پشتەڤان و حەز ژێكەرێن چامپیۆنز لیگ یا فوتبۆلێ‌ چاڤەڕێ‌ چار یاریێن ئەڤ شەڤە نە ئەوێن بڕیارە ژ چارچووڤەیێ‌ قۆناغا پاشكۆ یا یاریێن هاتنێ‌ و دەربازبوون بۆ قۆناغا 16یا قارەمانییا یانەیێن ئۆرۆپا قارەمانێن خولا بهێنە كرن.
بایرن میۆنخ – سێلتیك
دەمژمێر 11ی شەڤ یاریگەها ئالیانز ئارینا دێ‌ یارییەكا ب هێز و ئاگرین دناڤبەرا خودانێن ئەردی یانەیا بایرن میۆنخ یا ئەلمانی و مێڤانا وێ‌ سێلتیك یا ئسكۆتلەندی، هەرچەندە د یارییا چوونێ‌ یا حەفتیا بۆری دا بایرن شیابوو ب دو گۆلان بەرانبەر گۆلەكێ‌ سەركەفتنێ‌ بینت لێ‌ دڤێ‌ یاریێ‌ دا ئەركێ‌ وێ‌ بزەحمەت بوویە سەرباری ئاست و شیانێن یاریزانێن یانەیا باڤاری باشترن ژ یا ئسكۆتلەندی ئەوا هیڤیێن دەربازبوونێ‌ بۆ قۆناغا 16ێ‌ بخوە هێلاینە، دیدارێن داناڤبەرا هەردو یانەیان دا بۆ بەرژەوەندییا بایرن میۆنخێ‌ بوویە ئەوا چار سەركەفتن و ئێك وەكهەڤی هەیە.
میلان- فاینۆرد رۆتردام
ژلایەكێ‌ دووڤە ل دەمژمێر 8:45 شەڤ یانەیا ئەی سی میلان یا ئیتالی دێ‌ ل یاریگەها خوە سان سیرۆ مێڤاندارییا یانەیا فاینۆرد رۆتردام یا هۆلەندی ب هیڤیێن سەركەفتنێ‌ زێدەتر ژ گۆلەكێ‌ ژبەركو د یارییا حەفتییا بۆری دا ب گۆلەكێ‌ تووشی خوسارەتیێ‌ بوو، یانەیا هۆلەندی ئێك ژ هەسپێن ڕەش د چامپیۆنزێ‌ دا هاتییە دیتن ئەوا شیایی د قۆناغا كۆمی دا سەركەفتنێن باش بینت ژوانا ل سەر بایرن میۆنخێ‌، سێ‌ دیدارێن پێشتر هەبووینە دو سەركەفتن بۆ فاینۆرد بوویە و ئێك بۆ میلانێ‌ بوویە.
مۆناكۆ – بەنفیكا
هەر ئەڤرۆ ل دەمژمێر 11ی شەڤێ‌ یانەیا مۆناكۆ یا فرەنسی دێ‌ بیتە مێڤانا یانەیا بەنفیكا یا پۆرتۆگالی د شەڕەكێ‌ دی یێ‌ دەربازبوونێ‌ دا، هەرچەندە د یارییا حەفتییا بۆری دا خودانێن ئەردی ل یاریگەها مۆناكۆ سەركەفتن ئینابوو ب گۆلەكێ‌ و هیڤیێن دەربازبوونێ‌ گەشتر كرینە لێ‌ ئەنجامێ‌ یارییا بۆری دەربازبوون مسۆگەر نەكرییە، هەرچەندە دیدارێن پێشتر د بەرژوەندییا وێ‌ دابوون ب چار سەركەفتنان بەرانبەر وەكهەڤییەكێ‌.
كلۆپ برۆچ- ئەتلانتا
ژلایێ‌ خوەڤە یانەیا كلۆپ برۆچ یا بەلجیكی گەشبینە ئەڤ شەڤە دەربازبوونا خوە مسۆگەر بكەت و پلێتا قۆناغا 16 وەربگریت دەمێ‌ ل دەمژمێر 11ی شەڤ دبیتە مێڤانا یانەیا ئەتلانتا یا ئیتالی ئەوا دێ‌ ب هەموو چەكێ‌ خوە شەڕی بۆ سەركەفتنێ‌ زێدەتری دو گۆلان كەت پێخەمەت دەربازبیت، د یارییا حەفتییا بۆری دا كو بوویە ئێكەم دیدارا دناڤبەرا وان دا تیما كلۆپ ب2-1 سەركەفتن ئینابوو.

د داخویانیەكێ‌ دا سەرپەرشتێ‌ تیما فوتبۆلا یانەیا دهۆك یا وەرزشی بۆ رۆژنامەیا ئەڤرۆ دیار كر هەموو پێڕابوونێن یاسایی ل سەر ڤەگۆهاستنا شێوازێ‌ پیشەكارییا یاریزان پیتەر گۆرگیس بۆ یاریزانێ‌ نافخوەیی ل دەڤ مە ب دووماهی هاتینە و بۆ فدراسیۆنا فوتبۆلا ئیراقێ‌ هاتینە هنارتن د نوكە دا تەپە د گۆرەپانا وان دایە.
زێدەتر جاسم محەمەد سلێمان گۆت: هەرچەندە ب شێوەكێ‌ گشتی ئەم دێ‌ شێن بێژین پیتەر گۆرگیس بوویە كەسەكێ‌ ئیراقی و هەتا دو حەفتیێن دی دبیت ناسناما ئیراقی وەربگریت، لێ‌ د یاسایا تەپا پێی دا ژلایێ‌ فدراسیۆنا فوتبۆلا ئیراقێ‌ و فیفا هێشتا یاریزانەكێ‌ پیشەكارە، لەوما ژی هێشتا كارۆبارێن وی ب زەحمەتن و دەمەكێ‌ درێژ بۆ دڤێت هەتا پێنگاڤێن دیتر بهێنە هاڤێژتن، ژبەركو پیتەر د تۆمارا فیفایێ‌ و ئیراقێ‌ یاریزانەكێ‌ پیشەكارە، لەوما ژی بلا جەماوەر ئەگەهدار بیت كو هێشتا نەبوویە یاریزانێ‌ نافخوە، هەكە د یاریێن بهێت دا وەكو یاریزانێ‌ نافخوە بهێتە دناڤ یاریگەهێ‌ دا یانەیێن هەین د خولا ئیراقێ‌ دا دێ‌ سكالایێ‌ ل سەر تیما مە تۆماركەن.
ژلایەكێ‌ دووڤە ناڤهاتی دیار كر كارگێرییا یانەیا و كادرێ‌ ڕاهێنانێ‌ هەموو بزاڤان دكەن بۆ چارەسەركرنا ڤێ‌ ئاریشێ‌ و سەرۆكێ‌ یانەیێ‌ د. عەبدوللا جەلال كاپتن خالد موشیر ل پایتەختێ‌ ئیراقێ‌ بەغدایە دگەل فدراسیۆنا فوتبۆلا ئیراقێ‌ ژبۆ رێكە چارەیەكێ‌، ژبەركو ئەڤ بابەتە ب سانەهی نینە وەكو پشتەڤانێن یانەیا دهۆكێ‌ وێ‌ هزر دكەن لێ‌ یا دشیانێن مە دا بیت دێ‌ هەموو بزاڤان كەین بۆ چارەسەركرنا ڤێ‌ ئاریشەیێ‌.
جاسم محەمەد حاجی ئەوچەندە ژی گۆت: وەكو كارگێری گەلەك بزاڤكرن پیتەر گۆرگیس ببیتە یاریزانێ‌ نافخوە، لێ‌ ژبەركو ڤەگۆهاستنێن هاڤینێ‌ و یێن زڤستانێ‌ هاتینە گرتن، هەرچەندە پیتەری پاسپۆرت بەری دو مەهان وەرگرتبوو ب ڕاسپاردا محەمەد شیاع ئەلسودانی سەرۆك وەزیرێن ئیراقێ‌ پێخەمەت پیتەر دگەل هەلبژارتیێ‌ ئیراقێ‌ كۆپا كەنداڤی دا بكەت، هەكە كۆپا كەنداڤی یا فەرمی و پەسەندكری بایە ل فیفایی د وی دەمی دا هەلبژارتیێن كەنداڤی هەبوون سكالایێ‌ تۆماربكەن، لێ‌ پشتی ب فەرمی بوویە خەلكێ‌ ئیراقێ‌ ئەم بزاڤێن چڕتر دكەین كو پیتەر ببیتە یاریزانێ‌ نافخوە، هەرتشتەكێ‌ پێدڤی مە بۆ فدراسیۆنا فوتبۆلا ئیراقێ‌ هنارتییە و تەپە كەڤتییە د گۆرەپانا واندا دڤێت ئەو پێنگاڤێن باشتر پاڤێژن، لێ‌ هەكە پیتەر گۆرگیس نە بیتە یاریزانێ‌ نافخوە ئەم ڕێكێ‌ نادەینێ‌ بۆ هەلبژارتیێ‌ ئیراقێ‌ یاریێ‌ بكەت، ژبەركو مافێ‌ مەیە و خودێ‌ ژی رازی نابیت دگەل هەلبژارتیێ‌ ئیراقێ‌ یاریزانێ‌ نافخوە بهێتە هژمارتن و دگەل مە ببیتە یاریزانێ‌ پیشەكار.
ژلایەكێ‌ دووڤە ناڤهاتی ئەو چەندە ژی دیار كر بۆ یارییا سوبەهی ژ چارچووڤەیێ‌ كۆپا كەنداڤی ئەو گەشبینن تیما وان دێ‌ ئاست و ئەنجامەكێ‌ دلخوەشكەر ئینیت و گۆت: هەرچەندە تیما مە دەربازبوویە قۆناغا چارگۆشەیا زێرین لێ‌ گەشبینن دلێ‌ جەماوەرێ‌ خوە خوەشبكەین لەوما ئەم و هەموو یاریزان چاڤەڕێ‌ هاتنا پشتەڤانێن یانەیێ‌ نە، ئەڤ یارییە دێ‌ بیتە دەلیڤەیەكا باشتر هەموو یاریزان ڤەگەڕینە دناڤ هەڤڕكیێن خولێ‌ دا پشتی خوسارەتییا نە چاڤەڕێ‌ كری بەرانبەر یانەیا ئەلقاسم ژ خولا ستێرێن ئیراقێ‌ و گەشبینن دێ‌ ب سەركەڤین.

شاهۆ فەرید:

یما فوتبۆلا یانەیا تەناهی هیڤیێن دەربازبوونێ‌ بۆ ئێك ژ پلێتێن دەربازبوونێ بەر ب خولا پلا نایابا ژ دەستداینە لێ‌ ل سەر ئاستێ‌ یاریزانێن خوە د ڕازینە و ڕژدن باشترین ئەنجامان د خولا پلا ئێكا كوردستانێ‌ دا بینن.
ل دۆر ڤێ‌ یەكێ‌ دارڤان خالد راهێنەرێ تیما یانەیا تەناهی بۆ رۆژنامەیا ئەڤرۆ گۆت: هەر دەستپێكێ‌ مە د زانی ئەركێ‌ مە بۆ دەربازبوونێ‌ ب سانەهی نابیت لێ‌ مە شەڕی دكر بۆ دەربازبوونێ‌ ژبەركو شیانێن مە یێن دارایی لێ‌ د نوكە دا ڕێزێن ناڤین داینە و هەموو بزاڤان كەین بەرنەدەین هەر ژ دەستپێكێ ئارمانجامە ئەڤە بۆ دگەل دەربازبوونێ بەرۆڤاژی شیانێن تیمێ ئەڤە بوون نەشیاین زێدەتر پێشكێشبكەین، ژلایێ‌ خوەڤە ئەز ژ ئاستێ تیمێ و یاریزانان گەلەكێ رازیی مە و شیاین ئەڤی ئاستی لسەر وان كاودانێن یانە تێدا دەبازبووی پێشكێشبكەت، ئەڤی وەرزی مە پتر خوە پێشئێخستیە و تیما مە هەموو گەنجن و خودان شیانن.
هەروەسان ناڤهاتی گۆت: پشت گەرمییا مە پتری ب كوریێن پارێزگەهێ‌ و باژێرێ دهوكێ یە نوت ژ سەدی پێكهاتێ مە یاریزانێن خۆمالی نە، چونكۆ یاریزانێ مە ژیێ بیانی كێمتر نینە بتنێ پالپشتی دڤێت دا ئاستێن بلند نیشانبدەت وەكۆ پێشەكاران، ئەم وەكو یانە پتر گرنگیێ ب كوڕێن پارێزگەهێ ددەین و پتر پێش دئێخین وان گەنجان پشكداریێ بكەین و هەڤركیێ بۆ ڕێزبەندێن دەستپێكێ بچین بڤان یاریزانان، هەكە چو ئاریشە نەهێنە درێیا مە دا بۆ هنگاڤتنا یان وەرگرتنا كارتا دێ هەڤڕكیا خوە بەردەوام بین، شیانێن یانەیێ سنورداركرینە و نەشێن زێدەتر بكەین، پلانا مە یا سەركەفتی بۆ هەر یاریەكێ‌ بوویە مە دەستپێكا وەرزیی جێبەجێكریی.

رەمەزان زەكەریا

د داخۆیانیەكێ دا پەیڤدارێ یانەیا ئاكرێ یا وەرزشی ئاشكرا كر ئەو بێ هیڤی نەبووینە ژ دەستڤەئینانا ناسناڤی خولا نایابا كوردستانێ یا فوتبۆلێ‌ چنكۆ سەرباری و بۆ یاریێن داهاتی دێ‌ شەڕی ل سەر دەستڤە ئینانا سێ‌ خالێن هەر یارییەكێ‌ كەن و ئەگەرێ‌ ئەنجامێن لاواز یین چەند یارییێن بۆری ڤەدگەرینە هنگاڤتنێن بەردەوام یێن یاریزانان.
زێدەتر سوهەیب عەلی بۆ رۆژنامەیا ئەڤرۆ گۆت: نوكە ئاستێ تیما یانەیا ئاكرێ یێ جێگیرە چۆ ئاریشێن وەسا نینە كو ببیتە ئەگەر ڕكابەریێ ل سەر ناساڤان نەكەت ژبەركو ئاستێ یانەیێ گەلەك یێ باشە نوكە و هەموو یاریزان بۆ ئێك مەرەم خوە ماندی دكەن ئەوژی باشترین شێوە ب ئاستەكێ‌ بلند بتنێ‌ هزار سەركەفتنان بكەن
ناڤبری گۆتژی : یاڕوونە هەر ل دەستپێكا خولێ هژمارەیەكا یاریزانێن یانەیا ئاكرێ تووشی هنگافتنێ بوون ئەڤە ژی ئەگەرێ سەرەكی بوو كو ئەنجامێن تیما مە د خولا كوردستانێ‌ نە دباش بوون تایبەت د قۆناغا ئێكێ دا،ب گشتی هەموو یێن كوردستانێ رەوشا ئابووری ئەگەرە ل ئەنجامێن نەباش یانەیا مە ژی رەوشا ئابووری یا باش نینە.
پەیڤدارێ یانەیا ئاكرێ گۆت: هەر ل دەستپێكا وەرزێ نوو یێ خولێ یانەیا ئاكرێ ڕكابەرە ل سەر ناسناڤێ خولا نایابا كوردستانێ و كۆپا كوردستانێ هەموو یانەیێن كوردستانێ حسابێ بۆ یانەیا ئاكرێ دكەن

عەلی حاجی:

د داخویانیەکێ دا سەرپەرشتێ تیما فوتبۆلا یانه‌یا زاخۆ ئه‌وا پشكدار د خولا ستێرێن ئیراقێ دا بۆ رۆژنامەیا ئەڤرۆ دیار کر وەرزێ ئەڤ سالە گەلەک یێ ب زەحمەتە و ئاگرینه‌ و هەموو تیمێن دەستپێکێ دشێن خولێ ببەن، لێ ئه‌م ژی دێ بزاڤێ كه‌ین و ئارمانجا مه‌یه‌ پاراستنا سه‌رێ لیستێ.
زێدەتر حەمید ئیسماعیل گۆت: وەرزێ ئەڤ سالە یێ خولا ستێرێن ئیراقێ ئێک ژ زەحمەترین وەرزێ سالێ یە د دیرۆكا فوتبۆلا ئیراقێ دا ژبەرکو پشتی بۆرینا 20 یارییان هەتا رێزا هەشتێ د خولێ دا خالێن رێزبه‌ندیێ نێزیکی ئێکن و هەڤرکیێ ل سەر دەستڤەئینانا ناسناڤی دکەن بەروڤاژی وەرزێن پێشتر بتنێ چەند یانەیەکان هەڤڕکی دکرن، ئەڤ چەندە دێ بیتە ئەگەرەکێ سەرەکی خولا ستێرێن ئیراقێ بەر ب پێشڤە بچیت، وەکو یانەیا زاخۆ ژی دێ هەتا دووماهی چرکە شەری ل سەر ب دەست ڤەئینانا خولێ کەین ژبەرکو هەمی مەرجێن ب دەست ڤەئینانا ناسناڤی ل دەف تیما مە هەنە.
ناڤبری گۆت ژی: تیما مە ژ تیمێن گەلەک ب زەحمەتە و ئەم خودان سەرێ لیستا خولێ نە و دڤێت ئەم وێ رێزبەندیێ پارێزین و ژ دەست نەدەین هەتا خول ب دووماهی دهێت.
ل دووماهیێ گۆت ژی: هەمو یاریزان هەست ب بەرپرسیارەتیێ دکەن و هەمی یاریزان هەڤرکیێ دکەن ژ بۆ ب دەست ڤە ئینانا جهەکێ دناڤ پێکهاتەیێ سەرەکی دا و ئەڤە ژی دێ پتر روحیەتێ دناڤ تیما مە دا پەیدا کەت.

ستێرێ‌ ئەمریكی و یانەیا لوس ئەنجلۆس لیكەرز لیبرۆن جێمس بەردەوامە ل سەر تۆماركرنا ڕیكۆردێن نوو د خولا باسكێت بۆلا ئەمریكا دا یا NBA و شیایە ب گەهینتە ڕیكۆردا چیڤانۆكێ‌ ناڤدار مایكل جوردانی.
ل دووڤ ئامارێن ئاژانسا باسكێت یا ئەمریكی لیبرۆنی شیا د ژیێ‌ 40 سالی دا د ئێك یاری 42 خالان تۆماربكەت و تیما خوە بەر ب سەركەفتنێ‌ بر، هەروەسان بوو ئێكەم یاریزان شیا حەفت هێرشێن هەڤدژ خالان تۆماربكەن و هەشت ئەسێست و چار شۆتێن سێیانی بینت ئەڤ هژمارە ئێكانیە د ئێك یاری دا دهێنە تۆماركرن، دیسان وەكو ئێك ژ یاریزانێن مەزن شیایە د 14 یارییان دا تیما خوە بێ‌ خوسارەتی بەر ب سەركەفتنان ببەت و خەلاتێ‌ باشترینێ‌ سالێ‌ ب دەستڤە بینت.