د. وەهاب جوشکون بسپۆرێ کاروبارێن سیاسی دیار کر، یا نها ل تورکیا روو ددەت تشتەک گەلەک باشە بۆ ئاشتیێ و چارەسەرکرنا پرسا کوردی، چونکی بەری نها دژبەریەکا گەلەک زێدە ل دژی مافێن گەلێ کورد ل تورکیا هەبوو، هەتا ل دژی پەیڤا کورد بوون، لێ نها رەوشەکا نوو هاتیە پێش، هەلوەستێ بەرپرسێن تورکیا نەرم بوویە، د ناڤ جڤاکێ تورکیا دا ب گشتی نها خەلک دبێژن کوردان ژی وەکو هەموو خەلکێن دی ئەڤ مافە هەیە ب زمانێ خوە بخوونن و بنڤیسن و گۆت: (رەوشا نها نیشا ددەت کو خەلک ژ شەڕی بێزارن و خەلکێ تورکیا ب گشتی ئاشتی دڤێت، د راپرسیێن هەری دووماهیێ دا دیار دبیت کو ٨٠٪ ژ خەلکێ تورکیا پشتەڤانیێ ل ئاشتیێ دکەن، ئەو یەک ژی گەلەک گرنگە و مرۆڤ دشێت بێژیت نها دژبەرێن ئاشتیێ و دژبەرێن مافێن کوردان ل تورکیا لاواز بووینە، ئەو یەک ژی گەلەک گرنگە).
فەهیم تاشتەکین بسپۆرێ کاروبارێن سیاسی ژی دیار کر، روودانێن نها ل رۆژهەلاتا ناڤین نیشا ددەن کو بریارا تورکیا یا بۆ ئاشتیێ گەلەک راستە، چونکی گەلەک هێز یێ کار بۆ هندێ دکەن دا بەرژەوەندیێن خوە بپارێزن و هەروەسا مەترسی ژی ل سەر تورکیا هەنە، ئاشکرایە هەر هێزەکێ بڤێت ل دژی تورکیا کار بکەت دێ کارتا کوردی بکار ئینیت، تورکیا هەر زوو ئەو یەک دیت و دەست ب قووناغا ئاشتیێ کر و گۆت: (گرنگە ئێدی ئەردۆغان و بەرپرسێن دی یێن تورکیا ب جهێ قووناغا تورکیا بێ تیرۆر بێژن قووناغا ئاشتیێ و ئەو یەک دێ پتر کاریگەریا خوە هەبیت، چونکی گەلەک ژ کەسایەتیێن کورد ژ پەیڤا تورکیا بێ تیرۆر توورە دبن و مافدارن ژی، چونکی ژ بۆ ئاشتیێ و برایەتی گرنگە هەموو هەستیاریێن جڤاکێ تورکیا ب هەموو پێکهاتەیێن خوە ڤە ل بەر چاڤ بهێتە وەرگرتن).
نڤیسەر و ڤەکۆلەر ئیسمەت سیڤەرەکلی ژی دیار کر، راپرسیێن نها ل تورکیا دهێنە کرن گەلەک دلخوەشکەرن، چونکی خەلکێ تورکیا ژ شەڕی بێزار بووینە، ئەو یەک پشتەڤانیەکا گەلەک مەزنە بۆ حوکمەتێ و د هەمان دەمی دا دەلیڤەیەکا گرنگە ژی بۆ دەولەتا تورکیا کو پرسا کوردی چارەسەر بکەت، ئانکۆ ب کورتی کورد و تورک دخوازن ب ئاشتیانە پێکڤە بژین و ئێدی کەسێ نەڤێت زارۆیێن وان ببنە قوربانی، ژ بەر ڤێ یەکێ ژی نها گەلەک کەسێن توندرەو ل دژی قووناغا ئاشتیێ نە، لێ تشتێ جهێ دلخوەشیێ ئەوە کو یێن ل دژی ئاشتیێ گەلەک لاوازن و نەشێن ببنە مەترسی ل سەر قووناغا نها ل تورکیا.
ناڤهاتی ئەو یەک ژی دیار کر، گرنگە ئەردۆغان ب رەنگەکێ هەستیار سەرەدەریێ ل گەل قووناغا نها بکەت، چونکی کورد دو دلن و هێشتا ژی ب کریاری ژ بۆ چارەسەرکرنا پرسا کوردی چو نەهاتیە کرن، نابیت بابەت تنێ ژ بەر بەرژەوەندیێن تەنگ بیت، هەکە ئەردۆغان تنێ هزرا پاشەرۆژا خوە و ئاکپارتیێ بکەت و بڤێت پرسا کوردی بۆ خۆلەکا دی یا سەرۆک کۆماریێ بکار بینیت ئەو یەک دێ ئەنجامێن خوە یێن گەلەک خراب بۆ تورکیا هەبن، چونکی نها دەلیڤەیەکا گەلەک گرنگ و دیرۆکی بۆ چارەسەرکرنا پرسا کوردی و پرسێن دی هاتیە پێش و دڤێت ئەو یەک ژ دەست نەچیت.
ل ئالیێ دی هژمارەک زێدە ژ چاڤدێرێن سیاسی، رۆژنامەڤان و کەسایەتیێن تورکیا ژی ب رێیا تۆرێن جڤاکی پشتەڤانیا خوە بۆ قووناغا ئاشتیێ و چارەسەرکرنا پرسا کوردی دیار دکەن و داخواز ژ دەولەتا تورکیا دکەن کو ب کریاری کار بۆ چارەسەرکرنا پرسا کوردی بهێتە کرن و رێ نەدەن ئالۆزیێن نوو ل تورکیا روو بدەن.
ل گۆر باوەریا چاڤدێرێن سیاسی پشتەڤانیا نها یا جڤاکێ تورکیا بۆ دەولەتێ گەلەک گرنگە، زێدەتر ژ ٨٠٪ خەلکێ تورکیا پشتەڤانیێ ل قووناغا نها دکەن، بەری نها تشتەک وەسا نەبوو، چونکی بەری نها ژی چەندین جاران تورکیا بزاڤا چارەسەرکرنا پرسا کوردی کریە، لێ ئاستەنگی دروست بوون، هندەک هێزێن سیاسی ژی ل دژی ئاشتیێ بوون، لێ نها رەوشەکا گەلەک گونجای بۆ ئاشتیێ و چارەسەرکرنا پرسا کوردی ل تورکیا هاتیە پێش و گرنگە دەولەتا تورکیا ڤێ دەلیڤەیا دیرۆکی ژ دەست نەدەت، هەروەسا دڤێت پشتی بابەتێ چەکان ب دووماهی هات ب کریاری ژی کار بۆ چارەسەرکرنا پرسا کوردی ل تورکیا بهێتە کرن، نابیت وەکو وەلاتیێن پلە دو سەرەدەری ل گەل کوردان بهێتە کرن، دڤێت کورد ژی وەکو تورکان ببنە خوەدانێن کۆمارا دیموکراتی یا تورکیا، هەکە تشتەک وەسا روو بدەت دێ هەم تورکیا بهێز کەڤیت و هەم ژی کورد گەهنە مافێن خوە.

حسێن موحیبی پەیڤدارێ سوپایێ پاسداران دیار کر، زانیاریێن تەمام ل بەر دەستێ وان هەنە کو ئەمریکا خوە بۆ ئێرشەکا نوو ل دژی ئیران بەرهەڤ دکەت و هندەک وەلاتێن دەڤەرێ ژی هاریکاریا ئەمریکا دکەن، هەکە ئەمریکا جارەکا دی ئێرشی ئیرانێ بکەت ڤێجارێ دێ بەرسڤا ئیرانێ گەلەک یا جودا بیت، ئیران دێ هەموو دەڤەرێ کەتە مەیدانا شەڕی و دێ زیانێن گەلەک مەزن ژی گەهنە ئەمریکا و گۆت: (هەکە ئەمریکا شاشیەک وەسا بکەت دێ ئیران ل هەر جهەکێ ئێرشی بەرژەوەندیێن ئەمریکا کەت، ژ بەر ڤێ یەکێ ژی وەکو ئیران وان نەڤێت تشتەک وەسا روو بەت و گرنگە ئەمریکا ژی هزرا شاشیەک وەسا نەکەت، چونکی ئەنجامێن وێ دێ بۆ ئەمریکا ژی گەلەک کوژەک بن).
ناڤهاتی ئەو یەک ژی دیار کر، ئیرانێ خوە بۆ هەر پێشهاتەکێ بەرهەڤ کریە و نها مۆلەتا هەموو ئەفسەرێن ئیرانێ هاتیە هلوەشاندن و هەموو ئەفسەر و فەرماندارێن ئیرانێ د ئامادەباشیەکا تەمام دانە، ئیرانێ گەلەک چەکێ نوو ژی بەرهەڤ کریە و هەکە شەڕ روو بدەت دێ ئیران چەکێن گەلەک جودا تاقی کەت، ژ بەر ڤێ یەکێ ژی گرنگە ئەمریکا هزرا هەر تشتەکێ بکەت و شاشیەکا وەسا نەکەت، چونکی دێ رۆژهەلاتا ناڤین هەموو بیتە مەیدانا شەڕی.
ل ئالیێ دی بەری دو رۆژان دۆنالد ترامپێ سەرۆکێ ئەمریکا ژی دیار کر، بەرپرسێن ئیرانێ گەلەک دخوازن ل گەل ئەمریکا دانوستاندنان بکەن، لێ مخابن نها چو کەسەک وەسا ل ئیرانێ نینە کو ئەمریکا ل گەل وی دانوستاندنان بکەت و رێبەرێ ئیرانێ ژی خوە ڤەشارتیە و نەوێریت دەرکەڤیت و ژ بەر ڤێ یەکێ ژی رەوشەکا جودا نها ل دەڤەرێ هەیە و گۆت: (دێ ڤان رۆژان بریارەکا گەلەک جودا ل دۆر ئیرانێ دەم، دێ تشتێن گەلەک مەزن روو دەن، باشترە بەرپرسێن ئیرانێ نەبنە ئەگەر کو وەلاتێ وان ب تەمامی وێران بیت، ئەو دشێن بریارەکا عاقلانە بدەن و وەلاتێ خوە بپارێزن، دێ د چەند رۆژن بهێت دا گەلەک تشت ئاشکرا بن).
د. ئەردەشیر پشەنگ بسپۆرێ کاروبارێن سیاسی ژی دیار کر، گرنگە بەرپرسێن ئیرانێ بریارەکا دروست بدەن و نەهێلن چو شەڕێن دی روو بدەن، چونکی رەوشا ئابووری یا ئیرانێ گەلەک خرابە و خەلک ب زەحمەت دشێن پێدڤیاتێن رۆژانە بۆ خوە دابین بکەن، دڤێت بەرپرسێن ئیرانێ د خەما خەلکی دا بن و باشترین بریار ژی ئەوە ل گەل ئەمریکا بگەهنە رێککەفتنەکا باش دا رەوشا ئابووری یا ئیرانێ باش ببیت، چونکی بەردەوامیا شەڕی و ئالۆزیان دێ ئیرانێ تووشی کارەساتێن گەلەک مەزن کەت.
ناڤهاتی ئەو یەک ژی دیار کریە، هەکە جارەکا دی شەڕ دەستپێ بکەت دێ زیانێن گەلەک مەزنتر گەهنە ئیرانێ، چونکی ئەمریکا یێ بزاڤان دکەت ڤێجارێ هندەک وەلاتێن دی یێن جیهانێ ژی پشکداریێ د شەڕی دا بکەن و مە جارا دی ژی دیت کو ئیران ب تنێ ما، ژ بەر ڤێ یەکێ ژی گرنگە بەرپرسێن ئیرانێ د خەما خەلکێ خوە دا بن، براستی ژی نها ژیان ل ئیرانێ گەلەک زەحمەت بوویە، دۆرپێچا دەریای و سزایێن ئابووریی وەسا کرینە کو ب سەدان کۆمپانیێن مەزن ل ئیرانێ هاتینە دائێخستن و ب هزاران کەس بێکار ماینە، ژ بەر ڤێ یەکێ ژی گرنگە ب دانوستاندنان و رێککەفتنەکا نوو پرسێن هەی بهێنە چارەسەرکرن.
چاڤدێرێن سیاسی ژی دیار دکەن، گرۆپەک توندرەو ل ئیرانێ هەیە کو ناهێلن سەرۆک کۆمار مەسعود پزیشکیان و تیما وی ل گەل ئەمریکا دانوستاندنان بکەن، وان دڤێت شەڕ و ئالۆزی بەردەوام بن، چونکی ئەو یەک د بەرژەوەندیا توندرەوان دایە، لێ سیاسەتا وان کەسێن توندرەو بوویە ئەگەر زیانێن گەلەک مەزن گەهشتینە ئیرانێ، پارێ ئیرانێ نها بێ بها بوویە، کەلوپەل گەلەک گران بووینە، ژ بەر شەڕی ب هزاران کەس ل ئیرانێ بێکار ماینە و هەژاری ل ئیرانێ گەلەک زێدە بوویە.
ل گۆر باوەریا چاڤدێرێن سیاسی هەکە ڤێجارێ شەڕەک نوو د ناڤبەرا ئەمریکا و ئیرانێ دا روو بدەت دێ کارەساتێن مەزن ل ئیرانێ روو دەن، ئەمریکا و ئسرائیل دشێن ژێرخانا ئابووری یا ئیرانێ ژناڤ ببەن و وی دەمی دێ زیانێن گەلەک مەزن گەهنە وەلاتیێن ئیرانێ، ب گشتی خەلکێ ئیرانێ ل دژی شەڕی یە، ژ بەر ڤێ یەکێ ژی گرنگە بەرپرسێن ئیرانێ ژی گوهداریا داخوازیێن خەلکێ خوە بکەن و بزاڤێ بکەن ب رێیا دانوستاندنان ل گەل ئەمریکا هەموو پرسێن هەی چارەسەر بکەن و هەکە کەسێن توندرەو دەستێوەردانێ نەکەن مەسعود پزیشکیان دشێت ل گەل ئەمریکا پرسێ هەی چارەسەر بکەت.

باران کایا ڤەکۆلەرێ کورد ل باکورێ کوردستانێ دیار کر، ‌هێشتا ژی تورکیا نیەتا خوە یا پاک بۆ چارەسەرکرنا پرسا کوردی نیشا نەدایە، رۆژانە بەرپرسێن تورکیا بەحسێ هلوەشاندنا پەکەکێ دکەن و دبێژن دڤێت د زووترین دەم دا هەموو ئەندامێن پەکەکێ ڤەگەرنە ڤە تورکیا، لێ ل هەمبەر دا تورکیا دێ چ کەت ئەو یەک دیار نینە، هەر رۆژ دبێژن سیاسەتا دیموکراتی، لێ دڤێت ئەم پرسیار ژ وان بکەین کا کێ رێ ل هەمبەر سیاسەتا دیموکراتی گرتیە؟ ما نە هەر تورکیا بوو ب رێیا دانانا قەیوومان رێز ل ئیرادەیا گەلێ کورد نەگرت، وی دەمی دڤێت بەرپرسێن تورکیا ژی نیەتا خوە یا پاک بۆ چارەسەریێ نیشا بدەن.
ناڤهاتی ئەو یەک ژی دیار کر، دڤێت ژ ئالیێ تورکیا ڤە ب کریاری هندەک تشت بهێنە کرن، کوردان دڤێت ب رێیا سیاسەتێ و ب رێبازێن ئاشتیانە پرسا کوردی و هەموو پرسێن دی ل تورکیا بهێنە چارەسەرکرن، لێ ل هەمبەر هەلوەستێ باش یێ کوردان هەتا نها دەولەتا تورکیا ژی یا پێدڤی نەکریە و دڤێت د زووترین دەم دا ب کریاری دەولەتا تورکیا ژی هندەک تشتان بکەت دا بۆ هەموو جڤاکێ تورکیا ئاشکرا بیت کو براستی دەولەتێ ژی دڤێت پرسا کوردی بهێتە چارەسەرکرن.
فەرحان خەیروللا چاڤدێرێ سیاسی ژی دیار کر، هەکە ئارمانجا بەرپرسێن تورکیا ئەوە پرسا کوردی چارەسەر بکەن دڤێت بەر هەر تشتەکێ دستوورێ نها یێ تورکیا بهێتە گوهۆڕین، بەری دو رۆژان شیرەتکارێ ئەردۆغانی ژی بەحسێ ڤێ یەکێ کر کو پێدڤیا تورکیا ب دستوورەک نوو و دیموکراتی هەیە، ژ بۆ دستوورەکێ نوو هەتا نها چ نەهاتیە کرن و گۆت: (تشتێ نها ل تورکیا ئەم دبینین هەموو ئەوە کو پەکەکە هەر زوو هەموو چەکێن خوە رادەست بکەت و وەسا دیارە بەرپرسێن تورکیا وی بابەتی وەکو سەرکەفتنەک مەزن بۆ خوە دبینن، لێ بابەت وەسا ب دووماهی ناهێت و پرسا کوردی ژی وەسا ناهێتە چارەسەرکرن، دڤێت ژ بۆ چارەسەرکرنا پرسا کوردی هندەک تشت بهێنە کرن، بەری هەر تشتەکێ ژی دڤێت هەبوونا گەلێ کورد ب فەرمی ل تورکیا بهێتە قەبوول کرن).
ناڤهاتی ئەو یەک ژی دیار کر، گەلەک بەحسێ قووناغا ئاشتیێ ل تورکیا دهێتە کرن، لێ تشتێ دیارە ئەوە کو قووناغا ئاشتیێ یا کو بەرپرسێن تورکیا دبێژنێ قووناغا تورکیا بێ تیرۆر ب رەنگەکێ نهێنی بەردەوام دکەت و رایا گشتی یا تورکیا نزانیت کا چ روو ددەت، ئەو یەک ژی جهێ گومانێ یە، چونکی بابەتەک وەسا مەزن وەکو پرسا کوردی کو پرسا هەری مەزن یا تورکیا یە نابیت وەسا ب رەنگەکێ نهێنی بەردەوام بکەت و دڤێت گەلەک تشت بۆ رایا گشتی یا تورکیا بهێنە ئاشکرا کرن.
نڤیسەر و ڤەکۆلەر ئیسمەت سیڤەرەکلی ژی دیار کر، نەمانا شەڕی ب هەموو رەنگەکێ کارەک باشە، ب سالانە گەلێ کورد ل تورکیا داخوازا ئاشتیێ و چارەسەریێ دکەت، لێ دڤێت ل هەمبەر نەمانا چەکی دەولەتا تورکیا ژی ئێدی دەست ب گوهۆڕینێن مەزن بکەت، پێدڤیا تورکیا ب چاکسازیێن سیاسی و قانوونی هەیە و هەروەسا دڤێت د پێنگاڤا ئێکێ دا سیاسەتا قەیوومان ل تورکیا ب دووماهی بهێت و زمانێ کوردی وەکو زمانێ فەرمی یێ پەروەردەیێ بهێتە قەبوول کرن و گۆت: (دڤێت هەموو گرتیێن سیاسی یێن کورد بهێنە ئازاد کرن و ئێدی ل هەمبەر سیاسەتکرنا کوردان ژی چو ئاستەنگی دروست نەبیت، نابیت هەر جارێ ل ژێر ناڤێ تیرۆرێ و بزاڤێن ژ بۆ پارچەکرنا تورکیا سیاسەتمەدارێن کورد بهێنە دەستەسەرکرن، دڤێت ئەو یەک ب دووماهی بهێت و رێز ل ئیرادەیا گەلێ کورد بهێتە گرتن، بێگومان پاشی دڤێت هندەک کارێن دی ژی بهێنە کرن و وەسا دێ کورد ژی هەست بکەن کو براستی دەولەتا تورکیا دڤێت پرسا کوردی چارەسەر بکەت، لێ مخابن هەتا نها تشتەک وەسا نینە).
ناڤهاتی ئەو یەک ژی دیار کر، دەمێ ئەم دبێژین پێدڤیا تورکیا ب دستوورەک نوو هەیە ئەو یەک ژ بۆ هندێ یە دا کو د دستوورێ نوو دا هەبوونا گەلێ کورد ب فەرمی بهێتە قەبوول کرن و هەروەسا مافێن رەوا یێن گەلێ کورد ژی د دستوورێ نوو دا بهێتە گەرەنتیکرن، چارەسەرکرنا پرسا کوردی بابەتەک نینە کو ب درووشمان بهێتە کرن، ژ بۆ چارەسەرکرنا پرسا کوردی پێدڤیا تورکیا ب دستوورەک نوو هەیە و پاشی ژی دڤێت دەولەتا تورکیا ب کریاری کار بۆ چارەسەرکرنا پرسا کوردی بکەت و گۆت: (کوردان ژی دڤێت ل تورکیا وەکو گەلێ تورک خوەدان هەمان مافی بن، مادەم ئەو دبێژن کود برایێن مە نە، وی دەمی کا تورکان چ ماف هەنە دڤێت کوردان ژی هەمان ماف هەبیت).

فەیسەل یوسف پەیڤدارێ ئەنجوومەنێ نشتیمانی یێ کوردی ل سووریێ دیار کر، هندەک هێز و ئالی جارەکا دی بزاڤا ڤێ یەکێ دکەن کو رەوشا رۆژئاڤایێ کوردستانێ ئالۆز بکەن، روودانا شەهیدکرنا سیپان حسو و هەروەسا روودانا ئاگری یا ل زیندانا کۆبانێ کو مخابن تێدا ٩ کەس شەهید بوون و گەلەک کەس ژی بریندار بوون، ژ بەر روودانێن ڤێ دووماهیێ خەلکێ مە ل رۆژئاڤایێ کوردستانێ گەلەک خەمگینن، خەلک ڤێ زۆرداریێ ب چو رەنگەکێ قەبوول ناکەن و گۆت: (دڤێت بەرپرسیارێن هەر دو روودانان د زووترین دەم دا بگەهنە سزایێن خوە، دڤێت راستیا هەموو بابەتان ژی بۆ خەلکێ مە بهێتە ئاشکرا کرن، ژ بەر ڤێ یەکێ ژی دڤێت ئالیێن پەیوەندار د زووترین دەم دا هەموو راستیان بۆ رایا گشتی ئاشکرا بکەن).
پەیڤدارێ ئەنەکەسێ ئەو یەک ژی دیار کر، یا ل زیندانا کۆبانێ روو دا کۆمکوژیە و کارەساتەک مەزن بوو، خەلکێ مە ل رۆژئاڤایێ کوردستانێ نها گەلەک خەمگینن، چونکی زۆرداریەک گەلەک مەزن ل خەلکی هاتە کرن، دیارە هندەک هێز دخوازن ئالۆزیان د ناڤبەرا کوردان و عەرەبان دا دروست بکەن، ژ بەر ڤێ یەکێ ژی گرنگە هەموو ئالی هشیار بن و هەست ب بەرپرسیاریا خوە یا دیرۆکی بکەن و رێ نەدەن رەوشا رۆژئاڤایێ کوردستانێ تێک بچیت، چونکی ئەو یەک د بەرژەوەندیا چو ئالیەکێ دا نینە و گۆت: (ل گۆر رێککەفتنا د ناڤبەرا هەسەدێ و شامێ دا هاتیە کرن دڤێت هەر دو ئالی هەست ب بەرپرسیاریا خوە بکەن، دڤێت ئارامیا دەڤەرێن کوردی بهێتە پاراستن و رێ نەهێتە دان ئالۆزی دروست ببن).
فەیسەل یوسف ئاماژە ب ڤێ یەکێ ژی کر کو، ل گۆر رێککەفتنا د ناڤبەرا مەزلوم عەبدی و ئەحمەد شەرعی دا دڤێت رەوشا عەفرینێ و سەرێکانیێ ژی ب تەمامی ئارام ببیت و گرنگە هەموو کۆچبەر بشێن ڤەگەرنە ڤە مالێن خوە، هەتا نها هندەک کار هاتینە کرن، لێ هێشتا ژی خەلک ب تەمامی نەشیاینە ڤەگەرنە ڤە مالێن خوە، دڤێت یا پێدڤی بۆ ڤەگەرا خەلکێ مە بهێتە کرن، چونکی د رەوشا نها یا هەستیار دا دڤێت رێگری ل ئالۆزیان بهێتە کرن.
ناڤهاتی ئەو یەک ژی دیار کر، ب گشتی رەوشا سووریێ و رۆژهەلاتا ناڤین یا ئالۆزە، گوهۆڕینێن بلەز ل دەڤەرێ روو ددەن، بێگومان هندەک ئالی ژی دخوازن ئالۆزیان دروست بکەن و بەری نها ژی بزاڤێن وەسا هەبووینە، گرنگە رێگری ل وان بهێتە کرن و گۆت: (دڤێت د زووترین دەم دا لیژنەیەک ژ ئالیێ حوکمەتێ ڤە بهێتە دروست کرن و دڤێت ئەو لیژنە دەست ب ڤەکۆلینان بکەت دا هەم روودانا شەهیدکرنا سیپان حسو و هەم ژی چاوانیا کۆموکوژیا ل زیندانا کۆبانێ بۆ خەلکێ مە بهێتە ئاشکرا کرن، پاشی ژی دڤێت کەسێن بووینە ئەگەر و هەروەسا کەسێن تاوانبار ژی بگەهنە سزایێن خوە، ئەو یەک ژی ئەرکێ حوکمەتێ یە و دڤێت د زووترین دەم دا یا پێدڤی بهێتە کرن).
ل ئالیێ دی ل پڕانیا باژێرێن رۆژئاڤایێ کوردستانێ ژی وەلاتیێن کورد دەست ب خوەنیشادانان کرینە و خوەنیشادان هەتا نها ژی بەردەوامن و خەلک داخوازا سزادانا تاونبارێن زیندانا کۆبانێ و شەهیدکرنا گەنجێ کورد سیپان حسو دکەن.