ئارمانجا مه‌ ساخكرنا باسكێت بۆلێ و ڤه‌گه‌ڕاندنا هیڤیێن گه‌نجانه‌

ئارمانجا مه‌ ساخكرنا باسكێت بۆلێ و ڤه‌گه‌ڕاندنا هیڤیێن گه‌نجانه‌

10

د دیداره‌كێ دا راهێنه‌رێ تیما باسكێت بۆلا یانه‌یا گاره‌ دیار كر ئارمانجا وان یا سه‌ره‌كی ساخكرنا یارییا باسكێت بۆلێ یه‌ پشتی ڤه‌قه‌تیانه‌كا درێژ و ڤه‌گه‌ڕاندنا هیڤیێن چه‌ند سالان بۆ لاوێن باژێرێ دهۆكێ یه‌.
زێده‌تر خه‌تاب عومه‌ر بۆ رۆژنامه‌یا ئه‌ڤرۆ گۆت: ب سۆپاسی ڤه‌ كارگێرییا یانه‌یا گاره‌ ب سه‌رۆكاتییا شێروان به‌شار به‌رهه‌ڤییا خوه‌ دیاركرن ژبۆ دروستكرنا تیمه‌كا یارییا باسكێت بۆلێ ب ناڤێ یانه‌یێ ئه‌ڤچه‌نده‌ ژی وه‌كو پشته‌ڤانیه‌كا گه‌له‌ك باشه‌ بۆ گه‌نجێن باژێرێ دهۆكێ ئه‌وێن پرانییا وان خودان شیان و ب هیڤیێن مه‌زن ئه‌ڤه‌ چه‌ند ساله‌ دخوازن یاریێ بكه‌ن، له‌وما ئارمانجا مه‌ ژی ساخكرنا ڤێ یاریێ یه‌ و ڤه‌گه‌ڕاندا ئه‌ڤان هیڤییانه‌، سه‌رباری ئاسته‌نگا مه‌زن ئه‌و ژی نه‌بوونا پشته‌ڤانییا دارایی بۆ یانه‌یێ و تیمێ، له‌وما هیڤییا مه‌ ئه‌وه‌ ژ جهێن په‌یوه‌ندیدار ل پارێزگه‌ها دهۆكێ خوه‌ ل ڤان گه‌نجان بكه‌نه‌ خودان، ب مخابنی ڤه‌ یارییا باسكێت بۆلێ گه‌هشتییه‌ نزمترین ئاستێ خوه‌ دا كو دده‌می دا هه‌می ئیراقێ پارێزگه‌ها دهۆكێ ب ناڤێ پایته‌ختێ باسكێت بۆلێ دانابوو و یانه‌یا دهۆك شیابوو زێده‌تری هه‌شت ناسناڤێ خول و قاره‌مانی و كۆپایێ ببه‌ت.
ناڤهاتی ئه‌وچه‌نده‌ ژی دیار كر كو یانه‌یا گاره‌ به‌رهه‌ڤییا بۆ وه‌رزێ نوو یا خولا نایابا كوردستانێ دكه‌ت كو دهێته‌ پێشبینیكرن ل دووماهییا ڤێ مه‌هێ یان ژی ده‌ستپێكا مه‌ها بهێت هه‌ڤڕكیێن وێ بهێنه‌ كرن، له‌وما ئه‌ڤه‌ باشترین ده‌لیڤه‌یه‌ بۆ گه‌نجێن دهۆكێ ئه‌و هه‌می هێز و شیانێن خوه‌ دناڤ خولێ دا دیاربكه‌ن، هه‌تا نوكه‌ ب سۆپاسی ڤه‌ فیدراسیۆنا له‌قێ هه‌ولێرێ چار ته‌پێن باسكێت بۆلێ وه‌كو دیاری داینه‌ تیما مه‌، ب هیڤییا وێ یه‌كێ نه‌ لژنه‌یا ئۆلمپی تایێ دهۆكێ ژی پشته‌ڤانییا مه‌ بكه‌ت و د باوه‌رێ دامه‌ د. ئه‌حمه‌د قاسم هه‌رده‌م پشته‌ڤانه‌ بۆ هه‌می یارییان.
بۆ زانین فیدراسیۆنا باسكێت بۆلا كوردستانێ راگه‌هاند بوو دێ خولا پلا نایاب ب پشكدارییا 11 یانه‌یا ڤه‌كه‌ن و دێ ب شێوەیێ خول بیت و یاری ژی دێ هاتن و چون بیت، نڤێسارێن فه‌رمی بۆ هه‌می یانه‌یان هاتینه‌ هنارتن، هه‌روه‌سان راگه‌هاند بوو قاره‌مانییا مینی باسكێت بۆل بۆ ژیێن 2012ێ و سه‌ر دا هێته‌ ڤه‌كرن.

کۆمێنتا تە