د چارچۆڤێ گرنگیدان ب كەرتێ گەشتوگۆزارێ ل ئیدارەیا سەربخوە یا زاخۆ، د نوكە دا مەزنترین نافۆرە ل سەر ئاستێ ئیراق و كوردستانێ دناڤ كۆڕنیشێ پرا دەلال دا ل ئیدارەیا سەربخوە یا زاخۆ دهێتە دروستكرن.

ئەندازیار هەدیا محەمەد سەرپەرشتا پڕۆژەیێ نافۆرا زاخۆ بۆ ڕۆژناما ئەڤرۆ دیاركر، ل سەر ڕووبەرێ 12 هزار مەترێن دووجا و ب گوژمێ 13 ملیار دیناران، مەزنترین نافۆرا لێزەری یا لڤۆك ل سەر ئاستێ ئیراق و كوردستانێ د ناڤ قوناغا دووێ یا كۆڕنیشێ پرا دەلال دا ل ئیدارەیا سەربخوە یا دهێتە دروستكرن.
ناڤهاتیێ ئاماژە ب وێ چەندێ ژی كر كو ئەڤ نافۆرە ب سیستەمێ لێزەر و لڤۆك دهێتە دروستكرن، و پاركەكا ڕاوەستاندنا تڕۆمبێلان ل بنداڤا پڕۆژەیی دێ هەبیت كو جهێ 300 تڕۆمبێلان لێ هەیە، و هەروەسا ئێك ژ بناڤودەنگترین خوارنگەهێن جیهانێ تێدا دهێتە دروستكرن.
گۆت ژی:»د نوكە دا كاركرن د ڤی پڕۆژەیی دا یا بەردەوامە، و هەتا ٦ هەیڤێن دی دێ ب دووماهیك هێت و كەڤیتە د خزمەتا خەلكێ دەڤەرێ دا، و ئەڤ پڕۆژە تەمامكەرێ قۆناغا دووێ یا كۆڕنیشێ پرا دەلالە كو ئێكە ژ پڕۆژەیێن گرنگ و ستراتیژی ل دەڤەرێ، و ل دەمەكێ نێزیك ژی دێ قوناغا سیێ یا كۆڕنیشێ پرا دەلال هێتە ڤەكرن».

پەیڤدارێ وەزارەتا چاندنێ و ژێدەرێن ئاڤێ ل هەرێمێ دیاركر، وەزارەتا چاندنێ و ژێدەرێن ئاڤێ یێن هەرێما كوردستانێ هەول و بزاڤێن خۆ بۆ مۆدێرنكرنا كەرتی چاندنێ چڕ كرینە و د ڕێكا پەیڕەوكرنا چەندین سیستەمێن پێشكەوتی یێن بێ كێڵان، چاندنا زیرەك و ئاكواپۆنیك، كار بۆ زێدەكرنا بەرهەمێ خۆمالی و كێمكرنا تێچوویان كریە.

قارەمان قادر، پەیڤدارێ وەزارەتا چاندنێ بۆ رۆژنامەیا (ئەڤرۆ) گۆت: بكارهێنانا ڕێكا ببێ كێڵان (No-Till) گەشەكرنەكا بەرچاڤ بخوەڤە دیتیە، ل هندەك دەڤەران ڕووبەرێ چاندنێ ب ڤی سیستەمی ژ 30 دۆنەمان بۆ 300 دۆنەمان زێدەبوویە، ئەڤە ژ بلی كێمكرنا تێچوویێن سەر جووتیاری، هاریكارە بۆ پاراستنا شێی خاكێ و زێدەبوونا كوالێتییا بەرهەمان.
قارەمان قادر، دەربارەی بەرهەمێ خۆمالی یێ جووتیاران ڤە بۆ پڕكرنا پێدڤیێن خۆمالی گۆت: هەرێما كوردستانێ قۆناغا دابینكرنا پێتڤییێن خۆمالی دەرباز كریە و نوكە پشكەكا بەرچاڤ ژ بەرهەمان بۆ دەرڤە دهنێریت، وەكی بەرهەمێن باجانا سۆر، هژیر و تری، سەرەڕای هنارتنا وان بۆ بازاڕێن ناڤەڕاست و باشوورێ ئیراقێ، بۆ وەڵاتێن توركیا، ئوردن و ئیماراتێ ژی دهێنە هنارتن.
قارەمان قادر ئاشكراكر، كابینا نەهێ یا حوكمەتا هەرێمی كوردستان، هەڤدەم دگەل پڕۆژەیێن ستراتیژی، گرنگییەكا مەزن دایە ڤەژاندنا چاندنێ و پەرەپێدانا كەرتی پیشەسازیی، و د وێ چارچووڤەی دا گەشەیا وەبەرهێنانا چاندنێ ژ 1.8٪ بۆ١٠٪ زێدە كریە.

وەزارەتا سامانێن سروشتی ئاشكراكر، نڤیسارا فەرمی بۆ بەغدا هاتیە هنارتن ل دۆر دابینكرنا گازا سپی، دیسا ئەڤ سالە گازا سپی ب رێیا پلێتا ئەلكترۆنی لسەر وەلاتیان دێ هێتە بەلاڤكرن.
ژێدەرەكی ژ وەزارەتا سامانێن سروشتی بۆ رۆژناما ئەڤرۆ دیاركر، وان وەكو حوكمەتا هەرێما كوردستانێ، ب نڤیسارا فەرمی داخواز ژ بەغدا كریە گازا سپی یا بەلاڤكرنێ بۆ وەلاتیێن هەرێمێ دابین بكەت و گۆت: «نڤیسار بۆ بەغدا هاتیە هنارتن و ژ لایێ نوونەراتیا هەرێمێ ل بەغدا دێ رادەستی حوكمەتا فیدرال هێتە كرن، چونكی ئەركێ حوكمەتا بەغدایە سالانە گازا سپی بۆ وەلاتیێن هەرێما كوردستانێ دابین بكەت».
گۆت ژی: «هەردەمێ بەغدا رازیبوون نیشادا و گاز گەهشتە هەرێما كوردستانێ، مینا سالێن بۆری لسەر وەلاتیان دێ هێتە بەلاڤكرن، پرۆسێسا بەلاڤكرنا گازا سپی دێ مینا سالێن بۆری ل دەڤەرێن چیایی بڕێڤەچیت، ژ بەركو ئەڤان دەڤەران زێدەتر پێدڤی ب گازێ هەیە، هەروەسا پرۆسێسا بەلاڤكرنا گازێ دێ ب رێیا پلێتا ئەلكترۆنی بیت و بۆ هەر خێزانەكێ ژی بەرمیلەكا گازێ دێ هێتە دان».

پتریا ئەو كەسێن بۆ گەڕیان و سەیرانان دهێنە جهێن گەشتیاری ل سنۆرێ پارێزگەها دهۆكێ گازندەیان ژ وێ چەندێ دكەن بهایێن خوارنان ل خوارنگەهان، هەروەسا یێن تەزیاتیان ژی بۆ وان دگرانن و دخوازن چاڤدێریا بازرگانی ئاگەه ژ بهایێن وان هەبیت و هندەك بهایێن گونجای بۆ بهێنە دانان.

خالد مەسعود، گەشتیارەكێ خەلكێ (بەغدا) یە، بۆ رۆژنامەیا ئەڤرۆ دبێژیت: سالانە د وەرزێ هاڤینێ و بێهنڤەدانا قوتابیان دا ئەز ب خێزانڤە سێ هەتا چار جاران دهێمە دهۆكێ و هەر جارەكێ ژی نێزیكی حەفتیەكێ دمینم، سەبارەت بهایان ب تایبەت یێن خوارنان راستە هەتا ڕادەیەكی ئەڤە یا هەی و دبیت هەتا ڕادەیەكی خودانێن خوارنگەهان ژی د حەقبن، چونكو ل ڤێرە هەر تشتەك یێ گرانە، ب تایبەت ژی (گوشت) لەوڕا یا فەرە حكومەتا هاریكاریا وان بكەت.
عابد حلۆ، گەشتیارەكێ دی یێ خەلكێ (سەماوە) یە، ئەو ژی ب خێزانڤە هاتبوو گۆت: ب راستی ئەڤە جارا ئێكێ یە ئەز دهێمە جهێن گەشتیاری ل دهۆكێ و من دیت هەر تشتەك یێ گرانە، ب تایبەت بهایێن خوارنان و تەزیاتیان و ئەو پارەیێ من دگەل خۆ ئینای من هزر دكر دێ تێرا مە (10) رۆژان كەت، لێ هەكە بڤی رەنگی بیت ڕەنگە ب زۆڕی ئەم بشێن (5) یان (6) رۆژان پێ بقەتینن و دووڤدا دێ زڤڕینە مالا خۆ، بۆ زانین بەری نوكە چەندین جاران ئەم چووینە جهێن گەشتیاری ل هەولێرێ و سلێمانیێ، لێ ئەڤ بهایێن گران مە ل وێرێ نەدیتینە.
(ئاراز) وەك كامەندەكێ خوارنگەهەكێ ژ پێش خودانێ وێ خوارنگەهێ ڤە گۆت: ل دەستپێكێ دڤێت مرۆڤ بزانیت دەمێ دچیتە گەشتەكێ ل هەر پارێزگەهەكێ یان وەلاتەكێ جیهانی بیت ل جهێن گەشتیاری تشت یێ گرانە و نە وەكو بازاڕێ سروشتی یە، هەروەسا هندەك هۆكارێن دی ژی هەنە، وەك گرانیا كارەبێ و گرانیا كریا خوارنگەهێ و گرانیا باجێ و هەر تشتەكێ دی بیت ئەڤە دبنە هۆكار كو بها دبلندن، لێ هەكە حكومەتێ هاریكاریا جهێن گەشتیاری كر، بۆ نموونە كریا ئاڤێ و كارەبێ، هەروەسا باجێ ژی تشتەكێ كێم ژێ وەرگرت، ل وی دەمی بارێ وی ژی گران نابیت و دێ بهایێن خۆارنێن وی دئەرزان بن و ئێدی گەشتیار ژی گازندەیان ناكەن و دێ پتر هێن.

ب درێژاهیا چەند سالێن بۆری پتریا خەلكێ دهۆكێ بەردەوام گازندا ژ وێ چەندێ دكەن كو هەموو بهایێ هەموو تشتان ل ڤی باژێری یێ گرانە و ل باژێرێن دی ئەرزانتر دهێتە كڕین و ئابوورناسەك ژی دبێژیت: هەموو تشت ل دهۆكێ گرانترە، لەورا خەلكێ وێ هەژارترە و ئەڤ چەندە ژی بۆ قەیرانا ئابووری و گیرۆبوونا مۆچەی و نەبوونا دەلیڤەیێن دامەزراندنێ و گەلەك هۆكارێن دی دزڤڕیت.

حەجی محەمەد، زەلامەكێ (74) سالی یە و خەلكێ دهۆكێ یە، دبێژیت: ئەز ل دهۆكێ یێ ژدایكبوویم و هەتا نوكە هەر ل ڤێرە دژیم و بیرا من دهێت بابێ من دگۆتە من تشتێ دهۆكێ ژ هەموو پارێزگەهێن ئیراقێ گرانترە، لەورا ئەم دبێژین ئاخا دهۆكێ یا گرانە، ئانكو ئەڤ دیاردە گەلەك ژ مێژە یا هەی و ب دیتنا من ئەڤ چەندە بۆ گەلەك ئەگەران دزڤڕیت، یا ئێكێ نەبوونا وژدانێ، یا دویێ ژی دوكاندارێن دهۆكێ ب مفایەكێ كێم ڕازی نابن و دڤێت زوو زەنگین ببن.
د. كاوە عەبدولعەزیز وەكو ئابوورناسەك دبێژیت: ئەڤە چەندە راستە و د كەڤندا یا هەی، بۆ نموونە ئەڤرۆ ل دهۆكێ بهایێ هەر لترەكا پانزینێ (موحەسەن) هەتا نێزیكی (2500) دیناران بوو بۆ هەر لترەكێ، بەلێ من ل كەنالێن راگەهاندنێ دیت ل سلێمانیێ و هەلەبجە لتر ب (1900) دینارانە، ئانكو (500) هەتا (600) دیناران بۆ هەر لترەكێ زێدەتر ژ وێرێ، هەروەسا خانوبەر ژی، ئانكو كڕینا خانی و شوقە و پارچەیێن عەردی و ترۆمبێلان و هەر تشتەكێ دی ل ڤێرە گرانترە، لەورا رێژەیا هەژاریێ ل دهۆكێ بلندترە و حكومەت ژی نەشایە دەلیڤێن كاری رابگەهینیت و كۆمپانیێن كەرتێ تایبەت ژی نەشیانە وەكو پێدڤی بەلانسی رابگرن و دەلیڤەیێن كاری بۆ خەلكەكی ببینن و هەكە هەبن ژی گەلەك دكێمن و ل دووڤ خواستا خەلكێ مە نینن، هەروەسا قەیرانا دارایی و گیرۆبوونا مۆچەی و گەلەك هۆكارێن دی ژی ئەگەرن.

مامۆستایەکا زانکۆیێ د دیدارەکێ دا بۆ ڕۆژنامەیا ئەڤرۆ دیار کر، سەرکەفتنا دارایی یا ڕاستەقینە نە ب خەرجکرنا زێدە و دیاردەیێن دەرەکییە، بەلکو د ڕێکخستنا داهاتی و ئاڤاکرنا پاشەڕۆژەکا ئارام دایە و گۆت؛ فشارا جڤاکی و سۆشیال میدیا هۆکارێن سەرەکی یێن کێمبوونا هشیاریا دارایی و ئاڤابوونا کلتورێ چاڤلێکرنێ نە د ناڤ گەنجان دا.

پروفیسورا هاریکار دکتورە نەسرین مستۆ شەرەفانی، مامۆستایا زانکۆیێ یە دیار کر، فشارا جڤاکی، کلتورێ چاڤلێکرنێ و کێمییا هشیارییا دارایی سەرەدەریێ دکەن، ژبەرکو جڤاک کەسێ خودان ترومبێل و ئاهەنگێن مەزن ب سەرکەفتی دبینیت، تاك ژی فشارێ ل خۆ دکەت داکو بگەهیتە ئاستێ وان و گۆت؛ دەمێ ئەڤ هشیارییە نەبیت، تاک بۆ پاراستنا وێنەیێ خۆ یێ جڤاکی پەنایێ دبەتە بەر قەرزان، کێشە نەک بتنێ دەروونی یان جڤاکییە، بەلکو هشیارییا دارایی ئەو سنورەیە کو ڕێگریێ ل زیانان دکەت.
د. نەسرینێ گۆت؛ سۆشیال میدیایێ کەلتورێ چاڤلێکرنێ د ناڤ گەنجان دا زێدە کریە؛ دەمێ وێنەیێ کەسایەتیێن بەرنیاس دبینن و تشتا دکڕن، سەرەڕای کو ئەو بتنێ بۆ خۆ دیار کرنێ دکڕن، لێ گەنج ژی چاڤ ل وان دکەن.
ماموستایا زانکۆیێ زێدەتر گۆت؛ کێشە نە د سازکرنا ئاهەنگان یان کڕینا تشتان دایە، بەلکو د نەنیاسینا پێدڤییێن سەرەکی و فەر دایە، وەرگرتنا قەرزان بۆ خواندنێ یان دەستپێکرنا پرۆژەیان مفادارە، بەلێ قەرزکرن بۆ خۆشییا دەمکی، جێگیرییا ئابووری یا خێزانێ د ئێخیتە د مەترسیێ دا
پروفیسورا هاریکار و ماموستایا زانکۆیێ د. نەسرینێ دیار کر، ئەو چەندە ژی دیار کر، جێگیرییا دارایی ئەوە تاک یان خێزان داهات و خەرجیێن خۆ ڕێک بێخیت و ل دویڤ داهاتێ خۆ بژیت یا گرنگ ئەوە ژ قەرزێن نە پێدڤی دوور بکەڤیت و گۆت؛ هەڤسەنگیێ دناڤبەرا خۆشییا ئەڤرۆ و پاراستنا داهاتی دا ڕاگرێت دا کو ب هەر بارودۆخەکێ نەهێتە هەژاندن.

د سەردەمێن بووری دا خانیێن تاخێن كەڤنارێن ئاكرێ ب تەمامی ب بەرێن چیای و كەرەستەیێن سەرەتایی دەستكرد هاتینە ئاڤاكرن بەلێ نوكە ژ بەر كارتێكرنا كەش و سەقایێ سروشتی و دەربازبوونا سالان پشكەكا زۆر ژ بەرەڤ ژناڤچوونێ دچن و خودانێن وان ژی ژ بەر كێم دەرامەتیێ دیار دكەن كو شیانێن نۆژەنكرنا وان نینە.

موسا ئەحمەد، كاركەرەكە ل ئاكرێ بۆ ئەڤرۆ گۆت: دەمێ خانیەك دكەڤیت دابینكرنا بەران گەلەك یا گرانا تەنگاڤییێ بۆ خەلكی دروست دكەت خەلك نەشێت ب بهایێ گران بەران بكڕیت، چونكە بهایێ هەر بەرەكی گەهشتیە ٧ بۆ ٨ هزار دیناران.
حاجی ئاكرەیی، هۆستایێ دیواران دەربارەی نووژەنكرنا خانیان بۆ ئەڤرۆ گۆت: سیمایێ كەڤناری یێ ئاكرێ گەلەك یێ جوانە، بەلێ دابینكرنا بەران گەلەك ب زەحمەتە و چو هاریكاری ژی نینە ئەگەر حكومەت پشتەڤانیا خەلكی بكەت ئەم ئامادەینە ل دووڤ مەرجێن باژێرڤانیێ و رێڤەبەریا شوونەواران كار ب كەین.
ل سالێن ٢٠١١ هەتا دووماهیا سالا ٢٠١٣، حكومەتا هەرێما كوردستانێ بودجەیەكا تایبەت بۆ پاراستن و نۆژەنكرنا ڤان خانیان تەرخان كربوو، بەلێ پشتی دەستپێكرنا شەڕێ داعش و قەیرانا دارایی ئەو هاریكاری بەردەوام نەبوو و هاتە ڕاگرتن نوكە لایەنێن پەیوەندیدار داخازا ڤەگەڕاندنا وێ بودجەیێ دكەن.
هیوا شەمال، ڕێڤەبەرێ شوونەوارێن ئاكرێ بۆ ئەڤرۆ گۆت: حكومەتا هەرێمێ سالانە ٢٥٠ ملیۆن دینار تەرخان كربوون بۆ وێ چەندێ خەلكێ تاخێن كەڤنار خانیێن خۆ نۆژەنبكەن، بەلێ ژ بەر بارودۆخێ دارایی ئەڤ مەزاختنە هاتە ڕاگرتن وەك ڕێڤەبەرییا شوونەواران داخوازێ ژ حكومەتێ دكەین ئەڤ بودجەیە بەردەوام بیتەڤە دا كو خەلك بشێت ناسنامەیا شوونەواری و دیزاینا خانیێن خۆ بپارێزیت.

ئەندامەكێ لژنەیا نەفت و غازێ ل جڤاتا نوونەرێن ئیراقێ ژ فڕاكسیونا پارتی دیموكراتی كوردستان ڕاگەهاند، وەزارەتا سامانێن سروشتی ل حوكمەتا هەرێما كوردستانێ ب نڤیسارەكا فەرمی لاری نەبوونا خوە بۆ ڕادەستكرنا 50 هزار بەرمیلێن نەفتێ ڕادەستی وەزارەتا نەفتا ئیراقێ دیار كرییە، ئەڤە ژی د بەرامبەر وێ چەندێ دا كو بەغدا سوتەمەنی و پەنزینا 450 دیناری بۆ هەرێما كوردستانێ دابین بكەت.
سیپان شێروانی، ئەندامێ لژنەیا نەفت و غازێ ل جڤاتا نوونەرێن ئیراقێ ژ فڕاكسیونا پارتی دیموكراتی كوردستان بۆ ڕۆژنامەیا «ئەڤرۆ» دیار كر، پشتی كۆمبوونێن لژنەیا جڤاتا نوونەران ل گەل وەزارەتێن نەفتا ئیراقێ و سامانێن سروشتی یا هەرێما كوردستانێ، وەزارەتا سامانێن سروشتی دوو پێشنیاز بۆ چارەسەریێ بەرچاڤكرن ئەوژی:
1-هەرێم 14% ژ نەفتا خاڤا ئیراقێ (كو دكەتە 140 هزار بەرمیلان د ڕۆژەكێ دا) وەربگریت بۆ بكاربرنا ناڤخوەیی.
2-یان ژی د بەرامبەر ڕادەستكرنا 50 هزار بەرمیلێن نەفتێ، ئیراق 14% ژ پەنزین و سوتەمەنیێن دابینكری بۆ ئیراقێ، بدەتە هەرێما كوردستانێ.
ناڤهاتی ئاماژە ب وێ چەندێ كر كو»مە پێشتر ژی دگۆت هەرێما كوردستانێ بەرهەڤە 50 هزار بەرمیلان ڕادەست بكەت بەرامبەر دابینكرنا هەموو پێدڤیاتیێن سوتەمەنیێ، لێ هندەكان دگۆت ئەڤە نە ڕاستە. نوكە ئەڤ نڤیسارە هەموو دەنگۆیان ئێكلا دكەت و بەلگەیە ل سەر بەرهەڤییا هەرێما كوردستانێ».
سەبارەت ب هەلوەستێ وەزارەتا نەفتا ئیراقێ، شێروانی دیار كر «هەتا نوكە وەزارەتا نەفتا ئیراقێ چو پێشنیازێن ب نڤیسار بۆ سوتەمەنییا هەرێما كوردستانێ نەداینە جڤاتا نوونەران، دیسان بەلگەیا دەنگی یا وەزیرێ نەفتێ ژی ل دەف مە هەیە كو د دانپێدانێن خوە دا دبێژیت نەشێم بەرهەمێن نەفتی بۆ هەرێما كوردستانێ دابین بكەم».
ئەندامێ لژنا نەفت و غازێ ل جڤاتا نوونەرێن ئیراقێ دووپات كر كو پێدڤییە هەموو ئالیێن سیاسی یێن كوردی ل جڤاتا نوونەرێن ئیراقێ پێكڤە كار بكەن بۆ وێ چەندێ كو وەزارەتا نەفتا ئیراقێ نەچار بكەن هەمان مافێ پارێزگەهێن ناڤەڕاست و باشووری، بۆ هەرێما كوردستانێ ژی ب جهـ بینیت، چونكی سوتەمەنی (پەنزین، نەفتا سپی و گازوایل) مافەكێ دەستووری و یاسایی یێ خەلكێ هەرێما كوردستانێ یە و نابیت بهێتە پشتگوهخستن.

سەرۆكێ‌ دەستەیا وەبەرهێنانێ‌ ل هەرێما كوردستانێ‌ دیار كر، وان ئەڤ سالە ب گوژمێ‌ نێزیكی ئێك ملیار دۆلاران مۆلەتێن وەبەرهێنانێ‌ هاتینە دان.
مەحەمەد شوكری، سەرۆكێ دەستەیا وەبەرهێنانێ ل هەرێما كوردستانێ بۆ رۆژنامەیا ئەڤرۆ گۆت: «حوكمەتا هەرێمێ هەموو ئاسانكارییان پێشكێشی وەبەرهێنەران دكەت، داكو بشێن كار بكەن، ئەڤ سالە ژی‌ 105 مۆلەتێن وەبەرهێنانێ ب گوژمێ نێزیكی ئێك ملیار دۆلاران ب كۆمپانییان د بیاڤێن جودا دا ل هەرێما كوردستانێ هاتینە دان».

ل دەڤەرا ئاكرێ دەمێ پێگەهشتنا بەرهەمێ سماقێ یە و ئێك كیلۆیا وێ ل دووڤ جۆراتیێ ب هەشت بۆ ١٢ هزار دیناران ژ جوتیاران دهێتە كڕین و هەموو ژی دێ بۆ بازارێن دەرڤەی وەلاتی هێتە هنارتن.

محەمەد عەلی جوتیارەكێ بەرهەمئینانا سماقێ یە ل دەڤەرا ئاكرێ بۆ ئەڤرۆ گۆت: سماقا ئاكرێ یا ناڤدارە و سالانە و ب بەردەوامی خواستەكا زۆر ل سەر هەیە، سالانە رێژا چاندن و بەرهەمئینانێ زێدە دبیت هەر سال ب بهایەكێ دهێتە فرۆتن ئەڤسالە هێشتا دەستپێكا وەرزێ چنینێ یە، بەلێ بهایێ وێ گەلەك یێ باشە هەر نوكە كریاران دەست ب كرینێ كریە ب بهایەكێ زۆر و گرانتر ل هەموو سالان.
ناڤبری گۆتژی: ل دەڤەرا ئاكرێ سێ جورێن سماقێ خواست ل سەر هەیە (سۆر، سپی، بالیكی) بهایێ سماقا سپی ژ هەمووان گرانترە و بەلێ ساقا سۆر بەرهەمێ وێ زێدەتر و خواستەكا زۆر ل سەر هەیە، چەند قۆناغا دەرباز دبیت هەتا سماق دگەهیتە بەری ب لایەنێ كێم سێ سال دەباز دبن ژبلی كاركرنا بەردەوام دناڤ دا، هندەك سالان ژبەر گۆهرینێن كەش و هەوای تووشی نەخۆشیا دبیت و ئەڤسالە ژی كێمەك خراب بووە.
ئەندازیار فازل مستەفا رێڤەبەرێ چاندنا ئاكرێ بۆ ئەڤرۆ گۆت: چوونا بەرهەمێ سماقێ بۆ دەرڤەی هەرێما كوردستانێ، بۆ ناڤخۆیا ئیراقێ بیت یان وەلاتێن ئەوروپی و عەرەبی كارتێكرنەكا گەلەك مەزن یا كری ل سەر بهایێ وێ و ل سەر جوتیارێ مە ژی كو بوویە ئەگەر سالانە رێژا چاندن و بەرهەمئینانێ زێدە ببیت و جوتیار پتر پەڕەی بدەتە چاندنێ، سالانە گۆهرین ب سەر بهای دا دهێن بەلێ ئەڤسالە بهایێ وێ گەلەك یێ باشە.