د ناڤ جیهانا وەرزشی دا ب تایبەت ژیێ پری مژار و نە سەقامگیر یێ یانەیا دهۆکێ دا، کێم جار نەبن ئەو کەسێن کو د ناڤ یانەیێ دا دەمەکێ درێژ بۆ سەرکەفتنێ کار دکەن، پشتی ژ دەستپێکا کارێ خۆ دووردکەڤن، د ڕەوشێن دژوار دا زڤڕن و پشتەڤانیا خۆ نیشانبدەن، لێ کاپتن سلیمان رەمەزان ناڤەکی جودایە، ئەو نە بتنێ وەرزشڤانەک ڤەقەتیایە، بەلکو دڵسۆزەکێ ڕاستەقینەیە کو چو جاران پشتا خۆ نە دایە یانەیا دهوک، هەر دەمێ دهۆک پێدڤی ب دەستەکێ بێ ‌مەرج و دڵسۆز بیت، دێ بینی کاپتن سلیمان یێ حازر و ئامادەباشیێ دایە، بێی کو چو جاران چاڤەڕێ بەرژەوەندی یان پلاڤانکریەکێ بیت.
سلیمان رەمەزان کورەکێ ژدایکبوویێ باژێرێ خوشتڤییێ دهۆکێ یە، خودان کەسایەتیەکا مەزن و ڕێزدارە، دیرۆکا وی د ناڤ وەرزشا ڤی باژێری دا پرە ژ سەرکەفتن و پێگەهاندنا ستێران، هەر دەمەکێ یانەیا دهۆکێ تووشی قەیرانەکێ دبیت، راهێنەرەک ژ کار دکەڤیت یان دهێتە دوورکرن، ڤالاهیەکا مەزن د ناڤ ئیدارە و ڕێزبەندییا یاریزانان دا دروست دبیت، ل ڤێ خاڵا هەستیار و بەرتەنگ دا، ناڤێ کاپتن سلیمان رەمەزان وەکو تابلۆیەکا هیڤی و گەش دگەهشیت، ئەو ب بێ‌ دو‌دلی دەستبکار دبیت، دێ هێتە پێش و سەرپەرشتیا راهێنان و ڕێڤەبرنا تیمێ کەت، هەتاکو رەوش ئارام دبیت و کەشتییا یانەیێ دگەهینتە پەناگەهەکا سەلامەت.
ئەڤ خەمخۆری و لەزبوونا وی یا مرۆڤایەتی بۆ خزمەتکرنا یانەیا دهۆکێ، نە تنێ ئەرکەکێ پیشەگەرییە، بەلکو پێخۆشڤینەکا کوور و خۆنە ویستانەیا وییە بۆ ئاخا دهۆکێ و پشتەڤانێ وێ یێ مەزن، پشتەڤانێ دهۆکێ هەمی ب چاڤەکێ پیرۆز و ڕێزدار سەحدکەنە ڤی کەسی، ژبەركو ئەنترۆل و پێگەیێ وی نە تنێ ل سەر هێلا تیمێ یە، بەلکو د ناڤ دەررون و هەستێن هەمی پشتەڤانێن تیمێ دا، دەمێ ڕەفتارێن وی دبینی، دێ بینی دلسوزیەکا کویر بو باژێرێ خو یا هەیی.
د مێژووا یانەیا دهۆکێ دا، گەلەک کەس هاتن و چوون، لێ کەسێن وەکی کاپتن سلیمان رەمەزانی ل بیردانک و هەستێن وەرزشڤانێن کورد پەیوەندیەکا بهێز دروستکریە، ئەو نە تنێ راهێنەر یان سەرپەرشتەکە، بەلکو سیمبولەکێ نەشکەستی یە ژ بۆ خۆڕاگریێ، هاریکاریێ و پێگەیاندنا سەربەرزانە، دهۆک شانازیێ ب کوڕەکێ وەکی وی دکەت، کاپتن سلیمان ب هەڵوێستێن خۆ یێن مێرخاسانە هەمیشە وەکۆ ستوونەکا بهێز ل پشت یانا باژێرێ خۆ دێ مینیت، داكو ئاڵایێ دهۆکێ ب بلند و شانازی ل سەر هەمی دایک و باوکان و وەرزشڤانان بهێتە دیتن.

ئێک ژ وان دیاردەیێن سەیر و سەرنجراکێش د ناڤ مەیدانا وەرزشی دا، هەلوەستێ هندەک جەماوەرانە بەرامبەر کوڕێ یانەیێ و باژێڕێ خوە تایبەت دەمێ شاشییەکێ د ناڤا یاریگەهێ دا بکەت، د دەمەکی دا یاریزانێ بیانی یان یێ دەرڤە هەکە شاشیا ژی بکەت چاڤپۆشی ژ وێ کێماسیێن دهێتە کرن بۆ دهێتەدان، لێ دەمێ لاوەکێ مە یێ نافخۆ شاشییا تەکتیکی یان تەکنیکی بکەت، سزایێ جەماوەری و گڤاشتنا دەروونی لسەر پەیدا دکەت ل جهێ پشتەڤانیێ گازندە و رەخنەیێن توند ئاراستەی وی دهێنە کرن.
پێدڤییە جەماوەرێ وەرزشی ب تایبەت یێ یانەیا دهۆکێ پرسیارەکا ڕژدی ژ خۆ بکەت، مانە ئەڤ لاوە بەرهەمێ ڤی باژێڕی یە! ب دلسۆزیەکا بێ بەرامبەر ژ ناخێ دل بۆ درێسێ تیمێ شەرێ دکەت؟ دیرۆک باشترین دیدەڤانا ڤێ راستییێ یە، دیرۆکا زێرینا یانەیا دهۆکێ نە ب پارەیێن دەمکی بوویە، بەلکو ب رەنج و خوونا کوڕێن وێ هاتە نڤیسین، کێ ژ مە ناڤ و ئاستێ ئەفسانەیێن وەکۆ بژار ئیسماعیل، جاسم محەمەدسلێمان، جاسم محەمەد حاجی، ئاماد ئیسماعیل، محەمەد یوسف ژ بیر کریە؟ ئەڤە ئەو ناڤ بوون کو د سەردەمێن دژوار دا دلسۆزانە مانە د ناڤ ڕێزێن تیمێ دا و دیرۆکەکا پڕ ژ شانازی بۆ پارێزگەهێ و یانێ تۆمار کرن بێی کو چاڤێ وان ل چو بەرژەوەندیێن دی بیت.
یاریزانێ بیانی ئەڤرۆ ل گەل تەیە و سوبەهی ل گەل دانا پارەی دێ چیتە یانەیەکا دی، بەلێ کورێ یانەیێ ئەو سەرمایێ بنەڕەتی و مانگرتییە کو هەردەم شانازیێ ب باژێڕێ خۆ دکەت، هەر وەرزشڤانەکێ مەزن د ژیانا خۆ دا تووشی شکەستن و شاشیان بوویە، شاشی پشکەکە ژ پێگەهشتنێ و دروستبوونا ستێرانە، دەمێ ئەم ل سەر ئێک ئیرادە و مۆڕالا وی دشکێنین، ئەم تنێ یاریزانەکی ژ دەست نادەین، بەلکو باوەریێ ل دەف تەڤایا گەنجێن ئومێدەوار دکوژین، پشتەڤانیکرن ل رۆژێن تەنگاڤیێ پیڤەرێ راستەقینە یێ وەفاداریێ یە، ئەرکێ هەمیانە ژینگەهەکا ئارام و پڕی هاندانە بۆ کورێن باژێڕی چێکەن داکو نەوەکێ نوو یێ قارەمانان دروست ببیت.

ئۆلتراسا دهۆکێ هەمی دەمان ل سەر مەشقێن دلسۆزیێ نە و دەنگێ وان یێ بلندە کو گیانێ سەرکەفتنێ ددەتە یاریزانان د ناڤ یاریگەهێ دا، پەیاما من نە ڕەخنەیە ژ بێهێزیێ، بەلکو پێشنیارەکا برایانەیە پێخەمەت بلندترکرنا ناڤ و هەیبەتا ئۆلتراسا مە د ناڤ ئیراق و کوردستانێ دا.
ستران و هوتافاتێن تایبەت ب یاریزانان: دەمێ سترانەک یان سروودەکا تایبەت ب ناڤێ ستێرێن تیمێ دهێتە گوتن، هەستێ گرێدان و غیرەتێ ل دەف وان دەهـ جاران زێدەتر دبیت، یاریزان هەست ب گرنگیا خۆ دکەت و گیانێ خۆ ددەتە یاریێ.
دەربازبوون ژ دروشمێن کورت و دووبارە: یانەیا دهۆکێ خودان ناسناڤ و دیرووکەکا مەزنە، رەوشا یاریگەهێ گەلەک سەرنجراکێشتر دبیت دەمێ سترانێن پێکهاتی ژ 3-4 رێزێن ب ڕامان و ریتم دبێژن، نەکو بتنێ هندەک ئاخفتنێن سادە یێن بێ بنەما.
رۆلێ کاپۆ (Capo) ل مەیدانێ: پێشنیار دکەین رێبەرێن پشتەڤانان بەری یاریێ چەندین پارچە هۆزان و سترانێن مۆرال ئامادە بکەن ب رێکا بلندگۆیێ پێشوەخت فێری جەماوەری بکەن، دا کو هەمی یاریگەهـ ب ئێک دەنگ و ئێکگرتی بێژیت.
زێدەباری دەنگی ڕەنگ و تابلۆیێن دەستێن هەوە د ناڤ پەلۆکێن یاریگەهێ دا سەرنجا کامیرەیان و راگەهاندنێ بۆ خۆ رابکێشن، رێکخستنا تیفۆیێن سەردەمیانە و بەرزکرنا شالێن زەر و شین ب رەنگەکێ کوم ل دەستپێکا یاریێ، دێ ئاوایەکێ ئۆرۆپی و مەزن ددەتە چەنالی و بینەران، هێزا ئۆلتراسی دەمێ دیار دبیت کو ل دەرڤەیی پارێزگەهێ ژی یاریگەهان بهەژینن، دەمێ تیمی ل دەرڤەیی یاریگەها خۆ پشتەڤانی ل پشت هەبیت، چ جاران هەست ب تنێبوونێ ناکەت، وەرن داکو ئێکگرتییا خۆ بکەینە کلتورەکێ وەرزشی یێ نموونەیی کو سەرانسەری ئیراقێ ب دەنگ و رێکخستنا ئۆلتراسا چیایێن بلند حێبەتی بمینیت، شانازیێ ب هەوە و یانەیا خۆ دبەین، هێڤیا مە ئەوە د یاریێن بهێت دا دەنگێ هوتافاتێن نوو و کاریگەر بگەهیتە هەمی ئیراقێ.