داخوازیێن دەڤەرداریێن ئاكرێ و بەردەڕەشێ گەهشتنە شاندێ جڤاتا وەزیران
سەباح زوهێر:
شاندەكێ جڤاتا وەزیران ب سەرپەرشتیا د. ئومێد سەباح، سەرۆكێ دیوانا جڤاتا وەزیران و ب ئامادەبوونا سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ و دكتۆر عەلی تەتەر، پارێزگارێ دهۆكێ و مەردان خدر، بەرپرسێ لقێ نەهێ پارتی و هەردو دەڤەردارێن ئاكرێ و بەردەڕەش و چەندین كەسایەتی و رێڤەبەرێن سازیێن حكومی و حیزبی ل ئاكرێ كۆمبوونەك ئەنجام دا.
د. مەردان خدر، بەرپرسێ لقێ نەهێ پارتی ل دەڤەرداریا ئاكرێ بۆ ئەڤرۆ دیار كر، شاندێ جڤاتا وەزیران بۆ چەندین مەرەمان سەرەدانا دەڤەرداریا ئاكرێ كر، ژ وان ژی: هەماهەنگیەكا باشتر هەبیت بۆ باشتر خزمەتكرنا هەردو دەڤەرداریێن ئاكرێ و بەردەڕەشێ و گۆت: «د كۆمبوونێ دا دانوستاندن ل سەر چەندین بابەتان هاتە كرن، كو بزانن د ڤێ قووناغێ دا چ پێدڤیە بۆ ڤێ دەڤەرێ بهێتە كرن».
ناڤهاتی گۆتژی: «مە داخوازیێن ڤێ دەڤەرێ گەهاندنە شاندێ جڤاتا وەزیرێن هەرێما كوردستانێ، بۆ وێ چەندێ خزمەتێن باشتر پێشكێشی خەلكێ هەردو دەڤەرداریێن ئاكرێ و بەردەڕەشێ بهێتە كرن، چونكی خەلكێ ڤێ دەڤەرێ هەژی خزمەتێن باشترن».
