خالەتا خۆشتڤی
ناصح کامگاری
کوڕکێ بچووک یێ جیرانێ وێ ب لەز و بەز کو هەر دو دەرەجە د کرنە ئێک، پێنگاڤ ب سەر دەرەجا کەفت و گۆتێ:”خالەت، خالەت، یێ سەتەلایتان کۆم دکەن”. خالەت یا روینشتیە ل بەر وێ زنجیرا حەژێدکرت و ب هەر دو دەستان ل ڕانێن خوە یێن قەلەو دان و گوت:” یا قەمەرێ بەنی هاشم!”.
کوڕکێ بچووک گۆتێ: ل سەربانێ مالا وان ژ وی ئالیێ کۆلانانڤە، خوە ب هاڤێژین دا بچین راکەین:” خالەت ب لەز رابوو شالا خوە هاڤێتە سەرێ خوە و سپاتێن خوە دانە سەر پێ خوە و دەستێ خوە دانا سەر سینگێن خوە یێن مەزن و ل دویڤ کوڕکێ بچوویک چوو، خوە گەهاندە دەرەجا سەر بانی، ب هەر رەنگەکێ هەیی ب هەناسەیەکا تەنگ خوە گەهاندە سەتەلایتێ و چاڤێ وێ ل وی مامۆرەکێ بوو یێ کو ل سەربانێ خانیێ وێ کو د کەفتە ئالیێ کۆلانێ دا، خالەت د جهدا ما راوەستیایی و کوڕکێ بچووک ل پشت خوە ڤەشارت. مامۆر ب رۆیەکێ ب ترس ل خالەتێ و وێ سەتەلایتا ل بن پێن وێ نێرا، هەروەسا خالەتێ بێ لڤین ما راوەستیایی، پاشی ب زۆری نیمچە گڕنژینەک ل سەر لێڤان پەیدا دبیت و دەستێ خوە بۆ مامۆری دهەژینیت، مامۆری کولاڤێ خوە دناڤا دو تبلێن خوە دا گرت بوو و ب هویری لێ دنێرا، خالەتێ ئیشارەت دا سەتەلایتا خوە و گۆت:” دادێ جان، تە دڤێت وەرە ڤێ ژی ببە”.
مامۆری ب تورەیی ڤە کولاڤێ خوە ل سەر سەرێ خوە شداند و گۆت:” ئەز کۆترم؟ من بال هەنە بفڕم، بهێمە وێرێ؟”.
خالەتێ گۆت:” باوەریا تە ژ خودێ بهێت ژ نو من دایە رێکخستن، ئەگەر تونەبەی بلا ژ خوە دەست لێ نەدەم دا رێکخستنا وێ تێک نەچیت”.
پاشی مامۆری ب تووڕەیی پەنەلا سەتەلایتێ یا کو ل بەر پێیێن وی بوو هەلگرت و هاڤێتە دناڤا کۆلانێ دا، ب چاڤەکێ تژی کین ل چەپ و راستێن خوە د نێرا و لبن چاڤان ڤە ل دەمژمێرا دەستێ خوە د نێرا و گۆت:” نەخێر مالا هەوە ئینشا ئەللا بۆ رۆژەکا دیە”.
خالەتا خۆشتڤی هەناسەیەکا ئارام هەلکێشا و گۆت:” ئینشا ئەللا، خودێ ژ تە رازی بیت، کورێ من”. دەستێ زارۆکی گرت و ژبۆ دیتنا پشکا دووماهیێ یا درامایا خۆ ژ سەربانی هاتنە خارێ. مامۆر ب حیبەتی ڤە هەر دو دەستێن خوە ل ئێک دان و تەقاندن، لێ بەلێ ژەنگا ئاسنی ژ دەستێن وی پاقژ نەبوون..
ژێدەر: ناصح کامگاری، سقف این خانە کوتاه است.
