ئێكەتیا ئافرەتان دژی زەلامان نینە

ئێكەتیا ئافرەتان دژی زەلامان نینە

7

شاكر ئەتروشی:

بەرپرسا ناڤەندا ئافرەتێن قەزا ئاكرێ‌، د دیدارەكێ‌ دا بۆ رۆژناما ئەڤرۆ دیار كر كو سەرەرای وان زەحمەتی و پێلێن دژوار و دەردەسەری و مالوێرانیا ل درێژاهیا مێژوویێ ژلایێ خێزانێ و جڤاكی ڤە ب سەر ئافرەتێ‌ دا هاتی، ئافرەتا كورد هەر دەست نە داهێلاینە و یا بهێز و خوڕاگر بویە.

بەرپرسا ناڤەندا ئافرەتێن قەزا ئاكرێ‌، بەفرین شەعبان ئاكرەیی دیار كر كو هەتا نها بەشەك ژ جڤاكی وەسا هزر دكەن كو جه و هەبوون و ئەركێ ئافرەتێ ب تنێ كار كرن دناڤ مالێ دایە و پەروەردەكرنا زارۆیانە و گۆت: (لێ سەرەرای هەبوونا ڤان ئاستەنگ و بەربەستان ئافرەتان دەست نە داهێلاینە و ب سەربلندی ئەركێن خۆ بجه ئیناینە و بێ دو دلی بارێ‌ بەرپرساتیێ ل سەر ملێن خۆ هەلگرتیە و بزاڤێن نەمانا زۆرداریێ ل سەر خۆ و كەتوارێ‌ خۆ كریە، ئەڤە ژی پێخەمەت یەكسانیا جێندەری و بەختەوەریا خێزانێ).
بەفرینێ‌ دیار كر ژی كو ئەو ئازادیا نها ئافرەت تێدا بەرهەمێ زەحمەتی و ماندیبون و قوربانیدان و خزمەتا ئافرەتێن بەری نها بوویە كو ب ئازادانە دناڤ گشت سێكتەراندا رۆلێ‌ خوە دیتیە و كار كریە، بێگومان گوهۆڕینێن باش پەیدا بووینە ل چاڤ سالێن بەرێ و گۆت: (ئافرەتا كورد قوناغێن ب زەحمەت دەرباز كرینە، چونكی د كەڤندا كەتوارێ مە هند یێ‌ هاریكار و پالپشت نەبو ژ بو خۆ دەرخستنا ئافرەتێ د وارێن جودا جودا یێن كاركرنێ دا و نیشاندانا هێز و ئیرادەیا خۆ كو ب دەنگەكێ ئازادانە بێژیتن بەلێ ئەز ژی دكارم خزمەتێ بكەم و ببمە هێڤێنێ ئاڤاكرنا كەتوارەك ئازاد).
بەفرینێ‌ گۆتژی: (ئەوا ژلایێ مەڤە گرنگ و پێدڤی وەك ئێكەتیا ئافرەتێن كوردستانێ گەهشتنا ئافرەتێ یە ب مافێن وێ‌ و پێگەه و ڕۆلێ وانا ب ڕەنگەكێ دیتر دناڤا خێزانێ دا بەرجەستە بكەین و ئەم شیاینە ئافرەتا خۆ پتر پێش بێخین و بكەینە ئافرەتەكا سەركردە و خۆ د هێزا كاری دا ببینت و دیتنا وێ‌ ل هەمبەر چەمكێ یەكسانیا جێندەر بەفرەهتر بكەین، ئانكو هەتا نها هەردە رێكخراوا مە ب ئێك دروشم و هزر بیر دەست ب خەبات و كەدا خۆ كریە كو ئێكەتیا ئافرەتان ب چ ڕەنگان دژی زەلامان نینە بەلكو دژی سیستەمێ جڤاكی یێ‌ باب سالاریێ نە).
سەبارەت دیاردا تۆندوتیژیێ‌ ل دژی ئافرەتان ل دەڤەرێ‌، بەرپرسا ناڤەندا ئافرەتێن قەزا ئاكرێ‌ دا زانین كو دیاردا توندوتیژیێ‌ چ جاران بنبڕ نابیت، لێ‌ كێم دبیت و گۆت: (مخابن توندوتیژی ل هەمبەر ئافرەتێ بتنێ‌ د مالدا ناهێتە كرن، بەلكو ژ دەرڤەی مال ژی و د كاری دا توندو تیژی ل هەمبەر ژنان دهێتە كرن، ئەڤجا پێدڤیە جڤاك پتر بهێتە رەوشەنبیر كرن).
ل دور شووكرنا كچان د ژیەكێ بچووكدا، بەرپرسا ناڤەندا ئافرەتێن قەزا ئاكرێ‌ دیار كر كو شوو كرن د ژیەكێ‌ بچووكدا د زێدە بونێ دایە و بوویە چاڤلێكرن، پێكئینانا هەڤژینیا بەر وەخت و ب زۆری د هەموو جڤاكان دا هەیە و ئەڤێ‌ دیاردێ‌ ژی كارتێكرنەكا مەزن ل سەر رەوشا خێزانان ب تەمامی كریە و بەهرا پتر ئەگەرێ وێ‌ نەبوونا داهاتیە و گۆت: (شووكرن د ژیەكێ بچووكدا دبیتە ئەگەرێ‌ پەیدابوونا ئاریشێن جورا و جور و ئەڤ جۆرە شوویدانە د ژیەكێ بچوویكدا د زێدەببونێدایە و یا بوویە چاڤلێكرن).

کۆمێنتا تە