قەیس وەیس:
هەر سێ یانەیێن كوردستانی دهۆك، زاخۆ و هەولێر نە شیان سەركەفتنێ د یاریێن گەڕا 20ێ دا بینن، پشتی ب خوسارەتی و وەكهەڤی ئەنجامێن وان ب دووماهی هاتن، د چارچووڤەیێ خولا ستێرێن ئیراقێ یا فوتبۆلێ ئەوا ل یاریگەهێن جودا ل ئەینییا بۆری هاتینە كرن.
ئەلقاسم سەركەفتنێن دهۆكێ ڕاوەستاندن
حەفتیەكا خەمگین بۆ پشتەڤانێن دهۆكێ پشتی حەفت سەركەفتن و ئێك وەكهەڤی تیما یانەیا دهۆك د ڤێ حەفتیێ دا تووشی خوسارەتیێ بوو بەرانبەر یانەیا ئەلقاسم ب دو گۆلان بەرانبەر گۆلەكێ، د یارییا واندا ئەوا ل ئەینییا بۆری یاریگەها ئەلفەیحا ل باژێرێ بەسرا هاتییە كرن، تیما ئەلقاسم یا پێشكەفتی بوو هەتا خولەكا 74ێ، پشتی بۆرینا خولەكەكێ پیتەر گۆرگیس د لێدانا پەنەلتیێ شیا جوداهیێ كێم بكەت و گۆلا ئێكێ بینت لێ یاری ب سەركەفتنا ئەلقاسم ب دووماهی هات.
دهۆكێ دەلیڤەیا پێشڤەچوونێ ژ دەستدا
ئەنجامێ خوسارەتیێ دەلیڤەیا پێشڤەچوونا ئەلهۆیێن چیا بۆ رێزێن باشتر ژ دەستدا ئەوا خالێن وێ ماینە 34 خال، ژ 10 سەركەفتن، چار وەكهەڤی و پێنج خوسارەتی هەنە بشێوەیێ بەروەخت ل رێزا چارێ دهێت، ژبەركو هێشتا یارییەكا چاڤەڕێ كری مایە بەرانبەر یانەیا ئەلتەلەبە.
مەسعۆد مبرال: ژ ئاستێ یاریزانێن خوە د رازی نەبووم
د پرێس كۆنفرانسێ پشتی یاریێ دا مەسعۆد میرال ڕاهێنەرێ یانەیا دهۆكێ گۆت: د نیڤا ئێكێ دا تیما مە یا باش نەبوون و یاریزانان ئەوا من ژێ دڤیایی و پلان بۆ دانایی پێشكێش نەكر ژ ئاستێ وان وان ڕازی نینم، سەرباری هەبوونا هندەك بزاڤێن كیم كو نە بوونە مەترسی ل سەر گۆلا ئەلقاسم، هەرچەندە د نیڤا دویێ دا مە هندەك گوهۆڕین كرن لێ بێ مفا بوو و تیما مێڤان شیان گۆلا ئێكی تۆماربكەن، مە بزاڤكر ڤەگەڕینە دناڤ یاریێ دا لێ گۆلەكا دی ژی ل سەر مە هاتە كرن، ڕەفتارێن هندەك یاریزانان دناڤ یاریگەهێ دا نە یا دروست بوو كو ئێك ژ ئەگەرێن سەرەكی یێ خوسارەتیێ بوون، دێ بزاڤێ كەین یارییا بهێت قەرەبووبكەن و پیرۆزباهیێ ل یانەیا ئەلقاسم دكەین بۆ ڤێ سەركەفتنێ.
26 گۆل هاتینە تۆماركرن
تیما دهۆكێ خوانا دەهـ یاریزانێن پشكداری د تۆماركرنا 26 گۆلان دا هەیە بڤی ڕەنگی، پاشەنگ عەبدوللا شەش گۆل، پیتەر گۆرگیس شەش گۆل، كەریم دەرویش سێ گۆل، هەر ئێك ژ و شەرقی ئەلبەحری و مارلۆن دۆسانتۆس دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، كێلبرت كۆمسۆن، سیابەند عەگید، ئیبراهیم غازی و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
كلاسیكۆیەكا ئاگرین ب كارتێن سۆر و زەر بێ گۆل ب دووماهی هات
هەر ل رۆژا ئەینییا بۆری ل یاریگەها شەهید فرانسۆ حەریری یانەیا هەلێر مێڤاندارییا یانەیا زاخۆ كر د كلاسیكۆیا كوردستانێ دا ئەوا ب كارتێن سۆر و زەر بێ گۆل ب دووماهی هاتی، دڤێ یاریێ دا جەماوەرەكێ ئێكجار زوور ژ باژێرێ زاخۆ بەر ب هەولێرا پایتەخت چۆبوون ژبۆ پشتەڤانییا تیما خوە، هەرچەندە یارییەكا ب هێز و كۆمەكا ژ دەستدانا دەلیڤا بوو، لێ دادڤانێ یاریێ محەمەد تارق هەشت كارتێن زەر و دو یێن سۆر بەرانبەر یاریزانان بلندكرن، هەردو یاریزانێن زاخۆ محەمەد عەلی عەبۆد و دیبیۆتی ئیچێتا ب كارتێن سۆر دوورئێخستن.
زاخۆ جهێ خوە ل سەرێ لیستێ پاراست
سەرباری ئەڤێ ئەنجامێ لێ یانەیا زاخۆ ب شێوەیێ بەروەخت مانا خوە ل سەرێ لیستا خولێ پاراست ب كۆمكرما 39 خالان ژ 11 سەركەفتن، شەشی وەكهەڤی، سێ خوسارەتی هەنە لێ ئەڤی ئەنجامی دەلیڤەیا دووركەفتن ژ هەڤڕكا خوە شورتە و زەورا، ژلایێ خوەڤە یانەیا هەولێر پێشڤە هاتە رێزا هەشتێ ب كۆمكرنا 29 خالان ژ هەشت سەركەفتن، پێنج وەكهەڤی و حەفت خوسارەتییان.
چو گوهۆڕین د لیستا گۆلكەران دا پەیدا نەكر
ب دووماهی هاتنا گەڕا قۆناغا ئێكێ ستێرێ یانەیا زاخۆ یێ بەرازیلی گۆستاڤۆ هێنریك ل سەرێ لیستا گۆلكەرێن خولا ئیراقێ دهێت ب تۆماركرنا 14 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 10 گۆلان رێزا دویێ ل سەر لیستا گۆلكەرێن تیما زاخۆ دهێت، ناسر محەمەدو چار گۆل، ئەحمەد یاسین دو گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ و دیبیۆتی ئۆگۆنا هەر ئێك گۆلەك تۆماركرینە كو سەرجەمێ گۆلێن زاخۆ بووینە 30 گۆل د خولێ دا.
تەلال ئەلبلۆشی: ب16 خولەكان مە ب نەهـ یاریزانان كر و دادڤان جهێ پرسێ یە
د پرێس كۆنفرانس دا تەلال ئەلبلۆشی ڕاهێنەرێ تیما یانەیا زاخۆ گۆت: سۆپاسیا هەموو یاریزانێن خوە دكەت ژبەركو ئاستەكێ مەزن نیشان دا و هەروەسان هاتنا جەماوەرێ بۆ ناڤ یاریگەهێ و پشتەڤانییا تیمێ جهێ دەستخوەشیێ یە، یاریزانێن مە مافێ دێربیێ دایێ ب پێشكێشكرنا باشترین ئاست تایبەت د نیڤا دویێ دا مە گڤاشتنەكا ئێكجار مەزن ل سەر خودانێن ئەردی كربوو، ئەز بەحسی دادڤانێ یاریێ ناكەم ئەو جهێ پرسێ یە، لێ ل دووڤ بڕیارا فدراسیۆنا فوتبۆلا ئیراقێ یێ هاتییە ڕاوەستاندن و هەر ئێكسەر پشتی ڕاوەستاندنێ یارییەكا مەزن و دێربیەك بڕێڤەبر، مە یاری ب نەهـ یاریزانان كر د ماوەیێ 16 خولەكان دا، لەوما ژی خالەك دناڤ ئەردێ هەولێرێ و ب نەهـ یاریزانان بكەیی نە خارابە.
راهێنەرێ هەولێرێ: یاریزانان د ئاستەكێ بلند دابوون وەكهەڤی سرۆشتی بوو
ژلایێ خوەڤە حسێن مورشد ڕاهێنەرێ یانەیا هەولێرێ پەسنا ئاستێ یاریزانێن خوە كر و گۆت: مە یارییەكا گەلەك باش دكر و هەموو یاریزان د ئاستەكێ بلند دابوون، لێ ئەڤە تەپا پێی یە و وەكهەڤی سرۆشتی بوو، یاریزانێن مە هەموو بزاڤ كرن بۆ تۆماركرنا گۆلێ، سەرباری ب كارتا سۆر یا دو یاریزانێن زاخۆ لێ یاری د بەرژوەندییا زاخۆ دا بڕێڤە چوو نە د بەرژەوەندیا مەدا، هەردەم دێربیێ هوسا ب هێز پێشبینییا هەر تشتەكی دهێتە كرن.
یارییا دهۆكێ هاتە پاشئێخستن
ل دووڤ لیستا گەڕا 21ێ یا خولا ستێرێن ئیراقێ یا فوتبۆلێ بڕیار هاتیە دان یارییا دهۆكێ بەرانبەر شورتە بۆ دەمەكی دی بهێتە پاشئێخستن ئەوا دهاتە چاڤەڕێ كرن سێ شەمبییا بهێت یاریگەها دهۆكێ مێڤانداركربا، لێ ژبەر پشكدارییا دهۆكێ د قارەمانییا كۆپا كەنداڤی دا ئەوا بڕیارە یارییا خوە ل 18ێ ڤێ مەهێ مێڤاندارییا یانەیا زەفار یا عومانی بكەت ژ چارچووڤەیێ گەڕا شەشێ و دووماهیێ ژ كۆما ئێكێ، هەرچەندە ئەنجامێ ڤێ یاریێ چو كارتیكرنێ ل سەر رێزبەندییا دهۆكێ ناكەت ئەوا وەكو تیما دویێ دەربازبوونا خوە بۆ چارگۆشەیا زێرین مسۆگەر كر و بڕیارە یارییا خوە ل پێنجێ مەها بهێت بەر ب وەلاتێ سعۆدیێ بچیت و یاریێ بەرانبەر یانەیا ئیتفاق بكەت.
كوڕێن خابووری دێ یارییەكا گرنگ ئەنجامدەت
ژلایێ خوەڤە بڕیارە تیما یانەیا زاخۆ ل یاریگەها خوە و دناڤ جەماوەرێ خوە دا یانەیا تەلەبە یا بەغدایی مێڤان بكەت كو دهێتە هژمارتن ئێك ژ یاریێن گرنگ بۆ كوڕێن خابووری و دێ بزاڤێن پاراستنا سەرێ لیستێ كەت.
نيشاندان