ئەڤ سالە 72 حالەتێن ڤایرۆسێ ئایدزێ هاتینە تۆماركرن
هەولێر، قائید میرۆ:
وەزارەتا ساخلەمیێ ل دۆر هەبوونا حالەتێن ڤایرۆسێ ئایدزێ ئاشكرا كر، ئەڤ سالە ل هەرێما كوردستانێ 72 حالەتێن ڤایرۆسێ ئایدزێ هاتینە تۆماركرن و پڕانیا وان ژی وەلاتیێن بیانی بووینە و بۆ وەلاتێن وان هاتینە ڤەگەڕاندن.
وەزارەتا ساخلەمیا هەرێما كوردستانێ داخویانیەك ل دۆر ڤایرۆسێ ئایدزێ بەلاڤكر و وێنەیەك گەهشتیە رۆژناما ئەڤرۆ و تێدا هاتیە: «د دەمێ 10 مەهێن بۆری دا ل هەرێما كوردستانێ پشكنین ژ بۆی 598 كەسان هاتینە كرن و ب تایبەتی بۆ كەسێن بیانی بەری مۆهلەتا ئاكنجیبوونێ وەربگرن پشكنین هاتینە ئەنجامدان و تێدا دەركەفتیە 72 حالەتێن نوو یێن ڤایرۆسێ ئایدزێ هەنە و هاتینە تۆماركرن».
وەزارەتا ساخلەمیێ دیار ژی كر، ئەو 72 حالەتێن هاتینە تۆماركرن پڕانیا وان وەلاتیێن بیانی بووینە و بۆ وەلاتێن وان هاتینە ڤەگەڕاندن و گۆت: «وەلاتیێن هەرێما كوردستانێ ژی ئەوێن هەلگرێ ڤایرۆسێ ئایدزێ، نوكە دبن چاڤدێریا نۆشداران دانە ب مەرەما وەرگرتنا چارەسەریێ و هەرێما كوردستانێ كێمتر ژ وەلاتێن جیهانێ حالەتێن ئایدزێ هەنە و هەموو بزاڤەك بۆ چارەسەركرنا وان كەسێن تووشی ئایدزێ بووین دهێتە كرن».
