بۆ دەمێ ۷۹ سالانە پارتی بەردەوام د خەبات و تێكۆشانێ دا
زاخۆ، دلۆڤان هالۆ:
سەگڤان هالۆ ئەندامێ كۆمیتەیا ناڤەندی یا پارتی دیموكراتی كوردستان د دیدارەكێ دا بۆ ڕۆژناما ئەڤرۆ دیاركر، پارتی دیموكراتی كوردستان ۷۹ سالێن بەردەوام د خەبات و تێكۆشانێ دایە، د هەموو قۆناغان دا خەبات و تێكۆشانا پارتی د پێناڤی بدەستڤەئینانا مافێن ڕەوا یێن گەلێ كوردستانێ بوویە و هەر د ڤێ پێناڤێ دا قوربانیەكا گەلەكا مەزن دایە.
ناڤهاتی ئاماژە ب وێ چەندێ ژی كر، پارتی ئامرازەكێ بهێز بوویە د پێناڤی گەهشتن ب وێ ئارمانجا پیرۆز كو ئەو ژی گەهاندنا دۆزا ڕەوا یا گەلێ كوردستانێ یە ب وێستگەها ئارامی و سەرفرازیێ، دامەزراندنا پارتی هەر ل سالا 1946 د بنەڕەت دا ئەگەرێ سەرەكی بوویە بۆ ڕزگاركرنا تاكێ كورد و كوردستانێ ژ بێ هیڤیبوونێ و ڤەگەڕاندنا هەستا نەتەوەیی و نیشتیمانی ل سەر بنەمایێ پرەنسیپا كوردایەتیێ، ل سەر ڤێ پرەنسیپا پیرۆز هەتا ئەڤرۆ و بۆ پاشەڕۆژێ ژی بەردەوامە و دێ بەردەوام بیت، چونكی ژ لایێ پارتی ڤە كوردایەتی ئەگەرێ سەركەفتنا دۆزا ڕەوا یا گەلێ كوردستانێ یە بۆ قۆناغا ئەڤرۆ ژی پێدڤیەكا حەتمیە.
گۆت ژی:»پڕۆسەیا هەلبژارتنا ئەڤ جارە ژی بۆ پەرلەمانێ ئیراقێ پڕۆسەیەكا گەلەك هەستیار و گرنگە، هەر چەند پارتی بهێز و بهێزتر بیت ناسنامەیا نەتەوەیی و نیشتیمانی یا گەلێ كوردستانێ دێ بهێزتر بیت و هەرێما كوردستانێ ژی دێ پاراستی تربیت، چونكی پارتی هەر وەك چاوا د ڕابردوویی دا داكوكیكارەكێ بهێز یێ مافێن ڕەوا یێن گەلێ مە بوویە، ئەڤرۆ ژی د ڤێ قۆناغێ دا مانا پارتی ب پێشەنگیێ دێ داكوكیكارەكێ سەرسەختێ مافێن دەستووری یێن هەرێما كوردستانێ بیت و ئێكەم لایەنە كو بەرژەوەندیێن گەلێ خوە پشتگۆهـ نا ئێخیت، درووشمێ سەرەكی یێ پارتی بۆ مامەلەكرنێ ل گەل بەغدا ل سەر بنەمایێ هەڤپشكی و هەڤسەنگی و ل هەڤكرنێ یە، ئەڤە ژی بۆ وێ چەندێ یە كو زۆرینە ل ئیراقێ مافێ گەلێ كوردستانێ پێشیل نەكەت و هەموو ئەو مافێن كو د دەستوورێ هەردەمی یێ ئیراقێ دا بۆ گەلێ كوردستانێ هاتینە جێگیركرن وەك خوە بهێنە بجهئینان».
زێدەتر ژی گۆت:»هەر دیسان دروشمێن پارتی ل پرۆسەیا هەلبژارتنێن خۆلا شەشێ یا پەرلەمانێ ئیراقێ بۆ وێ چەندێ یە گیانێ لێبورینێ ببیتە كەلتوورەكێ گشتی یێ جڤاكی و ل پێناڤی لێبورینا ئایینی و ئاشتیا جڤاكی و پێكڤە ژیانێ پشت ڕاست بیت و ل پێناڤی چەسپاندنا مافێ ئافرەتان و ڕۆلێ وان د ژیانا سیاسی و كارگێریدا، ئەڤە و چەندەها دروشمێن دیتر».
