تاوانێن ئەلكترۆنی و مادەیێن بێهۆشكەر گەلەك زێدە بووینە

تاوانێن ئەلكترۆنی و مادەیێن بێهۆشكەر گەلەك زێدە بووینە

6

شارەزایەكێ قانوونی ئاشكەرا كر، ل گورەی ئامارێن بەردەست د ڤی دەمی دا هەتا پێنج هزار زیندانیان دناڤا چاكسازیێن هەرێما كوردستانێ هەنە و گۆت: تاوانێن ئەلكترۆنی و مادەیێن بێهۆشكەر زۆر زێدە بووینە و مەترسی هەیە ل سەر هەرێما كوردستانێ.

شوان سابر، شارەزایێ قانوونی و چالاكڤانێ مافێ مرۆڤی بۆ رۆژناما ئەڤرۆ دیار كر،ل هەرێما كوردستانێ چار هەتا پێنج هزار كەسا دناڤا چاكسازیان هەنە و ژمارا زۆر ژی ل چاكسازیا هەولێرێ یە، ل گورەی ئەڤێ ئامارێ‌ هەموو كەسێن هاتینە زیندان كرن و یێن هاتینە راگرتن ژی ڤەدگریت و گۆت: ل گورەی زانیاریێن بەردەست چو زیندانیەكێ سیاسی نینە، بەلێ هندەك ئاماژە هەنە بادەكێن هندەك زیندانیان ب سیاسی هاتینە كرن، كەسێن هاتینە حوكم كرن ل سەر تاوانێن جودانە، تاوانێن كوشتنێ كێمن، تاوانێن تیرۆرێ هەر نینن.
شوان گۆتژی: مخابن تاوانێن بكارئینان و بازرگانیێ ب مادێن بێهوشكەر زۆر زێدە بوینە و ب دیتنا من مەترسیەكا مەزنە ل سەر هەرێما كوردستانێ، چونكە ماددێن بێهوشكەر هەموو تەخێن جڤاكی ڤەگرتیە و كەسێن رەوشەنبیر و قوتابیێن قۆناغا ناڤەندی و زانكۆیێ ژی تێدانە، هەتا كەسێن كاسبكار و ئاسایی ڤەگرتیە، مادێن بێهوشكەر هەموو سنور دەرباز كرینە و ژ ڤێ چەندێ ژی دەرباز بوویە كو بێژین زەنگا مەترسیێ لێدایە، تاوانێن ئەلكترۆنی ژی زۆر زێدە كبوینە ل ئەڤان سالێن دووماهیێ.
شارەزایێ قانوونی و چالاكڤانێ مافێ مرۆڤی ئاماژە پێ‌ كر كو ئەشكەنجەدان دناڤا چاكسازیێن هەرێما كوردستانێ نینە وەكی قوتان و لێدان، بەلێ حوكمەتێ ئەڤ چەندە نە ڤەشارتیە كو ل دەمێ ڤەكۆلینێ ئەشكەنجەدان هەیە، بەلێ رەنگە زێدەتر ئەشكەنجەدانا دەروونی بیت نەك لەشی و گۆت: هەرچەندە ب دیتنا من نابیت ئەشكەنجەدان دناڤا چاكسازیان ژی دا بمینیت، راستە كەسێن دهێنە زیندان كرن ئەشكەنجەدانا لەشی نینە وەكی بەرێ ب كێبلا زیندانی بهێتە قوتان، بەلێ ئەشكەنجەدانا دەروونی هەیە، چونكە دەمێ كەسەك دهێتە دەستەسەر كرن بۆ دەمێ چەند هەیڤان ناهێلن كەس و كارێن وی یان پارێزەر ژی ببینن ئەڤە ژی جورەكێ ئەشكەنجەدانێ یە، هەكە ل عێراقێ ژی بەهانەیەك هەبیت بۆ ئەشكەنجەدانێ چو بەهانە بۆ هەرێما كوردستانێ نینن كو ئەشكەنجەدان بمینیت.
شوان سابر د بەردەوامیا ئاخفتنێن خۆدا گۆت: ل هەرێما كوردستانێ نێزیكی 412 كەسان سزایێ سێدارە دانێ‌ بۆ دەرچوویە و هەتا نوكە ژی ئەو سزا ل سەر وان نەهاتیە بجهئینان، هەتا نوكە پاشەڕۆژا وان كەسێن سزایێ سێدارێ‌ هەی یێ‌ دیار نیە و خەلك هەیە 27 سالە سزایێ سێدارە دانێ‌ هەیە و هەتا نوكە چارەنڤیسێ خۆ نزانن، ل گورەی قانوونا عێراقی زیندانی كرن هەتا مرنێ نینە، درێژترین سزایێ زیندانی كرنێ 25 سالن، بەلێ مە خەلك هەیە ئەڤە 27 سالە یان 25 سالە دناڤا زیندانێ یە و چارەنڤیسێ وان دیار نینە، ئەڤە ژی بووینە بارگرانی ل سەر حوكمەتێ و چاكسازیێن هەرێما كوردستانێ.

کۆمێنتا تە