سەرۆكێ دەستەیا وەبەرهێنانا هەرێما كوردستانێ دیاركر، بەرهەڤی دهێنە كرن، دا كو ب ڕێكا چەندین پڕۆژەیێن مەزن یێن وەبەرهێنان و گەشەپێدانێ‌ ل دەوروبەرێن بەنداڤ و دەریاچەیان، سەرنجا هژمارەیەكا زۆرا گەشتیاران بۆ هەرێما كوردستانێ بهێتە ڕاكێشان و د ماوەیێ دو مەهێن بۆری دا، پێنج پێشانگەهێن نێڤدەولەتی یێن گرنگ ل باژێڕێن هەرێمێ هاتینە ڤەكرن و زێدەتر ژ 800 كۆمپانیێن ناڤخۆیی و بیانی پشكداری تێدا كربوو.
محەمەد شوكری، سەرۆكێ دەستەیا وەبەرهێنانا هەرێما كوردستانێ بۆ رۆژنامەیا ئەڤرۆ گۆت: «ئەڤ لڤینێن بازرگانیێن چڕ بووینە ژینگەهەكا سەقامگیر و ژ هەژی بۆ وەبەرهێنەرێن جیهانی، هەرێم ژی بوویە ناڤەندەكا سەرەكی بۆ هەڤدودیتنا بازرگان و وەبەرهێنەران و د چارچووڤەیێ پلانا ستراتیژی یا درێژخایەنا هەرێما كوردستانێ دا بۆ كەرتی گەشتیاری، كار و بەرهەڤی دهێنە كرن هەتا سالا 2035، هەرێما كوردستانێ‌ پێشوازییێ ل 20 ملیۆن گەشتیاران ژ هەمی جیهانێ بكەت».

سەرۆكێ باژێرڤانیا ڕوڤیا دیاركر كو هەموو ڕێكارێن بەلاڤكرنا قووناغا ئێكێ یا پارچەیێن ئەردی ب دووماهی هاتینە و ب تنێ پێنگاڤەكا مای، كو دەست ب بەلاڤكرنا وان ل سەر فەرمانبەر بهێتە كرن.
زەید سەلیم محەمەد سەعید، سەرۆكێ باژێرڤانیا ڕوڤیا گۆت: «ڕێكارێن یاسایی یێن بەلاڤكرنا پارچەیێن ئەردا ل ڕوڤیا هەموو تەمام بووینە و ل تاپۆیێ كار ل سەر تۆماركرنا وان دهێتە كرن».
گۆت ژی: «ب تنێ شێوازێ قەرەبووكرنا مۆلكدارێن خودانێن ئەردان یا مای، ژ بەركو ئەوان داخوازا قەرەبووكرنێ ل گۆر رەوشا نوكە كرییە، بەلێ ب یاسایا كوژاندنێ یا بەرێ قەرەبووكرن ب پشكانە، بڕیارا دووماهیێ ل نك ڕێڤەبەریا چاندنا دهۆكێ و پارێزگارێ دهۆكێ یە، دا كو بڕیارا دووماهیێ ل سەر شێوازێ قەرەبووكرنێ بدەن، ژبەركو باژێرڤانیێ هەموو ڕێكارێن خۆ تەمام كرینە».
زێدەتر گۆت: «ل قووناغا ئێكێ 800 پارچەیێن ئەردی ب ڕێزبەندیا خالان دێ هێنە بەلاڤكرن، ژ لایەكێ دی ڤە كار ل سەر بەرفرەهكرنا ماستەرپلانێ دهێتە كرن، دا كو ئەرد بۆ قووناغا دویێ ژی بهێتە ئامادەكرن، پارچەیێن ئەردی یێن قووناغا ئێكێ دكەڤنە پشت پێشانگەهێن ترۆمبێلان، كو ئێك ژ باشترین جهایە بۆ فەرمانبەران».

عەزیز ئەحمەد، جێگرێ سەرپەرشتیارێ كاروبارێن پڕۆژەیێ‌ ڕۆناهی ل هەرێما كوردستانێ، هندەك زانیاریێن گرنگ دەربارەی رەوشا كارەبێ و پڕۆژەیێ‌ ڕۆناهی بۆ دەزگەهێن ڕاگەهاندنێ دیاركرن.
ناڤهاتی گۆت: «نوكە بەرهەمئینانا كارەبێ‌ ل هەرێما كوردستانێ‌ چار هزار مێگاواتێن كارەبێ نە، مە مەهانە پێدڤی ب پتر ژ 200 ملیۆن دۆلاران هەیە و داهاتێ كارەبێ ل هەرێمێ مەهانە نێزیكی 80 ملیۆن دۆلارایە، دو ملیۆن پشكداربوویێن كارەبێ ل هەرێما كوردستانێ هەنە و ب تنێ‌ بەری نوكی بۆ 40% یا وەلاتیان پسوولەیا كارەبێ دچوو، ژ وێ ڕێژەیێ ژی نێزیكی 30% یا پشكداران پارەیێ كارەبێ ددا، ئەڤ چەندە ژی ببوو ئەگەرێ‌ كۆمبوونا كورتهێنانەكا زور د كەرتێ‌ بەرهەمئینانا كارەبێ‌ دا، لێ‌ نوكە داهاتێ مەهانە یێ‌ كارەبێ‌ دگەهیتە 80 ملیۆن دۆلاران «.
گۆت ژی: «هەتا دووماهیا ئەڤ سالە، پڕۆژەیێ‌ ڕۆناهی ل هەمی هەرێما كوردستانێ ب ڕێژەیا 100%ێ‌ دێ‌ هێتە بجهئینان».

گوهدار شێخۆ، سەرپەرشتێ ئیدارەیا سەربخوە یا زاخۆ د كۆنگرەیەكێ ڕۆژنامەڤانی دا دیاركر كو نێزیكی سێ‌ ملیار دیناران بۆ پڕۆژەیێن خزمەتگوزاری ل دەڤەرداریا باتیفا هاتینە تەرخانكرن و دبێژیت: بەهرا پتریا پڕۆژەیان ژی ب دووماهی هاتینە و هندەك ژی د بیاڤێ بجهئینانێ دانە.
سەرپەرشتێ ئیدارەیا سەربخوە یا زاخۆ گۆت: «ماستەرپلانا باتیفا ژ لایێ جڤاتا وەزیران ڤە هاتیە پەسەندكرن، ئەڤە ژی دێ بیتە ئەگەر، پتر گرنگیێ ب ڤێ دەڤەرێ بدەین، دیسا بجهئینانا پڕۆژەیێ بەرهەمئینانا كارەبێ‌ ژ تێهنا ڕۆژێ، ئێكە ژ پڕۆژەیێن مە یێن گرنگ ل ڤێ دەڤەرێ».
گۆت ژی: «ئێك ژ پڕۆژەیێن گرنگ یێن دەڤەرێ، دروستكرنا نەخوەشخانەیا باتیفایە، كو پێشتر كاركرن تێدا هاتبوو ڕاگرتن، لێ د نوكە دا كار تێدا دهێتە كرن و ل دەمەكێ نێزیك دێ كەڤیتە د خزمەتا خەلكێ دەڤەرێ دا».
زێدەتر ژی گۆت: «حوكمەتا هەرێما كوردستانێ پشتەڤانیا گەنجێن دەڤەرێ دكەت ژ بۆ پەیداكرنا دەلیڤەیێن كاری، ب تایبەت د بیاڤێ گەشتوگوزارێ دا، ب ڤێ ڕێكێ گەنجێن باتیفا ببنە خودان كار و خزمەتا دەڤەرا خوە بكەن».

بەرهەڤیێن دەستپێكرنا فەستیڤالا دانیكان ل بامەڕنێ تمام بووینە و بڕیارە ل رۆژێن ئەینی و شەمبی ل رێكەفتی 23 و 24/10/2026ێ‌ بهێتە گێڕان.
عەبدولرەحمان بامەڕنی، نڤیسەر و چالاكڤانێ دەڤەرێ دیار كر، ئەڤە فەستیڤالا شەشێ‌ یا دانیكایە ل بامەڕنێ دهێتە گێڕان، پشتی دیاربووی، گێڕانا ڤان فەستیڤالا بۆ نیشادان و ساخكرنا بەرهەمێن خۆمالی سەركەفتن ئینای و گۆت: «د ڤێ فەستیڤالێ دا چەندین بەرهەمێن خۆمالی یێن دەڤەرێ (ژ كتك، مێویژ، گیز، باهیڤ، هنار، تری، سماق، بێمك و كەزان) دێ هێنە نیشادان».
ناڤهاتی ئاشكرا كر، ل سالا بۆری زێدەتر ژ حەفت هەزار كەسان سەرەدانا فەستیڤالا دانیكان كربوو و گۆت: «ئەم ئەڤ سالە پێشبینی دكەین، هژمارەیەكا مەزنتر سەرەدانا فەستیڤالێ‌ بكەن و ئاسانكاریێن تمام بۆ هاتنوچوونا ترۆمبێلان هاتینە كرن».
بامەرنی گۆت ژی: «راستە دەڤەرا دەشتایی ل بامەڕنێ نینە، لێ د كەڤن دا، گەنم ل كانیا قەشیلۆی دهاتە كەلاندن و دبوو دانیك و ل ئاشێ بامەڕنێ دهاتە هێران، ئەڤ فەستیڤالە ڤەژاندنا وی كلتوورێ ڕەسەنە».

80% پڕۆژەیێن ڕێكا ڕۆڤیا بۆ ئاكرێ و جۆتسایدێ سەنتەرێ باژێڕی تەمام بووینە
رەمەزان زەكەریا:
ل گەل بەردەوامبوونا كارێن ئاڤەدانی و خزمەتگوزاری ل سنۆرێ ناوچەداریا رۆڤیا، پڕۆژەیێ ڕێكا سەرەكی یا ڕۆڤیا بۆ ئاكرێ و جۆتسایدێ سەنتەرێ ڕۆڤیا گەهشتیە قووناغێن دووماهییێ و رێژەیا تەمامبوونێ پتر ژ 80% یە.
مەنهەل موەفق، رێڤەبەرێ ناوچەداریا ڕۆڤیا بۆ ئەڤرۆ گۆت: «پڕۆژەی گرنگیەكا تایبەت بۆ ڤەگوهاستن و هاتنوچوونا وەلاتیان و كێمكرنا قەرەبالغیا سەرەكی ل سنۆرێ ناوچەدارێ هەیە».
ناڤبری گۆت ژی: «ڕێكا ڕۆڤیا بۆ ئاكرێ ب درێژاهیا نێزیكی كیلۆمەترەكێ‌ یە، جۆتسایدێ سەنتەرێ ڕۆڤیا ژی ب درێژاهیا نێزیكی دو كیلۆمەترایە ل گەل چێكرنا هژمارەكا سۆلینێن كۆنكریت و ئاڤڕێژ بۆ پاراستنا ڕێكان ژ لەهیان و كۆمبوونا ئاڤا بارانێ».
زێدوتر گۆت: «كارێن پڕۆژەی ب كوالیتییەكا بلند و بەردەوام دهێتە كرن، د دەمەكێ‌ نێزیك دا كارێن مایی ژی دێ ب دووماهی هێن و پڕۆژە دێ‌ هێنە ڤەكرن و كەڤنە د خزمەتا دەڤەرێ دا».