د داخویانیەکێ دا ئەندامەکێ دەستەیا کارگێریا یانه‌یا زاخۆ یا وەرزشی بۆ رۆژنامه‌یا ئەڤرۆ دیار کر ئەو ژ ئەنجامێن تیما خوه‌ د خولا ستێرێن ئیراقێ دا رازی بوون و د ناڤەراستا ڤێ مەهێ دا دێ کەمپەکێ بۆ تیمێ دانن.
زێدەتر دلژار عەدنان گۆت: وەکو دەستەیا کارگێریا یانه‌یا زاخۆ یا وەرزشی ئەو ژ ئەنجامێن تیما خوە یا ته‌پا پێی د خولا ستێرێن ئیراقێ دا د رازی بوون، ژبەرکو ب دەستڤەئینانا رێزا شەشێ کێم نینە و پلانا مە ژی ئەو بوو ئەم وێ رێزێ ب دەستڤە بینن و هەتا نوکە هەڤبەستا پێشەکارەکێ و یاریزانەکێ ئیراقی و دگەل هاریکارێ راهێنەری و راهێنەری جەستەیی هاتینە هەلوەشاندن و ئەم یێ ل چارەسەریان دگەرین ژ بۆ وان جهێن مە کێماسی تێدا هەین و د رۆژێن بهێت ژی دا دێ هەڤبەستا هندەک یاریزانێن دیتر ژی هەلوەشینن، هێشتا دەمەک باش ل بەر دەستێ مە هەیە داکو ئاریشەیێن خوە چارەسەر بکەین و ئەم لەزێ د هندێ دا ناکەین و ئەم ب هێمنی کارێ خوە دکەین و هەتا ئەم یاریزانان پەیدا نەکەین ئەم دەستا ژ چو یاریزانان ژی بەرنادەین ب تایبەتی ئەو جهێن مە پێدڤی پێ هەیی د دەما یاریان دا.
ناڤبری گۆت: تیما مە دێ رێکەڤتی ٩/١/٢٠٢٤ یەکەیێن راهێنانێ ئەنجامدەن و دێ پێشەکارێن مە ژی رێکەڤتی ١٥/١ ڤەگەرنە زاخۆ و دەست ب یەکەیێن ڕاهێنانێ کەن.
هه‌روه‌سان دلژار عه‌دنان گۆت: دێ ل رێکەڤتی ١٥/١/٢٠٢٤ کەمپەکێ ڕاهێنانێ ل باژێرێ هەولێرێ ئەنجام دەین و پاشی ٢٦/١ دێ یاریا خوە یا ئێکێ ژ جاما ئیراقێ کەین و ئەم ب هێڤینە تیما مە د قوناغا دووێ دا باشتر ببت ژ رویێ ئاست و ئەنجامان ڤە.

بۆ ماوەیێ‌ سێ‌ رۆژان ل دووڤ ئێك لژنەیەكا تایبەت ژ رێڤەبەرییا گشتی یا وەرزشی سەر ب وەزارەتا رەوشەنبیری و هونەری و لاوان و وەرزش ل حوكمەتا هەرێما كوردستانێ‌ سەرەدانا هەمی یانەیێن ل سنۆرێ‌ پارێزگەها دهۆكێ‌ كربوون پێخەمەت وەرگرتنا هەموو داتا و پێزان و چالاكیێن وەرزێ‌ 2023ێ‌ یێن یانەیان و پشتبەست بۆ سالا 2024ێ‌ پێ بهێتە كرن.
جەمال سلێمان رێڤەبەرێ‌ وەرزشی ل پارێزگەها دهۆكێ‌ و ئێك ژ ئەندامێن لژنەیێ‌ بۆ رۆژنامەیا ئەڤرۆ گۆت: هەر ژ پێنج شەمبی بۆ شەمبییا بۆری لژنەكا تایبەت ژ رێڤەبەرییا گشتی یا وەرزشی ل هەرێمێ‌ سەرەدانا پارێزگەها دهۆكێ‌ كربوو و شیاین ب شێوەكێ‌ مەیدانی سەرەدانا هەمی یانەیێن وەرزشی ل پارێزگەها دهۆكێ‌ بدەن و هەمی ئەو پێزانێن كارگێری، دارایی، ژێرخانە و كاروچالاكیێن یانەیا وەرگرتن ژ بلی یانەیا شێلادزێ‌ نەبیت ئەوا ژبەر كاودانێن سەقایی و مژەیی بۆ دەمەكێ‌ دی هاتە پاشئێخستن و مەرەما سەرەكی ئەوە هەمی یانەیێن وەرزشی ل سەر ئاستێ‌ كوردستانێ‌.
هەروەسان ناڤهاتی گۆت: ل سەر ئاستێ‌ هەمی یانەیێن كوردستانێ‌ ئەڤ پێنگاڤە هاتییە هاڤێتن و مەرەما سەرەكی ئەوە پشتی وەرگرتنا هەمی پێزانی و داتایێن یانەیان دووڤدا ل سەر سیستەمەكێ‌ دادپەروەرانە پلە كرن بۆ بهێتە دانان كو بۆ 2024ێ‌ پشت بەستن ل سەر بهێتە كرن و ب گورەیی ئەوان داتا و پێزانێن هاتینە وەرگرتن ئەڤە ژی دێ‌ هەلسەنگاندنەكا گەلەك باش بیت بۆ هەمی یانەیێن وەرزشی بشێن ل دووڤ شیان و كارێ‌ خوە چالاكییان بكەن.
ل دووماهیێ‌ جەمال سلێمان گۆت: دەستخووەشییا لژنەیا رێڤەبەرییا گشتی دكەین كو ب شێوەكێ‌ رێكخستی و پلان كارێ‌ خوە ئەنجامدایی و هەروەسان سۆپاسییا هەمی یانەیێن پارێزگەهێ‌ و ئیدارا سەربەخوەیا زاخۆ دكەین كو دگەل مە هەڤكار و هاریكاربوون بۆ وەرگرتنا هەمی پێزانین و داتایان، ب هیڤییا وێ‌ یەكێ‌ سالا نوو ببیتە قۆناغەكا دی یا نوو ژبۆ پێشئێخستنا وەرزشا كوردستانێ‌ و پارێزگەها دهۆكێ‌.
بۆ زانین لژنەیا رێڤەبەرییا گشتی یا وەرزشی پێكهاتی بوون ژ د. ئەژی خەلیل سەرۆك شاند، رێژین كەریم و خالد وەلی و جەمال سلێمان ئەندامێن لژنەیێ‌ كو دماوەیێ‌ سێ‌ رۆژان دا سەرەدانا هەر ئێك ژ یانەیێن دهۆك، زاخۆ، سێمێل، گارە، باتیفا، شێخان، ئاكرێ‌، سەنحاریب، بەردەرەش، دینارتە، تەناهی، بجێل، ئامێدیێ‌، ئافرەتێن دهۆك، پۆلیتەكنیك، پیرس، میدیا یا خودانێن پێدڤیێن تایبەت و یانەیا فرۆكەڤانی كربوون.

قەیس وەیس:

ب دووماهی هاتنا یاریێن گەڕا 14ێ‌ ژ هەڤڕكیێن خولا پلا نایابا كوردستانێ‌ یا تەپا پێی، چو گوهۆڕینێن بەرچاڤ د ناڤ رێزبەندییا خولێ‌ دا پەیدا نەبووینە، سەرباری خوسارەتییا یانەیا ئاكرێ‌ لێ‌ سەرێ‌ لیستێ‌ پاراستییە و یانەیا دهۆك بەردەوامە ل سەر ئەنجامێن خوە یێن خراب و پاشڤەچوونێ‌ دا.
ل باژێرێ‌ پیرمام یا هەولێرا پایتەخت یانەیا ئارارات سەركەفتنێن ئاكرێ‌ راوەستاندن و ب سێ‌ گۆلان بەرانبەر دو گۆلان تووشی خوسارەتیێ‌ كر، د یارییەكا پری هەڤڕكی دا، ژلایێ‌ خوەڤە یانەیا دهۆك بەردەوامە ل سەر ئەنجامێن خوە یێن خراب و خوسارەتییا شەشێ‌ تۆماركر پشتی دگەل خودانێن ئەردی یانەیا شێروانە ب سێ‌ گۆلێن یاقژ تووشی خوسارەتیێ‌ بووی، ژلایێ‌ خوەڤە یانەیا زاخۆ د ناڤ ئەرد و جەماوەرێ‌ خوە دا شیا سەركەفتنەكا گرنگ ل سەر مێڤانا خوە رانیە ب گۆلەكێ‌ بێ‌ بەرانبەر بینت، ژ ئەنجامێن دی، برایەتی 1-1 هەولێر، چوارقۆرنە چنە-چنە دەربەندیخان، هندرین چنە-چنە سەید سادق، سیروانی نوو 1- چنە سۆران، شەقلاوە 3-2 پێشمەرگەیا هەولێر.
بڤان ئەنجامان هەلوەستێ‌ گشتی بڤی رەنگی یە، ئاكرێ‌ جهێ‌ خوە ل سەرێ‌ لیستێ‌ پاراست ب26 خالان، هەر ئێك ژ شێروانە، چوارقۆرتە و سیروانی نوو ب24 خالان رێزێن دویێ‌ هەتا چارێ‌ دهێن، پێشمەرگەیا هەولێر ب21 خال، دەربەندیخان ب20 خال، زاخۆ هەمان خالان، ئارارات 13خال، رانیە17 خال، هندرین 16 خال، هەولێر 15 خال، برایەتی هەمان خال، سۆران14 خالان رێزێن پێنجێ‌ هەتا 13 دهێن، ژلایێ‌ خوەڤە دهۆك پاشڤەچوو رێزا 14ێ‌ ب14 خالان، شەقلاوە و سەیدسادق هەر ئێك ب13 خالان رێزێن 15ێ‌ و دووماهیێ دهێن.

راپۆرتێن رۆژنامەڤانی ل ئۆرۆپا ئەوچەندە دیار كرییە كو ستێرێ‌ فرەنسی و یانەیا پاریس سانجێرمان كیلیان مباپی ئاماژە ب پاشەرۆژا گرێبەستا خوە دا كو ئێدی ئەو دشێت بڕیارا مان و نەمانا خوە دگەل یانەیێ‌ بدەت.
د دیدارا رۆژنامەیا سپۆرت یا ئسپانی دا مباپی دیاركرییە كو ئەو دۆبارە خەلەتییا وەرزێ‌ 2022ێ‌ دۆبارە ناكەت و ببیتە ئەگەر رەوشتێ‌ وەرزشی ژ دەست بدەت و گۆت: من چو بڕیار نە داینە و دەم یێ‌ ل بەردەستێ‌ من هەیی، وەرزێ‌ بۆری دەمەكێ‌ هەستیار من بۆراند لێ‌ نوكە بڕیارا د دەستێ‌ من دا و چو یانە نەشێن مەرجێن گران بدانن، هەتا حەفتییا ئێكێ‌ یا شۆباتا بهێت دێ‌ هزرێن خوە كەم و بڕیارا دووماهیێ‌ ئێكلاكەم.
بۆ زانین بوو ماوەیێ‌ پێنج سالە یانەیا ریال مەدرید یا ئسپانی بزاڤێ‌ دكەت كیلیان مباپی رازی بكەت ب گرێبەستێن بوها لێ‌ ب ئەگەرێن جودا نە گەهشتینە چو رێكەفتنان ژ وانا مەرجێن 120 ملیۆن یۆرۆ یا پاریسێ‌ سانجێرمانێ‌.
ژلایەكێ‌ دووڤە یانەیا پاریس سانجێرمان دووماهی دەلیڤە دایە مباپی بۆ دیاركرنا هەلوەستێ‌ خوە و ئێكلاكرنا بڕیارێ‌ و دیاركرییە ئەوان هزر د هەمی بۆچوونا دا كرییە و پێكگۆرەك ژی ل بەر دەست دانایە هەكە بڕیارا نە نووكرنا گرێبەستا خوە بدەت.

یاریزانا كازاخستانی ئیلینا ریباكینا ب ناسناڤێ‌ قارەمانییا بریزبن یا نێڤدەولەتی بۆ یارییا تێنسا ئەردی ب دەستڤە ئینا، پشتی ب سەركەفتی ل سەر هەڤڕكا خوە یا بیلارۆسیا ئارینا سابالینكا ب دو كۆما بێ‌ بەرانبەر، د هەڤڕكیێن واندا ئەوا ل باژێرێ‌ كۆینزەلاند یا ئوسترالییا هاتیە كرن.
ریباكینایێ‌ یا پلەدارا چارێ‌ د رێزبەندییا جیهانێ‌ دا شیا تۆلێن خوە یێن قارەمانییا بۆری ڤەكەت سەرباری بۆرینا چار دەمژمێر و 52 خولەك د ماوەیێ‌ یاریێ‌ دا هەتا شیایی ب دو كۆمان 6-چنە و 9-3 خالان دەستڤە بینت و خالێن خوە یێن جیهانی بگەهینە6366 رێزا چارێ‌، بەرانبەر دا سابالینكا ب9050 خالان رێ.ا دویێ‌ دهێت ئەوا یا پۆلەندی ئیگا شڤیۆنتینگ ب9505 سەرێ‌ لیستێ‌ دهێت