بێوار حەمدی:

جڤاکێ کوردی ژ وان جڤاکانە یێن کو گەلەک گرنگیێ ب پەیوەندیا هەڤالینیێ د خێزانێ دا ددەت، بەلێ هەکە بەراوردیا نوکە دگەل سەردەمێ بوری بکەین د نوکە دا هەڤالینیا دناڤبەرا ئەندامێن خێزانێ دا سار و لاواز بویە، ئەو ژی ژبەر ئالوزیا ژیانێ و گەلەک بکارئینانا تورێن جڤاکی، لێ خێزانا سەرکەفتی و رەوشەنبیر ئەوە یا کو پەیوەندیێن هەڤالینیێ دناڤدا هەبن.

زێرەڤان ئەمین، ماموستایێ زانکۆیێ و تایبەتمەندێ ئاشتی و مافێ مرۆڤی د دیدارەکێ دا بۆ رۆژناما ئەڤرۆ دیار کر، ئێک ژ گرنگترین و سەرەکیترین پەیوەندیێن مرۆڤی وەکو تاکەکەس پەیوەندیێن هەڤالینی و خێزانێ نە، ژبەرکو دبنە ژێدەرێن گرنگ یێن هێزێ، زانینێ، ئەزمونا، فێربونێ و گۆت: (ب ڕێڤەبرنا ژیانێ ل سەر گەلەک جورێن پەیوەندیان د راوستیت ژ وانژی ئەو جورێن کو مرۆڤ تێدا فێری زمانی و دانوستاندنێ و رێزگرتنێ دبیت و مرۆڤ مفای ژ ڤان پەیوەندیان دبینیت دەمێ بازنێ پەیوەندیێن وی بەرفرەهتر لێ دهێت).
ماموستایێ زانکۆیێ دیار کر ژی، جڤاکێ کوردی ژ وان جڤاکانە یێن کو گەلەک گرنگیێ ب پەیوەندیا هەڤالینیێ دناڤ خێزانێ دا ددەت و گۆت: (بەلێ هەکە بەراوردیا نوکە دگەل سەردەمێن کەڤن بکەین د نوکەدا پەیوەندیێن هەڤالینیا خێزانێ سار و لاواز بوینە، ئەو ژی ژبەر ئالوزیا ژیانێ و گەلەک بکارئینانا تورێن جڤاکی ب هەموو پلاتفورمێن وێڤە).
دەرونناس، نورمان عەلی سەبارەت هەمان بابەت دیار کر، خێزانا سەرکەفتی و رەوشەنبیر ئەوە یا کو پەیوەندیێن هەڤالینیێ دناڤدا هەبن، ژبەرکو هەڤالینی دبیتە ئەگەرێ نێزیکبونێ و ڤیانێ دناڤبەرا ئەندامێن خێزانێ دا و گۆت: (ئەڤ پەیوەندیە دەروونێ مرۆڤی ئارام دکەت و تاک دشێت بساناهی ئاریشەیێن خۆ ژی چارەسەر بکەت) .
دەرونناسێ دا زانین ژی، هەردەمێ تاکی پەیوەندیێن هەڤالینیێ دگەل خێزانا خۆ نەبن ل وی دەمی بێگومان دێ دەروونێ وی ب بچووکترین ئاریشە تێک چیت و دێ پەنایێ بەتە ژ دەرڤەی خێزانێ بۆ چارەسەریا ئاریشا خۆ، ئەڤە ژی ژ ئەگەرێ ڤالاتیا دناڤ خێزانێ دا دروست دبیت.
سەربەست ئیسماعیل، ماموستایێ زانکۆیێ، دیار کر، د بەرێدا پەیوەندیێن هەڤالینی گەلەک کێمتر بون ژ نوکە، ژبەرکو دایکێ هەموو زەحمەتا خێزانێ و زارۆکی ب ستویێ خۆڤە دگرت و هەژاری و نەداری بو و خێزانەکا تژی ژ ڤیانێ و هەڤالینیێ نەبو و گۆت: (لەوما دایکێ پتر ڕولێ بخودانکرنێ وەردگرت ژ رولێ پەروەردەکرنا زارۆکی ئەڤە ژی دبۆ ئەگەر کو پەیوەندیێن هەڤالینی دلاواز بن).
میدیاکار ڕێژین عەبدولرەحمان دیار کر کو هەڤالینی پەیوەندییەکا گەلەک گرنگە د ژیانێ دا، بتایبەت هەکە دناڤ خێزانێ دا بیت دێ گرنگیەکا باشتر هەبیت و دێ هەبونا ئاریشەیان ژی کێمتر بیت و گۆت: (گەلەک گرنگە د خێزانێ دا خووشک و بڕایان پەیوەندیا هەڤالینی هەبیت، چونکی هەکە خووشک و برا وەکو هەڤال بن دێ بنە هاریکار و هەلگرێن خەم و ئاریشەیێن ئێکودو، و ئاریشان دناڤبەرا خودا چارەسەر کەن، ژبەرکۆ دبیت هندەک حالەت هەبن شەرم ژدایک و بابێن خۆ بکەن).

هه‌ولێر، قائید میرۆ:

ل گوره‌ی ڤه‌كۆلینه‌كێ د ده‌مێ شه‌ش سال و شه‌ش هه‌یڤاندا 549 ئافره‌تان ل هه‌رێما كوردستانێ خۆ كوشتیه،‌ ڤه‌كۆله‌ره‌كا جڤاکی ژی دا زانین کو ل سه‌رده‌مێ كۆرۆنایێ خۆ كوشتن كێمتر بوو و گۆت: راگه‌هاندنێ رۆله‌كێ خراب هه‌یه‌ بۆ هاندانا وه‌لاتیان و به‌لاڤكرنا توندوتیژیێ.

بهار ره‌فیق، ڤەکۆلەرا جڤاکی بۆ رۆژناما ئه‌ڤرۆ گۆت: (مە ڤه‌كۆلینه‌ك لدۆر خۆ كوشتنا ژنان كریه‌، ل سالا 2017ێ مه‌ وه‌رگرتیه‌ هه‌تا شه‌ش هه‌یڤێن ئێكێ یێن سالا 2023ێ، ل گوره‌ی ئامارێن نۆشداریا داد‌ و ئامارێن وه‌زاره‌تێن ناڤخۆ و ساخله‌میێ د ده‌مێ شه‌ش سالاندا 549 ئافره‌تان خۆ كوشتیه‌).
بهارێ گۆتژی: (ته‌مه‌نێ دوازده‌ سالی تێدا هه‌یه‌ هه‌تا ته‌مه‌نێ مه‌زن و هه‌موو ته‌خ ژی دناڤ قوربانیاندا هه‌نه‌، هه‌ر ده‌زگه‌هه‌كی ئاماره‌ك هه‌یه‌، به‌لێ بۆ مه‌ ئامار یا گرنگ نینه‌، چونكه‌ ئه‌م دزانین هژماره‌كا زێده‌تر‌ خۆ كوشتیه‌، لێ نه‌هاتینه‌ به‌لاڤكرن و نه‌چووینه‌ نۆشداریا داد).
ڤەکۆلەرا جڤاکی زێدەتر گۆت: (یا گرنگ بۆ مه‌ ئه‌گه‌رێن خۆ كوشتنا ئافره‌تێ نه‌، ئەگەر زۆرن لێ ئه‌ڤا بۆ مه‌ دیار بووی پتر ژبەر ئەگەرێن خێزانی و جڤاکی خۆکۆشینە، هه‌تا بو مه‌ دیار بوویه‌ ئه‌گه‌رێن ئابوری هۆكارن بۆ خۆكوشتنێ، نموونێن زۆر هه‌نه خۆكوشتن دناڤ ته‌خا بێكاراندا یا زۆره‌، ئه‌ڤێن ژن بسه‌ر هاتی‌ دناڤدا هه‌نه‌، قوتابی هه‌نه‌ کەسێن سیاسی هه‌نه‌).
بهارێ د بەردەوامیا ئاخفتنێن خۆدا گۆت: (ژبۆ رێگریێ ل خۆ كوشتنا ئافره‌تێ، مە دنیایه‌كا راسپارده‌ و ده‌رئه‌نجامان به‌رهه‌ڤکرینە، به‌لێ پێدڤیه‌ كومه‌كا ده‌زگه‌هان تێدا پشكدار ببن، چونكه‌ بابه‌تێ توندوتیژیێ تنێ گرێدایی ئێك ده‌زگه‌هی نینه‌، پێدڤیه‌ مامۆستایێن ئایینی رۆل هه‌بیت د هشیاركرنا جڤاکی دا و كێمكرنا دیاردا توندوتیژیێ، هه‌روه‌سا په‌روه‌ردێ رۆل د په‌روه‌رده‌كرنا تاكی دا هه‌بیت).
بهار ره‌فیق، ڤەکۆلەرا جڤاکی ئەو چەندە ژی ئاشکرا کر و گۆت: (مه‌ سه‌ره‌دانا هه‌موو ئایینان كریه‌ و ل گوره‌ی هه‌موو ئایینان خۆكوشتن حه‌رامه‌ و تاوانەک مەزنە د دەرحەقێ روحا خۆ دا دکەت، مخابن ده‌زگه‌هێن راگه‌هاندنێ رۆله‌كێ خراب هه‌یه‌ بۆ هاندانا وه‌لاتیان، چونكه‌ زۆر بابه‌ت دهێنه‌ به‌لاڤكرن دبنه‌ ئه‌گه‌رێ هاندانا وه‌لاتیان بۆ توندوتیژیێ).