دڤێت مـرۆڤ خـوە قـەبیـل بكـەت

دڤێت مـرۆڤ خـوە قـەبیـل بكـەت

25

بێوار حەمدی:

نوكە دیتنا جڤاكی بو كەسێن پەككەفتی هاتیە گوهورین و پتر ب چاڤێ دلوڤانیێ و مەزنیێ سەح دكەنێ‌،دەرونناسەكێ ژی گوت: پەككەفتنا دروست ئەوە دەمێ مروڤ د مێشكێ خودا یێ پەككەفتی بیت نەك د لەشێ خۆدا.
دەرونناس و چالاكڤانا جڤاكێ مەدەنی، ئەڤیندار زوبێر د دیدارەكێ دا بو روژناما ئەڤرۆ گوت: (ئەم هەموو دزانین كو كەسێ كێم ئەندام ئەوە یێ كو ئاریشەكا پەككەفتنێ د لەشێ خۆدا هەبیت و ئەو كەسە ژی وەسا هزر دكەن كو د ژیانا خو یا روژانەدا نەشێن وەكو كەسێن ئاسایی بژین).
ئەڤیندارێ‌ دیار كر ژی كو د مێژویا مروڤایەتیێ دا بەری نوكە ل گەلەك جها ب چاڤەكێ‌ كێم سەح دكرە ڤان كەسا،بەلێ د نوكەدا سەحكرنا جڤاكی بو ڤان كەسا گەلەك هاتیە گوهورین و ب چاڤێ دلوڤانیێ و مەزنیێ سەح دكەنێ‌ و گۆت: (بەلێ گەلەك جاران دەمێ ئەم پتر دلوڤانیێ ب وان دبەین ئەو پتر هەست ب كێماسیێ دكەن و هزر دكەن كو كێماسیەك یا هەی، ئەڤجا پێدڤیە ئەم سەرەدەریەكا سروشتی ل گەلدا بكەین).
دەرونناسێ دیار كر ژی كو مەرج نینە كەسێن كێم ئەندام ل دەسپێكا ژیانا خو د هوسا بن رەنگە ل گەل بورینا دەمی ئاریشەك بو پەیدا ببیت و ببیتە كەسەكێ پەككەفتی و گوت: (پەككەفتنا دروست نە ئەوە كو مرۆڤ یێ‌ پەككەفتی بیت د لەشێ خودا بەلكو ئەوە مرۆڤ د مێشكێ خودا یێ پەككەفتی بیت، لەوما ژی ئەڤ كەسە هەكە ل سەر پەروەردەیەكا ساخلەم و مێشكەكێ ڤەكری ژیانا خو ببورینن دێ بنە كەسێن بهێز و خودان ئیرادە).
ئەڤیندارێ د بەردەوامیا ئاخفتنێن خودا دیار كر، كەسێن پەككەفتی تووشی گەلەك تێكچونێن دەروونی دبن وەكو خەموكیێ و ب تایبەت ل قوناغێن دەسپێكێ یێن ژیانا وی تووش دبیت و ئەگەرێ سەرەكی ژی ئەوە كو ژیانەكا ب زەحمەتتر دەرباز دكەن و گوت: (كەسێن پەككەفتی د ژێك جودانە،چونكی هندەك هەنە لڤینێن وان زور د كێمن لەوما ژی ئەڤە پتر تووشی نەخوشیێن لەشی و دەروونی دبن و بەروڤاژی هەكە پەككەفتنا وان كێمتر بیت كێمتر تووشی ڤێ نەخوشیێ دبن).
دەرونناسێ ئەو چەندە ژی دا زانین كو ئێكەمین پێنگاڤ بو وێ چەندێ كو مروڤ هەست ب كێماسیێ نەكەت ئەوە كو مروڤ خو قەبیل بكەت و یێ ب ژیانا خورازی بیت و خودان ئیرادە بیت و گۆت: (لەوماپێدڤیە ئەم بزانین كو شیانێن هەموو مروڤان وەكو ئێك نینن و دڤێت ڤان جورە كەسان لبەر چاڤ وەربگرین، بتایبەت ژلایێ دەروونیڤە بزانین كا دێ ب چ شێوە سەرەدەریێ ل گەل دا كەین).

کۆمێنتا تە