ئەو کەنالێن درامایا خۆمالی پەخش دکەن گەلەک بینەرێ خوە یێ ھەی
ھەرھین محەمەد:
ئەنوەر بادی شارەزا دبوارێ دوبلاژێ و کارێ ھونەری دا ددیدارەکێ دا بۆ بەرپەرێ ھونەری یێ رۆژنامەیا ئەڤرۆ دیارکر کو بەری نوکە ئەوان کار ل سەر ھندەک درامایان دکر و نوکە ژی ئەو ل کومپانیا ئەی ڤی لاین مژوولی کارەکێ پەروەردە یی و فێرکرنێ ینە بۆ کەنالەکێ عەرەبی یێ ئاسمانی وئەڤ کارە ژی ب زمانێ عەرەبی یێ عیراقی و زمانێ کوردی کرمانجیا رۆژئاڤایی.
زێدەتر گۆت: راستە ھەیڤا رەمەزانێ ھەیڤا تاعەتی یە، بەلێ دەلییڤەیەکە بۆ گەلەک کەنالان و گەلەک ژ خەلکی ژی یێن ل ھیڤیا درامایێن رەمەزانێ، چونکو درامایێن رەمەزانێ گەلەک دخۆش و تایبەتن و پتریا خەلکی ل مالن و دەمێ خوە ب دیتنا درامایان ڤە دبورینن و خەلکێ مە ژی گەلەک حەزژ درامایێن خێزانی دکەن ژ ب کوردی بن، یان عەرەبی بن، یان دوبلاژکری بن و سەبارەت مە ژی ئەم گرێدایی کەنالێن ئاسمانی نە و ھەکە ئەوان کارەک ھەبین دەنە فمە ئەم بۆ وان دوبلاژ دکەین گۆت: ئەو کەنالێن دراما خومالی پەخش دکەن گەلەک بینەرێ خوە یێ ھەی و خەلک ژی حەزژێدکەن تایبەت ئەو درامایە گرێدای جڤاکی بیت، یان گرێدای ژیانا گوندا بیت، یان خێزانی بیت و سەربور ژی ل سەر ئەڤێ چەندێ ھەنە و ئەو درامایێن ھاتینە پەخشکرن ل کەنالێن مە یێن ئاسمانی ھاتینە پەخشکرن زێدەتر خەلک یێ پێڤە ھاتیە گرێدان و سەبارەت درامایێن دوبلاژ کری چ تورکی بین ن یان ھەرزمانەکێ دی بیت ئەو گرێدای کەلتۆر و ئاریشەیێن وانە و یا مە بتنێ دوبلاژە ئەوی ئاریشێ یان ئەوی کەلتوری ڤەدگوھێزین ب زمانێ خۆ و دبیت ئەو ئاریشەیا لنک وان چێبیت لنک مە نەبیت.
ئەوچەندەژی گۆت: نە ھەرکەسەکێ بڤێت دێ دوبلاژێ کەت و ئەو کەسێ دوبلاژێ دکەت دڤێت بەری نوکە ئەو کارە کربیت دا کو بشێت بھایێ ئەوی بدەتێ و دبینم کارێ دوبلاژێ ب زەحمەترە ژ زارڤەکرنێ، چونکو دزارڤەکرنێ دا زارڤەکەر دکەسایەتیا خودا زارڤەکرنێ دکەت، بەلێ دوبلاژی دا دوبلێر دچیتە دکەسایەتیا ئەوی کەسی دا یێ ب رولێ وی رادبیت و دیسان دەنگان ژی کارتێکرنا خوە ھەیە ل سەر کەسایەتیێ درامایێ دا دڤێت لدووڤ کەسایەتیێ دەنگ بھێتە دانان و خەلەتیا مەزن ئەوە ھەتا نیڤا درامایێ دەرباز دبیت نێزیکی سێ جاران دەنگێ کەسایەتیەکێ دھێتە گوھورین، یان دەنگەکی بۆ گەلەک درامایان ب کاردئینن و ئەڤێ چەندێ ژی کارتێکرنا خوە ل سەر دراما دوبلاژکری ھەیە.
ئەنوەر بادی نەڤەشارت و گۆتژی: ھەکە ئەم بەحسێ رووبەرێ عیراقێ بکەین بینەرێ دەڤەرا بادینان کێمترە ژ بینەرێ دەڤەرا سوران و ھەروەسان کەنالێن وان یێن ئاسمانی و لوکال ژ یێن مە پترن و ئەگەر مەکەنالەکێ بادینی ھەبیت دبیت ئەوان دەە کەنالێن سورانی ھەبن و دبینم ئەڤە ژی بازارە و بازارێ کێ خوەشترە دێ خەلک قەستا وێرێ کەت چ بۆ دوبلاژێ بیت، یان بۆ دراما چێکری بیت و پتر گرنگی ب زاراڤێ سورانی دھێتە دان، چونکو بینەری َوان ژ یێ بادینی زێدەترە.
