دوهی گه‌له‌ك قوتابخانه بڤی ره‌نگی بوون
ئه‌ڤرۆ، سالار دۆسكی:
دوهی هژماره‌كا رێڤه‌به‌رێن قوتابخانا گازندا وێ چه‌ندێ كر كو پشتی پرۆسه‌یا هه‌لبژارتنان ب دووماهی هاتی و قوتابخانه وه‌ك بنگه‌هێن ده‌نگدانێ هاتینه بكارئینان، كارمه‌ندێن كومسیوونێ به‌رمایكێن خوه پاقژنه كربوون، جهێن روینشتنا قوتابیان ژی هه‌ر هه‌می هاتبوونه گوهورین و ڤێ چه‌ندێ ژی كارتێكرن ل ده‌واما گه‌له‌ك قوتابخانا كریه.
مامۆستا ئه‌ڤین عومه‌ر عه‌لی، رێڤه‌به‌رێ قوتابخانا نیرۆژ یا بنه‌ره‌ت سه‌ر ب رێڤه‌به‌ریا په‌روه‌ردا زاخۆ ڤه بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: قوتابخانا مه بنگه‌هێ ده‌نگدانێ بوو و بمخابنی ڤه پشتی پرۆسێسا هه‌لبژارتن ب دووماهی هاتی كارمه‌ندێن كومسیوونێ جهێن خوه پاقژنه‌كربوون و به‌رمایك و جهێن روینشتنا قوتابیان هه‌ر هه‌می دجهێن خوه دا مابوون، نه‌چاربووین خزمه‌ت گوزارێ قوتابخانێ بۆ ماوێ دو رۆژان كه‌فتیه قوتابخانێ هه‌تا شیای پاقژ بكه‌ت، گرنگ بوو ل سه‌ر كارمه‌ندانێن كومسیوونێ هاتبا سه‌پاندن كو جهێن خوه پاقژ بكه‌ن و به‌رمایك نه‌مینن ل پولان دا چونكه هه‌تا ئه‌ڤه هاتیه‌كرن ره‌نگه گه‌له‌ك ماوه پێ ڤه چوو.
مامۆستا به‌هزاد عومه‌ر حه‌سه‌ن رێڤه‌به‌رێ قوتابخانا شوخ یا بنه‌ره‌ت ل په‌روه‌ردا زاخۆ ل سه‌ر هه‌مان بابه‌ت بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: قوتابخانا مه ب بوو بنگه‌هێ ده‌نگدانێ مخابنی ڤه وێزگه‌هێن ده‌نگدانێ كو پول هاتبوونه بكارئینان هه‌ر هه‌می پیس بوون وه‌ك لسقه و دیسا رحله ژی هه‌ره هه‌می هێلا بوون ل جهێن وان و گه‌له‌ك یا بێ سه‌رۆبه‌ر بوو.
رێڤه‌به‌رێ هه‌مان قوتابخانه گۆتژی: گرنگ بوو كومسیوونێ ل سه‌ر هه‌می كارمه‌ندێن خوه كربا فه‌رمان كو دڤێتـ به‌رمایكێن خوه پاقژ بكه‌ن چونكه ئه‌ڤه قوتابخانه نه و جهێ قوتابیان و ده‌وام تێدا دهێته‌كرن و نابیت ئه‌و پیساتی مینته ل جهێن خوه دا، ئه‌ڤه ده‌مه‌كی دا ئه‌ژی كارمه‌ند بووم ل قوتابخانه‌كێ به‌لێ مه جهێن خوه هوسا پاقژكرن باوه‌ركه ژ به‌رێ و باشتر ژی.
وه‌هبی یونس، سه‌رۆكێ لقێ دهۆك یا سه‌ندیكا مامۆستایێن كوردستانێ بۆ به‌رپه‌رێ په‌وره‌رده و زانكۆ رۆژناما ئه‌ڤرۆ گۆت: ئه‌وێن دبنه كارمه‌ندێن كومسیوونێ نه‌بتنێ مامۆستانه به‌لكو گه‌له‌ك كارمه‌ند و ده‌رچووێن زانكۆ و په‌یمانگه‌هانه و گه‌له‌ك فه‌رمانبه‌رێن ل فه‌رمانگه‌هێن حوكمه‌تێ و هه‌كه رێڤه‌به‌رێ قواتابخانێ بخوه ل وی بنگه‌هی ئانكو ل قوتابخانا خوه كارمه‌ند با ره‌نگه ماندیبوون كێمتر با و دا ل سه‌ر كارمه‌ندان كه‌ته فه‌رمان كو دڤێت پولێن قوتابیان بهێنه پاقژكرن ژ كلێشی و گرنگه سالێن بهێت ئه‌ڤه ل به‌رچاڤ بهێته وه‌رگرتن.
وه‌هبی یونس ئه‌و ژی گۆت: هه‌ر بنگه‌هه‌كێ ده‌نگدانێ هه‌كه مامۆستا و رێڤه‌به‌رێن وێ قوتابخانی بخوه بانه دا ل دووماهیێ ته‌خێن روینشتنا قوتابیان ژی دروست كه‌ن و دا كارێن خوه ب دووماهی ئینن به‌ری چووبانه مالێن خوه و ره‌نگه ماندیبوون گه‌له‌ك كێمتربا.
جمبد شوكری ئه‌بابه‌كر، سه‌رۆكا لژنا په‌روه‌ردێ و ئه‌وقافێ ل جڤاتا پارێزگه‌هێ بۆ به‌رپه‌رێ په‌روه‌رده و زانكۆ رۆژناما ئه‌ڤرۆ گۆت: گازندێن رێڤه‌به‌رێن قوتابخانا گه‌هشتینه مه و گه‌له‌ك قوتابخانێن بووینه بنگه‌هێن ده‌نگدانێ هه‌ر هه‌می به‌رمایكێن هه‌لبژارتنان ماینه جه دا و چووینه و هه‌تا كارب نه ڤه‌مراندینه و ئه‌ڤرۆ ره‌نگه ده‌واما گه‌له‌ك قوتابخانه ره‌نگه شه‌له‌له‌ك تێدا هه‌بوو ، چونكه كارگێری و مامۆستا هه‌ر هه‌می مژوولی دروستكرنا ته‌خێن قوتابیان بوون ل پولێ دا.
سه‌رۆكا لژنا په‌روه‌ردێ وئه‌وقافێ ل جڤاتێ ئه‌و ژی گۆت: پاقژی گه‌له‌ك یا باشه و رێنمایێن ساخله‌میێ دڤیابا هاتبانه پاراستن و باشتر بوو ئه‌وان كارمه‌ندا هزر كربا كو ده‌واما قوتابخانا دێ هێته‌كرن و زارۆك دهێنه قوتابخانێ و گه‌له‌ك خه‌لكی سه‌ردانا بنگه‌هان كرینه و ره‌نگه كارتێكرن ل سه‌ر ساخله‌می یا قوتابیان هه‌بیت، له‌وما گرنگ بوو زێده‌تر رێكخه‌ری دناڤبه‌را په‌روه‌ردێ و كومسیوونێ هاتباكرن و ل سه‌ر هه‌می بنگه‌هێن ده‌نگدانێ هه‌تبا سه‌پاندن كو به‌ری بچن دڤێت جهێن خوه پاقژ بكه‌ن.
ل دور بابه‌تی، رۆژناما ئه‌ڤرۆ په‌یوه‌ندی ب به‌رپرسێن فه‌رمانگه‌ها كومسیوونێ ل دهۆكێ كر، لێ په‌یوه‌ندی یا به‌رده‌ست نه‌بوو.
