دایك ب تنێ‌ بەرپرس نینە ژ پەروەردەكرنا زارۆكی

دایك ب تنێ‌ بەرپرس نینە ژ پەروەردەكرنا زارۆكی

6

بێوار حەمدی:

گەلەك گرنگە دایك و باب هەردو ئەركێ خۆ بەرامبەر زارۆكی بزانن و بەردەوام ل سەر بخۆینن و خۆ فێر بكەن، جڤاكناسەكێ ژی گۆت: جڤاكێ مە وەسا تێدگەهن كو كارێ‌ بابی ئەوە بتنێ ژ دەرڤەی ماڵێ كار بكەت، لەوما ژی رولێ پەروەردەكرنا زارۆكی بتنێ ب دەیكێ ڤە گرێددەن .
جڤاكناس، شەریفا حسێن د دیدارەكێ دا بۆ رۆژناما ئەڤرۆ دیار كر كو كارتێكرنا دایك و بابان ل سەر زارۆكی گەلەكە، بەلێ د ڤی بابەتی دا دو بۆچون هەنە و گۆت: (یا ئێكێ ل ساڵێن دەسپێكا ژیێ زارۆكی ل ژیێ 1 هەتا 6 ساڵیێ كارتێكرنا دایكێ ل سەر زارۆكی پترە و پشتی هینگێ هەتا ژیێ‌ 15 ساڵیێ كارتێكرنا بابی پترە و بوچۆنەكا دوێ‌، كارتێكرنا دایك و بابان یەكسانە ل سەر زارۆكی، بەلێ ئەڤە دمینیتە ل سەرهندێ كا كیژ ژ وان بۆ زارۆكی نێزیكترە و كی پتر گرنگیێ پێ ددەت ل وی دەمی زارۆك ژی خۆ پتر نێزكی وی دكەت).
جڤاكناسێ د بەردەوامیا ئاخفتنێن خۆدا گۆت: (جڤاكێ مە وەسا تێدگەهن كو كارێ بابی بتنێ ژ دەرڤەی ماڵێ یە، لەوما ڕولێ پەروەردەكرنا زارۆكی بتنێ ب دایكێ ڤە گرێ ددەن، بەلێ ئەز دبینم كو ئەڤ تێگەهە گەلەك یێ خەلەتە، چونكی بابی د ماڵ ژی دا گەلەك ڕولێن مەزن بۆ زارۆكی ژلایێ پەروەردەكرنێ ڤە هەنە، ئانكۆ گەلەك لایەنێن پەروەردێ هەنە گرێدایی بابی نە و دایك بتنێ نەشێت زارۆكی ل سەر فێر بكەت بێی پشكداریا بابی).
شەریفایێ ئەو چەندە ژی دیار كر، گەلەك گرنگە دایك و باب هەردوو ئەركێ خۆ یێ دروست بۆ زارۆكی بزانن و بەردەوام ل سەر بخۆینن و خۆ فێر بكەن و هەردەمێ ئێك ژ وان خۆ ژ بەرپرسایەتیێ دویر بكەت ل وی دەمی ئەو ئەركێ خۆیێ دروست نزانیت و گۆت: (پێدڤیە بزانین كۆ پەروەردە كرن نە ترسەكە ل سەر زارۆكی و دڤێت ب پەروەردەیەكا ساخلەم و دروست بهێتە خۆدان كرن، لەوما ژی گەلەك گرنگە دایك و باب خۆ شارەزا بكەن بۆ هندێ كۆ پەروەردەیەكا ساخلەم بدەنە زارۆكێ خۆ).

کۆمێنتا تە