سێمێل، نەوزاد هلۆری:
ب ئامادەبوونا نوونەرێ سەرۆك بارزانی و جێگرێ بەرپرسێ مەكتەبا رێكخستنا پارتی ل دهۆكێ و نوونەرێ پارێزگارێ دهۆكێ، پێشوازی ل ڤەگەڕاندنا دو كچێن شەهید خالد كۆچەر ل سێمێلێ هاتە كرن، كو 45 سالە د بەرزەبوون ل سووریێ و هاتنە دیتن و ڤەگەڕاندن و ب مالباتا خوە شادبوون.
سەباح بەیتوللا،جێگیرێ بەرپرسێ مەكتەبا رێكخستنا پارتی ل دهۆكێ د كۆنگرەكێ رۆژنامەڤانی دا گۆت: “دلخوشین كو ئەڤڕۆ ل ڤێرە بەرهەڤبووین بۆ پێشوازیكرن ل دو كچێن قارەمان یێن شەهیدێ قارەمان خالد كۆچەر، كو ئەڤە 45 سالە چارەنڤیسێ وان نەدیاربوو، بێگومان ئەڤ یەكە نیشانە ل سەر قارەمانی و خەبات و قوربانیدانا وان بۆ بزاڤا رزگاریخوازیا كوردستانێ و نیشانە ل سەر هندێ ژی، كو رێما بەعس ب هەموو رێیا زۆلم و ستەم ل خێزانێن پێشمەرگەیان كریە، لەوا ئەم سەربلندین ب قارەمانیا ئەڤان هەردو كچان و خێزانا وان ب گشتی”.
مەسعود كۆچەر، برایێ وان هەردو كچان و كوڕێ شەهید خالد كۆچەری د وی كۆنگرێ رۆژنامەڤانی دا گۆت: “ئەم سوپاسیا بەرهەڤبوونا، عمران بارزانی، نوونەرێ سەرۆك بارزانی و جێگرێ بەرپرسێ رێكخستنا پارتی ل دهۆكێ و نوونەرێ پارێزگارێ دهۆكێ و كەسایەتیێن حزبی و حكومی دكەین، كو پێشوازی ل ڤەگەڕیانا هەردو خووشكێن مە كرین و پشتی چەندین نەخوشی و زۆلم و ستەمێ جارەكا دی ڤەگەڕیانە هەمبێزا خێزانا خوە”.
مەسعود كۆچەر زێدەتر گۆت: “بێگومان خێزانا مە ئێك بوویە ژ وان خێزانێن، كو زۆلم و ستەمەكا زۆر ل سەر دەستێ رژێما بەعس دیتیە، ل سالا 1979ێ رژێما بەعس دووڤچوون ل سەر بابێ من دكر، ژ بەكو بابێ من پێشمەرگەبوو، كار و خەبات بۆ بزاڤا رزگاریخوازیا كوردستانێ دكر، خوە نەدایە دەست رژێمێ، لەوا ل وی دەمی خێزانا مە كەفتە بەر زۆلم و ستەما وان و تەراوبەرا كرن، ژ هینگێ وەرە هەتا نوكە دو خووشكێن من بەرزەبووین، سوپاس بۆ خودێ پشتی چەندین سالان، ئەم شیاین هەردو خووشكێن خوە ب ساخی ببینین و ڤەگەڕینینە كوردستانێ و هەمبێزا خێزانا خوە، سوپاسیا هەر كەس و لایەنەكی دكەین، كو ل گەل مە هەڤكاربووین”.
نيشاندان