دژه‌پارتی كینه و چ ڤه‌دورین؟!..
به‌ره‌ڤ 184
د سالار عوسمان
نه تنێ ل ده‌مێ بانگه‌شه‌یا هه‌ڵبژارتنان دا، كو باش و جاش ئاخفتنێن باش دكه‌ن، به‌لكو ل ده‌مێن ئاسایی ژی دا پێدڤیه ئه‌ڤێ پرسیارێ بكه‌ین: (دژه پارتی كینه و مژوولی چنه و چ ڤه‌دۆرین)؟!.
جارێ به‌ری كو به‌رسڤا ڤێ پرسیارێ بده‌ینه‌ڤه، پێدڤیه هه‌ردوو چه‌مكی (جوداهی) و (دژ) ل هه‌ڤدو جودا بكه‌ین، كو ب باوه‌ریا من (جوداهی سیاسی) پێدڤیه‌كا سیاسیه و ئاكام هێزێ دده‌ته وه‌ڵات و پرۆسا سیاسی، لێ (دژه سیاسی)، وه‌ڵاتی په‌رته‌وازه و ژێكجودا دكه‌ت و پرۆسا سیاسی لاواز دكه‌ت، له‌وما ئه‌وا ئه‌م دڤێره دا ل دۆر دپه‌یڤین، یێن دژه سیاسینه، ئه‌و دژه سیاسیێن، كو ژبلی دژایه‌تیا پارتی و ئامانجێن سیاسی یێن پارتی، قه‌زیه و خه‌مه‌كا دی نه‌بووه و نینه!..
ـ پشكه‌ك ژ دژه پارتیان ئه‌ون، كو دژی نه‌ته‌وا كوردن و دیرۆك ژی دبێژیته مه كو وی ده‌می یێ (مسته‌فا بارزانی)یێ ڕابه‌ر، پارتی دیمۆكراتی كوردستان دامه‌زراند و به‌یداخا خه‌باتا سیاسی و شۆڕشگێڕیا گه‌لێ كوردێ مه‌زڵووم ل سه‌ر چیایان قایمكر، یێن دژه نه‌ته‌وه چوونه به‌ره‌یا دوژمنی و بوونه جاش، له‌وما زۆر ڕوون و ڕاشكاو، پشكه‌ك ژ دژه پارتیان جاشن، ڤێجا دبه‌ینا مه دا بیت، هه‌ر زه‌مه‌نه و جاشێ خوه هه‌یه، نها ژی كو بیست و حه‌فت ساڵ ب سه‌ر سه‌رهلدانا مه‌زنا ١٩٩١ تێپه‌ڕیه، خه‌لكه‌ك وه‌ك نۆكه‌ر و جاش ڕه‌فتارێ دكه‌ن و ه‌په‌یڤن و دنڤیسن و ته‌نانه‌ت جاشانه ژی بۆ وان هاتیه ڤه‌بڕین!.
ـ پشكه‌ك دی ژ دژه پارتیان ئه‌ون، كو گرێ یا ده‌روونی هه‌نه، بۆ نموونه: (گرێ یا زه‌عامه‌ت) و (گرێ یا ڕمووزیه‌تا سیاسی)، ڤێجا ئه‌ڤه ل جهێ هندێ ب ڕێك و میكانیزمێن دروست دا بچن و بگه‌هنه زه‌عامه‌تێ، كو ب باوه‌ریا من باشترین ڕێك و میكانیزم پرۆسا هه‌ڵبژارتنێ یه، كو دیاره ئه‌ڤه ژی جۆره‌ك ژ پڕی و ته‌ژیبوونێ دڤێت، چونكی خه‌ڵك ده‌نگی ناده‌ته سیاسی یێ به‌تاڵ و چ ڤێ نه، ئه‌ڤ ئه‌فه‌ندیێن هه‌نێ ژى، كو هنده‌ك ژ وان ڕیه ژی هه‌نه، به‌تاڵن، به‌تاڵن ل قه‌زیا سیاسیا هه‌ژی، ئه‌و قه‌زیا سیاسیا هه‌ژی یا شۆڕش پیخه‌مه‌ت وێ دا هه‌ل بوو و ڕووبارێ خوینێ بۆ هات رشتن، ئه‌وان نها دخوازن ب ڤێ به‌تاڵیێ ڤه دژی پڕی و ته‌ژی یێ بن، له‌وما زۆر ڕقنانه كه‌تینه دژایه‌تیا پارتی و ته‌نانه‌ت هنده‌ك جاران بۆ دژایه‌تیا پارتی، دژی خوه ژی رادوستن، پا نابینن كابرایێ هه‌ڤپه‌یمانی ئه‌رشیفه‌ك مه‌دح و سه‌نا هه‌یه ل دۆر حوكمه‌تا هه‌رێما كوردستانێ، لێ ها كه‌تیه دژایه‌تیا خوه ب خوه و بێویژدانانه ئاخفتنێت ناشیرین دبێژیته حوكمه‌تا هه‌رێما كوردستانێ !.. یان كابرایێ ڕیهدارێ ب ناڤ ئیماندار، دوهی خه‌لكێ كوردستانێ بۆ ڕیفراندۆما سه‌ربه‌خوه‌یی یێ هان ددا، لێ ئه‌ڤرۆ بۆ بده‌ستڤه‌ئینانا هنده‌ك ده‌نگان دژی سه‌ربه‌خۆیی یێ، واته دژی خوه رادوه‌ستیت!..چ غه‌ریبه، سیاسه‌ت و كورسیا ده‌سه‌ڵات و مه‌له‌ززاتی دونیا چ ل وی ئه‌فه‌ندیێ بۆینباخ ل مل و ڕیهدارێ بناڤ ئیماندار و هه‌ڤكیفێن وی كریه !..
ـ چی ڤه‌ددورن؟ به‌رسڤا ڤێ پرسیارێ ژی ئاسانه، ئه‌وێن پێشتر چ ڤه‌دوورین، ئه‌و ژی هه‌ر هندێ دێ دروین، كه‌واته هیچ ناڤه‌دروین، ژ به‌ر چی ؟!.. ژ به‌ر كو پارتی پڕه ته‌ژیه ل دیرۆكێ، پارتی نها ب هێزترین هێزا سیاسیه، بۆ پاشه‌رۆژ ژی هه‌ڵگرێ ئامانجا مه‌زنه، كو د ڤێ هه‌ڵبژارتنێ دا ل درووشمێ: (ده‌سكه‌فتێن زێده‌تر بۆ كوردستانێ) هاتیه به‌رجه‌سته‌كرن.
ـ پارتی دوهی بۆ ده‌سكه‌فتێن نه‌ته‌وه‌یی و ئه‌ڤرۆ ژی هه‌ر بۆ ده‌سكه‌فتێن نه‌ته‌وه‌یی و نیشتمانی د خه‌باتدایه، پا ئه‌وێن دی: (دژه پارتی) ل كیڤه‌نه؟!.. هنده‌ك ژ وان د ناڤ زبڵدانا جاشایه‌تی و هنده‌ك ژی نه‌خۆش، ب سه‌ر گرێین ده‌روونیێن خوه دا كه‌فتنه..!
