ئێكەتیا تەپا پێی: یاریگەها یانەیا شێلادزێ یاسایی نینە
ئەڤرۆ
د داخویانیەكێ ئەندامێ ئێكەتیا تەپا پێی یا هەرێما كوردستانێ دیار كر د كۆمبوونا دوهی دا چەند بڕیار و راسپاردە هەبوون ژ وانا راگرنا یاریان د ناڤ یاریگەها یانەیا شێلادزێ دا ژبەر كو سیستەمێ وێ یاسایی نینە.
زێدەتر ئازاد محەمەد گۆت: ل دووڤ راپۆرتا سەرپەرشتێ یاریا بۆری یا تیما یانەیا شێلادزێ د خولا پلا دو دا كو یاریگەها وێ گەلەك كێماسی هەنە و یا یاسایی نینە بۆ ئەنجامدنا یاریێن خولا كوردستانێ، ژ وانا پیڤەر و لاكێشێن وێ د روست نینن، جهێ كۆرنەرێ یاریزان نەشێت ب ئازادی لێدانا كۆرنەرێ ئەنجامبدەت و چەند كێماسیێن دی هەنە، لەوما ل دووڤ ئەڤێ راپۆرتێ د كۆمبوونا دوهی دا بڕیار هاتە دان ئێدی تیما یانەیا شێلادزێ یاریێن خوە د ناڤ یاریگەها خوە نەكەت و دڤێت یاریگەهەكا دی بخوە دەستنیشان بكەت بۆ یاریێن مایی، ئەڤ بڕیارە ژی هەر بۆ سەركەفتنا بڕێڤەبرنا یاریێن ڤێ یانێ نە و سلامەتیا یاریزانانە.
ژلایەكێ دووڤە ناڤهاتی دیاركر بڕیارا شێوازێ دەربازبوونا تیمێن رێزێن سێیێ و یێن14ێ و 16ێ د خولێن پلا نایاب، ئێك و دو دا هاتە پەسەندكرن و گۆت: ئەو تیمێن رێزێن سێیێ دهێن د خولێن پلا ئێك و دو دگەل تیمێن رێزێن 14ێ و 16ێ یێن پلا نایاب و ئێك دێ د قۆناغا چارگۆشەیا زێرین بەرانبەری ئێك بن ژبۆ مسۆگەركرنا تیمێن دەربازبوویی و مان د خولێ دا و ئەڤ قۆناغە دێ پشتی ب دووماهی هاتنا خولا پلا نایاب ب دو حەفتیان بیت.