بزاڤ دهێنە كرن پترین رێژەیا گەنمێ جۆتیاران بهێتە وەرگرتن

بزاڤ دهێنە كرن پترین رێژەیا گەنمێ جۆتیاران بهێتە وەرگرتن

6

ئەڤرۆ، زنار تۆڤی:

بریكارێ وەزارەتا چاندن و ژێدەرێن ئاڤێ ل هەرێما كوردستانێ دیار كر، لژنەك ژ هەموو وەزارەتێن ئیراقێ هاتیە پێكئینان بۆ دیاركرنا ڕێژەیا وەرگرتنا گەنمێ جۆتیارێن هەرێما كوردستانێ، هەتا نوكە حوكمەتا ئیراقێ رێژەیا وەرگرتنا گەنمێ جۆتیارێن هەرێمێ‌ دیار نەكرییە، مە ژی هەموو رێك و ئەو تشتێن حوكمەتا ئیراقێ ژ مە خواستین ل گەل خۆ برینە، داكو غەدر ل جۆتیارێن مە نەهێتە كرن، هەتا نوكە ئیراقێ چ ئەنجامێن دووماهیێ نەداینە مە، ئەڤ سالە ئەم ب هیڤینە ئیراق دێ پتر ژ پار گەنمی وەربگریت.
كەریم سلێمان، بۆ رۆژناما ئەڤرۆ گۆت: «دوهی مە كۆمبوونەك ل گەل وەزیرێ چاندنا ئیراقێ كر و لژنەك ژ 57 كەسان هاتیە پێكئینان، ئەو لژنە ژ هەموو وەزارەتان هاتیە پێكئینان، كارێ وێ لژنێ ئەوە ڕێژەیا وەرگرتنا گەنمێ جۆتیارێن هەرێما كوردستانێ دەستنیشان بكەت».
ناڤهاتی گۆتژی: «مە گەلەك دانوستاندن ل گەل وێ لژنێ‌ و وەزارەتا چاندنێ كرینە، ئەم پێداگیرین ل سەر هندێ، كو وەرگرتنا گەنمی ب رەنگەكێ دادپەروەر و یەكسان بیت و هەموو گەنمێ جۆتیارێن هەرێمێ بهێتە وەرگرتن، وەكو جۆتیارێن دەڤەرێن دی یێن ئیراقێ، لێ‌ هەتا نوكە ئەم نەگەهشتینە چ ئەنجامان، هەروەسا مە نڤیسارەك دایە محەمەد شیاع سوودانی، سەرۆكوەزیرێن ئیراقێ ل دۆر بابەتێ وەرگرتنا گەنمێ جۆتیارێن هەریمێ، لێ‌ هەتا نوكە چ بڕیار نەهاتینەدان، دیسا ئەم ل گەل د. فوئاد حسێن، جێگرێ سەرۆكوەزیران و وەزیرێ دەرڤەیێ ئیراقێ كۆمبووینە و مە یاداشتنامەك دایە وی ل سەر بابەتێ جۆتیارێن هەرێما كوردستانێ، ئەم ب هیڤینە دانوستاندن و كۆمبوونێن مە ئەنجامەكێ باش هەبیت».

کۆمێنتا تە