ئێك ژ ئەگەرێن دەستدرێژیێ ل سەر ژنان لاوازیا بارێ ئابۆریە
هەولێر، قائید میرۆ:
شیرەتكارەكێ جڤاكی و دەروونی بو رۆژناما ئەڤرۆ دیار كر كو لاوازیا بارێ ئابوری یێ ژنان ئەگەرە بۆ ڤێ چەندێ تەسلیمی زۆر كاران ببن ژ وان ژی ئێك ژ ئەگەرێن دەستدرێژیا سێكسی بۆ سەر ژنان ئابورە و گۆت: پێدڤیە هەموو لایەك هاریكار بیت ژ بۆ كێمكرنا حالەتێن دەستدرێژیا سەر ژنان.
بەهێز سابر، شیرەتكارێ جڤاكی و دەروونی بۆ رۆژناما ئەڤرۆ دیار كر، د پێكهاتا جڤاكێ مە دا ژن ب چەندین ئەگەران پێكڤە هاتینە گرێدان، ئەڤە ژی بوویە ئەگەرێ ڤێ چەندێ هندەك جاران ژن یان رەگەزێ مێ ببیتە ئارمانج بۆ ئەنجامدانا دەستدرێژیێ ل سەر وێ، هندەك جاران ژی فۆرمێن كەلتووری ئەگەرن و بەردەوام كەسێ دبیتە قوربانی دهێتە بێ هیڤی كرن ژ ڤێ چەندێ پشتەڤانیا كەسێ دبیتە قوربانی ناهێتە كرن، ئەڤە ژی بۆ ڤێ ئێكێ ڤەدگەڕیت بناڤێ شەرەفێ هەمبەر خێزانێ و گۆت: (لەوڕا ژی دەمێ ئاریشە زۆر ئالۆز دبیت دهێتە بەلاڤكرن ل سۆشیال میدیایێ و تۆڕێن جڤاكی، هندەك كەسێن تاوانبار ژی پێگەهێ خوە بكاردئینن بۆ دەستدرێژی كرنا سەر ژنان).
بەهێز دیار كر ژی كو مخابن رەوشا خراب یا ئابوری ئەگەرەكێ بهێزە ژن تەسلیمی هندەك كاران ببن ئێك ژ وان دەستدرێژیا سێكسیە و هندەك جاران ژی دهێنە نەچار كرن بچنە دناڤ رەوشا وەسا، بەلاڤكرنا بادەكێن دەستدرێژیا سەر ژنان ل راگەهاندنێ ب گشتی دو جورێن كاریگەریێ هەنە، ژلایەكی ڤە ترس و دو دلیا دەروونی و جڤاكی پەیدا دكەت، ژلایەكێ دیڤە دبیتە ئەگەر بۆ ڤێ چەندێ دڕنداتیا خەلكەكی بو جڤاكی بهێتە نیشا دان و خەلك بهێتە هشیار كرن ژ ئەڤان حالەتێن دهێنە تۆمار كرن یێن دەستدرێژیا سێكسی و ئەڤە دێ بیتە هاندانەك بۆ كەسێن بووینە قوربانی و هەتا نوكە كەس ژ بادەكا وان ئاگەهدار نینە و گۆت: (ب دیتنا من دەمێ دەزگەهێن راگەهاندنێ و سۆشیال میدیا بادەكێن دەستدرێژیێ بەلاڤ دكەن بێگومان خەلك دلگران دبیت و گڤاشتن ل سەر حوكمەتێ دهێنە كرن ژ بۆ لێپرسینێ ل ئەڤان روویدانان).
بەهێز سابر دا زانین كو رێكێن خۆ پاراستنێ ژ دەستدرێژیا سێكسی زۆرن، پەروەردێ رۆلەكێ سەرەكی هەیە بۆ ڤێ چەندێ تەحەدیا هندەك كاران بكەت ژ وانژی، بیرۆباوەر و پەروەردەكرنا كەلتوورێ رێزگرتن و ئێكڕێزیێ، هەروەسا پێدڤیە ئەو قانوونێن ژنان دپارێزن بهێنە بهێز كرن و گۆت: (دەمێ تاوانەكا دەستدرێژیێ دهێتە تۆمار كرن بلەز لێپرسین ل گەل تۆمەتباران بهێتە كرن و ب رێیا دەلیڤێن كاری ئابورێ ژنان بهێتە باشتر كرن، پشتەڤانیەكا بهێز ل كەسێن دبنە قوربانی بهێتە كرن، دوماهیێ هاریكاریا هەموو لایەكی یا پێدڤیە بۆ گۆهۆڕینا جڤاكی ل هەمبەر روویدانێن دەستدرێژیێ بۆ سەر ژنان و هەلویستێ جڤاكی بهێتە گۆهۆڕین هەتا رێگری ل ئەڤان تاوانان بهێتە كرن).
