ئەركێ باوەری ب خۆبوونێ ل دەڤ گەنجان ل سەر ملێن حوكمەتێ یە

ئەركێ باوەری ب خۆبوونێ ل دەڤ گەنجان ل سەر ملێن حوكمەتێ یە

107

بێوار حەمدی:

ئەو ژینگەها جڤاكی و ئابووری و سیاسی یا كو گەنج د ناڤدا دژیت، ئەوە كاریگەریێ ل باوەری ب خۆبوونا وی دكەت، ڤەكۆلەرەكێ جڤاكی ژی دبێژیت: دا كو باوەری ب خۆبوون ل دەڤ گەنجان زێدەببیت، ئەركێ مەزن دكەڤیتە سەر ملێن حوكمەتێ و دام و دەزگەهێن پەیوەندیدار كو گەنجا ژ بازنا دائێخستی دەربێخن.

بەیار باڤی، ڤەكۆلەرێ جڤاكی یە د دیدارەكێ دا بۆ رۆژناما ئەڤرۆ گۆت: باوەری ب خۆبوون باوەریا مروڤی یە ب وان هێز و شیانێن خودێ داینە مرۆڤی، ل سەر ڤی بنەمای مرۆڤ كار و خەباتێ دكەت بۆ گەهشتنا ئارمانجێن خۆ و ب باوەریەكا موكۆم و بێ دوودلی مرۆڤ دێ گەهیتێ، تاكو مرۆڤ د ویستگەهەكێ ژی دا ب سەرنەكەڤیت، پێدڤی یە باوەریا خۆ ژ دەست نەدەت و بۆ خۆ مفای ژ وێ نەسەركەفتنێ وەربگریت.
ڤەكۆلەرێ جڤاكی دیار كر، ئەو گەنجێ ب هزاران میلان ببریت و ل دەریا و رووباران بدەت و ل ناڤ چول و دارستانا ل سەرسنور و وەلاتێن بیانی ڤەدەربیت هەتا بگەهیتە پەناگەهەكا ئارام، بێگومان ڤی گەنجی باوەریا ب خۆهەی، لێ ئەو ژینگەها جڤاكی، ئابوری، سیاسی یاكو ئەو دناڤدا دژیت ئەوە كاریگەریێ ل ڤێ باوەری ب خۆبوونێ دكەت، و گۆت: (دەمێ گەنجەك دبینیت كەسەكێ كێم شیان دەرگەهێن پێشكەفتنێ و خوشگوزەرانیێ ل بەر دڤەكری بن و بەروڤاژی ئێكێ خودان شیان بمینیتە بێ خودان و پشتەڤانی، ل ڤێرێ دێ مۆرالا وی هێتە خوارێ و باوەری ب هێز و شیانێن خۆ نامینیت).
بەیار باڤی د بەردەوامیا ئاخفتنا خۆدا گۆت ژی: گەلەك تشت دبنە هاریكار گەنج باوەری ب خۆبوونێ ل دەڤ خۆ زێدەبكەن وەكی، (رێزگرتنا خەلكی و كەس و كارێن وی بۆ وی دبیتە ئەگەر پتر بهایێ خۆ بزانیت، دیسان زوو گەهشتنا وی ب ئارمانجا، ژ بەر كو هەردەم بەرێ وی ل پێشە و هەبوونا شیانێن نووكرن و هێزەكا نوی و گەشبینی و شیانێن داهێنان و ئافراندنا بەردەوام) و ئەگەر بەروڤاژی ڤان خالان بیت دێ ئەو گەنجە بیتە خودان باوەریەكا گەلەكا لاواز.
ل دووماهیێ ژی ڤەكۆلەری گۆت: ئەگەر خێزانێ پەروەردەیەكا ساخلەم بۆ زارۆیێن خۆ هەبیت و وەلێ بهێت بهایێن پیرۆزێن جڤاكی بزانیت دێ باوەری ب خۆبوون ل دەڤ وی زێدەبیت، بەلێ ئەركێ مەزن ل سەرملێن حوكمەتێ و دام و دەزگەهێن پەیوەندیدارە كو گەنجی ژ بازنا دائێخستی دەربێخن و ببنە هاریكار بۆ گەشبینی و گەشەكرنێ، ل دووڤدا كاركرن بۆ گەهشتنا ئارمانجێن وان وەكی (دانا قەرا بۆ پێكئینانا ژیانا هەڤژینیێ، دابینكرنا دەلیڤێن كاری، ئاسانكاری بۆ كەسێن بێ ئاڤاهی، دیسان دادی هەبیت د دابەشكرنێ و دامەزراندنێ دا.

کۆمێنتا تە