دهۆك و زاخۆ دێ ل یاریگەهێن خوە یانەیێن بەغدایی و بەسرایی مێڤان كەن
قەیس وەیس:
چاڤەڕێ دهێتە كرن ئەڤرۆ دەست ب هەڤڕكیێن گەڕا 11ێ ژ خولا ستێرێن ئیراقێ یا فوتبۆلێ بهێنە كرن، سوبەهی هەردو یانەیێن دهۆك و زاخۆ دێ مێڤاندارییا یانەیێن بەغدایی و بەسرایی كەن، ئەڤرۆ هەولێر ل دهۆكێ یە دێ بیتە مێڤانا مووسل.
ئەلهۆیێن چیا چاڤ ل سەركەڤتنا پێنجێ یە
جەماوەرێ وەرزشی یێ تیما فوتبۆلا یانەیا دهۆك ئەلهۆیێن چیا دێ سوبەهی ل رۆژا ئەینی دەمژمێر سێیێ ئێڤار چاڤەڕێ فیركا دادڤانێ یاریێ بن ژبۆ پشتەڤانییا تیما خوە بەرانبەر یانەیا مینا یا بەسرایی د یارییەكا ب هێز دا بۆ هەردو یانەیان، تیما دهۆكێ ب سەرپەرشتییا ڕاهێنەرێ خوە عەبدولغەنی شەهد شیایە ئاست و ئەنجامێن دلخوەشكەر بینت ژ تەنگاڤییا دەستپێكا خولێ قورتالبكەت، ئەوا ل ڕێزا 11ێ ب 14 خالان دهێت ژ چار سەركەڤتن، دو وەكهەڤی و سێ خوسارەتی هەنە، ژوان یارییان ل سەر دەمێ عەبدولغەنی چار سەركەڤتن و دو وەكهەڤی هاتینە، ژلایێ خوەڤە یانەیا مینا یا بەسرایی ل ڕێزا 14ێ یە ب كۆمكرنا 11 خالان بتنێ سێ سەركەڤتن هەنە، دو وەكهەڤی و پێنچ خوسارەتی.
زاخۆ دێ بزاڤێن ئاشتكرنا جەماوەرێ خوە كەت
ژلایێ خوەڤە پشتەڤانێن یانەیا زاخۆ هەلگرێن ناسناڤێ باشترینێن جیهانێ دێ رۆژا ئەینی دەمژمێر سێیێ ئێڤاری دەست ب پشتەڤانییا تیما خوە كەن ب هیڤیێن ڤەگەڕاندنا سەركەڤتنا دەمێ ل یاریگەها خوە یانەیا ئەمانەت بەغدا مێڤان كەت ئەوا بەری سێ رۆژان دگەل دهۆكێ ب گۆلەكێ تووشی خوسارەتیێ بووی، ئەڤ یارییە بۆ كوڕێن خابۆری دێ یا قەرەبوویا خالان بیت ژبەركو د یارییا بۆری دا بەرانبەر شورتە تووشی خوسارەتیێ بوو كو د بیتە یارییا سێیێ لدووڤ ئێك نەشیایە سەركەڤتنێ بینت، زاخۆ د نوكە دا ل ڕێزبەندیا 10ێ یە ب كۆمكرنا 15 خالان ژ چار سەركەڤتن، سێ وەكهەڤی و سێ خوسارەتی هەنە، ژلایێ خوەڤە ئەمانەت بەغدا وەكو زاخۆ هەمان خال هەنە لێ گۆلێن وێ پترن لەوما ژی ل ڕێزا نەهێ دهێت، دبیت ئەڤ یارییە بۆ زاخۆیان ئاستەنگ بیت ژبەركو تیما بەغدایی خودان یاریزانێن باشن، لێ پشتگەرمییا وان ب پشتەڤانان دبیت ببیتە كلیلكا سەركەڤتنێ.
هەولێر دێ ل دهۆكێ پاراستنا سەرێ لیستێ كەت
بڕیارە ئەڤرۆ ل دەمژمێر 5:30 مەغرەب تیما یانەیا هەولێرێ ل یاریگەها دهۆك یا نێڤدەولەتی ببیتە مێڤانا یانەیا مووسل د یارییەكا ب هێز دا بۆ كوڕێن كەلهە و منارە ئەوێن بۆ ماوەیێ زێدەتری پێنچ حەفتییە سەرێ لیستێ پاراستن ب كۆمكرنا 24 خالان ژ حەفت سەركەڤتنان و سێ وەكهەڤی و هیچ خوسارەتیەك نە دایە، د بەرانبەر دا یانەیا مووسل بتنێ 12 خال كۆمكرینە ل ڕێزا 13ێ دهێت.
نەورۆز
د تاقیكرنەكا بزەحمەت دا
ژلایێ خوەڤە بڕیارە ل شەمبییا بهێت تیما یانەیا نەورۆز نوونەرا چارێ یا كوردستانێ د خولێ دا بچیتە باژێرێ ناسرییە و ببیتە مێڤانا یانەیا ئەلغراف د تاقیكرنەكا ب زەحمە دا بۆ كوڕێن سلێمانیێ ئەوێن د گەڕا بۆری دا ڤەگەڕیاینە ئەنجامێن باش پشتی ب سەركەڤتی ل سەر یانەیا نەفت یا بەغدایی ب دو گۆلێن پاقژ كو دبیتە سەركەڤتنا ئێكێ پشتی بۆرینا نەهـ یارییان ژبلی ئێكەم سەركەڤتنا خوە یا گەڕا ئێكێ كو حەفت خوسارەتی بەرانبەر وەكهەڤیەك و دو سەركەڤتن هەنە ب حەفت خالان ل ڕێزا 17ێ دهێت ژلایێ خوە یانەیا ئەلغراف 13 خال كۆمكرینە ل ڕێزا 12ێ دهێت.
یاریێن مایین گەڕا 11ێ
دێ بڤی شێوەیی بن
ئەڤرۆ ل دەمژمێر سێیێ ئێڤاری ئەلقاسم دێ شورتە مێڤان كەت، سوبەهی رۆژا ئەینی، نەفت میسان- زەورا، ل دەمژمێر سێ ئێڤاری هێتە كرن، نەفت- دیالا، ل دەمژمێر 5:30 مەغرەب هێتە ئەنجامدان، جەوییە- ئەلگەرمە، ل دەمژمێر 5:30 مەغەرب هێتە كرن، ل شەمبییا بهێت كەرخ- نەجەف، ل دەمژمێر سێ ئێڤاری و تەلەبە- كارەبا، ل دەمژمێر 5:30 مەغرەب هێنە ئەنجامدان.
كۆپا ئیراقێ ناهێتە كرن
ل دووڤ ژێدەرێن رۆژنامەڤانی فدراسیۆنا فوتبۆلا ئیراقێ یاریێن قووناغا دویێ یێن كۆپا ئیراقێ نە كرینە د كارنامەیا خوە یا وەرزێ 2026ێ دا، پشتی ب دووماهی هاتنا قووناغا ڤاڤارتنا و یا ئێكێ، ئەوا بڕیار بوو ل قووناغا دویێ 32 یانە هەڤڕكیێ بۆ قووناغا 16ێ بكەن و دەربازبووین، ژبەر گڤاشتنێن یاریێن خولێ و هەبوونا مۆندیالا جیهانی ل خزیرانا بهێت فدراسیۆن نەچاركرییە كۆپا ب ڕاوەستینیت، هەروەسان یاریێن خولێ دناڤبەرا هەرسێ رۆژان یارییەك بێ ڕاوەستییان بهێتە كرن.
وەحید رەشید شرۆڤەكارێ وەرزشی بۆچوونا خوە هەبوو
ل دۆر یاریێن یانەیێن پارێزگەهێ وەحید رەشید ڕاهێنەرێ بەرنیاس ل پارێزگەهێ و شرۆڤەكارێ وەرزشی بۆ رۆژنامەیا ئەڤرۆ گۆت: هەرچەندە ئەو شێوازێ نوكە یێ خولێ كو هەر چار رۆژا یارییەك چو خوەشی و هەڤڕكییا ب تام نە هێلایە ژبەر هەبوونا گڤاشتنێ ل سەر یاریزانان، تایبەت ب هەبوونا هنگاڤتنان، نسبەت یانەیا دهۆك پشتی ڕاوەستیانا خولێ مفایەكێ باش ژێ وەرگرت و ئاست و ئەنجام دیارن ، تیما دهۆك ژبلی نەبوونا هێرشبەرەكێ گۆلكەر پێكهاتییەكێ گەلەك باش هەیە تایبەت پشتی ڤەگەریانا ئاستێ هارۆن ئەحمەد، كەریم دەرویش و پیتەر گۆرگیسی و شارەزاهییا راهێنەری و سەرەدەریا وی پشكەكا مەزنە یا سەركەڤفتنان، دبەرانبەردا ئاست و ئەنجامێن مینا دباش نینن د سێ یاریێن بۆری دا بتنێ خالەك ئینایە، لدووڤ ئامارێن دیار دبینم چەنسێ دهۆكێ باشترە بۆ سێ خالان
لدوور یارییا زاخۆ و ئەمانەت بەغدا ناڤهاتی گۆت: لدووڤ ئامارێن زاخۆ د یاریێن بۆری دا ئەنجامێن وێ د باش نینن ب دو وەكهەڤی و خوسارەتیەك، هەرچەندە وەكو ئاست دبیت تاڕادەیەكی خراب نەبیت لێ بگشتی ئەو ئاست تێراهندێ نەكریە خالان بدەستخوەڤەبینیت، یارییا وێ بەرانبەر ئەمانەت بەغدا ب سانەهی نابیت و ئەركێ و بزەحمەتە ژبەركو تیمەكا ڕێكخستی ژبلی یارییا دهۆكێ ئەنجامێن وێ دباش بوون، لێ دڤێت زاخۆ قەرەبوویا خالێن پێشتر بكەم و جەماوەرێ خوە ئاشت بكەت، زاخۆ ل دو چەپەران شەڕی دكەت خولا ئیراقێ و كۆپا كەنداڤی لەوما ژی پێدڤی ب سەركەڤتنێ یە و پێدڤی هیش یاریزانایە ژبۆ ڤەگەڕاندنا سەنگا خوە، یاری دێ یا بهێز بیت و زاخۆ دێ ب پشت گەرمییا پشتەڤانێن خوە بیت.
هەلوەستێ گشتی یێ ڕێزبەندیێ پشتی ب دووماهی هاتنا یاریێن گەڕا 11ێ.
1- هەولێر 24 خال.
2- دیالا 21 خال.
3- ئەلگەرمە 20 خال.
4- شورتە 18 خال كێمترییا یارییەكێ.
5- زەورا 18 خال كێمترییا یارییەكێ.
6- تەلەبە 18 خال.
7- جەوییە 18 خال.
8- كەرخ 16 خال.
9- ئەمانەت بەغدا 15 خال.
10- زاخۆ 15 خال.
11- دهۆك 14 خال.
12- ئەلغراف 13 خال.
13- مووسل 12 خال.
14- مینا 11 خال.
15- نەفت 11 خال.
16- كارەبا هەشت خال.
17- نەورۆز حەفت خال.
18- نەجەف حەفت خال.
19- نەفت میسان شەش خال.
20- ئەلقاسم ئێك خال.
