ئێكەم دەزگەهێ راگەهاندنێ بوو سترانێن من بەلاڤكرین
زنار تۆڤی:
سترانبێژ (دلیار شێخۆ) كوخەلكێ رۆژئاڤایێ كوردستانێ و ئەڤە بیست و دو سالن ل وەلاتێ سوید دژیت، د دیدارەكێ دا بۆ رۆژناما ئەڤرۆ گۆت: ئەڤە پتری 25 سالانە ئەز سترانان دبێژم و رادیۆیا دهۆك، ئێكەم دەزگەهێ راگەهاندنێ بوو سترانێن من بەلاڤكرین، هەتا نوكە من چەند ئەلبۆمێن سترانان و كلیپ بەلاڤكرینە و ب دەهان سترانێن سینگل ژی من تۆماركرینە.
ناڤهاتی گۆت: ئەڤ سالە من سێ سترانێن فولكلۆری (خانمێ، رەحیما، فاتم وەرە) بەلاڤكرینە، هەروەسا من سترانەكا دوقۆلی ب زمانێ سریانی ب ناڤێ (گركێ شامۆ) ل گەل هونەرمەندێ سریانی (نینیب لەحدو) گۆتیە، دیسان من سترانا (ئەسمەر هاتی) كو ژ پەیڤ و ئاوازێن مامۆستا كەریمونە من بەلاڤكریە، هەروەسا سترانا (فەلەك خائین كەفت) كو ژ پەیڤ و ئاوازێن جەواد مەحموودی نە، من بەلاڤكریە، نوكە ژی كاری ل سەر تۆماركرنا سترانەكا فولكلۆری ب ناڤێ « (عەیشانێ) دكەم، هەروەسا دێ سترانێن فولكلۆری (كۆبارێ، دل كەتمە یەكێ، ل گەل سترانا زۆزان من ل گەل كچا خوە گۆتیە ل ڤان نێزیكان دێ تۆماركەم، هەروەسا نوكە ئەز كار ل سەر تۆماركرنا سترانا ( نارین) دكەم، ژ پەیڤێن جەلال محەمەدی نە، ئاوازا وێ سترانا یا منە و ئارمانجا من ئەوە ئەز ڤان سترانان ب پارێزم و بگەهینمە نڤشێ نوو.
