ب رێیا كۆمپانیان گەنمێ وەرنەگرتی یێ جۆتیاران دێ هێتە وەرگرتن
زنار تۆڤی:
سەرۆكێ دەستەیا وەبەرهێنانێ ل هەرێما كوردستانێ دبێژیت: داخوازێ ژ جۆتیاران دكەین ئەو گەنمێ مایی هەتا 11ی ئیلۆنێ ڕادەستی ئەوان كۆمپانیان بكەن یێن هاتینە دیاركرن بۆ وان، ئەڤە دو سالە لژنەكا بەردەوام هەیە، كو ب سەرۆكاتییا دەستەیا وەبەرهێنانێ یە بۆ وەرگرتنا گەنمێ جۆتیاران، ب رێیا ئەوان پڕۆژەیێن هاتینە تایبەتكرن بۆ وەرگرتنا گەنمی و بازاركرنا وی ل باژێرێن سلێمانیێ، هەولێر و دهۆكێ.
د. محەمەد شوكری، سەرۆكێ دەستەیا وەبەرهێنانێ بۆ رۆژناما ئەڤرۆ گۆت: «ئەڤ سالە وێ پرۆسێ ل 8ی تەباخێ دەستپێكرییە، نڤیسارەك بۆ وان كۆمپانیان هاتیە هنارتن یێن هاتنیە دیاركرن، ل سلێمانیێ و گەرمیان و دەڤەرێن دیتر كۆمپانیا قەیوانە و ل هەولێر و دهۆكێ ژی كۆمپانیا خۆشناو هاتیە دیار كرن، ل دووڤ بڕیارەكا دیوانا سەرۆكاتیا جڤاتا وەزیران، نڤیسارەك بۆ مە هاتییە، هندەك كۆمپانیێن دیتر ژی هەنە، وان ژی دڤێت پشكداریێ بكەن، ل دووڤ وان ڕێكارێن حكومەتا هەرێما كوردستانێ داناین ئەو ژی دشێن پشكدارییێ تێدا بكەن، ب هەماهەنگی ل گەل وەزارەتا چاندنێ و وەزارەتا بازرگانی و پیشەسازی و هەتا 11ی ئیلۆنا ئەڤ سالە وەرگرتنا گەنمی دێ یا بەردەوام بیت».
سەرۆكێ دەستەیا وەبەرهێنانێ دیار ژی كر، ئەو گەنمێ مایی ژ جۆتیارێن كوردستانێ دهێتە وەرگرتن، هەروەسا بهایەكێ تایبەت ژی بۆ هاتییە دانان، چونكی بهایێ بازاڕی گوهۆڕین ب سەردا نەهاتییە و گۆت: «مە دو بها داناینە، ئەو ژی 575 هزار و 600 هزار دینارێن ئیراقی نە بۆ هەر تەنەكێ، دیسا ئەو پارە بۆ دەمێ دو هەیڤان بۆ جۆتیاران دێ هێتەدان و ئەم داخوازێ ژ جۆتیاران دكەین گەنمێ خۆ ڕادەستی ئەوان كۆمپانیان بكەن یێن هاتینە دیاركرن».
