ئەردۆغان دشێت پرسا کوردی چارەسەر بکەت

ئەردۆغان دشێت پرسا کوردی چارەسەر بکەت

10

سیاسەتمەدارێ ناڤدار یێ باکورێ کوردستانێ راگەهاند، سەرۆک کۆمارێ تورکیا گەلەک زیان گەهاندیە کوردان، لێ ئەردۆغان کەسەک بهێزە و دشێت پرسا کوردی چارەسەر بکەت، کلچدار ئۆغلۆ و پارتا کۆماری نەشێن پرسا کوردی چارەسەر بکەن و ژ بەر پشتەڤانیا بۆ کلچدار ئۆغلۆیی زیان گەهشتە کوردان.

ئەحمەد تورک سیاسەتمەدارێ ناڤدار یێ کورد راگەهاند، وی بەری نها ژی دیار کریە، تنێ کەسێ نها بشێت ل تورکیا پرسا کوردی چارەسەر بکەت، رەجەب تەیب ئەردۆغانێ سەرۆک کۆمارێ نها یێ تورکیا یە، راستە ئەردۆغانی گەلەک زیان گەهاندینە کوردان، لێ راستیەک هەیە نها ژ بلی ئەردۆغانی ل تورکیا کەس نەشێت پرسا کوردی چارەسەر بکەت، ئەردۆغان کەسەک بهێزە، د ناڤ دەولەتێ ژی دا هندەک ئالی هەنە دخوازن پرسا کوردی بهێتە چارەسەر کرن، هەر کەس ژی باش دزانیت هەتا ل تورکیا پرسا کوردی نەهێتە چارەسەرکرن تورکیا دێ هەر یا لاواز بیت و گۆت: (من بەری نها ژی دیار کربوو، کەمال کلچدار ئۆغلۆ سەرۆکێ بەرێ یێ پارتا کۆماری نەشێت پرسا کوردی چارەسەر بکەت، مخابن د هەلبژارتنێن بۆری دا مە وەکو هەدەپە و دەنگدەرێن کورد پشتەڤانی ل کلچدار ئۆغلۆیی کر و ژ بەر پشتەڤانیا مە یا بۆ کلچدار ئۆغلۆیی رێژەیا دەنگێن هەدەپێ ژ ١٣٪ داکەفت بۆ ٨٪، ئەو یەک ژی نیشا ددەت کورد ژ سیاسەتا بەرێ یا هەدەپێ رازی نەبوون و دڤێت پارتا دەم ل گۆر راستیا هەی سیاسەتێ بکەت و بزانیت کا کوردان ل تورکیا چ دڤێت).
ناڤهاتی ئەو یەک ژی دیار کر، رەنگە نها هندەک کەس د ناڤ پارتا کۆماری دا بەحسێ چارەسەرکرنا پرسا کوردی دکەن، لێ پارتا کۆماری بخوە چ پرۆژە بۆ چارەسەرکرنا پرسا کورد نینن، بەری نها سەرۆکێ پارتا کۆماری ل دژی پەروەردا ب زمانێ کورد بوو، وان ژ بەر هەلبژارتنان و دەنگێن کوردان هندەک هەلوەستێ خوە نەرم کربوون، هەدەپێ ژی پشتەڤانیا کلچدار ئۆغلۆیی کر و رێژەیا دەنگان گەلەک هاتە خوارێ، ژ بەر ڤێ یەکێ ژی دڤێت پارتا دەم پێداچوونێ د سیاسەتا بەری نها یا هەدەپێ دا بکەت و هەمان شاشیان دوبارە نەکەت.
ئەحمەد تورک سەبارەت ب داخۆیانیا سەرکردەکێ پارتا کۆماری کو دیار کربوو رێککەفتنەکا نهێنی د ناڤبەرا ئاکپارتیێ و پارتا دەم دا هەیە ژی دیار کر، پارتێن سیاسی دشێن ل گۆر بەرژەوەندیێن خوە سیاسەتێ بکەن و ئەو یەک تشتەک زۆر سروشتی یە، لێ چو رێککەفتنێن نهێنی د ناڤبەرا ئاکپارتیێ و پارتا دەم دا نینن، بەرپرسێن پارتا کۆماری دخوازن وەکو هەلبژارتنێن بۆری جارەکا دی کورد بێی بەرامبەر پشتەڤانیێ ل بەربژارێن وان بکەن، ئەو یەک ئێدی نەما و پارتا دەم یا نەچار نینە پشتەڤانیێ ل بەربژارێن پارتا کۆماری بکەت و کوردان ژی دڤێت ڤێجارێ ل هەموو باژێرێن تورکیا بەربژارێن خوە هەبن و ئەو یەک ژی گەلەک سروشتی یە و بریارەک د جهێ خوە دایە.
سیاسەتمەدارێ کورد ئەو یەک ژی نەڤەشارت، بەری نها ژ بەر پشتەڤانیا بۆ پارتا کۆماری رێژەیەکا مەزن ژ دەنگدەرێن کورد دەنگێن خوە نەدانە هەدەپێ، ئەو یەک ژی نیشا ددەت دڤێت ڤێجارێ هەمان شاشی نەهێتە کرن، ڤێجا گەلەک سروشتیە کوردان ل باژێرێن مەزن یێن تورکیا، ب تایبەتی ژی ل ئستەنبولێ بەربژارێن خوە هەبن و گۆت: (دڤێت کورد بەری هەلبژارتنان بەرەیەکێ دروست بکەن، گەلەک یا گرنگە هەموو هێز و ئالیێن سیاسی یێن کوردی ل تورکیا پێکڤە کار بکەن، ئەو یەک دێ کاریگەریەکا خوە یا گەلەک مەزن ل دەنگدەرێن کورد کەت، هەکە پارتێن کوردی بەرەیەکێ ئاڤا بکەن دێ رێژەیەکا باش دەنگان بدەستڤە ئینن و ئەو یەک دێ کاریگەریا خوە ل سیاسەتا دەولەتا تورکیا ل هەمبەر کوردان کەت، چونکی دەمێ کورد ب هێز بن دێ هەر کەس حسابەکا تایبەت بۆ وان کەت و دەمێ کورد لاواز بن بێگومان کەس چو حسابەکێ بۆ وان ناکەت).
ئەحمەد تورک د دووماهیا ئاخڤتنا خوە دا ژی سەبارەت ب داخۆیانیا هندەک ژ سەرکردێن تورکیا ل دۆر چارەسەرکرنا پرسا کورد ژی راگەهاند، پرسا کوردی پرسا سەرەکی یا تورکیا یە، نها بەرپرسێن دەولەتێ و سەرکردێن پارتێن سیاسی ڤێ راستیێ قەبوول دکەن، بەری نها وان دگۆت چو پرسەک ب ناڤێ پرسا کوردی ل تورکیا نینە، لێ نها ئەو بخوە دبێژن پرسا سەرەکی یا تورکیا پرسا کوردی یە و دڤێت بهێتە چارەسەرکرن، ئەو یەک بخوە تشتەک باشە، لێ مخابن هەتا نها دەولەتا تورکیا چو پرۆژە بۆ چارەسەرکرنا پرسا کوردی نین و گۆت: (هەردەم بەری هەلبژارتنان ل تورکیا، هندەک سەرکردێن پارتێن سیاسی ژ بۆ بدەستڤەئینانا دەنگێن کوردان بەحسێ پرسا کوردی و چارەسەرکرنا وێ دکەن، لێ پشتی هەلبژارتنان هەر ئەو بخوە ل دژی مافێن رەوا یێن گەلێ کورد کار دکەن، ژ بەر ڤێ یەکێ ژی باوەریا کوردان ب داخۆیانیێن وەسا ناهێت، چونکی بەری نها ژی گەلەک جاران تشتێن وەسا هاتینە گۆتن و ب کریاری چو بۆ کوردان نەهاتیە کرن).

کۆمێنتا تە