ب پشكداریا 29 ئاشان فەستیڤالا تەحینێ ل ئامێدیێ دێ هێتە گێڕان
ئامێدیێ، مەحمود نهێلی:
بڕیارە فەستیڤالەكا تایبەت ب نیشادانا بەرهەمێ تەحینا دەڤەرا ئامێدیێ بهێتە ئەنجامدان و جهـ و دەم بۆ هاتیە دەستنیشانكرن.
ئەندازیار هەكار حەمید، رێڤەبەرێ چاندنا ل ئامێدیێ دیار كر، بڕیارە ل ژێر چاڤدێریا د. عەلی تەتەر، پارێزگارێ دهۆكێ و وارشین سەلمان، دەڤەردارێ ئامێدیێ فەستیڤالا تەحینا ئامێدیێ ل رۆژێن پێنج شەمبی و ئەینی رێكەفتی 23 و 24/11/2023 ل دەمژمێر 10:30 سپێدێ ل هاڤینگەها سیلاڤێ ب پشكداریا 29 ئاشێن تەحینێ بهێتە گێڕان و گۆت: «د ڤێ فەستیڤالێ دا چەندین جۆرێن بەرهەمێ تەحینا خوەمالی یا دەڤەرێ و بەرهەمێن دی یێن خوەمالی دێ هێنە نیشادان».
گۆتژی: «ئەنجامدانا ڤان رەنگە فەستیڤالان دێ بنە ئەگەر پتر گرنگی ب چاندنێ و جۆتیاریێ و گوندان و گەشتوگوزارێ بهێتەدان، ئەڤە ژی ئێكە ژ سیاسەتا حوكمەتا هەرێما كوردستانێ، كو بەرێ خەلكەكی بكەڤیتە بەرهەمێن ناڤخوەیی و گوندان، دیسا ب ئەنجامدانا ڤێ فەستیڤالێ، پتر دێ بەرێ خەلكی كەڤیتە ڤێ دەڤەرێ و ڤەژاندنێ ب خوەڤە بینیت و ژ لایێ ئابووری ژی ڤە خەلكێ دەڤەرێ بشێن بۆ خوە مفای ژێ وەربگرن».
