ئەم حەز دكەین ڤیزا توركیا‌ ب تەمامی بهێتە راكرن

ئەم حەز دكەین ڤیزا توركیا‌ ب تەمامی بهێتە راكرن

3

ئەڤرۆ، زنار تۆڤی:

رێڤەبەرێ گشتییێ‌ گەشتوگوزارێ‌ ل باژێرێ‌ وانێ‌ دیار كر «من چەندین جاران سەرەدانا باژێرێ‌ دهۆكێ‌ كریە و چەندین جهێن گەشتیاری یێن خۆش و دلڤەكەر ل باژێرێ‌ دهۆكێ‌ هەنە، ئەم حەز دكەین، كۆمپانیێن گەشتیاری گەشتیاران ژ باژێرێ‌ وانێ‌ و جۆلەمێرگێ‌ و مۆشێ‌ و بدلیسێ‌ و ئاگری و ئەرزەرۆمێ‌ بینینە باژێرێ‌ دهۆكێ‌، د هەمان دەمدا خەلكێ‌ دهۆكێ‌ و هەولێرێ‌ و سلێمانیێ‌ بهێنە باكورێ‌ كوردستانێ‌ ب مەرەما گەشتیاریێ‌«.

جەودەت ئۆزگۆكچە، رێڤەبەرێ گشتیێ‌ گەشتوگوزارێ‌ ل باژێرێ‌ وانێ‌ بۆ رۆژناما ئەڤرۆ دیار كر، ئەم گەلەك ل سەر ڤێ‌ چەندێ‌ كار دكەین، هەر چەندە هندەك ئاریشە ل پێشیا هاتنا گەشتیارێن هەرێمێ‌ هەنە، ئەو ژی ئەوە، كو نوكە دەولەتا مە فیزە بۆ خەلكێ‌ هەرێمێ‌ گرانكرییە، لەوما وەكو پێدڤی خەلكێ‌ هەرێمێ‌ سەرەدانا باژێرێن مە ناكەن.
ناڤهاتی گۆت ژی: نوكە ئەم ل سەر هندێ‌ كار دكەین، ڤیزا توركیا بۆ وەلاتیێن هەرێما كوردستانێ‌ ئەرزان ببیت، بۆ ڤێ‌ مەرەمێ‌ ژی من نڤیسارەك دایە سەرۆك كۆمارێ‌ توركیا، د هەمان دەمدا من نڤیسارەك دایە وەزیرێ‌ گەشتوگۆزارێ‌ و بازرگانی یێ‌ توركیا ژی، دا كو بهایێ‌ ڤیزا توركی بۆ وەلاتیێن هەرێما كوردستانێ‌ و عیراقێ‌ ئەرزان بكەن، وان دایە دیاركرن ئەو نەشێن ڤیزێ‌ راكەن، بەلێ‌ وان سۆزادایە مە، ئەو دێ‌ ڤیزا توركی بۆ وەلاتیێن هەرێما كوردستانێ‌ و عیراقێ‌ ئەرزانتر لێكەن، هەروەسا گرانیا ڤیزا توركی بۆ وەلاتیێن هەرێمێ‌ بوویە بارگرانی و خەلكێ‌ هەرێمێ‌ ژی وەكو سالێن بەری نوكە ناهێنە باكورێ‌ كوردستانێ‌ و توركیا ب مەرەما گەشتیاریێ‌.
جەودەت هێشتا دبێژیت: ئەم حەز دكەین ڤیزا توركی بۆ خەلكێ‌ هەرێما كوردستانێ‌ و عیراقێ‌ ب تەمامی بهێتە راكرن، نوكە ئەم ل سەر ڤی بابەتی كار دكەین و ئەم حەز دكەین، هەرێما كوردستانێ‌ ژی ل سەر ڤی بابەتی كار بكەت، پشتی گرانبوونا ڤیزا توركی، نوكە سالانە نێزیكی (80-90) هزار گەشتیارێن هەرێما كوردستانێ‌ سەرەدانا باژێرێ‌ وانێ‌ دكەن، هەروەسا پار ملیۆنەك و 600 هزار گەشتیارێن ئیرانێ‌ هاتینە باژێرێ‌ وانێ‌، لەوما ئەم حەز دكەین، گەلەك گەشتیارێن هەرێمێ‌ بهێنە وانێ‌.
زێدەتر گۆت: دیسان ئەم دخوازین د ئالیێ‌ بازرگانی ژی دا مە پەیوەندیێن ب هێز ل گەل بازرگانێن هەرێما كوردستانێ‌ و ب تایبەتی یێن باژێرێ‌ دهۆكێ‌ هەنە و مە بزاڤكرینە، ئەو پەیوەندی خۆرتتر لێ‌ بهێن، هەروەسا مە بزاڤكرینە دەرگەهێ‌ سەرزێری ژی ببیتە دەرگەهەكێ‌ بازرگانی، مە گەلەك خەبات د ڤی واری دا كرینە و چەندین جاران من سەرەدانا پارێزگارێ‌ جۆلەمێرگێ‌ كریە، ئەو ئاریشێن ژ ئالیێ‌ مەڤە هەین، من بۆ وی بەحس كرینە، دیسان من داخواز ژێ كریە، نێزیكی 15 كیلۆمەترێن رێیا سەرزێری ژ ئالییێ‌ توركیاڤە د خرابن بهێنە چێكرن.
رێڤەبەرێ‌ گشتیێ‌ گەشتوگۆزارا وانێ‌ ئەو ژی گۆت: نوكە ئەم هەموو بزاڤان دكەین د نێزیكترین دەمدا، دەرگەهێ‌ سەرزێری ببیتە دەرگەهەكێ‌ ستراتیجی و نوكە ئەم كار ل سەر ڤێ‌ چەندێ‌ دكەین، د هەمان دەمدا نوكە نێزیكی ( 12-15) كۆمپانیێن گەشتییاری یێن وانێ‌ هەنە، گەشتیاران ژ باژێرێ‌ وانێ‌ دئیننە هەرێما كوردستانێ‌ و ئەڤە گاڤەكا گەلەك باشە، د هەمان دەمدا، مە پەیوەندیێن ب هێز ل گەل هەرێما كوردستانێ‌ هەنە، د هەمان دەمدا، ب سپۆنسەرییا هەردو كۆمپانیێن پلنگ ئینێرجی بۆ بازرگانیا گشتی و كۆمپانییا مۆدرێن تۆریزم، ب هەڤكاری ل گەل سەندیكا رۆژنامەڤانێن كوردستانێ‌ لقێ‌ دهۆكێ‌، گەشتەك بۆ 110 رۆژنامەڤانێن پارێزگەها دهۆكێ‌ هاتبوو رێكخستن، د وێ‌ گەشتا رۆژنامەڤانێن دهۆكێ‌ دا، پەنەلەك ل دۆر چاوانیا گەشەكرنا كەرتێن بازرگانی و گەشتوگۆزاری ژ لایێ‌ راگاهاندنێ‌ ڤە هاتبوو رێكخستن و تێدا رێڤەبەرێ‌ گشتیێ‌ گەشتوگۆزارا وانێ‌ ژی بەحسێ‌ كەرتێ‌ گەشتیاری ل باژێرێ‌ وانێ‌ كر، ل گەل چەندین رۆژنامەڤانێن باژێرێ‌ دهۆكێ‌.

کۆمێنتا تە