ئاکپارتی تووشی شکەستنێ بوو و تورکیا بەر ب قـۆناغەکـا نوو ڤـە دێ چیت
ب، سه‌رجان مەحمود:
چاڤدێرێن سیاسی ل تورکیا دیار دکەن، د هەلبژارتنێن باژێرڤانیان دا دو هێزێن سیاسی سەرکەفتن، ئەو ژی پارتا کۆماری و پارتا رەفاهـ بوون، پارتا دەم ژی ل دەڤەرێن کوردی سەرکەفت و ئاکپارتی ژی تووشی شکەستنەکا مەزن بوو و تورکیا بەر ب قۆناغەکا نوو ڤە دچیت.
ل تورکیا و باکورێ کوردستانێ هه‌لبژارتنێن باژێرڤانیان هاتنه ئه‌نجامدان و %73 وه‌لاتیێن تورکیا پشکداری د هه‌لبژارتنان دا کرن و ل گۆر ئه‌نجامێن نه فه‌رمی پارتێن کو شیاینە سەرۆکاتیا باژێرڤانیان ل تورکیا بدەستڤە بینن ب ڤی رەنگی نە: ئاکپارتیێ شیایە سەرۆکاتیا 505 باژێرڤانی و قەزایان بدەستڤە بینیت، هەروەسا پارتا کۆماری 421، پارتا بزاڤا نەتەوەپەرست 186، پارتا دەم 82 و پارتا رەفاه ژی 60.
ل گۆر ئه‌نجامێن هه‌لبژارتنێن باژێرڤانیان پارتا کۆماری بوو پارتا ئێکێ ئاکپارتی ژی هاتە رێزا دویێ، د هه‌لبژارتنان دا پارتا کۆماری و ده‌م پارتی هژمارا باژێرڤانیێن خوه زێده کرن. ل باژێرێن مه‌زن یێن وه‌ک سته‌نبۆل، ئه‌نقه‌ره، ئەزمیر، ئەنتالیا، ئه‌دانا، مێرسین و بۆرسیا پارتا کۆماری شیا سه‌رکه‌فتنه‌کا مه‌زن تۆمار بکەت.
پشتی هەلبژارتنان سەرۆک کۆمارێ تورکیا رەجەب تەیب ئەردۆغان ئاخڤی و دیار کر، خەلکێ تورکیا پەیامەکا ئاشکرا دایە وان، ئەنجامێ نها بۆ پارتا وان شکەستنە، لێ ئەو راستیا هەی قەبوول دکەن و سوپاسیا گەلێ تورکیا کر و گۆت: (دێ ئۆپه‌راسیۆنێن سه‌ربازی یێن ل دژی پارتا کارکه‌رێن کوردستانێ ب دژواری بەردەوام بن، ئاماده‌کاریێن مه بۆ ئۆپه‌راسیۆنێن به‌رفرەهـ ب دووماهی هاتینه و مە دڤێت ڤێجارێ پەکەکێ ب تەمامی ژناڤ ببەین).
ل ئالیێ دی ئۆزگور ئۆزه‌ل سه‌رۆکێ پارتا کۆماریا گه‌ل ژی راگه‌هاند کو ئه‌ڤ سه‌رکه‌فتنا وان دهێته واته‌یا گوهۆ‌رینا سیاسه‌تا تورکیا و ئاشکرا کر کو ئەو دێ کار بۆ وەرگرتنا دەستهەلاتێ کەن، چونکی خەلکێ تورکیا ژ دەستهەلاتا نها یا ئاکپارتیێ بێزار بووینە، ئێدی دەم یێ هاتی پارتا کۆماری بهێتە سەر دەستهەلاتێ و تورکیا بەر ب قۆناغەکا نوو ڤە ببەت.
ئاژانسا رویتەرز یا نووچەیان ژی راپۆرتەک سەبارەت ب هەلبژارتنێن باژێرڤانیان ل تورکیا بەلاڤکریە و د راپۆرتێ دا هاتیە دیار کرن کو نها ئەکرەم ئیمام ئۆغلۆ سەرۆکێ باژێرڤانیا ستەنبۆلێ کەسەکێ گەلەک بهێزە ل تورکیا، ئەو ئێدی هەڤڕکیا ئەردۆغانی دکەت و دشێت ببیتە کەسەکێ گەلەک بهێز ل تورکیا.
چاڤدێرێن سیاسی ژی ل تورکیا دیار دکەن د هەلبژارتنێن ڤێجارێ دا گەلەک روودانێن نەچاڤەرێ کری روو دان، سەرکەفتنا پارتا رەفاه تشتەک نەچاڤەرێ کری بوو، هەروەسا پارتا کۆماری شیا ب رێژەیەکا بەرچاڤ دەنگێن خوە ل گەلەک دەڤەران زێدە بکەت، گەلەک باژێرێن مەزن کەفتنە دەستێ پارتا کۆماری و ئاکپارتیێ ژی گەلەک باژێرێن مەزن ژ دەست داینە، ئەردۆغان شکەستا خوە قەبوول کر، ئێدی ل تورکیا قۆناغەکا نوو یا سیاسی دەستپێ دکەت و ل تورکیا ئێدی چو تشتەک وەکو بەرێ نابیت.
ل گۆر باوەریا چاڤدێرێن سیاسی، قەیرانا ئابووری و بێکاری ژ وان فاکتەرێن سەرەکی بوون کو وەسا کر خەلک ڤێجارێ وەکو جارێن بۆری پشتەڤانیێ ل ئاکپارتیێ نەکەت، چونکی باوەریا خەلکێ تورکیا ب ئاکپارتیێ وەکو بەرێ نەمایە و خەلکێ دڤێت رەوشا وان یا ئابووری باش ببیت، لێ هەتا نها ژی پارتا کۆماری نەبوویە جهێ باوەریا خەلکی، هەکە پارتا کۆماری بشێت د دەمێ چەند سالێن بهێت دا ب رێیا باژێرڤانیان خزمەتا خەلکی بکەت دێ شێت د هەلبژارتنێن بهێت یێن پەرلەمانی دا ئاکپارتیێ تووشی شکەستنەکا مەزن بکەت، لێ هەتا نها ژی پارتا کۆماری نەشیایە ببیتە هێزەکا جهێ باوەریێ بۆ هەموو خەلکێ تورکیا.
ل گۆر باوەریا چاڤدێرێن سیاسی پارتا دەم شیایە ل دەڤەرێن کوردی یا سەرکەفتی بیت، لێ رێژەیا دەنگێن خوە ل سەر ئاستێ تورکیا کێم کریە و ل باژێرێن مەزن یێن تورکیا ژی ب دەنگێ کوردان جارەکا دی پارتا کۆماری شیا سەرکەڤیت و ژ بەر ڤێ یەکێ ژی دڤێت پارتا کۆماری سیاسەتەکا زەلال ل هەمبەر چارەسەرکرنا پرسا کوردی ل تورکیا هەبیت.
چاڤدێرێن سیاسی ل تورکیا و باکورێ کوردستانێ وەسا دبینن، ئەردۆغان ژ بۆ پەردەپۆشکرنا شکەستا پارتا خوە دێ دەست ب ئۆپەراسیۆنێن سەربازی ل رۆژئاڤا و هەرێما کوردستانێ کەت، چونکی ئەردۆغانی دڤێت وەسا جارەکا دی گەلەک تشتان ژ بیرا خەلکی ببەت و پشتەڤانیا نەتەوەپەرستێن تورکیا بدەستڤە بینیت، ژ بەر ڤێ یەکێ ژی دبیت چار سالێن بهێن بۆ تورکیا گەلەک نەخوەش بن، چونکی ئۆپەراسیۆنێن سەربازی دێ بنە ئەگەرێ ڤێ یەکێ رەوشا ئابووری یا تورکیا پتر خراب ببیت، چونکی نها رەوشا ئابووری یا تورکیا گەلەک خرابە، ئۆپەراسیۆنێن سەربازی دێ بنە ئەگەرێ ڤێ یەکێ رەوشا ئابووری گەلەک خرابتر ببیت، لێ ئەردۆغانی بریارا خوە دایە و دێ دەست ب ئۆپەراسیۆنێن سەربازی کەت.
