تۆنێلا گەلیێ زاویتە دێ خەملەكا مەزن دەتە كەرتێ گەشتیاری
هاریكارێ رێڤەبەرێ گشتیێ رێك و پرا دیار كر، مە كۆمەكا پرۆژەیان ل سەر بۆدجا وەبەرهێنانێ هەنە رازەمەندی ل سەر هاتیە كرن، ژ وان ژی تۆنێلا گەلیێ زاویتەیە و نها ئەو هەموو پرۆژە د قوناغێن تەندەرینكێ و دیزاینێ دانە و گۆت: ئەڤ تۆنێلە دێ خەملەكا مەزن دەتە كەرتێ گەشتیار ب تایبەتی ل گەلیێ زاویتە، چونكو د رۆژانێن بهێنڤەدان و ئەینی دا خەلكەكێ زۆر قەستا جهێن گەشتیاری دكەن و قەلەبالغەكا زۆر ل گەلیێ زاویتە چێدبیت.
ئەندازیار رێدیر سلێمان هاریكارێ رێڤەبەرێ گشتیێ رێك و پرا و سەخبێری و نشتەجێكرنێ بۆ رۆژناما ئەڤرۆ دیاركر، سەرۆكێ حكومەتا هەرێما كوردستانێ رازەمەندی ل سەر چێكرنا تۆنێلەكێ ل گەلیێ زاویتە كریە، ئەڤ تۆنێلە دێ خەملەكا مەزن دەتە كەرتێ گەشتیار ب تایبەتی ل گەلیێ زاویتە، چونكو د رۆژانێن بهێنڤەدان و ئەینی دا خەلكەكێ زۆر قەستا جهێن گەشتیاری دكەن و قەلەبالغەكا زۆر ل گەلیێ زاویتە چێدبیت و دبیتە ئەگەرێ وێ چەندێ رێك هەتا رادەكی باش دهێتە گرتن و خەلك بێزار دبیت.
ناڤبری گۆت: نوكە ژی كار ل سەر هندێ ژی دهێتە كرن ل وەزارەتێ كومپانی بهێن پێشكێش بكەن و لێژنەك دێ هێتە پێك ئینان و كارێ ڤێ لێژنێ دێ دیڤچونا وان كومپانیا بیت ئەوێن سیڤیێن خو پێشكێش كرین و ئەو كومپانی دێ هێنە ڤاڤارتن پشتی دهێتە ڤاڤارتن ئەڤ كومپانیێن هەنێ دێ چنە د تەندرێ ڤی پرۆژەی دا و دێ ب وان كەسان هێتە دان ئەڤێن دهێنە ژێگرتن د وێ رەوشێ ژی دا كەڤنە كێبركیێ دا كا دێ بۆ كیژ كومپانێ هێتە رەوانەكرن.
زێدەتر گوتژی: پرۆژە دوو پارچا ب خوڤە دگریت، قوناغا ئێكێ قوناغا دیزاینكرنا ڤێ یە كو ئەو كومپانیا كار بۆ دكەڤیت دێ رابیت ب دیزاینكرنا ڤێ تۆنێلا هەنێ كو تۆنێل ژ دوو تیوبا پێك دهێت و هە ر تیوبەك ژ وان ژی دوو لێنا ب خوڤە دگریت و دروستبوونا ڤێ تۆنێلا گەلیێ زاویتە دێ بیتە چارەسەری كو گەشتیار د رۆژانێن سەیرانان دا بێزار نەبیت.
رێدیر سلێمان دیار كر ژی: د وارێ سەكتەێ ئاڤەدانكرنێ و نیشتەجێكرنێ دا، خۆشبەختانە كۆمەكا پرۆژان رەزامەندی ل سەر هاتیە كرن ژ وانا ژی پرۆژێ یاریگەها تەپاپێ ل سێمێلێ بۆ كومپانیەكێ هاتیە رەوانەكرن و كار تێدا دهێتە كرن، ب شێوەیەكێ باش كار تێدا یێ بەردەوامە، هەروەسا دروستكرنا هۆلەكا بیرەوەریان یا بەرفرەهـ ل قەزا بەردەرەش، ئەو ژی بۆ ماوەیەكی یە كار تێدا دهێتە كرن، هەر دیسان ئاڤاهیەك بۆ دادگەها قەزا ئامێدیێ ئەوێ رەزامەندی هاتیە كرن و ئەو كومپانی دەست ب كار بوویە و كار تێدا دكەت و ئاڤاهیەكێ دیترە یێ كولیژا پەروەردا بنیات ل قەزا ئامێدیێ خوش بەختانە ئەو ژی بۆ كومپانیەكێ هاتیە رەوانە كرن، لێ هێشتا هندەك كێشەیێن ئەردی هەنە كو ب رێكا قایمقامیا قەزا ئامێدیێ بهێتە چارەكرنێ.
زێدەتر دیاركر: رەزامەندی ل سەر یاریگەهەكا تەپاپێ ل ناحیا شێلادزێ هاتیە كرن، بۆ كومپانیەكێ هاتیە رەوانەكرن، ئەو ژی هندەك كێشەیێن زەڤی و زاری هەنە كو هێشتا نە هاتیە كرن، ئەڤە وەكو سەكتەرێ ئاڤەدانكرن و نیشتەجێكرنێ یە و ئەڤ پرۆژێن ئاڤەدانكرنێ هەمی ل سەر بۆجا پارێزگەها دهۆكێ نە.
ئاشكرا ژی كر، سەرەرای وێ چەندێ ئەڤ رێكا بەری چەند رۆژا جەنابێ سەرۆكێ حكۆمەتا هەرێما كۆردستانێ كو رێكا گرێدانا باژێرێ دهۆكێ ب هەڤلێرێ بەرێ بنیاتی بۆ دانای، ب تنێ 26 كیلۆمەترێن جادێ ماینە بهێنە جوتسایدكرن و بەرێ بنیاتی بۆ هاتە دانان و ئەو پرۆژە ژی دوو قوناغە یا ئێكێ دیزاین كرنە، قوناغا دوویێ ژی جێبەجێكرنا پرۆژەیە و ئەو پرۆژە ژی د ماوێ سێ سالان دا دێ تەمام بیت، و كەڤیتە خزمەتا خەلكێ مە یێ خوشتڤی دا.
