ئاڤاكرنا شوقەیێن كرێداران دێ كەڤیتە سالا داهاتی
هەولێر، قائید میرۆ
بەرپرسەكێ دەستەیا گشتیا وەبەرهێنانێ ئاشكراكر، پرۆسا ئاڤاكرنا شوقەیێن كرێداران دێ كەڤیتە سالا داهاتی و گیرۆبوونا بجهئینانا پڕۆژێن شوقێن كرێداران بۆ بەرژەوەندیا وانە و دبێژیت: بڕیارە پێداچوون د بهایێ یەكەیێن ئاكنجیبوونێ دا بهێتەكرن ب شێوەیەكی هەموو خەلكەك بشێن یەكەیێن ئاكنجیبوونێ ل پڕۆژێن وەبەرهێنانێ بكڕن.
بەرگەشت ئاكرەیی، رێڤەبەرێ راگەهاندنا دەستەیا گشتیا وەبەرهێنانێ بۆ رۆژناما ئەڤرۆ دیار كر «بڕیارە ڤێ حەفتیێ دەستەیا گشتیا وەبەرهێنانێ كۆمببیت و تێدا بڕیارێ ل سەر بهایێ قستێن یەكێن ئاكنجیبوونێ بهێتەدان كو دۆلار ب چەندێ ل هەمبەر دینارا ئیراقی بهێتە هژمارتن، چونكە بڕیارە ل دەستپێكا سالا داهاتی هەموو مامەلەیێن ناڤخۆ ل ئیراقی ئەڤێن ب دۆلاری دهێنەكرن ببنە دینار و ئیدی دۆلار نامینیت ل مامەلەیێن نافخۆ.
زێدەتر دبێژیت: ئەم دزانین خەلكەكێ زۆر زیان هەبووینە د دەمێ بلندبوون و داكەتنا بهایێ دۆلاری ل كەرتێ وەبەرهێنانێ، لەوڕا حوكمەتا هەرێما كوردستانێ دێ بهایێ دۆلاری دیاركەت و كۆمبوونا داهاتی دێ ئەو بابەت بهێتە ئێكلاكرن، هەتا وەلاتی ژی ژ ڤێ دو دلیێ رزگارببن دۆلار بلند و نزم بوو، وەلاتی نەبنە قوربانی و باجا نە جێگیریا بهایێ دراڤی نەدەن، لەوڕا كۆمبوونا داهاتی دێ یا گرنگ و ئێكلاكەر بیت بۆ وەلاتیێن هەرێما كوردستانێ، واتە حوكمەت دێ بۆ قستێن وەبەرهێنانێ بهایێ دۆلاری هەمبەر دینارا ئیراقی دیار كەت و ل گۆرەی ڤی بهایێ دهێتە دیاركرن وەلاتی دێ قستێن وەبەرهێنانێ دەن.
بەرگەشت ئاكرەیی گۆت ژی» هەر بڕیارەكا بهێتەدان دێ د بەرژەوەندیا وەلاتیان دابیت، بەلێ ئەڤە رامانا ڤێ چەندێ نادەت غەدر ل وەبەرهێنەری بهێتەكرن، بەلكۆ دێ بڕیارەك هێتەدان د بەرژەوەندیا هەموو لایەكی بیت، سیاسەتا سەرۆكێ حوكمەتا هەرێما كوردستانێ ب تایبەتی سەرۆكێ حوكمەتێ ئەوە بەرژەوەندیا وەلاتیان ل بەرچاف بهێتە وەرگرتن، واتە هەر بڕیارەك ل دۆر هەر پرسەكێ بهێتەدان بەرژەوەندیا وەلاتیان دێ ل بەرچاف هێتە وەرگرتن.
خویاژی كر، پشتی دەستەیا گشتیا وەبەرهێنانێ بڕیارێ ل دۆر بهایێ قستێن یەكەیێن وەبەرهێنانێ دەر بكەت دێ بڕیار هێتە بلندكرن بۆ سەرۆكایەتیا جڤاتا وەزیران و ژلایێ سەرۆكێ حوكمەتێ مەسروور بارزانی بهێتە پەسەندكرن، ئەو ژی یێ چاڤەڕێی بڕیارێ دكەت بۆ ڤێ چەندێ دەستەیا وەبەرهێنانێ بهایێ دۆلاری و دینارێ ئیراقی ئێكلا بكەت و زیان ب وەلاتیان نەكەڤن، چونكە یا خویایە بهایێ دۆلاری و دیناری بەردەوام یێ جێگیر نینە و هەر بلند و نزم دبیت وەلاتی ژی نوزانن ب چو شێوەیەكی قستێن خوە یێن وەبەرهێنانێ ڤەگەڕینن، ئەم وەلاتیان پشتڕاست دكەین بهایەكێ گونجایی دێ بهێتە دانان و بەرژەوەندیا هەموو لایەكی بەرچاف بهێتە وەرگرتن، بێ كو زیان ب كەسەكی هەبن و وەلاتی ژی رزگارببن ل بلند و داكەتنا بهایێ دۆلاری.
