دو باسک و کوریەک

تە دو باسک هەنە و کوریەک!
ئەسمانی ژی
نە سنۆر هەنە،
نە دەر و دیوار پێڤەنە.
تە دڤێت بالندەیەکێ ئازاد بە و
بلند بفڕە!

تە دڤێت ژی خشۆکەک بە
ل ناڤ بیابانێ
کوریا خۆ د دویڤ خۆ ڕا بخشینە و
د چالەکێ دا بمرە!

ب تە و بێ تە
ئەسمان هەر ئەسمانە.
ب تە و بێ تە
بیابان ژی هەر بیابانە.

تو هەمی

چ ڕێ نینن
ئەگەر تو ڕێڤینگ نەبی.
چ ئەسمان نینن
ئەگەر تو ستێر نەبی.
چ چەم و دەریا نینن.
ئەگەر تو گەمی نەبی.
چ مرۆڤ ژی نینن
ئەگەر تو هەمی نەبی!

هەكە ئەز چووم
ب ئێڤارا من نە گڕنژە
چیڕۆكا چوونا من
ژ عەشقا ئاخی نە ڤەكێشە
رۆندكێن ب ڤین
ژچاڤێن ئەختوبارەكێ‌ خەمگین
تو نە رێژە
بێهنا هەناسەیا من
ژ گەرماتییا رۆندكێن باژێرەكێ‌ ئێتیم
نە هەلكێشە
لەیزینێ‌ ژ غەریبییا شەڤ رەشا منا ساڤا
دگەل سەمایا
راستییەكا هیش نەرابووی ب وەستیك و گاڤا
نە گڤێشە
عەشقا شەڤێ‌
دگەل ڤەرێژا رۆندكێن رۆژێ‌
هەر نە بێژە.
…
هەكە ئەز چووم
تو بخودی كەی
رۆندكێن وەغەرێ‌ بێ‌ دەنگ نەكە
و رەنگ رەنگ نەكە
بهارا عەشقا من
دگەل دێمی خوە تو زەر نەكە
بێ‌ خولك نەكە
پرتپرت نەكە
دگەل سەرسال و دایكبوونا خوە
سەرژێ‌ نەكە..
بهارا دلێ‌ من
ژ دایكبوونا هەناسەیا خوە
گڕنژینا سلاڤا خو ڤەدەرنەكە
كزگیرۆكا شەڤێن من
ب سەمایا خاترخواستنێ‌
سەرخوەش نەكە.
….
هەر ژ رۆژا ئەز چوویم
ئاڤابوونێ‌ برینا من كویر كرە ڤە
دلێ‌ من داخ كرە ڤە
هەناسەیا من پیر كرە ڤە
وەرگەڕیانی ئەلندا سوبەیا من كز كرەڤە
ئەڤە دەم هات
بیردانكا ئەڤرۆیا من بۆ هەلاتنا سوبەیا تە
بگریتە ڤە
ئەی هلینا گەرماتییا رۆندكێن من
شارێ‌ فڕینا عەشقا من
دی بگڕنژە
دا رۆندكێن دوهی ب ئەڤرۆیا تە
ژبیرڤە نەچن
كەنی گریكێن من، من دناڤ داخێن
دویربوونا و بیروبوونا تە
ب لەرزنە ڤە
زمانێ‌ من دناڤ
پارزوینكا پیرۆزییا رۆژبوونا عەشقا تە دا
بفڕیتە ڤە
چاڤێن من بۆ دیتنەكێ‌
ب كەنیتە ڤە
بۆ داخێن وەغەرەكێ‌
بگریتە ڤە
بكەڤیت و بمریتە ڤە.

کانتۆ (٦ )

هێشتا ناخێ من ژ خەمێ یێ داگرتییە، ژبەر وی جێمکێ دلێ من پێ سۆتی(١)، وەلێ پشتی هۆشێ من ڤەگەڕای و هشیار بوویم، چەوا بلڤم و بەرێ خوە بدەمە کیژ سەمتێ، یێ کۆمەکا کەسێن ئەشکەنجەدایی و عەزابەکا نوو ل دۆر خوە دبینم. ئەز یێ ل خەلەکا سیێ، خەلەکا بارانا ئەبەدی، بارانا نەفرەتیی و سار و گران، ئەوا نە توندییا وێ کێم دبیت و نە جۆرێ وێ دهێتە گوهۆڕین. سڕوسەقەمەکا مەزن، ئاڤ یا ڕەشکری و بەفرەکا دناڤ بایێ تاریدا دباریت، بێهنەکا نەخۆش ژێ بلند دبیت و دکەڤیتە سەر عەردی. چیربیرۆس(٢)، ئەو هۆڤێ دڕندە و سەیر، مینا صەیەکێ سێ سەر ل ڤێرە ل هنداڤ وان مرۆڤێن دناڤ تەقن و زیلاقێدا پەنگیایی دڕەویت. ب دو چاڤێن سۆر، ڕدێنەکا بۆش و ڕەش، زکەکێ مەزن و دو دەستێن پەنجدار، جانان ددڕینیت و ژ کەڤل دکەت و دکەتە چوار پارچە دا ب ساناهی بدابلعینیت(٣). باران ڕەوینەکا مینا صەیان ژ وان گیانان بەرددەت، کێلەکەکا خوە دکەنە پەرچانێ کێلەکا دی، ئانکو ئەو لایێ ل بەر بارانێ دقولپیننە دناڤ د هەڕیێ ڕا، دا ئێشانا وی سڤککەن، ئەڤ گونەهکارێن دامایی، ب بەردەوامی، یێ دناڤ هەڕیێدا دگەڤزن. ئو دەمێ وی هۆڤێ مەزن، چیرپیرۆسی ئەم دیتین، دەڤێ خوە بەشکر و کێلبێن خوە قیچکرن، تەڤ ئەندامێن وی دلڤلڤین.
ڕێنیشاندەرێ من، دەستێن خوە درێژکرن، هندەک ئاخ ژ سەر ڕوویێ عەردی ڕاکر، هەردو مستێن خوە ژێ مشتکرن و تێوەرکر، ب تنێ ئاخە گەروویێن چاڤبرسییان تێر دکەت. وەک وی صەیێ ژ برسا دڕەویت، هەکو خوارنێ دخۆت تەنا دبیت؛ چونکو هەمی شەڕ و ڕەوینا وی ژبۆ قووتدانا نێچێرا وییە. وان دێمێن کرێت و ب ترس ژی وە کر، ڕەوینا دێمێن چیرپیرۆسێ شەیتان ژی گورمێنەکا وەسا ئێخستە هنداڤ گیانان هەتاکو حەزکری د کەڕ بان. ئەم ل هنداڤ هندەک ڕەشەیان ڕا چووین، ل بن بارانا گران دنالین، د سەر میناکێن وان یێن ڤالا ڕا بۆرین، مینا جەستەیێن مرۆڤان بوون. هەمی کەفتنە سەر عەردی ژ بلی ڕەشەیەکێ ب تنێ(٤)،
ئەو بلەز ڕادبوو و د ڕوونشتەڤە. دەمێ دیتی ئەم یێن ل بەرانبەری وی دبۆرین، گۆتە من:

– تو ئەوێ د ڤێ دۆژەهێ ڕا دهێیە هاژۆتن، من بنیاسە ئەگەر بشێی، پێش مرنا من تو یێ ژ دایکبووی.
– دبیت ئەو عەزابا تو تێدا، میناکێ تە ژ بیردانکا من سڕیبیت، هەروەکو بەری نۆکە من چ جاران تو نەدیتبی. لێ بێژە من کا تو کیی ئەوێ کەفتییە دناڤ ڤی جهێ ژاندار و ڤێ ئەشکەنجەیا ئەگەر ژ وێ توندتر هەبیت ژی، ژێ ب رق و کینتر نینە.
– باژێڕێ تە هند یێ پڕە ژ ئەرەشکییێ(٥) تاکو ئامان د سەرداچووی، ژینا تەنا ئەز ڤەگرتم. ئو وەیێن هەڤوەلاتی یێن من، ناڤێ من کرە چاکۆ: ئەز ب گونەها زۆرخوەڕییا نەفرەتیی کەفتیمە بن ڤێ بارانا بۆش، هەروەک دبینی. ئو نە ئەز تنێ ئەو گیانێ بێزارم، ئەڤێن هەنێ هەمی وەک من یێن کەفتینە د بن سزایێ هەمان گونەهێدا.
پشتی هینگێ، ژ وەستیانا سزادانێ، چ دی نەگۆت. لێ من د بەرسڤدانا ویدا گۆت:

– هۆ چاکۆ، عەزابا تە، من گەلەک دلگران دکەت و گریا من دئینیت؛ لێ بێژە من، ئەگەر بزانی کا دێ خەلکێ ڤی باژێڕێ دابەشکری چ لێ هێن؛ ئەرێ مرۆڤەکێ دادپەروەر لێ هەیە؟ بۆ من بێژە کانێ بۆچی ڤێ هەمی هەڤڕکییێ هێڕشکرییێ(٦)؟
– پشتی هەڤڕکییەکا درێژ، دێ خوینێ ڕێژن، پارتا گوندی دێ هەڤڕکا خوە ب زیانەکا مەزن کەتە دەرێ. پشتی هینگی ب سێ دەورانێن ڕۆژێ ئەڤ پارتە ژی دێ کەڤیت و ئەوا دی، ب هێزا ئەوێ هەردوان کونترۆل دکەت، دێ ب سەرکەڤیت(٧). ژبۆ دەمەکێ درێژ ئەو هەر دێ یا سەربلند بیت، لایێ دی ژی، هندی گریانێ و هەستکرنا ب فهێتییێ درێژ بکەن، دێ د بن بارێن قورسڤە مینیت. یێن دادپەروەر تنێ دوونە(٨)، لێ ل وێرێ کەسەک گوهێ خوە نادەتێ: چونکو ستەمکاری و ئەرەشکی و چاڤتەنگی، هەر سێ چریسکێن دلسۆژن، دلان مشتی کەربوکین دکەن.
وی ل ڤێرە، ئاخفتنا خوە یا گریۆکی ب دوماهی ئینا، لێ من گۆتێ:

– حەز دکەم من هێشتا فێربکەی و بۆ من پتر باخڤی، فاریناتا و تیجیابۆ دو قەنجکارێن مەزن بوون. ئو جاکوپۆ روستیکۆچی، هنڕی و مۆسکا و گەلەکێن دی(٩)، ئەوێن مەژێن خوە ژبۆ قەنجی و خێرێ تەرخانکرین، بێژە من کا ئەو ل کیڤەنە؟ دێ هەولدەم کو ببینم، حەزەکا دژوار من پالددەت کو بزانم کا ئاسمان وان دلخۆش دکەت یان ژی دۆژەھ وان بۆش دکەت؟
– ئەو دناڤ ڕووڕەشترین گیاناندانە، ب هندەک گونەهێن دی یێن ل خوارێ، وان دهاڤێژنە بنی بنی: ئەگەر پتر تێندەیە خوارێ و بۆ بچی دێ وان بینی. لێ ل دەمێ دگەهییە جیهانا خۆشتڤی، هیڤیدارم ناڤێ من بکەیە دناڤ بیردانکا ساخاندا: چ گۆتنێن دی نابێژم و چ بەرسڤان ل سەر زێدە ناکەم.
پشتی دروستدیتنێ، حەوێلییێ چاڤێن وی ڤەگرتنەڤە(١٠): پیچەکێ ب گۆمان و نەرێنی ل من نێڕی، پاشی سەرێ خوە چەماند، کەفتە دناڤ هەمی کۆرەیێن دیدا(١١).
ڕێنیشاندەرێ من گۆتە من: «ئەو ڕانابیتەڤە هەتاکو ل ئاخرەتێ فریشتە پف دکەنە صۆرێ(١٢) و هێزا لایێ دی دگەهیت (ئانکو مەسیح): هەر ئێک ژ وان دێ بەرەف گۆڕێ خوەیێ خەمگینڤە چیت، دێ میناک و جەستەیێ وان بۆ زڤڕیت، ئەو دێ دەنگێ حوکمێ عەزابا خوە بۆ هەتا هەتایێ ل ڕۆژا تالییێ بهیسن.
ئو هۆسا ب پێنگاڤێن هێدی هێدی، مە بەحسی ژیانا هاتیی دکر و ئەم دناڤ وی تێکهەلەیێ کرێت ژ بارانێ و ڕەشەیان دەرباز بووین. لەوا من گۆت:
– سەیدایێ من، ئەرێ پشتی دادرەسکرنا داوییێ، ئەڤ عەزابە دێ زێدەتر یان کێمتر لێ هێت؟ یان ژی هۆسا دێ هەر یا توند و دژوار بیت؟
– ل زانشێ خوە ڤەگەڕە، ئەوێ دبینیت کو چەند مرۆڤ کاملتر بیت، دێ هەستکرنا وی ب لەزەت و ئێشانێ پتر بیت(١٣).
هەرچەندە ئەڤ خەلکێ نەفرەتیی، چ جاران ناگەهنە کاملانییا دروست، لێ ئەو وە پێشبین دکەن کو نهۆ یێن ژ وێ کاملانییێ نێزیکن. ئەم ل دۆر ڕێکا خەلەکا سیێ دزڤڕین و گەلەک دئاخفتین، ژ وان ئاخفتنێن من نەڤێت دوبارە بکەم، ئەم گەهشتینە جهەکی کو دەستپێکا چوونا بەرەف خوارترێیە، ژ خەلەکا سیێ بەر ب یا چوارێڤە.
ئو ل وێرێ مە پلوتۆسێ دوژمنێ مەزن دیت(١٤).

دەهمەن:
(١) مەرەم پێ فرەنچیسکا و پاولۆنە (ژ سروودا بەری ڤێ).
(٢) چیربیرۆس (Cerberus): د میتولۆجیا کەڤندا، صەیەکێ چیڤانۆکییە، ڤیرجیلۆی کربوو زێرەڤانێ هەمی دۆژەهێ، لێ ل ڤێرە زێرەڤانێ ڤی خەلەکێ ب تنێیە.
(٣) چاڤێن سۆر: نیشانا تووڕەبوون و دڕەندەییێیە. سێ سەر، ڕدێنا ڕەش و زکێ مەزن: نیشانا چلێسی و خوەڕەیی و تێر نەبوونێیە.
(٤) ئەڤە ڕەشەیێ چاکۆیە (Ciacco)، هەڤوەلاتییەکێ فلورەنسایە، ل سەدەیێ سێزدێ، دەربڕینێ ژ کەسێ چڵێس و خوەڕە دکەت. ل ساڵا ١٢٨٦ێ یێ مری، ئانکو پشتی ژیێ دانتی ژ بیست سالییێ بۆری.
(٥) مەرەم پێ باژێڕێ فلورەنسایە ئەوێ مشتی ئەرەشکی (دلڕەشی- حەسوودی) و ڕکابەرییا ل سەر پلە و پۆست و بەرژەوەندان.
(٦) پرسیارا پاشەڕۆژێ ژ چاکۆی دکەت؛ چونکو گیانێن مرییان وێ دزانن. د پرسیارا ئێکێدا دڤێت چارەنڤیسێ خەلکێ فلورەنسا دابەشکری ل سەر پارتان بزانیت. پرسیارا دووێ ئەوە کا کەسەکێ دادپەروەر مایە ل فلورەنسا. پرسیارا سیێ دەربارەی سەدەمێ وێ هەڤڕکییا هەییە ل فلورەنسا. ئەڤ دێرە دیرۆکا فلورەنسا د سالێن (١٣٠٠- ١٣٠٣)دا تۆمار دکەت.
(٧) ئانکو دێ هەڤڕکییەکا خویناوی دناڤبەرا هەردو پارتێن لایەنگرێن پاپای (گویلفیێن سپی و یێن ڕەش)دا چێبیت و پارتا گوندییان (گویلفێن سپی) دێ ب سەرکەڤیت. لێ پشتی بۆرینا سێ سالان دێ گویلفی یێن ڕەش ب هێزا ئەوێ هەردوان کونترۆل دکەت ب سەرکەڤیت؛ مەرەم پێ پاپا بانیڤاچۆیێ هەشتێ، کو ب ناڤێ ئاشتییێ پارتا گویلفی یێن ڕەش ب سەردئێخیت و گەلەک ژ لایەنگرێن پارتا گویلفی یێن سپی ل سالا ١٣٠٢ێ دهێنە نەفیکرن کو دانتی ژی ئێک ژ وان بوو.
(٨) نەدیارە کا ئەو هەردو دادپەروەر کینە، دبیت دانتی بەحسی خوە و هەڤالێ خوە جویدۆ بکەت، دبیت ژی مەرەم ئەو بیت کو دادپەروەر ل فلورەنسا د کێمن، ئو سەرەڕای کێمییا وان ژی کەسەک گوهێ خوە نادەتێ.
(٩) فاریناتا دلی ئوبرتی (Farinata degli Uberti)؛ فەرماندەیەکێ گیبلییان بوو، جەڤەنگێ وێرەکییێ و هێزا نیشتمانپەروەرییێ بوو. تیجیابۆ ئەلدوبراندی دلی ئەدیماری (Tegghiaio Aldobrandi degli Adimari)؛ فێرسەکێ فلورەنسییێ وێرەک و زیرەک بوو. جاکوپۆ روستیکۆچی (Jacopo Rusticucci) فێرسەکێ فلورەنسیێ وێرەک بوو. ڕەخنەڤان ل سەر کەسایەتییا هنڕی پێک نەهاتینە کا کییە. مۆسکا دی لامبرتی (Mosca dei Lamberti) هەڤوەلاتییەکێ فلورەنسییە. ئەڤە هەمی وەلاتپارێز بوون ژ پێخەمەت خزمەتکرنا فلورەنسا کار دکرن. دانتی د ڤیا وان د دۆژەهێدا نەبینیت. لێ ئەو نە ب گونەها چلێسیێ ل دۆژەهێنە، ب هندەک گونەهێن دی ل وێرێنە.
(١٠) ئەڤە سزایێ ئەشکەنجەداییانە کو هەکو سەرێ خوە دچەمینن، تووشی حەوێلییێ دبن، چونکو تشتان ب ڕاستییا وان نابینن.
(١١) ئەو چ تشتان نابینن، چونکو سەرێن وان یێن دناڤ تەقن و زێلاقێدا، ڕابوونا چاکۆی یا بەروەخت بوو، تنێ دا دگەل دانتی باخڤیت.
(١٢) ئانکو (نفخ الصور فی یوم القیامە).
(١٣) ئاماژەیە بۆ بۆچوونێن قەددیس تۆماسێ ئەکوینیێ (١٢٢٦- ١٢٧٤)، کو لاهۆتزان و کاهنەکێ کاسۆلیکییە، ئەڤ هزرە ژ فەلسەفا ئەرستۆی وەرگرتییە کو هەکو جان و جەستە هەڤ دگرن پتر هەست ب لەزەت و ئێشانێ دکەن.
(١٤) پلوتۆس (Plutus): خوداڤەندێ سامانی د میتولۆژیا یۆنانییاندا، دبێژنێ دوژمنێ مەزن، چونکو حەزا ب دەستڤەئینانا سامانی ل دەف مرۆڤی دئازرینیت.

بێژە من ئەو چ جۆتە سێڤن
ل بەر چاڤێن من؟
وەكی هەیڤەكێ‌
د شەڤەكا بێ‌ هیڤی دا
وەكو پەیكەرەكی كو ب دەستێن
هونەرمەندەكی ب ئارامی دهێتە چێكرن
نە ئاخە، نە ئاگرێ‌ تێهنێ‌
بەلكو هەناسەیەكا گەرمە
دناڤبەرا دل و هزراندا
ئەو جوانیە نووتە یە
بەلێ‌ نووتەیا وێ‌
وەكە گولەكێ‌ یە كو بارانێ‌ شل كربیت
وەكو رۆناهییا سێدەهیانە
كو چ تشتەك نەشێت داپۆشیت
بێژە من ئەو چ سێڤێن…؟
سێڤێن هەرجارن كو بەردەوام
دخەونێ‌ دا دبینم و
دوبارە د دلێ‌ مندا د شین دبیە ڤە.

چاڤێن تە یێن بهاری
مێرگێن تژی کەسکاتینە
خەیالێن من یێن شیم
سەمایێ لێ دکەن
عەشق هەست و سازەکە
ژەنینا وێ بۆ ژانێن ئەڤینا مە
سترانا داستانا حەسرەتا
مرنا مەمۆی
بۆ زینا ڕەبەن دبێن
عەسمانێ ستێرا
ڕۆپەلێن شەڤا مەیا تاری
هەمبێز بکە
بەسە ئێدی چرایێ
کێلەشۆکا بڤەمرینە
وان چاڤێن گلدای
دلێ دقەفەسا سینگی دا
زیندانکری
ل وێ هیڤییا پڕی تۆلاز
سروود و ڤەلۆرینا عەشقێ
دگەورییا دا
ئازرینەکە ژ کۆمەکا پەیڤان
خۆزی لێ دبارن
دەم و ژڤانێن مە
چەند سال بەزاندن
زڤڕین نیشان و ئارمانجەکە
چەند قێری و نالین لێ بهەلێن
هند پتر ئاخین
دبنە تاڤەزەرکا سپێدا
ئێڤارا سەرنیشف ئاڤا دبن.

ل وێ ئێڤارا سار، تە بێخێرییا خۆ ل من باراند. ئەز ل هیڤییێ نەبووم تو ببیە «زۆحاکەک» و دلێ من ژ سینگی دەرئینی دا کو تێهناتییا خۆ ب خوینا من بشکێنی. من هزر دکر تو دێ بیە سهیوانەک ل هنداڤی سەرێ من، نەک ل چەپەرێن جەنگی هەردو پێ یێن من بشکێنی.
پشتی پێشکەستنا من، من چەپەرێن خیانەتێ بۆ تە هێلان. ل بەرامبەر تە، ب وان پێ یێن شکەستی، من قەلغانەک ل بەر سینگێ خۆ دانا. هندێ موکوم کو ئەگەر فیشەک و گولەیان ژی ل من ببارینی، نەشێی دوبارە من بکوژی.
من بڕیار دا ب وان پێ یێن شکەستی ڕاوەستم دا کو فێری تە بکەم و بیژمە تە: سەرفەرازی ئەوە تو ب برینێن خویناوی ڤە ڕاست ببیەڤە، بەلێ سەرێ خۆ ل بەر دلۆڤانییا خاینان نەچەمینی. ئێدی پێدڤی ب وێ ڤیان و دلۆڤانییا تە یا خویس نینم.

درەنگی شەڤ بوو، هەمی تشت ل دەوروبەرێن وێ د ناڤ بێدەنگییەكا گران دا نقۆ ببوو. ئەو بتنێ ل كوژیكێ ژۆرا خۆ روینشتبوو، تاریاتییێ وەك مێڤانەكێ نەخواستی هەمی جه گرتبوو، تنێ تیشكەكا لاواز یا هەیڤێ نەبیت كو ژ كنارێن پەنجەرەیێ ب دزی ڤە دڕژیا ناڤ ژۆرێ. ئەو نە دشیا بنڤیت؛ چونكی تاریاتییا ناخێ وێ ژ یا ژدەرڤە كویرتر و دژوارتر بوو.
د وێ بێدەنگییا كویر دا، تشتێ بتنێ هاتنوچوون دكر هەناسەیێن وێ یێن گران بوون. هەر هەناسەیەك وەك چەكووچەكی ل دیوارێ سار و بلند یێ بێدەنگییێ دا. روحا وێ ئێدی نەدشیا بەرگرییا ڤێ بێزارییێ بكەت، وەك بالندەیەكێ بریندار د قەفەسەكا تاری دا دنالیت، روحا وێ دەست ب شكاندنا وێ قەفەسێ دكر.
وێ وەسا هەست پێ دكر كو ژۆر ب سیبەرێن ڕابردووی هاتییە هونین. ئاوازا هەناسەیێن وێ دگەل لێدانێن دلێ وێ ببوو سترانەكا غەمگین كو بتنێ دیوارێن ژۆرێ تێدگەهشتن. وێ دزانی كو ئەڤە نە تنێ روینشتنەكە، بەلكو گەشتەكا كویرە بۆ ناڤ لاپەڕێن ژیانەكا گەلەك جاران تێدا بەرزەبووی.
هێدی هێدی رۆندكەكا گەرم رێكا خۆ ل سەر كولمێن وێ ددیت و دناڤ تارییێ دا ڤەپەشی. ئەو تێدگەهشت كو نە بێدەنگە، نەبوونا دەنگییە بەلكو جۆرەكێ دی یێ قیژییێ یە. وێ دڤییا باخڤیت، دڤییا هەوار بكەت، بەلێ دزانی كو هندەك جاران پەیڤ گەلەك یێن كورتن و نەشێن بارێ خەمان هەلگرن. ئەو د وێ شەڤێ دا فێر بوو كو روحا مرۆڤی جاران پێدڤی ب تاریاتییێ هەیە، دا كو ستێرێن هیڤیان د ناخێ خۆ دا ببینیت.
دەمێ سپێدێ رۆناهییا خۆ ل پەنجەرەیێ دای، ئەو ئێدی هەمان ئەو كچا بەری دەمژمێرەكێ نە بوو، وێ بێدەنگی شكاند، نە ب ئاخفتنێ، بەلكو ب وێ قەبوولكرنا كو دناڤ تاریاتییێ دا دیتی، وێ دزانی كو هەر شەڤەكا تاری، دەستپێكەكە بۆ رۆژەكا نوو كو تێدا ب هێزتر ل هیڤی یێن خۆ بگەڕیت.

دگەل ئێڤارییەكا
ژی كورت و بێ‌ زمان
بێ‌ هەلویست و پڕ ب گۆمان
بێ‌ وەغەر و پڕ ب مژ و دۆمان
بێ‌ دل و دل پڕ كۆڤان
بێ‌ ناخ و ناخەك پڕ ژ چیڕۆك و ڕۆمان
ب شەڕ و جەنگ چووم..
هەر زوو ڕاكێشام
ڕاكێشامە بەرامبەر تابلۆیەكا دەم ئێڤاری
د چاڤێن وێ‌ دا دەریایەكا ڕۆندكان
بێ‌ كو ل سەر روومەتان
ببن سیلاڤ و
ل سەر لێڤان ب مەهن
د دل دا هزار برین
بێ‌ كو دلۆپێن خوینێ‌
ل وێ‌ نەقەبا كویر ب پەنگن
پێشبەری وێ‌ رێكەكا درێژ
پێنگاڤێن خرچ و خاڤ و كورت
بێ‌ كوو ببەزیت
ڕستكەكا ب خلفان ڤەهاندی
گەردەنا وێ‌ توند پێچابوو
بێ‌ كو بۆ ئێك چركە سست ببیت
بازنكێن هەردو دەستان
دناڤ ئێك دا چووینە خار
بێ‌ كو ژ ئێكودو بخۆن و ب دەرزن
داڤێن پرچا وێ‌ نیڤ سپی و رەش
نیڤا دی پڕ بەلاڤن
بێ‌ كوو بۆیاخێ‌ هەمبێز كربن
ژ نشكەكێ‌ ڤە تابلۆیێ‌ لڤینەك كر
ب بێ‌ دەنگی و
دەنگێ‌ بێ‌ دەنگییێ‌
ئازار و هێزە.

پاشـــایێ عـــەرش و ئـــەسمانا
خەلاتكه ڤــــان گـــەنـــج و زانا
بـــەخــتــەوەری هـــەر ئەڤەیه

خــودێ دزانـیـت نــیـــازا مـــه
هەر بەهــەشتــه داخـــوازا مه
تاعەتێ مـــه بـــەس بــۆ تەیه

تو یێ مەردی و تو رەحمانی
خــودان گــەنجین و سامانی
دەولـەمــەنــدی هـەژی تەیه

ئـــەم د هـەژارو بـەندەوارین
بۆ رەحمـــا تـــه ئەم نەچارین
خودێ قــەبوولكــه ڕۆژییا مه
هندی بكـــەیـن هەر یا كێمە
بۆ گـــازییـا تە هەردەم لێمە
ئـــەڤ دنیایه مولكێ تەیه
١١/٣/٢٠٢٥

ل گۆشەکا ژۆرا وی یا تاری سندوقەکا داری یا کۆن هەبوو، مام حەجی هەر جار دەمێ دلێ وی تەنگ دبوو بەرێ خۆ ددا وێ سندوقێ کو دناڤ وێ سندوقێدا وێنەیەکێ ڕەش و سپی هەبوو کو ڕەخێن وی ژ بەر کین و رەقیا زەمانی پەرچقینە. وێنەیێ خێزانەکا بەختەوەر بوو ل بەر دەرگەهێ مالەکا گوندی بەری شەڕ و دەربەدەری هەمی تشتان ژ ناڤ ببەت.
مام حەجی ب تبلێن لەرزۆک دەستێ خۆ ل سەر وێنەی دئینا و دگۆت: ئەڤە ئەو مالە بوو کو مە دگۆتێ بەهەشت… ئەڤە ئەو کەس بوون کو بێهن ب وان دهات، د وێنەی دا کچەکا بچووک یا ل بەر کەیفان دکەنی.
بەلێ مام حەجی دزانی کو ئەو کەنی یە ل ژێر ئاخێ هاتیە ڤەشارتنێ، وێنە ل دەف وی مایە، هەمی شەڤان وێنە دبوو هزار خەم و دکەفتنە سەر ملێن وی، دگۆتە خۆ: ما وێنە ژی دبنە بار؟. بەلێ هەر جار وی دخواست کو وێنەی ڤەشێریت، دلێ وی ڕێ نەدایێ، ئەو وێنە تنێ تشت بوو کو دهێلا مام حەجی هەست بکەت هێشتا یێ زێندیە، ئەگەر چ هەمی تشتێن د ناڤ وێنەی دا ببوونە یادگارییەکا سۆتی.