بیرەوەریا كارەساتا بۆمبەبارانكرنا ئۆردیگایێ زێوە هاتە ساخكرن
بیرەوەریا كارەساتا بۆمبەبارانكرنا ئوردیگایێ زێوە ژ لایێ رژێما بەعس ڤە ب ئامادەبوونا د. عەلی تەتەر، پارێزگارێ دهۆكێ و خەلیل مەحمود، دەڤەردارێ سێمێلێ و موسا كێستەیی، نوونەرێ بەرپرسێ لقێ ئێك یێ پارتی دیموكراتی كوردستان ل كۆمەلگەها تەناهی هاتە ساخكرن.
د. عەلی تەتەر، پارێزگارێ دهۆكێ كو ئەو بخوە د ناڤ ڤێ كارەساتێ دا بوو، بەحسێ روودانێن ڤێ كارەساتێ كر و گوت: «ئەڤ كارەساتە دڕندەییا ڕژێما بەعس بەرامبەر گەلێ كورد دیار دكەت، دیسا پتریا قوربانیێن ڤێ كارەساتێ ژن و زارۆك بوون، حوكمەتا ئیراقێ ئوردیگایێ زێوە شەش جاران بۆمبەبارانكر و تێدا هندەك خێزان ب كۆم شەهید بوون، ئەڤ كارەساتە ل وی سەردەمی یا بێ وێنە بوو»
پاشی ئێك ژ دیدەڤانێن ڤێ كارەساتێ بەحسێ ڤێ روودانێ كر و د دووڤ دا فلمەكێ دیكۆمێنتاری ل سەر كارەساتێ هاتە نیشادان و ل داویێ ژی پێشانگەهەكا وێنێن قوربانیێن كارەساتێ هاتە بەرچاڤكرن.
د ڤێ كارەساتێ دا 150 شەهید و نێزیكی 500 بریندار و 14 هزار كەس ژی ئاوارەبوون.
