بەرهەمێ گژ و گیای خواستەكا زۆر د بازاڕی دا ل سەر هەیە

بەرهەمێ گژ و گیای خواستەكا زۆر د بازاڕی دا ل سەر هەیە

9

رەمەزان زەكەریا

سالانە دگەل هاتنا وەرزێ بۆهارێ وەلاتی بۆ كۆمكرنا بەرهەمێ سروشتی یێ چیایی رۆژانە قەستا دەشت و چیا دكەن، وی بەرهەمی دفرۆشن و خواستەكا باش ل سەر هەیە، وەلاتی ژبلی فرۆتنێ ل مال ژی دخۆن.

یاسین حەكیم، وەلاتیەكێ دەڤەرا ئاكرێیە بۆ ئەڤرۆ گۆت: سالانە ل وەرزێ بۆهارێ ب مەبەستا كۆمكرنا گیایێن سروشتی قەستا چیا دكەین ب مەبەستا ب دەستڤەئینانا گژوگیایێ بۆ خوارنێ و فرۆتنێ، وەك چۆرین و سترك و كاری و كەنگر و بەردەوام ئەم ڤان بەرهەمانە كۆمدكەین بۆ خوارنێ و فرۆتنێ بازارێ وان گەلەك یێ خۆشە و خواستەكا باش ل سەر هەیە، هەموو كەس نەشێن ڤان گژوگیا ب دەستخۆڤەبینن، ژ بەر كو ل جهێن ئاسی دهێن، بەلێ چەندین سالە ل ڤی وەرزی ئەم ڤان بەرهەما كومدكەین و ل دووڤ بهایێ رۆژێ دفرۆشین و بەرهەمێن رۆژانە ژی بهایێ وان دیارنینە و گوهۆرین ب سەر دا دهێن.
ئێحسان خوشانی، خودانێ فروتنا قەپانا گیایێن سروشتی بۆ ئەڤرۆ گۆت: ل دەستپێكا وەرزێ بوهارێ، گەلەك جۆرێن گیایی یێن خوارنێ بۆ مە دهێن، كو ل چیایێن دەڤەرێ دهێتە رەنین و بۆ فروتنێ دئینن، قەپانێ سالانە گورانگاری ب سەر بهایێ گیایێن خوارنێدا دهێت، ئەڤ سالە هژمارەكا جۆرێن گیایی هاتینە و بهایێن وان جۆراو جۆرن هەموو جۆرەكێ گیایێ بۆهارێ گەهشتیێ هەردەما بەرهەم‌ زێدە بوون ل بازاری بهایێ وێ كێمتر دبیت، ژبەر كو ل هەموو جها ب دەست دكەڤیت هەر دەڤەرەكێ جۆرە گیایەكێ تایبەت هەیە خواست ل سەر هەیە.
ژینگەپارێز تاهر ئالكەیی بۆ ئەڤرۆ گۆت: سالانە ل وەرزێ بۆهاری هژمارەكا زۆرا وەلاتیان قەستا چیا دكەن ب مەبەستا كۆمكرنا گژوگیایی، بەلێ مخابن هندەك كەس بێی كو هەست ب زیانێن تێكدانا ژینگەهێ بكەن ئەو گژوگیایێ هەی ل چیا ب بنكڤە دئیننە دەرڤە و ل جهێن تایبەت دچینن، ئەڤە دبیتە ئەگەرێ تێكچوون و ژناڤبرنا ژینگەهێ.
ناڤبری گۆتژی: دخوازین ئەو وەلاتیێن قەستا چیا دكەن ب كۆمكرنا گژوگیایی ب تنێ گیایی ببرن و بنكێن گیایی نەئیننە ژ دەرڤە، بۆ وێ چەندێ گژوگیا كێم نەبیت و مەترسی ل سەر دروست نەبیت ژناڤ نەچیت، بۆ وێ چەندێ سالانە ئەڤ گژوگیایە بمینن پێدڤیە بنكێن وان بهێنە پاراستن هەر جهەكێ بنكێن گیایێ بۆهارێ بینن دەرڤە سالا پاشتر ئەو جۆرە گیایە نامینیت و بەرەڤ ل ناڤ چوونێ دچیت.

کۆمێنتا تە