ئێزگێ ده‌نگێ كوردستانێ كاریگه‌ریه‌كا مه‌زن ل شۆڕه‌شا 26گولانێ هه‌بوو

ئێزگێ ده‌نگێ كوردستانێ كاریگه‌ریه‌كا مه‌زن ل شۆڕه‌شا 26گولانێ هه‌بوو

10

ئەڤرۆ

دیدار، سالار محه‌مه‌د دۆسكی:

بێژه‌ركێ به‌رنیاسێ ئێزگێ ده‌نگێ كوردستانێ ل بیرهاتنا شۆڕه‌شا 26ی گولانێ، د دیداره‌كا رۆژناما ئه‌ڤرۆ دا به‌حسێ رۆلێ ئێزگێ ناڤبری دكه‌ت دگه‌هاند په‌یام و سه‌ركه‌فتن و چالاكیێن پێشمه‌رگه‌ی و ئاماژه‌ ب رۆلێ مه‌زنێ ئێزگه‌ی دكه‌ت ل وی سه‌رده‌می.
مه‌سعود سه‌رنی، بۆ رۆژناما ئه‌ڤرۆ گۆت: پشتی من ئاماده‌یا برایه‌تی ب دووماهی ئینای هاتمه‌ وه‌رگرتن ل پشكا كه‌هره‌بێ ل ئاماده‌یا پیشه‌سازی، ل سالا 1978ێ وی ده‌می ب شێوه‌كێ نهێنی هاتنیه‌ رێكخستن ژلایێ پارتی دیموكراتی كوردستان ڤه‌، وی ده‌می به‌رپرسێ بنكه‌كێ بووم و هه‌ر بنكه‌كی چه‌ند كه‌س بخوه‌ ڤه‌ دگرتن و بنكێ ئه‌ز ژێ به‌رپرس بووم هه‌ڤالێن ل گه‌ل من ل(دهوك، باگێرا و كانێ و دێره‌لوكێ) بوون و هه‌ر ئێكی چه‌ند كه‌سه‌ك پێڤه‌ دگرێدایی بوون، پێشكه‌فتنا ڤێ هێلا رێكخستنێ ژ ده‌ڤه‌را دێره‌لوكێ ده‌ست پێدكر بۆ كومه‌لگه‌ها باگێرا بۆ سه‌نته‌رێ دهۆك ئه‌ڤ هێله‌ دهاته‌ ناڤكرن ب هێلا خه‌بات و دووڤ دا به ر ب‌ هندێ چوو بۆ رێكخراوا خه‌بات ئه‌ڤه‌ ل سالا 1979ێ بوو، ده‌مێ ب بریارا شوره‌شا گولانێ رێكخراوا خه‌بات هاتیه‌ دروستكرن وی ده‌می نێزیكی 60 كه‌سان بووین و هه‌ر پێنچ كه‌س ب ئێكی ڤه‌ دگرێدایی بوون و باراپتر ئێك و دو نه‌نیاسی دناڤ رێكخستێن پارتی دا وی ده‌می بوومه‌ ئه‌ندامێ رێكخراوێ و به‌رپرسێ رێكخراوا خه‌بات ناڤێ وی سه‌باح عه‌بدوالخالق بوو نوكه‌ ئاكنجی یه‌ ل وه‌لاتێ هوله‌ندا، رێكخراوا خه‌بات گه‌له‌ك پێشكه‌فت و چالاكی ئه‌نجامدان و هه‌ر چاپه‌مه‌نیه‌ك هاتبا مه‌ ل جهێن ستراتیجی به‌لاڤدكر كو وی ده‌می هێزێن ئه‌منا به‌عسیا دیتبانه‌ وی ده‌می گه‌له‌ك خوشی مه‌ ژێ دیت ده‌مێ ئه‌ڤ كاره‌ مه‌ ئه‌نجامدا و گه‌له‌ك هه‌ڤالێن دی ژی هه‌بوون و مه‌ گه‌له‌ك جاران هاریكاریا ئێكو دو دكر كو ئه‌و ژی ئه‌ڤان چالاكیان ئه‌نجام بده‌ن.
مه‌سعود سه‌رنی زێده‌تر گۆت: ل سالا 1981ێ رێكخراوا مه‌ گه‌له‌ك كه‌فته‌ بن چاڤدێری یا حزبا به‌عس ڤه‌ و گه‌له‌ك چاڤدێریه‌كا توند ل سه‌ر مه‌ هاته‌كرن و سێ هه‌ڤالێن مه‌ هاتنه‌گرتن، هێدی هێدی گه‌هشته‌ وی ئاستی كو نه‌چاربین خوه‌ بگه‌هینه‌ هێزێن شوره‌شێ و ئه‌گه‌ر نه‌ دێ كه‌ڤینه‌ ده‌ستێ رژێمێ و هێنه‌ سێداره‌دان و گه‌هشتمه‌ شوره‌شێ بوومه‌ پێشمه‌رگه‌ و پشتی ماوه‌كێ درێژ چوومه‌ ئێزگێ ده‌نگێ كوردستانێ بوومه‌ بێژه‌رێ كرمانجیا سه‌ره‌ی ئانكو ل پشكا بادینی بوومه‌ بێژه‌ر.
مه‌سعود سه‌رنی گۆتژی:ده‌سپێكا سالا 1981ێ پشتی من په‌یوه‌ندی ب ئێزگێ ده‌نگێ كوردستانێ كری و تاقیكرن ب من هاته‌كرن ژلایێ هه‌ڤال (صه‌باح به‌یت الله)ڤه‌ دیاركر كو ده‌نگێ منێ دروسته‌ و بكێر ئێزگه‌ی دهێت و هاتمه‌ وه‌رگرتن، وی ده‌می ده‌رچوویێن ئاماده‌یی و زانكویا گه‌له‌ك دكێم بوون، چونكه‌ زێده‌تر قوتابی بوون خواندنا خوه‌ ته‌مام نه‌دكر و ره‌ڤین له‌وما من باوه‌رناما شه‌شێ ئاماده‌یی هه‌بوو و من زمانێ كوردی باش زانی بخوینم و بنڤیسم له‌وما هاتمه‌ وه‌رگرتن، وی ده‌می ئێزگه‌ ل سێگوشا دناڤبه‌را هه‌ر دو وه‌لاتێن عیراق و توركیا و ئیرانێ بوو، وی ده‌می گه‌له‌ك بوومن خوه‌ش بوو ژ بێژه‌رێن سه‌ركه‌فتی و كاریگه‌ر بووم وڤێ چه‌ندێ پتر كاریگه‌ر ل منكر پتر داهێنانێ بكه‌م و خوه‌ پێش بێخم وهه‌تا ببمه‌ ئێك ژ بێژێن سه‌ره‌كی ل ئێزگێ ده‌نگێ كوردستانێ دا و گه‌له‌ك خوشی و نه‌خوشی و نشیڤی و ئه‌ڤرازی مه‌ بوراندن، لێ ڤیان و حه‌زا و بیرو باوه‌رێن مه‌ گه‌له‌ك ژڤێ چه‌ندێ مه‌زنتربوون كو خودانێن كێشه‌كا نه‌ته‌وه‌یی بووینه‌ و ئه‌ڤه‌ هه‌می بۆ وێ چه‌ندێ كو دێ وه‌لاتێ خوه‌ ب سه‌رئێخین و رزگار كه‌ین.
مه‌سعود سه‌رنی ئه‌و ژی گۆت: هه‌می ده‌نگ و باسێن ئێزگێ كوردستان دخوش بوون و تایبه‌ت چالاكیێن پێشمه‌رگێ كوردستانێ ئه‌ڤجا ل سنورێ هه‌ر چ لقا پارتی دیموكراتی كوردستان با و هه‌ر جهه‌كێ چالاكیه‌كا پێشمه‌رگه‌ی یان داستانه‌كا پێشمه‌رگه‌ی هاتباكرن ل ده‌نگ و باسان دا دهاته‌ خواندن خوشترین ده‌نگ و باس بوو و هنده‌ك جاران ژی ده‌نگ وباسێ شه‌هید بوون چه‌ند هه‌ڤالێن مه‌ هه‌بوو و ئه‌ڤه‌ ژی بوومه‌ یا نه‌خوش بوو، لێ چونكه‌ مه‌ باوه‌ری ب شه‌هیدبوونێ هه‌بوو كو هه‌ر ده‌مێ چالاكیه‌كێ ئه‌نجام بده‌ین دێ شه‌هید بین یان دێ برینداربین كو هه‌ر تشته‌كێ ب سه‌رێ مه‌ بهێت نورماله‌، خوشترین ده‌نگو باس من خواندین داستانا (دێره‌لوكێ) بوو و پێشمه‌رگه‌ی سه‌ركه‌فتنه‌كا مه‌زن بده‌ست ڤه‌ ئینا و گه‌له‌ك ده‌ست كه‌فتێن مه‌زن ب ده‌ست ڤه‌ هاتن و دڤێ داستانێ دا گه‌له‌ك جاش و سه‌ربازێن دوژمنی هاتنه‌ ئێخسیركرن و هه‌تا 500 كه‌له‌خێن دوژمنی كه‌فتنه‌ ده‌ستێن پێشمه‌رگه‌ی دا و ئه‌ڤه‌ خوشترین ده‌نگ و باس بوو و ئه‌ڤه‌ مه‌زنترین خونیشادانا پێشمه‌رگێ، قه‌هره‌مان بوو به‌رامبه‌ر دوژمنی، دیسا داستانا (كانی ماسێ و قه‌رداغێ) و گه‌له‌ك داستان پێشمه‌رگه‌ی توماركرن بوومن گه‌له‌ك خوش بوو، شه‌رێ سالا 1984ێ ده‌مێ رژێمێ جاش و له‌شكه‌رێ عیراقێ هنارتیه‌ سه‌ر لژنا دهۆكێ ل ده‌ڤه‌را دۆسكیا و شه‌رێ درێژ بوو دناڤبه‌را پێشمه‌رگه‌ی و جاش و له‌شکرێ عیراقێ دا و به‌رده‌وام چالاكی دهاتنه‌ خواندن ئێدی مه‌ ئێكسه‌ر ده‌نگ و باسێن پێشمه‌رگه‌ به‌لافكرن و دپه‌خشێ ئێكسه‌ر دا حه‌ماسه‌كا مه‌زن بوومن دروست بوو و من گازی دكره‌ پێشمه‌رگه‌ی دێ چه‌وا سه‌ركه‌فتنێ ب ده‌ست ڤه‌ ئینت، بلا نه‌هێته‌ ژبیركرن ئافره‌تا ئه‌وان گوندان رۆله‌كێ كاریگه‌ر هه‌بوو و پارزینكێ خوه‌ نان و خوارن بۆ پێشمه‌رگه‌ دبر و بتنێ دا ل شه‌ری به‌رده‌وام بن و ئه‌ڤێ ژی گه‌له‌ك كارتێكرن ل سه‌ر من هه‌بوو ژ روویێ حه‌ماسه‌تێ ڤه‌ كو پتر ب ده‌نگێ خوه‌ پشته‌ڤانیا پێشمه‌رگه‌ی بكه‌م وی ده‌می هه‌ر پێشمه‌رگه‌كی رادیویا خوه‌ هه‌بوو دناڤا جانتێ وی دا بوو و ل ده‌مێ شه‌ری ده‌نگ دایێ و په‌خشێ رادیویێ راسته‌وخو بوو وهه‌تا جاشا گوهداری دكر كو ئێزگێ ده‌نگێ كوردستانێ یێ گازی پێشمه‌رگه‌ی دكه‌ت و دوژمنێ دره‌ڤیت و شكێت .
مه‌سعود سه‌رنی گۆتژی: هه‌ر دناڤا ئێزگه‌ی دا مه‌ بانگه‌وزا بۆ مه‌فره‌ز و گرۆپێن پێشمه‌رگه‌ی دان و ئه‌ڤه‌ ژی ب رێكا هژماران بوو و پتر ده‌نگ و گازیكرن بۆ گرۆپێن پێشمه‌رگه‌ی هه‌ر ب رێكا ئێزگه‌ی بوو و ئه‌ڤه‌ ژی هژمارێن نهێنی بوون و پتر سه‌رهلدانێ ئه‌ڤ چه‌نده‌ هاته‌ به‌رچافكرن، ل سه‌رهلدانێ مه‌ گازی چه‌كدارا دكر ئه‌وێن وی ده‌می ل گه‌ل حوكمه‌تێ و دیسا مه‌ گازی كادرێن خوه‌ دكر و مه‌ گازی رێكخستیێن نهێنی دكر و ئه‌ڤه‌ هه‌می خودان هژماره‌ بوون و بتنێ ئه‌و تێ دگه‌هشتن، مه‌ بانگه‌واز هه‌بوون بۆ سه‌رۆكێن چه‌كداران وی ده‌می ل گه‌ل حوكمتێ بوون له‌وما مه‌ دگۆتێ چه‌كدار و ناڤ هاته‌ گوهورین چونكه‌ مل ب ملێ پێشمه‌رگه‌ی ڤه‌ شه‌ركر به‌رامبه‌ر رژێما به‌عس و كه‌فتنه‌ دناڤا جه‌ماوه‌ری دا و زێده‌تر سه‌ركردایه‌تی دكر و بیرامنه‌ من گه‌له‌ك گازی (براهیمێ عه‌لی) دكر كو سه‌ركردایه‌تی یا هه‌ڤالێن مه‌ و جه‌ماوه‌ری ل سه‌رهلدانێ دكر و گه‌له‌كێن دی و گه‌له‌ك سه‌رۆكێن چه‌كداران هاریكاریا پێشمه‌رگه‌ی و جه‌ماوه‌ری دكر.
مه‌سعود سه‌رنی گۆت: هێزا ئێزگێ ده‌نگێ كوردستانێ 400 وات بوو و هێزه‌كا گه‌له‌ك كێم بوو، به‌لێ وی ده‌می دنه‌چار بووین ونه‌شیاین ئامیرێن پێشكه‌فتی ب ده‌ست خوه‌ ڤه‌ بینین، په‌خش مه‌ رۆژانه‌ دو ده‌مژمێر بوو ده‌مژمێره‌ك ئێڤاری بوو و ده‌مژمێره‌ك سپێدێ بوو، ئێڤاری مه‌ به‌رنامه‌ توماردكر و دهاته‌ په‌خشكرن و رۆژا دووڤ دا ل دانێ سپێدێ به‌رنامه‌ دووباره‌ بوو و ئه‌ڤه‌ ژی هاتبوو دابه‌شكرن ل سه‌ر زاراڤێن (كرمانجی یا خوارێ سورانی، كرمانجی سه‌ره‌ی بادینی) زێده‌باری زمانێ عه‌ره‌بی و گه‌له‌ك پرۆگرام هه‌بوون وه‌ك پرۆگرامێ قوتابی و لاوان و ئافره‌تان و چه‌ندین به‌رنامێن دی هه‌بوون.
مه‌سعود سه‌رنی زێده‌تر گۆت: ئێزگێ ده‌نگێ كوردستانێ گه‌له‌كێ كاریگه‌ر و پشته‌ڤان بوو بۆ پێشمه‌رگه‌ی ل شوره‌شا 26ێ گولانێ، سه‌رده‌مێ ئه‌ز ل ئێزگه‌ی باوه‌ركه‌ ئێزگه‌ لایه‌نه‌كێ گه‌له‌ك گرنگ بوو و لایه‌نێ دی هێزا پێشمه‌رگه‌ی بوو و هه‌ر دو پێكڤه‌ هێز دا خه‌لكی و جه‌ماوه‌ری ورێكخستنا و خه‌لكی خوه‌ دناڤا ئه‌ڤان هه‌ردوكان دا دیت، كو ئێزگێ ده‌نگێ كوردستانێ گوهداریێ بكه‌ت 100% و یا دووێ چالاكی و داستانێن پێشمه‌گه‌ری و ئه‌ڤه‌ هه‌ر دو پێكڤه‌ دگرێدایی بوون.
مه‌سعود سه‌رنی گۆتژی: دروستبوونا سه‌رهلدانێ بۆ گه‌له‌ك خالان ڤه‌دگه‌ریت، ئێكگرتن و ئێكرێزیا هێزێن كوردستانێ و دروستبوونا به‌ره‌ی كوردستانی، لاوازبوونا رژێمێ ل وی سه‌رده‌می و زولم و زوریا رژێمێ بۆ ئه‌گره‌ خه‌لكێ مه‌ بێ زاربیت، ئێزگێ ده‌نگێ كوردستانێ و داستێن پێشمه‌رگه‌ی ئه‌ڤه‌ هه‌می ئه‌گه‌ر بوون كو سه‌رهلدان بهێته‌كرن.
ل دووماهیێ مه‌سعود سه‌رنی گۆت: هیڤدارم وێ روح و گه‌رما ل شوره‌شا 26ی گولانێ ئه‌ڤرۆ په‌یدا بكه‌ینه‌ ڤه‌ دا بشێن وه‌لاتێ خوه‌ ئاڤا بكه‌ین و ئێكگرتنه‌كا دروست چێ بكه‌ین و به‌ر ب وێ چه‌ندێ بچین مه‌ ئاخ و وه‌لاتێ خوه‌ بڤێت و مه‌ر سه‌ركردێ خوه‌ بڤێت و ئه‌گه‌ر ته‌ ئه‌ڤه‌ هه‌بن تو توشی شاشیێ نابی، و هه‌ر تشته‌كێ ته‌ هه‌بیت دێ یێ پیرۆزبیتن نوكه‌ ئه‌و پیرۆزی یا لاوازه‌ بمخابنی ڤه‌ و هیڤیا وێ چه‌ندێ به‌ر ب وی گیانی بچین، به‌ر ب هندێ بچین مه‌ قوربانی و سه‌روه‌ریه‌كا مه‌زن دایه‌ و هه‌ر ئه‌ڤه‌ خه‌لك و مرۆڤێن مه‌ بووینه‌، ئێكگرتن و ئێكرێزیا ناف مالا كوردی گه‌له‌ك یا گرنگه‌ و ئه‌ڤرۆ بوومن یا خوش بوو پارتی و ئێكه‌تی نێزیكی ئێك بووینه‌ ئه‌ف نێزیك بوونه‌ بۆ هه‌ر كوردانه‌كێ خوان غیره‌ت و وژدان بیت دێ بوو یا خوش بیت.

کۆمێنتا تە