ئه‌مریكا گوژمه‌كێ‌ پاره‌ی دده‌ته‌ هێزێن پێشمه‌رگه‌ی

ئه‌مریكا گوژمه‌كێ‌ پاره‌ی دده‌ته‌ هێزێن پێشمه‌رگه‌ی

8

هه‌ولێر، قائید میرۆ:

به‌رپرسه‌كێ وه‌زاره‌تا پێشمه‌رگه‌ی ئاشكرا كر، هه‌ڤپه‌یمانێن نێڤده‌وله‌تی به‌رده‌وام هاریكاریا وه‌زاره‌تا پێشمه‌رگه‌ی دكه‌ن و دبێژیت: بڕیاره‌ بۆ سالا داهاتی ژی ئه‌مریكا گوژمه‌كێ پاره‌ی بۆ هه‌ژماره‌كا لیوایێن پێشمه‌رگه‌ی دابین بكه‌ت.

لیوا قاره‌مان كه‌مال، جێگرێ سۆپاسالارێ پێشمه‌رگه‌ی بۆ رۆژناما ئه‌ڤرۆ دیار كر، ئه‌مریكا  و هه‌ڤپه‌یمانێن نێڤده‌وله‌تی ل سه‌ر هاریكاری و پشته‌ڤانیا هێزێن پێشمه‌رگه‌ی د به‌رده‌وامن و گۆت: “هه‌ژماره‌كا لیوایێن پێشمه‌رگه‌ی هاتینه‌ پێكئینان و هه‌ڤپه‌یمانان چه‌ك و پێدڤیێن سه‌ربازی بۆ دابین كرینه‌ و مه‌شق و راهێنان ژی ب هێزێن پێشمه‌رگه‌ی هاتینه‌ كرن، هه‌روه‌سا بڕیاره‌ ئه‌ڤ ساله‌ دو لیوایێن دیژی بهێنه‌ پێكئینان، دیسا هه‌ڤپه‌یمان دێ هاریكاربن بۆ مه‌شق و راهێنانكرن ب وان و به‌رده‌وام ژی بۆ به‌رهنگاربوونا تیرۆرێ هه‌ڤپه‌یمانێن نێڤده‌وله‌تی پشته‌ڤانیا پێشمه‌رگه‌ی دكه‌ن”.

لیوا قاره‌مان گۆتژی: “ژبلی مووچێ هه‌ژماره‌كا لیوایێن پێشمه‌رگه‌ی، كو ژ لایێ ئه‌مریكاڤه‌ هه‌یڤانه‌ دهێته‌ مه‌زاختن، بڕیاره‌ بۆ سالا داهاتی ژی ئه‌مریكا گوژمه‌كێ پاره‌ی بده‌ته‌ هێزێن پێشمه‌رگه‌ی، چونكو د پڕۆژه‌قانوونا بودجا سالا داهاتی دا ئه‌مریكا گوژمه‌كێ پاره‌ی بۆ هێزێن ئیراقی و هێزێن پێشمه‌رگه‌ی دابین كریه‌، ئه‌ڤه‌ ژی هاریكاریه‌كا باشه‌ بۆ هێزێن پێشمه‌رگه‌ی”.

کۆمێنتا تە