ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ دیاركر، ئێدی بێی دەستووریا ڕێڤەبەریا چاڤدێریا بازرگانی ل زاخۆ، بەرنیاسێن تۆڕێن جڤاكی و هەر كەسەكێ دی ژی نابیت ب چ ڕەنگان و ل دووڤ حەزا خوە ڕیكلامێ بۆ كەرەستەیێن بازرگانی و بابەتێن داشكاندنێ بكەن.

كۆڤان ئاڤدەل، ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ، بۆ ڕۆژناما ئەڤرۆ دیاركر، هەر كەسەكێ بڤێت ڕیكلامێ بكەت ل دەستپێكێ پێدڤیە سەرەدانا ڕێڤەبەریا مە بكەت، و دەستویریێ ژ مە وەرگریت و ڕێنومایێن مە بجهـ بینیت، پاشان ڕیكلاما خوە بكەت.
گۆت ژی:»ئەو كەسێ ڕیكلامێ بكەت دڤێت شارەزایی د بیاڤێ ڕیكلامكرنێ دا هەبیت و زانیاری ل سەر وی بەرهەمی هەبن یێ ڕیكلامێ بۆ بكەت، هەردیسا دڤێت سۆزنامەیەكێ ئیمزا بكەت كو بەرپرس بیت ژ هەر ئاریشەیەكا دەربارەی ڤی بابەتی دهێتە پێش».
زێدەتر ژی گۆت:»هەر كەسەكێ بیێ دەستووریا مە ڕیكلامێ بكەت دێ پێڕابوونێن یاسایی ل گەل هێنە وەرگرتن و دێ هێنە ڕەوانەكرن بۆ دادگەهێ».

رێڤەبەرێ نەخۆشخانەیا ئومێد یا چارەسەریا نەخۆشێن پەنجەشێرێ بۆ رۆژنامەیا ئەڤرۆ دیاركر كو سیستەمەكێ نوو بۆ خزمەتكرنا نەخۆشێن پەنجەشێرێ هاتە دانان و دبێژیت: ئێدی نەخۆش فایلە و معاملەیان ل گەل خۆ نابەنە نەخۆشخانەیێ.
د. چەكدار ئەحمەد، رێڤەبەرێ نەخۆشخانەیا ئومێد یا چارەسەریا نەخۆشێن پەنجەشێرێ ل دهۆكێ‌ گۆت: «ب رێكا سیستەمەكێ نوو دێ پتر خزمەتا نەخۆشێن پەنجەشێرێ كەین، دەمێ نەخۆش قەستا مە دكەن، بێی وەرگرتنا نۆبەیێ‌ و هەبوونا قەرەبالغیێ‌ كاروبارێن وان پشكنین و تاقیگەه و هەموو خزمەت بۆ نەخۆشان دێ ب رێكا سیستەمێ نوو بن».
گۆت ژی: «مە ل بەرە سیستەمێ نوو ل گەل نەخۆشخانەیێن هەولێر و سلێمانیێ‌ ژی گرێ بدەین، هەر جهەكێ هەبیت بێ نەخۆش معاملا خۆ ببەتە نەخۆشخانێ، دێ‌ دیاربیت ڤی نەخۆشی چو ئێش هەیە و چو بۆ هاتیە كرن، ب ناڤونیشان ڤە ئەڤ سیستەمە بۆ نەخۆشی گەلەك یێ‌ باشە دێ پتر خزمەتا نەخۆشی د وارێ چارەسەریێ دا هێتە كرن».

پەیڤدارێ رێڤەبەریا گشتی یا حەج و عومرەیێ‌ ل هەرێما كوردستانێ دیاركر، پرۆسێسا هووربینیێ بۆ ناڤێن وان كەسێن بۆ حەجا سالا بهێت خۆ تۆماركرین ل هەشت نڤیسینگەهێن پارێزگەهـ و ئیدارێن سەربخۆ بەردەوامی هەیە و دبێژیت: ئەم پێشبینی دكەین؛ ل دووماهیا ڤێ مەهێ یان ڕۆژێن دەستپێكا مەها بهێت پشككێشان بۆ ناڤان بهێتە كرن.
كاروان ستوونی، پەیڤدارێ رێڤەبەریا گشتی یا حەج و عومرەیێ‌ بۆ رۆژنامەیا ئەڤرۆ گۆت: «ل ڤان نڤیسینگەهان ڕۆژانە پتر ژ هزار فۆڕمان هووربینی بۆ دهێتە كرن، هەر فۆڕمەكا شاشیەك تێدا هەبیت، ب رێكا كورتەنامەیەكێ ئەو كەس دهێتە ئاگەهداركرن، یێن نامە بۆ نەچووی هێشتا فۆڕما وان نەچوویە هووربینیێ، یان ژی بۆ هاتییە كرن و چ گرفت تێدا نەبووینە».

بەرپرسەكێ وەزارەتا باژێڕڤانیێ ئاشكرا كر، ناڤێ 500 هزار فەرمانبەران بۆ باژێڕڤانیان هاتیە هنارتن ب مەرەما وەرگرتنا پارچەیێن ئەردی و دبێژیت: هەردەمێ لیستا ناڤێن فەرمانبەرێن گرێبەست بگەهیتە وەزارەتێ، ئێكسەر فۆرمێن بەلاڤكرنا ئەردی لسەر فەرمانبەرێن گرێبەست دێ هێنە بەلاڤكرن.
سەربەست مەولود، رێڤەبەرێ قانوونی ل وەزارەتا باژێڕڤانیێ بۆ رۆژناما ئەڤرۆ دیاركر، بڕیارا بەلاڤكرنا پارچەیێن ئەردی لسەر فەرمانبەرێن گرێبەست دەركەفتیە و دێ كەڤیتە د بیاڤێ بجهئینانێ‌ دا و گۆت: «داتا و هووركاریێن فەرمانبەرێن گرێبەست ل جڤاتا وەزیرانن، لەوڕا وەزارەتا باژێڕڤانیێ‌ چاڤەڕێی سەرۆكایەتیا جڤاتا وەزیرانە بۆ هنارتنا ناڤێن فەرمانبەرێن گرێبەست، هەتا بڕیار بهێتە بجهئینان، هەر دەمێ لیستا ناڤێن گرێبەستان گەهشتە وەزارەتێ ئێكسەر دێ پرۆسێسا بەلاڤكرنا فۆرمان بڕێڤەچیت و مینا فەرمانبەرێن هەمیشەیی دێ فەرمانبەرێن گرێبەست ژ وەرگرتنا پارچەكا ئەردی مفاداربن».
سەربەست مەولود گۆت ژی: «كارێن وەزارەتێ ل دۆر بەلاڤكرنا پارچەیێن ئەردی لسەر فەرمانبەرێن هەمیشەیی ب دوماهی هاتیە، چونكی وەزارەتێ‌ 500 هزار ناڤێن فەرمانبەران پێشكێشی سەرۆكایەتیا جڤاتا وەزیران كرینە، پشتی پەسەندكرنێ بۆ باژێڕڤانیان هاتینە هنارتن، هەژمارەكا بەرچاڤ یا فەرمانبەرێن بڕیار هەی مفاداربووینە و بەردەوام ژل ایێ باژێڕڤانیان ڤە بەرهەڤی بۆ پرۆسێسا بەلاڤكرنا پارچەیێن ئەردی دهێتە كرن».

ئەمین عیسا، بەرپرسێ سەنتەرێ عەشتار یێ ڕەوشەنبیری و هونەری ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو ب هەلكەفتا 16ی تەباخێ‌ و 80 سالیا دامەزراندنا پارتی و ب ئامادەبوونا ئانۆ جەهوەر، وەزیرێ ڤەگوهاستن و گەهاندنا حكومەتا هەرێما كوردستانێ و هەژمارەكا كەسایەتیێن دەڤەرێ، سەنتەرێ عەشتار یێ ڕەوشەنبیری و هونەری ل زاخۆ پێشانگەهەكا فۆتۆگرافی ل بارەگایێ سەنتەری ڤەكر، كو تێدا وێنەیێن 300 پێشمەرگێن دێرین یێن كلدانی هاتنە نیشادان.
بەرپرسێ سەنتەرێ عەشتار یێ ڕەوشەنبیری و هونەری ل ئیدارەیا سەربخوە یا زاخۆ، گۆت: «زێدەباری وێنەیێن پێشمەرگێن كلدانی، وێنەیێن گوندێ سناتێ یێ كلدانیان و شانەدێرا مەریەمایێ ژی د ڤێ پێشانگەهێ دا هاتنە نیشادان».

پڕۆژەیێ ئاڤا بەردەڕەشێ‌ دوەم مەزنترین پڕۆژەیێ ئاڤا ڤەخوارنێ یە ل سەر ئاستێ هەرێما كوردستانێ، پڕۆژە دێ ئاڤێ ژ ڕووبارێ زێیێ مەزن بۆ سەنتەرێ دەڤەرداریا بەردەڕەشێ و سێ ناوچەداریان و 83 گوندان دابین كەت.
ئەندازیار رێبەر خورشید نازم، رێڤەبەرێ ئاڤا بەردەڕەشێ بۆ ئەڤرۆ گۆت: «ل بەردەڕەشێ كاركرن د پڕۆژەیێ ستراتیژی و مەزن یێ دابینكرنا ئاڤا ڤەخوارنێ دا ب رەنگەكێ بلەز بەردەوامە، پڕۆژە دێ ئاڤێ ژ ڕووبارێ زێیێ مەزن بۆ ناڤ سەنتەرێ بەردەڕەش و هەرسێ ناوچەداریێن سەر ب دەڤەرداریێ ڤە و 83 گوندان دابین كەت».
ناڤبری گۆتژی: «پڕۆژە ژ لایێ حكومەتا هەرێما كوردستانێ و ب دەستێ كۆمپانیەكا ناڤخۆیی دهێتە بجهئینان، بڕیارە د دەمێ 450 ڕۆژان دا ب دووماهی بهێت، نوكە كاركرن تێدا بەردەوامە».
زێدەتر گۆت: «ب درێژاهییا 451 كیلۆمەتران بۆڕی بۆ تۆڕێن ئاڤێ دێ هێنە ڕاكێشان، هەروەسا ل 18 جهێن جودا 39 ئەمبارێن مەزن یێن ئەمباركرنا ئاڤێ دێ هێنە دانان، ب تەمامبوونا پڕۆژەی بۆ دەمێ 40 سالان هەموو دەڤەرداریا بەردەڕەشێ‌ ب گوند و ناوچەداری ڤە دێ ژ ئاڕێشەیا كێمی و نەبوونا ئاڤا ڤەخوارنێ ڕزگار بن».

پشتی بڕیارا سەرۆكێ حكومەتا هەرێما كوردستانێ ل دۆر بەلاڤكرنا پارچەیێن ئەردی ل سەر فەرمانبەران، پرانیا باژێرڤانیێن سنۆرێ دەڤەرداریا ئامێدیێ كارێ پێدڤی ئەنجامدایە ژ بۆ بەرهەڤكرنا پارچەیێن ئەردی، داكو ل سەر وان فەرمانبەران بهێنە بەلاڤكرن یێن رازی بوون هەی.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، ل سنۆرێ دەڤەرداریا ئامێدیێ هەموو باژێرڤانیان كارێ پێدڤی ئەنجامدایە و نوكە ژی كار دهێتە كرن ژبۆ بەرهەڤكرنا وان پارچەیێن ئەردی یێن پێدڤی، كو بهێنە بەلاڤكرن و گۆت: «هندەك رێكارێن یاسایی، وەكو: كوژاندنا ئەردی و قەرەبووكرنا خودانێن ئەردی، د دووڤ دا ئەو پارچەیێن ئەردی ل سەر فەرمانبەران دێ هێنە بەلاڤكرن».
گۆت ژی: «ئەڤ پرۆسێسە ل هەموو باژێرڤانیێن سەر ب دەڤەرا ئامێدیێ ڤە هاتیە ئەنجامدان، پارچەیێن ئەردی ل سنۆرێ هەموو باژێرڤانییان، ل دووڤ وان رێنومایێن ژ لایێ وەزارەتا باژێرڤانییان ڤە هاتینە دەركرن؛ دهێنە بەرهەڤكرن، نوكە كار ل سەر كوژاندنا ئەردی دهێتە كرن، ل هندەك جهان ژی كار ب داوی هاتیە و چێدبیت هەتا دو مەهێن بهێن ئەڤ رێكارە ل سنۆرێ هەژمارەكا باژێرڤیانیان ب داوی بهێن و پارچەیێن ئەردی بهێنە بەرهەڤكرن بۆ بەلاڤكرنێ‌«.