ئەڤرۆ نیوز ، زنار تۆڤی:
موقەدەم بێوار عەبدولعزیز پەیڤدارێ بەرەڤانیا باژێرێ دھۆکێ، بۆ ئەڤرۆ نیوز راگەھاند: ئەڤرۆ شەمبیێ و ل دەمژمێر ١١ سپێدێ ل گوندێ خازیاڤا گەنجەکێ ئاکنجیێ باژێرێ دهۆکێ ب ناڤێ( م، ک) د ژیێ 16 سالیێ دا د ئاڤێ دا خەندقیە.
ناڤهاتی دیار کر ژی: پشتی تەرمێ وی ژ ئاڤێ ئیناینەدەر، بۆ نۆشداریا داد ل دھۆکێ ھاتیە ھنارتن، د ئەڤ سالە دا ١٧ کەس د ئاڤێن سنورێ پارێزگەها دهۆکێ دا خەندقینە.
ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونێ ل پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا سێ کەس بریندار بوون.
ناڤهاتی زێدەتر ئاشکرا کر: ئەڤرۆ ئەینیێ، 2020/7/24 ل دەمژمێر (10:00) شەڤ ل ناڤا تۆنێلا گەلیێ زاخۆ دو ترۆمبێلان لێکدا کو ترۆمبێلەکا تایبەت جێب هۆندا تکسۆن ل گەل ترۆمبێلەکا تایبەت دوج ب رەنگێ رەش بوویە، د ئەنجامدا سێ کەس بریندار بوون و زیانێن مادی یێن مەزن ب ترۆمبێلان کەفتن و دیسان ترۆمبێلا هۆندا تکسون وەرگەریا یە.
ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونێ ل پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا ئاگر بەربوو ترۆمبێلەکێ.
ناڤهاتی زێدەتر ئاشکرا کر: ل دەمژمێر 9 ئەڤ شەڤە، ئاگر بەربوو ترۆمبێلەکا دۆج ب رەنگێ سور ل سەر رێیا قەدشێ، لێ خەلکێ قەدشێ شیان ب زووترین دەم کونترولێ ل سەر وی ئاگری بکەن و ئاگر ڤەمراند، زیانێن گیانی د وێ روودانێ دا نەبوون، ب تنێ هندەک زیان گەهشتنه وێ ترۆمبێلێ.
ئەڤرۆ نیوز:
وەزارەتا ساخلەمیا هەرێما کوردستانێ ئامارا تووشبوویان و وەغەرکرنێ ب ڤایرۆسێ کۆرۆنایێ راگەهاند و گۆتیه: 222 تووشبوویێن دی هاتینە تۆمار کرن و 9 کەسان ژی وەغەرکریە.
هەروەسا گۆتیە: ژ وان 222 تووشبوویێن کۆرۆنایێ، 101 ل کەس هەولێرێ نە، 64 ل سلێمانیێ، 43 ل گەرمیان ، 14 ژی ل دهۆکێ، هەروەسا 127 تووشبوویێن دی یێن کۆرۆنایێ چێبووینە، کو 109 کەس ل هەولێرێ نە، هەشت کەس ل گەرمیان و 10 کەس ژی ل هەلەبجە.
نوکە هژمارا تووشبوویێن کۆرۆنایێ ل هەرێما کوردستانێ گەهشته 12 هزار و 38 کەسان، شەش هزار و 595 تووشبوویی چێبووینە و 464 کەسان ژی وەغەر کریە.
ئەڤرۆ نیوز:
وەزارەتا دەرڤە یا عیراقێ راگەهاند: حوکمەتا عیراقێ داخوازا راکرنا ڤیزێ د ناڤبەرا هەردو وەلاتێن عیراقێ و سعودیێ دا کریە.
ئەڤرۆ ئەینیێ، وەزارەتا دەردڤە یا عیراقێ راگەهاندنەک بەلاڤکر و تێدا هاتیە: د کۆمبوونا سییێ یا هەماهەنگیا عیراق ــ سعودیێ دا ل باژێرێ ریاز، بەرپرسێن عیراقێ داخواز ژ نوونەرێ سعودیێ کریە، کو ڤیزا د ناڤبەرا هەردو وەلاتان دا بهیتە راکرن.
دیار ژی کریە، د هەمبەر دا نوونەرێ سعودیێ ئاشکرا کریە: کو ئەو دخوازن د هەموو بیاڤان دا پەیوەندیان بهێز بکەن، ئەو دێ ب رژدی تەماشەی وێ داخوازا عیراقێ کەن و دێ هەلسەنگاندنێ بۆ کەن.
ئەڤرۆ نیوز، زنار تۆڤی:
موقەدەم هێمن سلێمان پەیڤدارێ پۆلیسێن پارێزگەها دهۆکێ، بۆ مالپەرێ ئەڤرۆ نیوز دیار کر: بەری دەمەکێ پۆلیسەکێ دهۆکێ، کو كارمەندێ پۆلیسێن پاراستنا چالاكیێن مەدەنی بوویە، ب ناڤێ ( عابد عەبدوللا )، کو د ژیێ 30 سالیێ دایە، ل گەل پسمامێ خوە ب ناڤێ( مەروان عەبدوللا) د ژیێ 17 سالیێ دایە، ل گوندێ بێنارینکێ یا سەر ب ناحیا ئەتریش ڤە دئاڤێ دا خەندقینە.
هەروەسا گۆتیه ژی: پشتی تەرمێن وان ژ ئاڤێ ئیناینەدەر، تەرمێن وان بۆ نۆشداریا داد ل دھۆکێ ھاتینە ھنارتن.
ئەڤرۆ نیوز، زنار:
وەزارەتا ساخلەمی و ژینگەها عێراقێ راگەھاند: دو ھزار و ٢٤٠ حالەتێن نوو یێن کۆرۆنایێ و ھزار و ٧٠٤ حالەتێن چێبوونێ و ٨٩ حالەتێن وەغەرکرنێ ھاتینە تۆمار کرن.
هەروەسا گۆتیە: د دەما ۲٤ دەمژمێرێن بوری دا دو ھزار و ٢٤٠ حالەتێن نوویێن توشبوون ب کۆرۆنایێ ھاتینە تۆمار کرن، کو ٨٣٢ حالەت ژ وان ل بەغدا بووینە.
ھەتا نوکە ١٠٤ ھزار و ٧١١ کەس ل عیراقێ تووشی ڤایرۆسێ کۆرۆنایێ بووینە.
ئەڤرۆ نیوز، زنار تۆڤی:
سوبەهی شەمبیێ، 25.7.2020 دێ تێلەڤزیۆنا پەروەردەیی _ دهۆک، ب سیستەمێ ئێچ دی ل باژێرێ دهۆکێ هێتە ڤەکرن.
ئەحمەد زۆبێر بەرپرسێ راگەهاندنا رێڤەبەریا گشتی یا پەروەردا پارێزگەها دهۆکێ، بۆ ئەڤرۆ نیوز دیار کر: تێلەڤزیۆنا پەروەردەیی، دهۆک تەلەفزیۆنەکا لۆکالە و ل دەستپێکێ دێ پەخشێ وێ ل سنۆرێ پارێزگەها دهۆکێ بیت و د پاشەرۆژێ دا، مە لبەرە پەخشێ وێ بگەهینینە هەموو کوردستانێ، ئەڤ کەنالە دێ یێ گرێدایی رێڤەبەریا گشتی یا پەروەردا پارێزگەها دهۆکێ بیت.
ناڤهاتی گۆت ژی: بۆ جارا ئێکێ ل پارێزگەها دهوکێ، سوبەهی شەمبیێ، 25/07/2020 و ل دەم ژمێر (12:00) بەری نیڤرۆ، ب ئامادەبوونا ئالان حەمە سەعید وەزیرێ پەروەردێ یێ حوکمەتا هەرێما کوردستانێ، عەلی تەتەر پارێزگارێ دهوکێ، دێ تێلەڤزیۆنا پەروەردەیی ـ دهۆک، کو ئاڤاهیێ وێ دکەڤیتە پشت ئاڤاهیێ رێڤەبەریا گشتی یا پەروەردا پارێزگەها دهوکێ دێ هێتە ڤەکرن.
ئەڤرۆ نیوز:
وەزارەتا نافخۆ یا هەرێما کوردستانێ راگەهاند: ئاخفتنێن وەزیرێ نافخۆ دەربارەی جەژنا قوربانێ ژ ئالیێ هندەک کەس و دەزگەهێن میدیایی ڤە لێکدانێن شاش بۆ هاتینە کرن.
وەزارەتا نافخۆیا هەرێما کوردستانێ د راگەهاندنەکێ دا دیار کریە: د کونفرانسەکێ رۆژنامەڤانی دا وەزیرێ نافخۆ دەربارەی جەژنا قوربانێ گوتیە: پشتی راوێژا وەزارەتا ئەوقاف و ئێکەتیا زانایێن ئاینێ ئیسلامێ و ب هەماهەنگیا وەزارەتا ساخلەمیێ دێ بەلاڤ کەن، لێ ژ ئالیێ هندەک کەس و دەزگەهێن میدیایی ڤە لێکدانێن شاش بۆ هاتینە کرن.
دیسان گۆتیه: جەژنا قوربانێ جەژنەکا پیرۆزا موسلمانایە و ل هەرێمێ هەلکەفتەکا ئاینی و فەرمیە و وەکی هەموو سالان دێ بلند هێتە راگرتن و دەرفەتەکە بۆ کارێن خێرێ و پارڤەکرنا قوربانان، هەروەسا هەر رێکارەکا حوکمەتا هەرێمێ د روژێن جەژنێ دا بگریتە بەر، ب تنێ بۆ بەرچاڤ وەرگرتنا رێکارێن ساخلەمیێ و خۆپارێزیێ ژ ڤایرۆسێ کۆرۆنایێ یە.
نيشاندان