ئایه‌ زه‌ین، خانمه‌كا شێوه‌كاره‌، دبێژیت: ئه‌ز ب شێوازێ سوریالیستی كاردكه‌م و من حه‌ز ل سه‌ر هندێ هه‌یه‌ كارێن من راسته‌وخۆ نه‌بن، به‌لكو د هزری بن و بینه‌ری هانبده‌ت لێكدانه‌كا تایبه‌ت بۆ بكه‌ت، هه‌روه‌سا هه‌ر ژ زارۆكینیێ من حه‌ز ل سه‌ر هونه‌ری هه‌بوو، د ده‌مه‌كی دا ئه‌ڤ تایبه‌تمه‌ندیه‌ وه‌ك هێزه‌كا ژ ناڤدا ل گه‌ل من مه‌زن بوویه‌ و به‌رده‌وام گه‌شه‌كریه‌، هه‌روه‌سا ئه‌ز وێنه‌كیشانێ ب رێیه‌كا سه‌ره‌كی دزانم بۆ وان هه‌ستێن كو ب په‌یڤان نه‌هێنه‌ ده‌ربرین، دیسا هه‌ر كه‌ڤاله‌كێ ئه‌ز دروستدكه‌م، پشكه‌كه‌ ژ ئه‌زموونا من یا تایبه‌ت، هه‌روه‌سا ئه‌ز به‌حسێ ئه‌زموونا جڤاكی ژی دكه‌م، له‌وما كارێن من ب تنێ وێنه‌ نینن، به‌لكو چیرۆكن، به‌ری ئه‌ز ده‌ست ب چێكرنا وێنان بكه‌م، من هه‌لبه‌ست و دیتن و چیرۆكێن كورت ژی دنڤێسین، نوكه‌ ئه‌ز شیایمه‌ ئه‌ڤان دو جیهانا بگه‌هینمه‌ ئێك، جاره‌كێ وێنه‌یی دكێشم و پاشی ده‌قی ل سه‌ر دنڤیسم، جاره‌كێ ژی ژ ده‌قی ده‌ستپێدكه‌م بۆ دروستكرنا كه‌ڤالی.
ئایه‌ زه‌ین، گۆت ژی: سه‌ركه‌فتن ب تنێ ب شیانێن هونه‌ری ناهێته‌ پیڤه‌ركرن، به‌لكو ب وان شیانانه‌ یێن كو هونه‌رمه‌ند دشێت هزرەكێ یان هه‌سته‌كێ بگه‌هینیته‌ بینه‌ری، جوانیا دیتنێ ب تنێ پشكه‌كه‌، به‌لێ کارتێکرنا كاری ل سه‌ر هه‌ست و سۆزا خه‌لكی گرنگتره‌، هه‌روه‌سا جوداهیا ره‌نگێ كاری، پشكه‌كا سه‌ره‌كی یا ناسناما هونه‌رمه‌ندییه‌، ئه‌ز ب شێوازێ سوریالیستی كاردكه‌م و من حه‌ز ل سه‌ر هندێ هه‌یه‌ كارێن من راسته‌وخۆ نه‌بن، به‌لكو وه‌كی هزر بن كو بینه‌ری هانبده‌ت بۆ لێكدانا وی یا تایبه‌ت، هه‌روه‌سا ل ده‌مێ كاركرنێ ل سه‌ر كه‌ڤالان، گرنگییه‌كا زۆر ب هه‌ڤسه‌نگی و هه‌ڤره‌نگیا ره‌نگان دده‌م، ب ره‌نگه‌كی كو خزمه‌تا هزرێ یان هه‌ستی بكه‌ن، گەلەک جاران ژ هه‌لبژارتنا ره‌نگان ده‌ستپێدكه‌م كو د گونجایی بن بۆ ئه‌وان هه‌ستێن د وی ده‌می دا هه‌ین، هه‌روه‌سا ئه‌زموون و تێكهه‌لكرنا ره‌نگان هه‌تا گه‌هشتنا ئه‌نجامه‌كێ راست پشكه‌كا گرنگا وی كاری یه‌، له‌وما تێكهه‌لبوونا ره‌نگان زمانه‌كێ دیتره‌ بۆ ده‌ربرینا هه‌ستان.
ئایه‌ زه‌ین هێشتا دبێژیت: شێوه‌كاریا هه‌ڤچه‌رخ رۆحا سه‌رده‌مه‌كیه‌ و گۆهورینان نیشان دده‌ت، هه‌روه‌سا به‌حسێ كێشه‌ و هه‌ستان دكه‌ت، ئه‌ڤ جۆره‌ هونه‌ره‌ ته‌كه‌زیێ ل سه‌ر هزرێ دكه‌ت و هنده‌ك جاران ئه‌و په‌یامه‌ ژ جوانیا دیتنێ گرنگتر دبیت، هه‌روه‌سا هونه‌رێ هه‌ڤچه‌رخ ده‌رگه‌هه‌كێ ڤه‌كریه‌ بۆ داهێنانێ، كو هونه‌رمه‌ند دئینیت بۆ شكاندنا سنوران و ده‌ربرینا ئازاد یا هه‌ست و خه‌ونان، دیسا ئه‌ڤ هونه‌ره‌ دانوستاندنه‌كێ دروستدكه‌ت دناڤبه‌را كه‌ڤالی و بینه‌ری دا، كو هه‌ر كه‌سه‌ك دشێت وه‌كو خۆ لێ تێبگه‌هیت، هه‌ر چه‌نده‌ هنده‌ك جاران لێكدانا كاران نه‌ یا ب ساناهیه‌، به‌لێ ئه‌ڤه‌ ژی پشكه‌كه‌ ژ جوانی و نهێنیا وی.
ئایه‌ دبێژیت ژی: هنده‌ك جاران ته‌كنه‌لۆژیا دشێت كاریگه‌رییا نه‌رێنی هه‌بیت ل سه‌ر هونه‌رێ كلاسیكی، چونكی هنده‌ك كه‌س دئینن بۆ له‌زێ و ته‌مامكرنێ، ئه‌ڤه‌ دشێت بهایێ كارێ ده‌ستی و ئه‌زموونا تایبه‌ت كێم بكه‌ت، هه‌روه‌سا به‌لاڤبونا وێنێن دیجیتالی دشێت كێمكرنا په‌یوه‌ندییا راسته‌وخۆ ل گه‌ل كه‌ڤالێن راسته‌قینه‌ بكه‌ت، هه‌روه‌سا پرۆژێ من یێ نوو ئه‌وه‌ كو ئه‌ز هونه‌رێ خۆ پتر ژ ده‌رڤه‌یی كوردستانێ و عیراقێ گرنگیێ پێبده‌م، ب تایبه‌تی ژی رێكخستنا پێشانگه‌هێن شێوه‌كاری ل جهێن جودا، كارێن من ب ره‌نگێ سوریالیستی دهێنه‌ نیاسین، د پرانیا كارێن خۆ دا ئه‌ز شه‌تره‌نجێ وه‌كو ئیمزایه‌كا تایبه‌ت ب كاردئینم و هه‌ر كه‌ڤاله‌كی دكه‌مه‌ چیرۆكه‌ك ل سه‌ر بۆردێ شه‌تره‌نجێ، هه‌روه‌سا ئارمانجا من ئه‌وه‌ كارێن من نه‌كو ب تنێ ژ لایێ هه‌ستیڤه‌، به‌لكو ژ لایێ جوگرافیڤه‌ به‌لاڤ بكه‌م.
ئایه‌ زه‌ین، هونه‌رمه‌ندا شێوه‌كار، ل سالا 1995 ل كه‌ركووكێ ژ دایك بوویه‌ و نوكه‌ ل هه‌ولێرێ دژیت، د وارێ ئاڤاكرنا شارستانی دا قوتابیا ماسته‌رێیه‌ ل توركیا، زێده‌باری هندێ كو وه‌ك شێوه‌كاره‌كا سوریالیستی دهێته‌ نیاسین، كۆمه‌كا دیكۆراتیڤ یا كه‌ڤالێن جوان هه‌یه‌ كو جوانیا مالێ و ئۆفیسان دیاردكه‌ت، ئایه‌ پشكداری د پێنج پیشانگه‌هێن تاكه‌ كه‌سی و شه‌ش پێشانگه‌هێن هه‌ڤپشك دا ل ناڤخۆیا عیراقێ و پێشانگه‌هه‌كێ دا ل وه‌لاتێ عومانێ دا كرییه‌.

شاره‌زایه‌كا‌ بوارێ‌ گه‌نجان د دیدارەکێ دا بۆ رۆژنامەیا ئەڤرۆ دیار کر کو نها رولێ‌ گه‌نجان د چالاكیێن جڤاكی دا ب شێوازه‌كێ به‌رچاڤ بلند بوویه‌ و گۆت: د سه‌رده‌مێ‌ پێشكه‌فتن و ته‌كنو‌لوجیایێ‌ دا، گه‌نج یێن بوینه‌ هێزه‌كا چالاك و كاریگه‌ر د گوهۆڕینان دا.

هه‌دیا حسێن به‌رپرسا رێكخراوا رابه‌ ژ بۆ گه‌شه‌پێدانا گه‌نج و ئافره‌تان دیار كر، د ڤان سالێن ده‌ربازبویی دا ، رولێ‌ گه‌نجان د چالاكیێن جڤاكی دا ب شێوازه‌كێ به‌رچاڤ بلند بوویه‌ و گۆت: د قوناغا نها دا و د سه‌ر ده‌مێ‌ پێشكه‌ڤتن و ته‌كنو‌لوجیایێ‌ دا گه‌نج ژبۆ ئاریشه‌ و ئاسته‌نگێن جڤاكی بتنێ بینه‌ر نینن، به‌لكو یێن بوینه‌ هێزه‌كا چالاك و كاریگه‌ر بو پێشڤەبرنا گوهۆرینێن جڤاكی.
هەدیایێ گۆتژى: ئه‌ڤ بارودوخه‌ وێ‌ چه‌ندێ‌ دگه‌هینیت كو گه‌نجان هیز و شیانێن مه‌زن هه‌نه‌ ژ بۆ چاره‌سه‌ركرنا گه‌له‌ك ئاریشێن جڤاكی.
به‌رپرسا رێكخراوا رابه‌ دیار کر ژى، نها گه‌نج د چالاكیێن جورا و جوردا كار دكه‌ن و دشێن رۆلێ‌ خۆ د پێشڤه‌برنا جڤاكی دا ببینن ژ وان ژی بوارێ ژینگه‌هێ د ڤی بواری‌ دا گه‌له‌ك ژ گه‌نجان ده‌ستپێشخه‌ریا چالاكیێن پاقژكرنا ژینگەهێ دکەن و گۆت: پشكداریا گه‌نجان د ڤان جوره‌ چالاكیان دا وێ‌ چه‌ندێ‌ نیشان دده‌ت كو هشیاریا جڤاكی و به‌رپرسیارە‌تیا نەتەوەیی لدەف چینا گەنجان یا بهێزە.
هەدیایێ ئه‌و چه‌ند ژی دیار كر کو د بوارێ‌ خێرخوازی و هاریكاریێن مروڤایەتی دا و ل ده‌مێن قه‌یران و دۆخێن ئالوزدا، گەنجان رۆله‌كێ كاریگه‌ر هەیە، د ڤان بارودۆخان دا گه‌نج پشته‌ڤانیا خێزانێن هه‌ژار و ده‌ست كورت و ئاوه‌ره‌ و په‌رنابه‌ر و هه‌ر كه‌سه‌كی پێدڤی ب هاریكاریێ‌ بیت دكه‌ن و گۆت: ئه‌و ژ هاریكاریێن ده‌ستپێكێ‌ ده‌ستپێدكه‌ن وەکى خوارن و ڤه‌خوار، جلک و پێدڤیێن ژیانێ بۆ وانا دابین دكه‌ن، ئه‌ڤه‌ ژی ئه‌گه‌ره‌كێ گرنگه‌ د پاراستنا هه‌ڤپشكی و ئارامیا دناڤ جڤاكى دا.
هەدیا حسێن بەرپرسا ڕێکخڕاوا ڕابە د بەردەوامیا ئاخفتنێن خۆدا گۆت: گه‌نج هێزه‌كا سه‌ره‌كینه‌ د پێگه‌هاندنا جڤاكی دا، پشته‌ڤانیا چالاكیێن گه‌نجان ژلایێ‌ حكومه‌تێ‌ و جهێن په‌یوه‌ندیدار و ڕێكخراوانڤه‌ دشێن ببنه‌ بنه‌مایه‌ك ژ بۆ دروستكرنا جڤاكه‌كێ بهێزتر د پاشه‌رۆژێ‌ دا.

1- 8

دەمێ‌ نسكویا شەشی ئادارا سالا 1975ی ب سەر شۆڕەشا ئەیلۆنا مەزن دا هاتی، ل ئەوی دەمی پێشمەرگەیی چەكێن خۆە ڕادەستی حكومەتا ئیراقێ‌ كرن.
گەلەك ژ خەبكێ‌ كووردستانێ‌ بەر ب سنۆران ئاوارە بوون و خوە ڕادەستی دەستهەلاتا حكومەتا ئیراقێ‌ نەكرن، دگەل ئەڤێ‌ چەندێ‌ حكومەتا ئیراقێ‌ ل دەزگەهێن خۆە یێن ڕاگەهاندنێ‌ دا گوتن: شۆرەش ب دوماهیك هات و كورد خوە ڕادەستی حكومەتا ئیراقێ‌ دكەن، بەلێ‌ سەركردایەتییا شۆڕەشی ب تایبەتی پارتی دیموكراتی كوردستان د بەیانامەیەكێ‌ دا ڕاگەهاندن و گوت: ئاگرێ‌ شۆڕەشێ‌ نەڤەمریە و دێ‌ یا بەردەوام بیت، بەلێ‌ بۆ دەمەكێ‌ شۆڕەش هاتیە ڕاوەستاندن و كاروانێ‌ خەباتێ‌ دێ‌ بەردەوام بیت. بەلێ‌ هەر ل ئەوی دەمێ‌ هەژمارەكا كادرێن خوین گەرم و نیشتمان پەروەر ل دەڤەرێ‌ مان و دەست ب خەباتا نهێنی یا پارتی دیموكراتی كوردستان كرن، و هێلێن ڕێكخستنا نهێنی یا پارتی دناڤ خەلكێ‌ دەڤەرێ‌ دا بەلاڤكرن.
ل ڤێرێ‌ مە سەرەدانا مالا پێشمەرگەیی دێرین حاجی حەسەن ل زاخۆ كر و وەك ڕۆژنامەیا ئەڤرو مە ئەڤ دیدارە ل گەل ئەنجامدا، پێشمەرگەیی دێرین د بەرسڤا پرسیارێن مە دا وگۆت: ناڤێ‌ من حاجی حەسەن حاجی یێ‌ ناسیار ب حاجی حەسەن ماسێ‌ ل سالا 1957ی ل گونێ‌ تلكەبەرێ‌ یا سەر ب ناحیا زاگاری قەزا زاخۆ ژدایك بویمە. هەر وەسا دیاركر، ل سالا 1957ی بابێ‌ من پولیسێ‌ حكومەتا ئیراقێ‌ بوو و هەر د ئەوێ‌ سالێ‌ دا ب ڕیكا ماموستا جەمیل هاتبوو ڕیكخستن و دەمێ‌ شۆڕەشا مەزنا ئەیلۆنێ‌ ل سالا 1961ی دەستپێكری پلەیا بابێ‌ من دناڤ پولیسێن ئیراقێ‌ دا عریف بوو و ئەركێ‌ وی ل قەزا شرگات بوو، و ل پائیزا سالا 1961ی بابێ‌ من و دگەل خوارزایێ‌ خۆە مەحمود شاهین ب ترومبێلا پولیسا هینگێ‌ دگوتنە ئەوان جورە ترومبێلان موسەلەح ڤێجا بابێ‌ من و دگەل خوارزایێ‌ خۆە مەحمود شاهین ئەو ترومبێلا پولیسا بۆ باژێرێ‌ زاخۆ ئینان و هەتا ژ گەلیێ‌ زاخۆ دابورین و گەهشتن چەپێن جهەكێ‌ دبێژنێ‌ ئاڤەڕویكا ل وێرێ‌ ترومبێلا خۆە ل وێرێ‌ ژكار ئێخستن و ل ئەوی دەمی گوینەكی پارا یێن مووچەیێن پولیسا دگەل ئەوان بین و رپشتی ئەو پرومبێلا پولیسا ژ كار ئێخستین و ئەو مەبلەغێ‌ پارا دگەل خۆە برن و قەستا ناڤ ڕێزێن شۆڕەشا ئەیلۆنێ‌ كرن، و ئەو مەبلەغێ‌ پارا ڕاەستی ماموستا جەمیل كرن، و بابێ‌ من و گەل خوارزایێ‌ خۆە مەحمود شاهین هەر ئێكسەر دگەل هێزا زاخۆ بین پێشمەرگە و دەست ب خەباتا چەكداری كرن.
حاجی حەسەن پێشمەرگەیێ شۆرەشا 26ی گولانێ‌ هەروەسا گۆت: ل سالا 1964ی بابێ‌ من ژبۆ كارەكی پارتایەتیێ‌ بۆ باكورێ‌ كوردستانێ‌ چووبی و ل گوندێ‌ بلەهێ‌ ژلایێ‌ چەكدارێن لەشكرێ‌ توركیا ڤە هات گرتن، و ڕەوانەیی زیندانا باژێرێ‌ سێرتێ‌ هات كرن. هەلبەت ل ئەوی دەمی نامەیەكا دەست نڤیسین یا جەنابێ‌ كاك ئیدریس بارزانی د بەریكا بابێ مندا بوو، و ئەو نامە ژی دگەل بابێ‌ من ژلایێ‌ لەشكرێ‌ توركیا ڤە هاتگرتن و تومەتا بابێ‌ من گەلەك ل زیندانێ‌ دژوارتر بوو. پشتی بورینا ماوێ‌ هەیڤەكێ‌ بابێ‌ من ژ زیندانا باژێرێ‌ سێرتێ‌ بۆ زیندانا باژێڕێ‌ ئامەدێ‌ هات ڤەگوهاستن و زبندانكرن. ب ڕیكا ڕیكخستنا پارتی دیموكراتی كوردستان و كەسەك ب ناڤێ‌ حاجو قەلابا چوو باژێرێ‌ ئامەدێ‌ و گوتە حكومەتا توركیا ئەف كەسێ‌ هەوە دەستەسەر و زیندان كری ئەو كوڕێ‌ منە، و ل بەر تەرش و كەوالی یێ‌ هاتیە گرتن. ئەو بوو هەر ب ڕیكا ئەوی زەلامی حاجو قەلابا شیاب ابێ‌ من ژ زیندانا باژێڕێ‌ ئامەدێ‌ بۆ زیندانا باژێڕێ‌ قەلابا ڤەگوهێزن كو ئەڤی كەسی خوە كرە باب، و بابێ‌ من حەسەن كرە كوڕە خوە هەتا شیا ژ زیندانێ‌ ئازاد بكەت، كو ب مەرجەكێ‌ بابێ‌ من بۆ لەشكریا توركیا بچیت و ئەركێ‌ لەشكریێ‌ ل ناڤ حكومەتا توركیادا ب دوماهیك بینت، ئەو بوو دەمێ‌ بابێ‌ من هاتی ئازادكرن و هەر ئێكسەر بابێ‌ من قەستا كورستانێ‌ كر و بەردەوامی دا خزمەتا پێشمەرگایەتیێ‌، ئەو دەمێ‌ بابێ‌ من هاتی گرتن ماوێ‌ یەك سال نیڤا د زیندانا دەولەتا توركیادا ما و ل ئەوی دەمی سەركردایەتیا شۆڕەشا مەزنا ئەیلۆنا، بیرا من دهێت گەلەك هاریكاریا مە دكرن، و نەدهێلان چ كێماتی ل مە ببن و گەلەك پێكول ژی هاتنكرن كو هەتا شیان هەر ب ڕێكا رێكخستنا پارتی دیموكراتی كوردستان كو بابێ‌ من ژ زیندانێ‌ ئازاد بكەن. دەمێ‌ بابێ‌ من ژلایێ‌ دەولەتا توركیا ڤە هاتی ئازادكرن. هەر ئێكشەر بابێ‌ من قەستا مالێ‌ كر و دەمێ‌ هاتی بۆ مالێ‌ كەیفا گوندی و مروڤێن مە هەمیان هات وژنا تلیلی ڤەدان و زەلامان گولەیێن كەیف خوەشیێ‌ هاڤێتن، پشتی بابێ‌ من بۆ ماوێ‌ چەند ڕۆژەكان وەك بێهنڤەدان ل مالێ‌ مایی و پاشی قەستا بارەگایێ‌ سەركردە شەهید عیسێ‌ سوار ل گەلیێ‌ گوندێ‌ ئەرمشتێ‌ كر، هەلبەت بابێ‌ من بۆ ماوێ‌ سالەك پێنج هەیڤان ل زیندانا دەولەتا توركیا دا مابوو هەتا هاتی ئازادكرن.ل ڤێرێ‌ سەركردە عێسێ‌ سوار پێشەوازیەكا مەزن ل بابێ‌ من كر، ئەو بوو ئەركێ‌ بابێ‌ من یێ‌ پێشمەرگایەتیێ‌ بۆ گوندێ‌ سەناتێ‌ هات ڤەگوهاستن و بابێ‌ من بوو بەرپرسێ‌ زیندانا شۆڕەشێ‌ ل گوندێ‌ سەناتێ‌ و خودێ‌ ژێ‌ ڕازی مەلا عەبدولغەنی دەشتماسەكێ‌ ڕێڤەبەرێ‌ زیندانا شۆڕەشێ‌ ل گوندێ‌ سەناتێ‌ بوو.
هەر وەسا پێشمەرگەیێ‌ شۆڕەشا گولانێ‌ حاجی حەسەن ماسێ‌ دبێژت: ل سالا 1968ی فروكەیێن جەنگی یێن حكومەتا ئیراقێ‌ یا ئەوی سەردەمێ‌ گوندێ‌ دەحلكێ‌ ب مووشەكان ناپال بۆمبەبارانكرن و ل جهێ‌ ئەڤان مووشەكان چالێن مەزن وەكی بیرا ل جهێ‌ ئەوان دروست بوون. هەر وەسا جهێ‌ ڕەمیا فڕەكەیێن حكومەتا ئیراقێ‌ ئەوا ل گوندێ‌ دەحلكێ‌ كرین ژنەكا خەلكا گوندی بریندار بوو و زەرەر و زیانێن مەزن ب ئاقارێ‌ گوندێ‌ كەفت. هەر وەسا ل پائیزا سالا 1968ی مەفرەزەیەكا جاشێن سەر ب حكومەتا ئیراقێ‌ ب شەڤێ‌ بوسەیەك ل گوندێ‌ بەهینیێ‌ ل نێزیكێ‌ گوندێ‌ دەشتەتەخێ‌ دانان و د ئەگەرێ‌ دا پێشمەرگەیەك ب ناڤێ‌ حاجی شەرنەخی هات شەهیدكرن.

6-7

ئەز ب ڤێ‌ گەنجاتیێ‌ و د ڤی حالەتی دا هوسا دیتم و مە گەلەك دایك و بابێن خوە ئەشكەنجەدان و نەخوشی بۆ دروستكرن، و پشتی هاتیمە مال سالەكێ‌ ژی ژ مال نەدەركەفتم و بابێ‌ من شیرەت ل من دكرن و چ نینە و دڤێت بهێە ناڤ مرۆڤان و هەتا بیرا من دهێت بابێ‌ من چوو مامۆستایێ‌ ئاینی (مەلا عەبدولكەریم گویی) ئینا خودێ‌ ژێ‌ رازیبیت و چەند جاران هاتە مالا مە و گۆت ئەڤە سەرا شەرفێ‌ یە و ئەڤە نیشانێن شەرەفێ‌ نە و شانازیێ‌ ب خوە بەو مورالا من بلند كر، و ل دوماهیێ‌ من گۆت بوو من قودیەكێ‌ بینن دا بەرێ‌ خوە دەمە خو ئەو رۆژ بوومن گەلەك یا نەخوش بوو و دەمێ‌ من هوسا خوە دیتی بوو من گەلەك یا نەخوش بوو وهێدی هێدی ئەز دەركەفتم و چوومە ناڤ مرۆڤان .
هێشتا گۆت: پشتی دەركەفتیم ژ زیندانێ‌ ب دو سالان ئانكو ل سالا 1984 من خێزان پێكئینا و برایەك ژ من مەزنتر بوو بەلێ‌ بابێ‌ من گۆت بەراهیێ‌ دێ‌ بووتە ژنێ‌ ئینم و مرۆڤەكا مە سوپاسی یا وێ‌ دكەم و مە خێزان پێكئینا.
ل دۆر نەخوشترین رۆژێن زیندانێ‌ ژی، زیندانیێ‌ سیاسی عەبدولواحد ئەحمەد سیاری گۆت: مە گەلەك دیمەنێن نەخوش دیتن ل زیندانێ‌ ،بەلێ‌ نەخوشترین دیمەن دژیانا من دا ل هەیئا كەركووكێ‌ یا تایبەت هەكە هڤالێن مە ئەڤێن سێدارێ‌ ژناڤ مە گرتین و برین و مە ئێكو دو هەمبێزكرین و پشتی هاتیمە ئازادكرن ژی گەلەك دیفچوون ل سەر من هەبوو و گەلەك جاران چاڤدێری یا مە دكر و پشتی دەركەفتیم بابێ‌ من دوكانەكا پێلاڤا بوومن ڤەكر وبەرامبەر من ئێكی دگۆتنێ‌(حجی سەلیم) دوكانەكا ئاهێن خوارنێ‌ و ئیسفەنج فرۆتن و سپێدەهكێ‌ زوی من دوكان ڤەكر و ئێكی ترەكتورەكا ئاخێ‌ كربوو جوكێ‌ دا ئاڤاهیێ‌ نالبەندی خانی ل پشت بوون بۆ كارەكی ئەو ئاخ ئینا بوو و گونتلێن ئاخێ‌ بوون و ئێكی ل سەر وی دیواری نڤێسی بوو كوردستان یان نەمان و ئێكێ‌ ئەمنێ‌ هات و خەلك هەمی نیاسن بەلێ‌ ناڤێ‌ وی ناهینم و هاتە دەف من گۆت ئەڤە چیە ل سەر ڤێرە نڤێسی من گۆتێ‌ نوزانم گۆت چەوا نوزانی؟ تۆ نوزانی من گۆتێ‌ ئەز نوزانم و ئەز و ئەو ماینە ب ئێك ڤە و من گۆتێ‌ من نەنڤێسی یە و دێ‌ چەوا نڤیسم و دەستێ منێ‌ سەقەتە و گۆت تە ب دەستێ‌ دی نڤێسی یە و ئەم یێ‌ ب ئێك و دو ڤە مە دیت (حەجی سەلیم سەرەروی) خودێ‌ ژێ‌ رازی بیت بابێ‌( وەحید، سەردار، جەلال) هات ئەمێ‌ جرە كەین و حەنەفیەك ل وێرێ‌ بوو سوندە پێڤە بوو و مرۆڤەكێ‌ ب عەمر بوو و خواند و نڤێسین زانی بەلێ‌ دخوە نەئینادەرێ‌ خوند و نڤێسینێ‌ دزانم راست سوندە هاڤێتە وێ‌ نڤێسینێ‌ وێ‌ تەقنێ‌ وگونتلێ‌ ئاخێ‌ و نەشافەك وێرێ‌ بوو لێدا و ئەوێ‌ ئەمنێ‌ گۆتێ‌ نە نە حەجی ئەو ئێكی نڤێسی یە ئەوی گۆت بابێ‌ ئێكی هندەك تەپكێن ئاخێ‌ ل دیوارێ‌ من داینە و باوەربكە ئەگەر وەنەكربا رەنگە ئەم هەر دو برباینە ئەمنێ‌ و گەلەك گڤاشتن ل سەر مە هەبوون پشتی ئازادكرنێ‌ ژی و دیفچوون ل سەر هەمی زیندانیێن سیاسی هەبوو.
زیندانیێ‌ سیاسی عەبدولواحد سیاری بۆ بەرپرێ‌ دیرۆكێ‌ رۆژناما ئەڤرۆ گۆت: هەستەكێ‌ گەلەك خوش بوو دەمێ‌ كەنالێ‌ رووداو بەلگە فلمەك ل سەر رێكخستنێن نهێنی ل وی سەردەمی دروستكری و بیرا هەڤالێن من شەهید ئینان و دەمێ‌ ئەز بیریا هەڤالێن خوە دكەم دلێ‌ من گەلەك نەخوش دبیت و جارەكادی ئەو بیر دهێنە بیرا من دەمێ‌ ئەم ل ئومبلانسێ‌ دا هاتینە سۆتن و گەلەك قەهرم و هەمان دەم كەیف خوشم ژی سلاڤ و رێز بۆ مالبات و زارۆكێن ئەوا شەهیدان و هەمی شەهیدێن كوردستانێ‌ و خوشحالم خەلكێ‌ مە ئەڤی بەلگە فلمی ببینت دا بزانن ئەڤێ‌ رژێمێ‌ چ ب سەرێ‌ خەلكێ‌ مە ئینایە و چ ب سەرێ‌ باب و باپیرێن وان ئینایە.
خویشكا زیندانیێ‌ سیاسی عەبدولواحد بناڤێ‌ فەوزی یا سیاری، گۆت: پشتی برایێ‌ مە سۆتی بابێ‌ مە سێ‌ هەیڤان نەهێلا ئەم بچینە هنداڤ سەری و گۆت نابیت هوون سەرا بدەن و پشتی بورینا سێ‌ هەڤیان ئەز و ژن ماما خوە پێكڤە چووین و من گۆت ئەڤە چ پاتێن رزی و پیسن ل سەر لەشێ‌ برایێ‌ من دەست و زك و پێ‌ و هەمی لەشێ‌ وی بگشتی و دەركەفت هەمی گوشتێ‌ لەشێ‌ وی و هەر هەمی رزی بوو و بابێ‌ من دا بكلینسێ‌ پاقژ كەت، دوڤدا هەرو سێ‌ ستلێن كێم و خوینێ‌ ژێ‌ پاقژكرن، سالەكێ‌ زیندانی یا كەركووكێ‌ و دوڤدا ل نەخوشخانا بەغدا ژی جارەكێ‌ مە سەرەدانا وی كر و پشتی لێبورینا گشتی ژی ژیانا وی یا نەخوش بوو و هەر ملحەم ل سەر لەشێ‌ وی بوون و سوپاس بۆ خودێ‌ نوكە برایێ‌ منێ‌ ساخە و دناڤ زارۆكێن خوە دا دژیت.

د ئه‌ڤی سه‌رده‌می دا شاشه‌یێن موبایلان بۆینه‌ بازارێن سه‌ره‌كی یێن ریكلامێ‌، دیاردا ناڤدارێن سوشیالێ‌ وه‌كو هێزه‌كا كاریگه‌ر سه‌رهلدایه‌، به‌لێ‌ ئه‌ڤ هێزه‌ گه‌له‌ك جاران ژ ئاراسته‌یێ‌ خۆ یێ‌ درست دەردکەڤیت، ژبەرکو هنده‌ك بەرنیاسێن سوشیالێ بو ریكلاما هه‌تكا خۆ دبەن.

هینكا محه‌مه‌د ئێک ژ بەرنیاسێن سوشیال میدیایێ‌ یە و كارێ‌ ریكلامان ژی دكه‌ت بۆ ڕۆژنامەیا ئەڤرۆ دیار کر کو راسته‌ هنده‌ك بەرنیاسێن سوشیال میدیایێ دكانداران نه‌چار دكه‌ن كو ریكلامێ‌ بۆ کەلوپەلێن وان بكه‌ن و گۆت؛ نوكه‌ ئه‌ز بچم ریكلامێ‌ بۆ جهه‌كی بكه‌م و ل سه‌ر ئه‌وی پوستێ‌ من ریكلام بۆ كری ئه‌وی جهی تاك بكه‌م ئه‌و بەرنیاسە دێ‌ چنه‌ دناڤ مالپه‌رێ‌ من دا و ل گه‌ل ئه‌وی جهی ئاخڤن یێ‌ من بو ریكلام كری و دێ‌ داخازا ریكلامێ‌ ژێ‌ كه‌ن، هه‌تكا مه‌ژی دبه‌ن و یا خوه‌ ژی دبه‌ن.
هینکایێ گۆتژی؛ دەمێ دچنه‌ ریكلامان ژی دبێژنێ‌ پارا نه‌ده‌ مه‌ دێ‌ بخوه‌ كه‌ل و په‌لان راكه‌ین و دێ بتنێ‌ ستوریه‌كی چێكه‌ت و دێ‌ هند كه‌لوپه‌لان بخو راكه‌ت پتری وی كاری یێ‌ وی كری و خودانی دكانێ‌ بکاردئینیت، خوه‌ گه‌له‌ك ره‌زیل دكه‌ن و مخابن بۆ وان كو ئەڤان كاران دكه‌ن ب بهانه‌یا ریكلامێ‌ خوه‌ به‌رنیاس دكه‌ن و هنده‌ك كارێن دی دكه‌ن.
هینکایێ گۆتژی؛ ستێر و بەرنیاسێن سوشیالێ‌ دڤێت د سەنگین بن، نوكه‌ كه‌سێن به‌رنیاس پتر لێهاتینه‌ ژ كه‌سێن نورمال.
زاهیدا مزوری، فه‌رمانبه‌رە دیار کر کو ئه‌و كه‌سێن ئه‌ڤان كاران دكه‌ن و خودانێن دکان و مارکێت و پێشانگه‌هان بکاردئینن گه‌له‌ك زێده‌ بووینه‌ دناڤ جڤاكی دا و كارتێكرن ل داب و نه‌ریتێن كوردی كرینه‌ و كارتێكرن ل بازاری هه‌موویێ‌ كریه‌ ب تایبه‌ت ئه‌وان به‌رهه‌مێن ئه‌و ریكلامێ‌ بۆ دكه‌ن و گۆت؛ بدیتنا من چ راستی بۆ نینه‌ و باوه‌ریا خه‌لكی ژی ب ئه‌وان به‌رهه‌مان ناهێت یێن ئه‌و ریكلامێ‌ بۆ دكه‌ن.
ڤه‌ده‌ر سالم ماموستایە دیار کر کو نه‌ بتنێ‌ د جڤاكێ‌ كوردی دا به‌لكو د هه‌ر جڤاكه‌كی دا چاڤێ خه‌لكی پتر ل كچێ‌ یه‌ ده‌مێ‌ ریكلامێ‌ دكه‌ن و راسته‌ ل ئه‌ڤێ‌ دووماهیێ‌ گه‌له‌ك كچ و كور ل سوشیال میدیایێ ده‌ركه‌فتینه‌ و ب كارێ‌ ریكلامێ‌ رادبن و دبیت كارێ گه‌له‌ك ژ وان ژی نه‌ ریكلام بیت.
ڤەدەر دا زانین ژی، ده‌مێ‌ ئەڤ کەسە دچنه‌ دكانانڤه‌، یان هه‌ر جهه‌كی دێ‌ بێژنه‌ خودانی دێ‌ بو ته‌ ریكلامێ‌ كه‌ین بهای كێم بكه‌ یان تشتا بەلاش بدە مە و ل ئه‌وی ده‌می ئه‌و دكانداره‌ دكه‌ڤیته‌ كراسێ‌ شه‌رمێ و دبیت ئه‌و خودانێ‌ دكانێ‌ پێدڤی ب ریكلامێ‌ ژی نه‌بیت.
ڤەدەر د بەردەوامیا ئاخفتنێن خۆدا گۆت؛ به‌لێ‌ هه‌كه‌ ب دلێ خودانی نەبیت دڤێت ب ئاخفتنه‌كا جوان و كورت ئه‌ڤێ سوحبەتێ ڤەبڕیت، هەروەسا گرنگه‌ ده‌مێ‌ جڤاك دكه‌ڤیته‌ هه‌لویسته‌كێ‌ وه‌سا خوه‌ زویكا ژێ‌ ب دوماهیك بینت و ده‌لیڤێ‌ نه‌ده‌ته‌ ئه‌وی كه‌سی پتر یێ‌ زال بیت ل سه‌ر ئه‌وی و نه‌چار بكه‌ت ریكلامێ‌ بو بكه‌ت.

5-7

ل بەغدا ئەوێ‌ پێشمەرگە ب رێڤەدانا و مە نەزانی كیڤە بوو و ئەز و ئەو كورێ‌ دی هەر دو برینە پشكا سنێلان و كارمەندێن وێ‌ پشكێ‌ گۆتن دێ‌ ڤی وەرگرین بەلێ‌ ئەڤێ‌ دی جەنازە یە و ئەم دێ‌ چ ل ڤی كەین و ئەوا گۆتن هەرن ببنە نەخوشخانا (ئەبو غورێب) وەك پێشتر من ئاماژە پێكری كو پشتی گەلەك واستەكاری یا مالباتا مە گەلەك وەستەگرتین و پارەكێ‌ مەزن مەزاختی هەتا ژ كەركووكێ‌ هاتیمە ڤەگوهاستن بۆ نەخوشخانا زیندانا (ئەبو غورێب) ل باژێرێ‌ بەغدا هێشتا برینێن من ساخ نەبووینە و نەشێم خوە ل سەر پێن خوە بگرم و ئێك ل وێرێ‌ بوو ناڤێ‌ وی ( مەحمود) بوو خەلكێ‌ خانەقین بوو و ڤێگاڤێ‌ ژی فەزلێ‌ ڤی مرۆڤی گەلەك ل سەر من هەیە، زیندانی بوو سزایێ‌ وی هەتا هەتایێ‌ بوو و هەمان دەم خزمەت گوزار ژی بوو و هاتە دەف من و دلێ‌ وی گەلەك ما ب من ڤە و دەرمان ل نەخوشخانا (ئەبو غورێب) نەبوو وی گۆتە من دێ‌ تشتەكی بێژمە تە گوهێ‌ خوە بدەمن و من گۆتێ‌ خێرە گۆت بڤی رەنگی دێ‌ ل ڤێرە مری و ئەگەر تو گوهێ‌ خوە بدەیە من دێ‌ سوباهی دێ‌ رێڤەبەرێ‌ زیندانێ‌ هێتەڤێرە و ژڤانە بهێت و رێڤەبەرێ‌ ساخلەمیێ‌ و چەند بەرپرسێن ساخلەمیێ‌ و رێكخروەكا ماف مرۆڤی یا كارتوونی هەبوو دهێنە ڤێرە و ئەگەر هاتن دێ‌ تە راكەم ژ پیر ڤە و تو بێژە وان بۆ خاترا خودێ‌ چارەكێ‌ بوومن ب بیین و من گۆتێ‌ ئەگەر رابمە ڤە پێن من هەمی سوتینە و دێ‌ پێن من پەقن و دێ‌ خوین ژێ‌ هێت گۆت بلا مرنا جارەكێ‌ بیت و ئەگەر نە دێ‌ ل ڤێرە مری و گوهێ‌ خوە بدە من و یێ‌ رویسم و چ ل بەر من نینە وەكی وی گۆتی سپێدێ‌ چەندین كەس هاتنە ژوور ڤە وەكی هولەكا مەزن بوو و ئەو هاتە دەف من و ملێن من گرتن و پێن من ل سەر تەختی ئینانە خوارێ‌ و راكرمە شپێرڤە و پێن من پەقین و خوین ژ كاشی چوو و جهێن سۆتی پەقی و خوین چوون و هەر هەمی هاتنە دەف من و من بزمانێ‌ عەرەبی گۆتێ‌ بۆ خاترا خودێ‌ چارەكێ‌ ل من بكە و گۆت ئەڤە چەندە سۆتی من گۆتێ‌ سالەك وشنی گۆتن ب ئومبلانسێ‌ ببنە بەغدا وشنی برمە نەخشخانا (كەرخ) وی دەمی شەرێ‌ ئیراق و ئیرانێ‌ بوو و هەیڤا نەه بوو سالا 1981 بوو و دەمێ‌ هاتیمە ڤەگوهاستن بۆ وێ‌ نەخوشخانێ‌ بریندارێن شەری ل وێرێ‌ بوون وشنی ل وێ‌ نەخوشخانێ‌ پیچەكێ‌ چارەسەریا من هاتەكرن، ل كەركووك و ئەبو غورێب هەر چارەسەری نەبوو و پشتی ئینایمە نەخوشخانا (كەرخ) نوژدارەك ل وێرێ‌ بوو دگۆتنێ‌ د. (شەوقی فوزی یوسف) مەسیحی بوو و تایبەتەند بوو و هاتە هنداڤ سەرێ‌ من و هەمی نوژدار و برین پێچ ل گەل خوە ئینان و پرسیار ژ من كرن و من گۆتێ‌ ئەڤە سالەك سۆتیم و گۆت ئەڤە سالەك ڤی حالی دا و بیرا من دهێت دەمێ‌ ئەو نوژدار ل هنداڤ سەرێ‌ من كومكرین و هەمی دگۆتە ئێكی كەس هوسا ل حەیوانا ژی ناكەتە هەنە و (9) هەیڤا مەمە ل وێ‌ نەخوشخانێ‌ و هەتا سالا 1982ێ‌ ل نەخوشخانێ‌ ژی (9) هەیڤان یێ‌ كلامچە كری بووم د دەستێ‌ ئەوان دا و سالەك و (9) هەیڤان ئەزێ‌ ب تەختان ڤە كلامچە كری بووم و هێشتا برینێن من مابوون هاتمە رەوانەكرن بۆ زیندانیا سنێلان و زێرەڤانی ل من گرت وی نوژداری دگۆت دێ‌ بزاڤا كەم تۆ ل ڤێرە بی چونكە ڤێرێ‌ بووتە خشترە ژ زیندانێ‌ و گەلەك بریندارێن شەرێ‌ ئیراق و ئیرانێ‌ ئینان و هێشتا خوین ب لەشێ‌ من ڤە ئەز ژ نەخوشخانێ‌ دەرخستم و ەك پێشتر من ئاماژە پێكری هاتمە ڤەگوهاستن بۆ پشكا سنێلان و هەیڤا شەش بوو و دەمێ‌ بریمە زیندانیا سنێلان هێشتا برین لەشێ‌ من بوون و برمە هولا چاڤەرێ‌ بوونێ‌ و ئەز ژی بریندارم و كورەك بناڤێ‌(مراد نێروەیی) سلاڤ و رێزێن من بۆ وی ئەو ژی هاتبوو سزادان ب (15) سالان و زارۆكێن عەرەبان یاری پێدكرن و ئەوی ژی دو بۆ سێ‌ كەسان ل وێرێ‌ قوتان و یێ‌ زیرەك بوو و من خوە پاراست و من گۆت ئێك ب من بكەڤیت دێ‌ برینێن من نەخوشتر لێ‌ هێن و كورەك ل وێرێ‌ بوو خەلكێ‌ كفری بوو بناڤێ‌(شوكر) سلاڤ و رێزێن من بۆ وی هەنە و گەلەك چاڤێ‌ خوە دا من و برینێن من دەرمان كرن، و چاڤدێری یا من دكر و گەلەك جاران سەرێ‌ من شوویشت و هەتا 17ی تەموزێ‌ ل سالا 1982ێ‌ ب لێبورینەكا گشتی هاتمە ئازادكرن، دوڤدا چوومە ئەورۆپا و ل وەلاتێ‌ هولاندا و ئەلمانیا و هەتا پشتی ئازادكرنێ‌ ژی ل بەغدا من نشتەگەری ئەنجامدان و هەتا نوكە من (23) نشتەگەری ئەنجامدان.
زیندانیێ‌ سیاسی عەبدالواحد ئەحمەد سیاری، بەحسێ‌ رۆژێن ئازادكرنا خوە ژ زیندانێ‌ دكەت و گۆت: دەمێ‌ لێبورنیا گشتی دایی بابێ‌ من تەوارا من هات كو من ل گەل خوە بینتە ڤە و دەمێ‌ هاتیە بەراهی یا من پسمامەكێ‌ بابێ‌ (حجی ئەحمەد سیاری) ئەو ژی ل گەل هات بوو كورێ‌ وی (حەسەن) خودێ‌ ژێ‌ رازی بیت نەمایە دژیانێ‌ دا ئەوژی ل (ئەبو غورێب) ل پشكا گران بوو و ئەم پێكڤە ئازادكرین و ئەم ل مزگەفتا (علاوی) ل بەغدا گەهشتینە ئێك و ئەم ب شەڤ چووینە مالا ئێكێ‌ مرۆڤێ‌ مە ل بەغدا و رۆژا پاشتر ئەم هاتینە دهۆكێ‌ و بابێ‌ من هاتیە، دویف من را و دایكا من كا دێ‌ چ سەرەدەری دكەت و دایكا من ل مال هندی قودیكەكا روناهیێ‌ هەیە ڤەشارت و هەلگریت و هەتا قودیكا بەر مەغسەلا دەست شوشتنێ‌ شكێنیت دا كەس نەچیتە بەر قودیكێ‌ ژ خویشك و برایێن من ژ بەر من و من خو نەدیتی یە و من سەرۆچاڤ نە دیتی نە و ئەم بەرێ‌ سپێدێ‌ هاتینە مال و دایكا من سەر نڤێژێ‌ بوو وەختێ‌ من دایكا خوە دیتی ناهێتە وەسفكرن و دایكا من نەهێلا چ برایێن من بچنە بەر قودیكا یان سەرێن خوە شە بكەن، وب چ رەنگان و گەلەك جاران ئەگەر پشتا وێ‌ كەفتبا من من دیت روندكێن خوە پاقژ دكرن.

4-7

هەمان زیندانیێ‌ سیاسی گۆت: جارەكێ‌ ناڤێ‌ هەڤال مە (بەدەل حەسەن عیسی) خواند و مە هزر دكر دێ‌ بەنە ئەشكەنجەدانێ‌ و پشتی بری و نێزیكی دەمژمێرەكێ‌ دەرباز بوو و زڤری، و خوت من وەركر و گۆت دێ‌ ئەم هیێنە ئازادكرن، و گۆت تۆ دزانی نوكە من كی دیت من گۆتێ‌ كی؟ گۆت (كازمێ‌ عەمەرخانێ‌ رێكانی) گۆت ئەو هاتیە واسەتەیێ‌ مەیە و دێ‌ هندەكێن وا رادست كەن و ئەم دێ‌ وەك پێ‌ گۆهور بەرامبەر هێینە ئازادكرن، و مەفرەزەكا (حجی سالح سپینداری) هەبوو و گۆت دێ‌ هێن خوە رادەست كەن، و بەرامبەر ئەم دێ‌ هێینە ئازادكرن و كەیفا مە وێ‌ رۆژێ‌ گەلەك هات و پاش ئەو هاتن خوە رادەست كرن و ئەم بەرامبەر نەهاتینە ئازادكرن ژی.
هەمان زیندانیێ‌ سیاسی گۆت: ل دووڤ گۆتنا ئەوان دگۆتن روودانەكا هاتن و چوونێ‌ دروست بوو و ترۆمبێلا پانزینێ‌ بوو و ئەڤە هەمی ناكەڤیتە ئاقلێ‌ من و 100% ئەو شوربا دایە مە دەرمانەك دناڤدا بوو و ئاگر هەمی بەر بوویە من و مە ئاگەه ژ خوە نەبوو، رێكەفتی 15/9/ ترۆمبێل ئومبلانس هاتبوو سۆتن و رێكەفتی 20- 21 من ئاگەه ژ خوە هەبوویە و من هەست پێكر ل سەر تەختەكی مە و دنیایێ‌ ژی نابینم ژ بەر ستۆنێ‌ و پێ خوە تلكێشم زنجیرەكا پێ‌ من ڤە و بزاڤا دكەم خوە ب قولپینم نەشێم وەكی كابوسەكی و من نەزانی چ ب سەرێ‌ من هاتیە و هەر من گازی هەڤالێن خوە دكر (سالح، بەدل، شادمان، رزگار) ئێك هاتە هنداڤ سەرێ‌ من و گۆت كورێ‌ من هوون سۆتینە و من گۆتێ‌ چەوا سۆتینە؟ و من گۆتێ‌ كا هەڤالێن من؟ دل نەدا بێژیتە من گۆت هەڤالێن تە ژ تە بریندارترن لەوما ئەو بۆ بەغدا هاتیینە ڤەگوهاستن و من گۆتێ‌ ڤێرە كیرێ‌ یە؟ گۆت كەركووكێ‌ یە، و دوڤدا ڤی كەسی وی بەحس كر و ناڤێ‌ وی (ئیسحاق) بوو و خزمەت گوزار بوو و خەلكێ‌ شقلاوە بوو و مەسیحی بوو بۆ بابێ‌ من بەحس كر و گۆتی دەمێ‌ جەنازێن هەر (10) كەسان ئیناینە نەخوشخانێ‌ و پزیشكی داد و نوژدار دێ‌ پشكنین كەن دا ئەگەرێ‌ روودانێ‌ بزانن و دەمێ‌ ئەم ل گەل چووین هێشتا روح ل كەلەخێ‌ (عبدولواحد) دا هەبوو و مە گۆت ئەڤە هێشتا یێ‌ ساخە و نوژداران گۆت ببنە سەر تەختەكی و گۆت دەمێ‌ مە تو ئینایە سەر تەختی هێشتا دەستێ‌ هەڤالێ‌ تە ب دەستێ‌ تە ڤە بوو یێ‌ كلامچە كری بوو و گۆت دووف دا ئەمن هات و گۆت جەنازەكێ‌ كێمە نوژداران گۆتێ‌ یێ‌ ساخە و نەمریە و گۆت ئەم نهاتن كلامچە كرە پێ تە و ب تەختی ڤە گرێدا و ئەوا كاودانان دا و لەشێ‌ من هەمی سۆتی یە و ئەو پێنچ رۆژ بوو هەر نەدشیا باخڤم و دو هەیڤان ژی هەر من دونیا نەدیت ژ بەر چاڤێن خوە و سەرۆچاڤێن من هەر هەمی سۆت بوون، و گۆت ئەو دەستێ‌ ب تە ژی ڤە سەر كلامچێ‌ ئینا و ب بوو خولی و هەتا نوكە شینوارێن كلامچێ‌ و سۆتنا دەستێ‌ من د دیارن و پشتی ئەنجامدانا (23) نشتەگەریان ل باژێرێ‌ هولەندا و سالا 1995 چوو مە دەرڤە.
هەمان زیندانی هێشتا گۆت: ژ ئەوا (10) كەسێن دناڤ ئومبلانسێ‌ دا هەر هەمی شەهید بوون و بتنێ‌ ئەز ژێ‌ مام و دەمێ‌ ئەم سوتین ئێكسەر ئەمنا كەركووكێ‌ پەیوەندی ب دهۆك و سلێمانیێ‌ كربوون و گۆت بوویێ‌ وەرنە جەنازێن خوە و ژ زاردەڤێ‌ بابێ‌ من گۆت پشتی ئەم هاتین و مە داخازا جەنازا كرین كا نوكە چ رەوش دانە هاتینە سێدارەدان یان كوشتن كا چەوانە رادەستی مە بكەن، بابێ‌ من گۆت ئێكی ب عەرەبی گۆت ئەڤێن سۆتی ؟ گۆت مە گۆتێ‌ چەوا سوتینە؟ گۆت بەلێ‌ هاتینە سوتن و هەر ل وێرێ‌ گۆت ئێكی گۆت كیش بابێ‌ عبدولواحدە؟ ئەڤ كەسە نەمریە و یێ‌ ساخە و ئەواژی ئەز نەنیاسیم كی مە و چەند دهاتنە دەف من و دگۆتن توكی تۆ مایە ساخ و من ناڤێ وە گۆت و ئەوا داخازا بابێ‌ من كر، بیرا من دهێت دنیایێ‌ نابینم و سەرۆچاڤێن من سۆتی نە و لەشێ‌ من هەمی یێ‌ سۆتی یە و بابێ‌ من دهێتە بەردەرگەهی دبێژیتێ‌ ئەڤە كورێ‌ تەیە و بابێ‌ من بەرخودەتێ‌ وی حالی دا و من چ سیما و چ لەش و ژ گەنجاتی و جوانیێ‌ بڤی رەنگی دیتم و من گوهلێ‌ هەیە و بابێ‌ من بێژیتێ‌ ئەڤە كورێ‌ من نینە و ئەڤە نە كورێ‌ منە و من ژ دەنگی بابێ‌ خوە نیاسی و من گازی كرە بابێ‌ خو و بەلێ‌ باب و ئەو رۆژ بوو من گەلەك یا نەخوش بوو یبرا من دهێت بابێ‌ من گەلەك و گەلەك بوو من كرە گری و بوو من گەلەك یا نەخوش بوو، دوڤدا بابێ‌ من گەلەك بزاڤكرن و چوونە ئەمنا كەركوكێ‌ و گۆت دێ‌ دەف بین هەتا دمریت چونكە كەس ل هیڤیا من نەبوو بمینم ساخ و مامە وی حالی دا و سالەكێ‌ مامە ل نەخوشخانێ‌ دا و سزایێ‌ مە دەركەفتیە (15) سال و ئەم سۆتین و هەر (9) هەڤالێن ل گەل من سۆتن و شەهید بوون و بتنێ‌ مایمە و گەلەك جاران كلامچە تێخستە دەستێ‌ من و من گۆتێ‌ بێخنە پێ‌ من چێترە و زنجیرەكا درێژ ئێخست بوویێ‌ ب تەختی ڤە گرێدا بوو و بابێ‌ من ئەو دهاتنە دەف من وسەر پشتێ‌ بوو و بابێ‌ من سەرو گوهی یا من دكر و بابێ‌ من سالەكێ‌ خوارن ب دەستی دكرە دەڤێ‌ من دا و مە گەلەك دایك و بابێن خوە ئێشاندینە گەلەك و گەلەك و سالەكێ‌ مامە ل كەركووكێ‌ دا و بابێ‌ من گەلەك واستە واستكاری گرتن و هەتا رێكەفتی 8/9/ 1981 ئومبلانسەك ئینا و برمە هەیئا كەركووكێ‌ و ل وێرێ‌ بریندارەك ل گەل من سیاركر و سێ‌ چار گولە ب پێن وی كەفت بوون، و هێشتا خوین پێڤە بووو ئێكێ‌ دی ژی دگۆتنێ‌(عەجیب) كورد بوو سەرا رێكخستنا ل مویسل گرت بوو ئەوژی ل گەل من ئینا و بەرەف بەغدا ڤە و دەمێ‌ ترۆمبێل ل تەسا دا قێریێن من چوونە بەر ئاسمانی و چ وەكی سۆتنێ‌ نینە و خوینا تێ‌ دهێت، ئەڤێ‌ دسینگێ‌ ئومبلانسێ‌ دا ئەفسەرەك بوو نوزانم دو زێرەڤان ل گەل بوون و فائیلە د دەستی دا بوون، و دگۆتە پێشمەرگەیێ‌ بریندار ئەڤێ‌ ل گەل مە تو چەوا گرتی و پرسیار ژێ‌ دكرن، و گەهشتە عەجیب كا تو كەنگی گرتی و چەوا بوو و تە چكریە و گەهشتە من و تە چكریە و من بزمانێ‌ عەرەبی گۆتێ‌ ئەزێ‌ د كاودان دا تو پرسیارا ژ من دكەی و دەنگێ‌ من بلند بیت و ئەو ژ من تورە بوو و گۆتە شوفێری هەرە و شوفێری گۆت رێكا بەغدا هەمی تەسەنە و رێكا دوزخورماتور و كەركووكێ‌ و چەند ل تەسەكێ‌ دا با من كرە هەوار ژ بەر برینێن خوە و شوفێری گۆت دێ‌ مریت ئەوی ئەفسەری ب عەرەبی ئاخفتن گۆتن و گۆت بلا بمریت و چ لێ‌ دهێت بلا وەلێ‌ بیت.

3-7

زیندانیێ‌ سیاسی عەبدولواحد ئەحمەد سیاری، زێدەتر گۆت: دەمێ‌ دبرمە ئەشكەنجەدانێ‌ هەر دگۆتە من ناڤێن هەڤالێن خوە بێژە و كێ‌ تێكەلیا هەوە دكر و هەر من دگۆتێ‌ ئەڤێن ل گەل من كرتین هەر ئەڤە نە و ئەوا دگۆت هێشتا بێژە وەكی ئەمنا دهۆكێ‌ و كا هەڤالێن قوتابخانێ‌ بێژە كی ل گەل تە بوون و من گۆتێ‌ من چ هەڤالێن دی نین و هەر من دگۆت ئەم كەفتینە دەستێ‌ رژێمێ‌ بلا كەسەكێ‌ دی نەكەڤیتە دەستێ‌ ئەڤان زالمان.
هێشتا گۆت: 7/9/1980 ل كەركووكێ‌ رۆژەكێ‌ سپێدێ‌ ناڤێن مە هەمیان گازی كرن و بەرا هەمیان ناڤێ‌ (خدر مستەفا هروری) كو بەرپرسێ‌ رێكخراوەكێ‌ بوو خواندن و ئەم رێز كرین وەكی رۆژا حەشرێ‌ بوو و ئەم (24) كەس بووین و دەمێ‌ ئەم ب رێزكرین مامۆستا (خدر مستەفا هروری) مرۆڤەكێ‌ ب خو ڤە بوو و ب چەند كەسان بەرا من بوو و كەسەكی دەستێ‌ خوە ل پاتكا وی دا و گۆتێ‌ كنف سێدارێ‌ چاڤەرێی تە دكەت و مامۆستا (خدر مستەفا هروری) گۆتێ‌ كانێ‌ یە كنفاتە ئەز ژێ‌ ناترسم؟ دەمێ‌ چووین دادگەهێ‌ سزایێ‌ سێدارێ‌ بۆ (9) كەسان دەرچوو ئەو ژی ( خدر مستەفا هروری، سالح سندی، وەیسی، تاهر، هادی، عبدوللا، محەمەد ئەمین رەشو) (7) هروری و (1) سلێڤانەی و (1) سندی بوو و ئەم برینە دادگەهێ‌ و بەری مە ببنە دادگەهێ‌ پرچێن مە هەمیان وەكی نەخشەی لێكرن و هندەكا رچا وان هێلا و هندەك ژێ‌ ڤەكر و گەلەك نەشرین كرن و بیرا من دهێت هەر ئێك ژ مە وێنەك بۆ گرت و ئەو وێنە ل فائێلێ‌ دا دا وێنێ‌ مە نەشرین بیت و ئەگەر سزایێ‌ سێدارەدانێ‌ بدانە سەر ژی دا ئەڤێ‌ بینت دلێ‌ وی پێ‌ نە سوژیت وەكی تاوانبارا دەركەڤیت و بیرا من دهێت دەمێ‌ وێنە بوومە دگرتن دا بێژنێ‌ چاڤێن خوە باش ژێكڤەكە سوندە ل هنداڤ سەرێ‌ مە بوو و ئەگەر تە چاڤێن خوە باش ژێكڤەنەكربانە وێنە بوو مە نەدهاتنەگرتن و دڤێت تە چاڤێن خوە باش و باش ژێكڤەكربانە دا دیمەنەكێ‌ نەشرین و نەشرین دیمە دەركەڤیت و ئەم برینە دادگەهێ‌ دادگەهەكا روتینی بوو و ئەڤە سێدارەدان و ئەڤە سێدارەدان وناڤێن هەر مە هەر (10) كەسان خواندن سێدارەدان ئەم (3) كەس خەلكێ‌ دهۆك بووین و (7) خەلكێ‌ سلێمانیێ‌ بوون و دوڤدا برگەكا دی خواند و گۆت سزایێ‌ سێدارەدانێ‌ ژ هەوە ناگریت چونكە ژیێ‌ هەوە دبن (18) سالیێ‌ دایە، ئەم ئەڤێن بچوویك (10) كەس بووین و گۆتن سزایێ‌ هەوە بوونە (15) سال و گەلەك كەیفا مە هات و ئەڤێن مەزن شەهید (خدر مستەفا هروری، تاهر، سەعید، عەبدوللا، هادی، سالح سندی، محەمەد ئەمین رەشو) هروری یا بتنێ‌ سێ‌ كەس نە سێدارەدان ئەو ژی ئەڤە بوون (مەكی هروری) سلاڤ و رێزێن من بووی سێدارەنەدا بەلكو هاتە زیندانكرن و (شوكری، سەلمان توڤی) ئەڤە هەرسێ‌ زیندانكرن و پشتی دادگەهكرنێ‌ ئەم هەمی زڤراندینە وێ‌ هول ڤە و ئەڤێن سزایێ‌ سێدارێ‌ بۆ دەرچووین و چاڤەرێی چوونێ‌ بوون هێشتا ئەوا دلەی دلێ‌ مەدا هەمان زیندانیێ‌ سیاسی گۆت: پشتی دادگەهێ‌ ئەم هەمی ئیناینە دژوورەكێ‌ ڤە و ئەڤێن سزایێ‌ سێدارێ‌ ژی بۆ دەركەفتین ئەو ژی ل گەل مە ئینانە وێ‌ ژوورێ‌ ڤە و ئەو گەلەك نەهێلانە ل گەل مە و بیرا من دهێت و ئەڤێن برینە سێدارێ‌ شەهید (تاهر، سەعید، خدر محمود) تایبەت شەهیدان(خدر محمود هروری و تاهر) وەكی مامۆستایێن مە بوون و گەلەك شیرەت ل مە دكرن و ژ مە مەزنتر بوون و شیرەت ل مە دكرن و ب چاڤێن برایێن مەزن و بابێ‌ سەحكرنە مە و گەلەك دلەی دلەی مە دا و مورالا مە بلندكر وبیرا من دهێت هەڤالەكێ‌ مەیێ‌ سلێمانیێ‌ ناڤێ‌ وی (جەزا) بوو دكرە گری و گۆت ئەز هاتمە زیندانكرن و ئەز ئێدی دایك و بابێن خوە نابینم، شەهید (خدر و تاهر) ب چاڤێن وی ڤە ماچی كر و دلەی دلێ‌ وی دا و بیرا من دهێت شەهید(خدر) دەمژمێرا خوە كرە دەستی وەك دیاری پێشكێشی وی كر، گۆتێ‌ هوون پاشەرۆژا مللەتێ‌ مە نە و دهێنە ئازادكرن و چاڤێ‌ وی ماچی كر و ئەڤ دیمەنە چ جارا پێش چاڤێن من ناچیت و هەر وێ‌ رۆژێ‌ برن و مە خواترا خوە ژ ئێك خواست و گەلەك دیمەنەكێ‌ نەخوش بوو و مەوی دەمی نەزانی و ڤێ‌ دووماهیێ‌ مە زانی ئینابوونە مویسل و 26/2/1981سێدارەدا بوون.
هەمان زیندانیێ‌ سیاسی ئەو ژی گۆت: پشتی زیندانیێن مەزن ژ ناڤ مە برین ئەو ژ مە مەزنتر بوون و مورالا مە بلندكر و ئێدی مە خوە دیت وەك بێ‌ سەمیان وەكی باب و برا شیرەت ل مەدكرن و پشتی ئەو برین گەلەك و گەلك بو مە یا نەخوش بوو و دوڤدا ئەڤێن هاتینە سزادان ژی برن و ئەم حەفتیەكێ‌ ماینە ل وی جهی و رۆژەكێ‌ سپێدە زی بوو و شوربە دامە و ئەم كرینە ئومبلانسەكێ‌ دا و ئەم دو دوە پێكڤە كلامچە كرین و ئەم برین و هێدی هێدی ب رێڤە مە ئاگەه ژ خوە نەما و وی دەمی ئەم زارۆك بووین و ئەم هەر (10) كەس دبن ژیێ‌ (18) سالیێ‌ دا بووین و كێمتر بووین و پشتی دادگەهكرنێ‌ سزایێ‌ سێدارێ‌ بوومە دەرچوو و ئەم رەوانەی نەخوشخانێ‌ كرین بۆ پشكنینا و دیاربوو كو ژیێ‌ مە كێمترە و لەوما گۆتن هەر ئێك ژ هەوە (15) سالان دهێتە زیندانكرن، دوڤدا پلانەك بووە هاتەدان و سپێدێ‌ شوربەك دامە و ئەزێ‌ ب گومانم ژ وێ‌ شوربێ‌ و ئەم كرینە ترۆمبێلەكا ئومبلانس دا و ب رێ ڤە ئەم گێژ بووین و ئەز سوتم و ئاگر بەربوو من و من ئاگەه ژ خوە نە و ئەگەر نوكە جگارەكێ‌ بەردەیە كەسەكی دێ‌ ئاگەه ژ هەبیت بەلێ‌ ئەڤ ئاگرە هەمیێ‌ بەربوویە من و من ئاگەه ژ خوە نەبوویە و پشتی بورینا شەش رۆژا من ئاگەهـ ژ خوە هەبوویە كو ل نەخوشخانێ‌ مە و پشتی بورینا دو هەیڤان هەر من دنیا نەدیت و دوڤدا هاتمە كەلامچە كرن و د دەستێن رژێمێ‌ دا بووم، هەڤالێن من شەهید بوون، حەفت ژ هەڤالێن من خەلكێ‌ باژێرێ‌ سلێمانیێ‌ بوون و ژ وانا (جەزا، شادمان، جەمیل، دەماوەند، رزگار، لوقمان، شەخسە) ل باژێرێ‌ دهۆكێ‌ ژی (بەدەل حەسەن عیسی ، سالح سیاری) هزار سلاڤ ل گیانێ‌ وان بن و سلاڤ و رێز بۆ مالباتێن ئەڤان شەهیدێن قەهرەمان.

2-7

بیرا من دهێت قەمیسەكێ‌ قەهوائی و بێجامەك ل بەر من بوون، و هەر ل وێرێ‌ قەمیسێ‌ من هاڤێتـە چاڤێن من و گرێدان و پسمامێ‌ من (سالح) دەرسوكا بابێ‌ وی ژ سەری كر و ئێخستە چاڤێن وی و مالا مە سەرئێك و بنێك كر و خویشك و برایێن من هەمی رابوونە ڤە و كرنە ژوورەكێ‌ ڤە و دەرگەه لێ‌ گرت و گۆتنێ‌ دەنگی نەكەن دا جیران پێ‌ نەحەسیێن و مالامە هەمی پشكنین كر و كرێدارەك خانیێ‌ ڤە بوو دگۆتنێ‌(عەبدولعەزیز) كرێكا بوو ل گەل برایێن من چوونە كاری و دو ژوور بەرامبەر ژوورا وی بوون و ئەوی گۆتێ‌ ئەڤە هەردو ژوورێن منن و ئەوی زانی بەلاڤووك تشتێ‌ مەیێ‌ نهێنی ل ئەوان ژوورایە و ئەمن نەچوو ئەوا ژوورا ڤە و خویشك وبرا و بابێ‌ من گۆت پشتی ئەمنێ تو بری ئەم چووینە وێ‌ ژوورێ‌ و هندەك بەلاڤووك هەبوون و مە دیتن مە سۆتن و بەرزەكرن، و ئەم برینە ئەمنا دهۆكێ‌ و بابێ‌(سالح) ژی ل گەل مە ئینا ئەمنا دهۆكێ‌ بەلێ‌ ئەو هەر ل وێرێ‌ ئازادكر، ل ئەمنا دهۆكێ‌ ئەشكەنجەدان و قوتان و لێدان و ئاخفتنێن كرێت و بێ‌ دلوڤانی و ب هەمی شێوا ل گەل مەكر و پشتی ئەم گەهاندینە وێرێ‌ هەڤالێ‌ مە (بەدەل حەسەن عیسی) شەهید بوویە، و خودێ‌ ژێ‌ رازی بیت ئەو ژی ئینا بوو وێرێ‌ و (عوبید سپینداری) ئەو ژی گرت بووو (عادل سپینداری) ئەو ژی گرت بوون و ئینا بوونە ئەمنێ‌ و بیرا من دهێت گەلەك ئەشكەنجەدان و كرمە دژوورەكا ئێك كەسی ڤە و شەش رۆژا دەستێن من ژ پشتێ‌ ڤە دگرێدایی بوون و بتنێ‌ بۆ ڤەكولین و ئەشكەنجەدانێ‌ تینا مە ژ دەرڤە و دا بێژن هەڤالێن خوە ئاشكرا بكە و مە ژی هندی پێ‌ چ بوو مە دگوت ئەڤێن نەهاتینە ئاشكراكرن ئەم نابێژین دا ئاشكرانەبن و مە گەلەك بزاڤكر و ئەمنێ‌ دگۆت ناڤێن هەڤالێن تاخێ‌ هەما بێژن نە ئیلا رێكخستی بن بتنێ‌ بێژن هووت تێكەلا كێ‌ دكەن و مەزانی هەر كەسەكێ‌ مە ناڤێ‌ وی گۆتبا دا چن دەستەسەركەن.
هەروەسا ناڤهاتی گۆت: سزادان و ئەشكەنجەدان ژ هەمی جوران بوو، فەلەقە بوو و هەتا نوكە وەكی كوركەكێ‌ ل پاتكا منە و ئەمنێ‌ جگارە پێ ڤەتنان و دیسا ئەم كارەب كرین و گەلەك یا نەخوش بوو و ئەو كارەب ب جهێن تایبەت ڤەدنا هەتا 30/6/ ئەم ل ئەمنا دهۆكێ‌ ماین و پشتی بورینا 20 و بیرا من دهێت نێزیكی نیڤرۆ بوو دو ترۆمبێل ئینان و هەر هندەك ژ مە هاڤێتنە دترۆمبێلەكێ‌ دا و ئەم برین و بیرا من دهێت ئەم ل باژێرێ‌ مویسل را برین و دەمێ‌ ئەم گەهشتینە (كەلەكا یاسین ئاغا)ی وەك بنگەه پولیسان وێرێ‌ بوو و راوستیان ئاڤ ڤەخوار و ئەە ج جارا ژ بیرا من ناچیت و مێژوو 30/6/1980 و ئەم گەلەك تێهنی بووین و مە هندی گۆتێ‌ ئاڤێ‌ بدنە مە ئاڤ نەدان مە وێ‌ هزرێ‌ بكە ئەگەر حەیوانەك ژی یێ‌ تهێنی بیت دێ‌ مرۆڤ ئاڤێ‌ دەتێ‌ هوسا زالم بوون ئاڤ نەدان مە و ئەم برین هەتا گەهشتینە دەستەیا كەركووكێ‌ یا تایبەت، ئەم گەلەك هاتینە ئەشكەنجەدان ، مە هزر كر ئەم ژ دەستێن زالما قورتال بووین و بەلكی مە ببنە جهەكێ‌ دی و پیچەكێ‌ ب دلوڤان تر بن و بەرۆڤاژی و دەمێ‌ ئەم گەهشتینە هەیەئیا كەركووكێ‌ و چاڤێن مە دگرتی بوو و ب ژوور كەفتین وەكی سەیێن هار هاتنەمە و ژ هەمی ئالیان ڤە دانا مەو و هەتا ب عەردی كەفتین ب كێڤلا و سوندا و قینتاخێن تڤەنگا و پێ‌ نا هەتا ژ مە رازی بوون، و هەر ئێك ژ مە هاڤێتە ژوورەكێ‌ ڤە و ئەز هاڤێتمە ژوورەكێ‌ ڤە یا بچوویك بوو و سێ‌ كەس تێدا بوو و ئێك ژوان خودێ‌ ژێ‌ رازی (عەبدوللا هروری) هاتە سێدارەدان و (محەمەد ئەمین رەشو سلێڤانەی) و ( سەعید سەعید هروری) ئەڤ هەرسێكە ل وێ‌ ژوورێ‌ ڤە بوون و ئەز هاڤێتمە وێ‌ ژوورێ‌ ڤە و دەرگەه گرتن و چوون، ژ بەر ئەشكەنجەدانێ‌ پەنترونێ‌ من هاتبوو دراندن و پێ‌ من ژێ‌ دەركەفت بوو ئەوا هزر كر خەلكێ‌ سلێمانیێ‌ مە و ب سورانی ل گەل من ئاخفتن و من ئاخفت ئەوا زانی ئەز خەلكێ‌ دەڤەرا بەهدینانم و خو من وەركرن، و گۆت كا بوومە بەحسێ‌ دەرڤە بكە و ئەوژی چەند رۆژەك بوو بەری مە هاتبوونە دەستەسەركرن و ئەز مامە ل وێ‌ ژوورێ‌ دا و باوەر بكە حەفتیەكێ‌ نە ڤەكێشا ئەز ڤەگوهاستمە ژوورەكا دی ژمارە (5) بوو و خودێ‌ ژێ‌ رازی بیت شەهید (خدر مەحمود مستەفا هروری) ئەو ژی هاتە سێدارەدان بەرپرسێ‌ رێكخراوەكێ‌ بوو و خەلكێ‌ گوندێ‌( هرورێ‌) بوو و (سالح سندی، شوكری هروری، عەلی مامە، عومەر میرزا، شەخسە، شادمان، لوقمان) دووبارە ڤەكولین و ئەشكەنجەدان و مە ل دهۆكێ‌ دانپیدانكر بوو و نەچاربووین و بەلێ‌ ل دەستەیا كەركووكێ‌ دووبارە ئەشكەنجەدان و زێدەتر، دیمەنێ‌ ژ هەمیان نەخوشتر ئەم (49) كەس دژوورەكێ‌ دا بووین و دبیت نوكە گەلەك باوەرنەكەن چەوا ئەڤ ژمارە د ژوورەكێ‌ دا بوون، و گەلەك جارا دەمێ‌ رازان دا هەر ئالیەكێ‌ زیندانێ‌ رێزەك راوستیت و ئەڤێن دی دا خودرێشكەن و پێن مرۆڤی چوونە سەر سەرێ‌ هندەكا و پێن هندەكا ل سەر سەرێ‌ مرۆڤی هەتا بتنێ‌ مرۆڤی خودرێژكرربا و نڤستن نەبوو ژ بەر نال نال و ئەشكەنجەدانێ‌ و گەلەك جاران ژی بەرامبەر ژوورا مە وەكی شیشكا بوو و پێڤەگرێدان هەتا سپێدێ‌ ریسكرن و ئەشكەنجەدان و گەلەك جاران مە دیت هندەك وشتن و كرنە دناڤ بەتەنیان دا و دبرن و بیرا من دهێت ئێكێ‌ خەلكێ‌ قەلادزێ‌ گرت بوو ناڤێ‌ (ئوسمانێ‌ حەمە ئوسمان) بوو هوسا ئەشكەنجەدا بوو پێن وی هەمی پەقاندن و ل دووماهیێ‌ ل سەرێن پێن وی ژی دا هەمی وەك كێم و عەداف كەفت بوونێ‌ وەل وی كەسی هات خوە ل سەر پێن خوە نەدگرت و هەر كەسەكێ‌ بربا ئەشكەنجەدانێ‌ و دزڤراند هەڤالێن وی هاریكاریا وی دكر، و ئەگەر نەدشیا خوارنێ‌ ب خوەت خوارن دایێ‌، مامۆستا (خدر مستەفا هروری) دەمێ‌ هاتیە دەستەسەركرن نارنجوك و بەلاڤووك د دەستی دابووینە و گەلەك هاتبوو ئەشكەنجەدان و دانپیدان ب رێكخستن و شانا خوە یا رێكخستنێ‌ كربوو و نارنجوك ژ مالا (سالح سندی) ئینابوو دەرێ‌ و رۆژەكێ‌ بیرا من دهێت و رۆژەكێ‌ (سالح سندی) گۆتە مامۆستا (خدر مستەفا هروری) بووتە تشتەكی بێژم گۆت بێژە گۆت ئەگەر ئەم چووینە دادگەهێ‌ 100% دێ‌ سزایێ‌ سێدارەدانێ‌ دانە سەر مە و مامۆستا (خدر هروری) گۆت ماچیە؟ ئەوێ‌ دی گۆتێ‌ ئەز بێژم ئەگەر ئەم بەرامبەر دادوەری بێژین ئەڤە نە گۆتنێن مە نە و مە ژ بەر ئەشكەنجەدانێ‌ ئەڤ دانپیدانە كرینە بەلكو سزایێ‌ مە ژ سێرەدانێ‌ بكەنە هەتا هەتا یان 15 سالان و مامۆستا (خدر هروری) گۆتێ‌ سالح ئەم وەبێژین و جارەكا دی مە بدانە بن ئەشكەنجەدانێ‌ ڤە و بزڤرینە ڤە هەما روحەكە و بلا گوری كوردستانێ‌ بیت و گۆتێ‌ ما تو ژ كنفا سێدارێ‌ ترسی؟ گۆتێ‌ نەخێر گۆتێ‌ پا خوە بێ‌ دەنگ بكە بۆ خودێ‌ و مێژوو دێ‌ بێژم ئەو چاڤ نەترس بوو و خودان موقف بوون، هەمی گاڤا مورالا مە بلندكر و شیرەت مەدكرن و ئەو ژ مە مەزنتر بوون وەكی بابەكی و برایەكێ‌ مەزن بوون بوو مە.

شاره‌زایه‌كا جڤاكی د دیدارەکێ دا بۆ ڕۆژنامەیا ئەڤرۆ دیار کر کو بناڤێ ده‌لیڤا كاری ئافره‌ت دهێنه‌ سه‌ردابرن و گۆت؛ هندەک پەیج د تۆڕێن جڤاکی دا وەک داڤەکێ بۆ نێچیرکرنا ئافرەتان دهێنە بکارئینان.

تانیا جه‌مال، شاره‌زایا جڤاكی دیار كر، بابه‌تێ ده‌ستدرێژیێ بۆ سه‌ر ره‌گه‌زێ مێ و ئه‌و ئافره‌تێن كار دكه‌ن یێ دبیته‌ دیارده‌ و گۆت؛ ئه‌ڤا دهێته‌ گۆتن ل سوشیال میدیایێ بناڤێ ده‌لیڤا كاری بۆ بکارئینان و خاپاندن و سه‌ردابرنا ئافره‌تێ یە، ئەڤجا چ ل كه‌رتێ تایبه‌ت یان ژی كه‌رتێ گشتی بیت.
شاره‌زایا جڤاكی دیار كر کو بابەتێ دەستدرێژی و ئیستغلالکرنا ئافرەتێ بۆ دو جۆرێن سەرەکی دهێتە دابەشکرن، جۆرێ ئێکێ، ل ژێر ناڤێ پەیداکرنا دەلیڤەیێن کاری، ب ڕێیا سۆشیال میدیایێ دهێتە ئەنجامدان، کو مخابن هندەک ژ وان چو ڕاستی بۆ نینن و بتنێ وەک داڤەکێ بۆ نێچیرکرن و خاپاندنا ئافرەتێ هاتینە دانان و گۆت؛ جۆرێ دویێ ژی، بکارئینانا وان ئافرەتانە یێن کو د کارێن خۆ یێن فەرمی دا، چ د کەرتێ تایبەت دا بن یان ژی د سازیێن حکومی و حزبی دا.
شاره‌زایا جڤاكی د بەردەوامیا ئاخفتنێن خۆدا گۆت؛ مخابن هژماره‌كا زۆر یا ئافره‌تان د جڤاکی دا د بێكارن و بخۆ لدووڤ كاری دگه‌ڕن، ئەڤجا ده‌مێ په‌یچه‌ك پرۆپاگندا ده‌لیڤێن كاری دكه‌ت په‌یوه‌ندیێ ب ئه‌ڤان په‌یچا دكه‌ن، لێ دهێنه‌ سەردارن و تووشی ئاریشه‌یان دبن.
تانیایێ دیار کر ژی، مخابن هژماره‌كا زۆر یا ئافره‌تان كار هێلایه‌ ژبه‌ر ئاخفتنان و ئیستغلالکرنێ و دده‌مه‌كی دا ئه‌ڤان ئافره‌تا شیانێن زۆر هه‌نه‌ بۆ كاری و گۆت؛ بریندارکرنا کەسایەتی و شەرەفا ئافرەتێ تاوانە و کوشتنا شیانێن نیڤا جڤاکیە.