ئەڤرۆ زاخۆ دێ عەین یا ئیماراتی مێڤان كەت
قەیس وەیس:
بڕیارە ئەڤرۆ تیما یانەیا زاخۆ دناڤ ئەرد و جەماوەرێ خوە دا مێڤاندارییا یانەیا عەین یا ئیماراتی بكەت ژ چارچووڤەیێ هەڤڕكیێن گەڕا سێیێ ژ كۆما ئێكێ یا قارەمانییا كۆپا كەنداڤی ل دەمژمێر هەشت شەڤ و دهێتە پێشبینیكرن هژمارەكا ئێكجار زوور یا پشتەڤانان بەرهەڤبیت.
تیما زاخۆ د هەردو یاریێن بۆری دا دگەل ئەلقادسیە یا كوێتی ب 3-1 سەركەڤتن ئینابوو، د یارییا دویێ دا دگەل سترە یا بەحرێنی بێ گۆل وەكهەڤبوون، یاریێن كۆما دویێ بڤی رەنگی نە، سوبەهی ئەلنەهزە یا عومانی- تەزامن یا یەمەنی، ریان یا قەتەری- شەباب یا سعۆدیێ.
ل دۆر دووماهی بەرهەڤیێن تیما زاخۆ هشیار شەهباز سكرتێرێ یانەیێ گۆت: یارییا ئەڤرۆ ژبلی كو یا نێڤدەولەتییە دبیتە یارییەكا دیرۆكی و هەموو خەلكێ زاخۆ و كوردستانێ چاڤەڕێ یە ژبەركو بۆ جارا ئێكێ یە یارییەك بڤی قەبارێ دەولەتی ل سەر ئەردێ یاریگەها زاخۆ بهێتە كرن، لەوما ژی هەر تشتەكێ پێدڤی بۆ ڤێ یاریێ و سەركەڤتنا وێ هاتییە كرن ژ هەر لایەكی ڤە، دهێتە پێشبینیكرن جەماوەرەكێ ئێكجار زوور بەرهەڤبیت نە بتنێ ل زاخۆ بەلكو ل كوردستانێ و ئیراقێ.
هەروەسان ناڤهاتی گۆت: ئەم دووڤچوونا ئاست و هونەری و دەرۆنێ یاریزانان دكەین سۆپاس بۆ خودێ بەرهەڤیێن باش دهێنە كرن و د بەرهەڤین، هەموو یاریزان ژی بەرهەڤن بتنێ ئەحمەد ئیبراهیم د گۆمانێ دایە، بۆ مە گرنگە یارییەكا جوان و بسەركەڤین، لەوما ژی پشتەڤانییا جەماوەری ب شێوەیەكێ شارستانی و ژبیر نەكەین پشتەڤانێن زاخۆ ئێكەمن و دێ جوانترین شێوە دیاربن.
