حه‌ز ژ سترانێن هه‌موو هه‌ڤالێن خوه دكه‌ت
دهۆك، شاكر ئه‌تروشی:
بیتا نه‌وزاد، سترانبێژ و پێشكێشكار ل كه‌نالێ هه‌لهه‌لۆك یێ زارۆیان ل دهۆكێ، د دیداره‌كێ دا بۆ رۆژناما ئه‌ڤرۆ گۆت: نێزیكێ ژیێ من دێ بیته سێزده سال، ل سالا 2016 من ده‌ست ب گۆتنا سترانان كریه، دایك و باب و خاله‌ت و هه‌ڤالێن من پشته‌ڤانێن من بوون، سترانا من یا ئێكێ ب ناڤێ (خواندگه‌ه) بوو، ل ستۆدیۆیا كه‌نالێ هه‌لهه‌لۆك هاته تۆماركرن ژبه‌ركو ده‌ستپێكا من ل گه‌ل وی كه‌نالی بوو، هه‌تا نوكه من شه‌ش ستران هه‌نه، كو دو ژوان ب شێوێ دوقۆلی ل گه‌ل هه‌ڤالا من (گرین حه‌سه‌ن) هاتینه گۆتن، ل گه‌ل چه‌ندین ستران و كلپێن دی كو ب شێوێ كۆم هاتینه گۆتن و نوكه ئه‌ز قوتابی مه ل پولا حه‌فتێ ل قوتابخانا چه‌له‌نگ و ماموستا و هه‌ڤالێن من یێن قوتابی گه‌له‌ك كه‌یف ب من دهێت و هه‌موو پێكڤه پشته‌ڤانێن منن و ئه‌ڤ چه‌نده من هان دده‌ت كو ل سه‌ر گۆتنا سترانان یا به‌رده‌وام بم.
هه‌روه‌سا گۆت: هه‌موو ستران و كلپێن ب پشته‌ڤانیا كه‌نالێ هه‌لهه‌لۆك و ئه‌ندامێن خێزانی هاتیه چێكرن و ژبلی سترانگۆتنێ ئه‌ز پێشكێشكارم ژی ل وی كه‌نالی و هنده‌ك جاران دچینه ژده‌رڤه‌ی ستۆدیۆیێ و ئه‌ز دیداران ل گه‌ل زارۆیان دكه‌م، ئانكو دێ پسیاران ئاراسته‌ی وان كه‌م و هه‌كه به‌رسڤ زانی دێ دیاریه‌كێ پێشكێشی وان كه‌م، وه‌ك ستران ژی دێ یا به‌رده‌وام بم و دێ بزاڤێ كه‌م هنده‌ك سترانێن نوو بێژم، هه‌روه‌سا ئه‌ز حه‌ز ژ سترانێن هه‌موو هه‌ڤالێن خوه دكه‌م و هه‌موو سترانێن وان بۆ من دخۆش، ب تایبه‌ت ژی یێن گرینێ.
