ئەندازیار بشار حجی زەینەل، رێڤەبەرێ ئاڤا دهۆكێ بۆ رۆژنامەیا ئەڤرۆ دیار كر، ل سەر پێشینەیا تایبەت یا ڕێڤەبەریا ئاڤا دهۆكێ، ب مەرەما باشتركرنا خزمەتگوزارییان و دابینكرنا ئاڤا ڤەخوارنێ بۆ وەلاتیان، رێڤەبەریا وان رابوویە ب چێكرنا دو پڕۆژەیان.
ناڤهاتی گۆت: «پڕۆژە پێك دهێن ژ ل ڕاكێشانا هێلەكا ئاڤێ ب درێژاهییا 275 مەتران، ل نێزیك قوتابخانەیا ئەمریكی ل تاخێ نزاركێ یێ‌ سەنتەرێ‌ دهۆكێ‌، دیسا ڕاكێشانا هێلەكا ئاڤێ ل تاخێ مالتا كادران، بەرانبەر پاركا دلشاد محەمەد سەعید».
گۆت ژی: «ڕێڤەبەرییا ئاڤا دهۆكێ بەردەوام د كاری دایە، داكو ئاڤا ڤەخوارنێ بۆ هەمی تاخ و گەڕەكێن باژێڕی دابین بكەت و ئارێشەیێن تۆڕێن ئاڤێ چارەسەر بكەت».

د. سەكڤان سلێمان خەمۆ، رێڤەبەرێ نەخۆشخانەیا ئازادی یا فێركرنێ‌ بۆ رۆژنامەیا ئەڤرۆ دیار كر، ژ بۆ ئاسانكاریكرن د كارێن وەلاتیان دا و زێدەتر بڕێڤەچوونا كارێن وان، دەست ب پرۆسێسا دیجیتالكرن و ئەلكترۆنیكرنا خزمەتگوزاریان ل نەخۆشخانەیا ئازادی یا فێركرنێ هاتە كرن.
ناڤهاتی گۆت: «ڤەگوهاستنا خزمەتان بۆ سیستەمێ ئەلكترۆنی، هەمی پشكێن نەخۆشخانەیێ ڤەدگریت، ژ وان ژی: سیستەمێ نۆبەگرتن و راوێژكاری، كۆنترۆلكرنا بێهنڤەدانێ و نۆبەگرتنا نەخۆشان ب شێوازەكێ سەردەم و ڕێكخستی و پشكنینێن تاقیگەهێ و تۆماركرن و دەرئێخستنا ئەنجامێن پشكنینان ب ڕێكا سیستەمێ دیجیتالی، هەروەسا پشكا تیشكێ و لێكگوهۆڕینا وێنێن تیشكێ د ناڤبەرا پشكان دا بێ بكارئینانا كاغەزێ، نڤاندنا نەخۆشان، تۆماركرنا بادەكا نۆشداری یا نەخۆشی ژ دەمێ هاتنا ژوورێ هەتا دەركەفتنێ».
گۆت ژی: «ئارمانجێن مە ب ڕێكا ڤی سیستەمێ نوو ئەوە، كارێ نۆشداری یێ هەر وەلاتیەكی بپارێزین، دەمێ ڕاوەستیانێ كێم بكەین، ئاستێ خزمەتگوزاریێن ساخلەمی ل نەخۆشخانەیا ئازادی یا فێركرنێ بگەهینینە ئاستەكێ بلندتر».

كویستان مەحەمەد، وەزیرا كار و كاروبارێن جڤاكی ل حوكمەتا هەرێما كوردستانێ دیار كر، مووچەیێ‌ چاڤدێرێن جڤاكی، ئەوێن چاڤدێرییا كەسێن خودان پێدڤیێن تایبەت دكەن دێ‌ هێتە زێدەكرن.
وەزیرێ‌ گۆت: «وەزارەتا كار و كاروبارێن جڤاكی یا ئیراقێ، تەرخانكرنا دارایی بۆ تۆڕا چاڤدێرییا جڤاكی و زێدەكرنا مووچەیێ كەسێن چاڤدێریا خودان پێدڤیێن تایبەت دكەن د خشتەیێن بودجەیا سالا 2027 دا راگەهاندیە، ل گور بڕیارا هاتیە دان، مووچەیێ چاڤدێری ژ 170 هزار دیناران دێ بۆ 250 هزار دیناران هێتە زێدەكرن».

بەرپرسەكێ وەزارەتا باژێڕڤانیێ ئاشكراكر، هەموو باژێڕڤانی هاتینە راستپاردن لەزێ‌ د پرۆسێسا بەلاڤكرنا پارچەیێن ئەردی دا بكەن و دبێژیت: ناڤێن فەرمانبەرێن گرێبەست بۆ هووربینیێ بۆ سەرۆكاتیا جڤاتا وەزیران هاتینە هنارتن.
سەربەست مەولود، رێڤەبەرێ قانوونی ل وەزارەتا باژێڕڤانیێ بۆ رۆژناما ئەڤرۆ گۆت: «پێنگاڤێن بەلاڤكرنا پارچەیێن ئەردی لسەر فەرمانبەرێن گرێبەست، بەر ب تەمام بوونێ نە و ژلایێ وەزارەتا دارایی ڤە بۆ سەرۆكاتیا جڤاتا وەزیران هاتینە هنارتن، داكو هووربینی بۆ بهێتە كرن و رازیبوون لسەر بهێتە كرن، پشتی رازیبوونا سەرۆكاتیا جڤاتا وەزیران، ناڤێن گربەستان بۆ وەزارەتا باژێڕڤانیان دێ هێنە هنارتن و رێكارێن كریاری ژ بۆ مفاداربوونا فەرمانبەرێن گرێبەست دێ بڕێڤەچن».
سەربەست مەولود گۆت ژی: «ژ بەر درەنگ دەركەفتنا بڕیارا مفاداربوونا فەرمانبەرێن گریبەست، ئەم پێشبینی دكەین، هژمارەكا زۆر یا فەرمانبەرێن گرێبەست پارچەیێن ئەردی وەربگرن، وەزارەتا باژێڕڤانیێ هەموو سەرۆكایەتیێن باژێڕڤانیان ئاگەهداركرینە لەزێ د پرۆسێسا بەلاڤكرنا پارچەیێن ئەردی دا بكەن، هەتا نوكە نێزیكی 140هزار كەسان پارچەیێن ئەردی وەرگرتینە و پرۆسێس ژی یا بەردەوامە».