دهۆك دێ بیتە جهەكێ گەشتیاریا ساخلەمیێ
دهۆك، لەزگین جوقی:
رێڤەبەرێ گشتیێ وەبەرهێنانێ ل پارێزگەها دهۆكێ دیار كر، ئەو بزاڤان دكەن دهۆكێ بكەنە جهەكێ گەشتیاریا ساخلەمیێ، كو خەلكەك ژ دەرڤەی پارێزگەها دهۆكێ قەستا دهۆكێ بكەن بۆ وەرگرتنا چارەسەریێ، ئەڤە دێ بیتە ئەگەر پتر دەلیڤەیێن كاركرنێ بۆ دەرچوویان پەیدا ببن.
هەڤال سەدیق، رێڤەبەرێ گشتیێ وەبەرهێنانێ ل پارێزگەها دهۆكێ بۆ ئەڤرۆ خویا كر، وان ل گەل لایەنێن پەیوەندیدار هەماهەنگی كریە، كا دهۆكێ پێدڤی ب چ جۆرە پڕۆژەیان هەیە و پڕۆژە ل دەڤەرداری و ناوچەداریان دێ هێنە بجهئینان و گۆت: «د بیاڤێ ساخلەمیێ دا هندەك پڕۆژە دێ هێنە بجهئینان و دەرگەه دڤەكرینە بۆ دانا مۆلەتێ بۆ بجهئینانا پڕۆژەیێن وەبەرهێنانێ ب تایبەتی ژی پڕۆژەیێن گرنگ بۆ ژێرخانەیا ئابووری یا پارێزگەها دهۆكێ و پڕۆژە دەلیڤەیێن كاركرنێ بۆ خەلكی دێ پەیدا كەن».
گۆتژی: «د سالا 2023ێ دا 29 مۆلەت هاتبوونەدان و هندەك پڕۆژە د بیاڤێ ساخلەمیێ دا بوون، ئەو ژی نەخۆشخانەیێن تایبەتمەند وەكو نەخۆشخانا پەنجەشێر و نەخۆشخانا ددانان، ئەڤ سالە پلان هەیە پتر گرنگی ب كەرتێ ساخلەمیێ بهیتەدان».