دێ كاركەین دەلیڤەیێن كاری بۆ گەنجێن مە زێدەتر هەبن
سالار محەمەد دۆسكی:
نەجیبا نەجیب، بەربژارا ژمارە 21 لیسیتا 275 یا پارتی دیموكراتی كوردستان بۆ ئەڤرۆ دیار كر، پرۆگرامێ من بۆ داهاتی ئەوە كار ل سەر شایستێن دارایی یێن هەرێما كوردستانێ بكەم، ل گۆرەی دەستورێ هەرێما كوردستانێ و مووچێ فەرمانبەر و پێشمەرگە و خانەنشین و زیندانیێن سیاسی و چاڤدێریا جڤاكی و ئەو كەسانێن زیان ڤێ كەفتین بهێنە دابینكرن و جوداهی دناڤبەرا مووچێ هەرێمێ و فەرمانبەرێن ئیراقێ دا نەمینیت.
نەجیبا نەجیب گۆت: دێ بزاڤا كەین سیستەمێ فیدرالی بهێـتە بهێزكرن ب دانانا جڤاتا فیدرالی یا ئێكگرتی و جێبەجێكرنا مادێ 140 و لژنە بهێتە ئەكتیفكرن و كار بۆ جێبەجێكرنا ڤی مادێ دەستوری بكەت و ئەڤ مادە روكنەكێ سەرەكی یە ل دەولەتا ئیراقێ یا فیدرال دا.
هیشتا گۆت: گەنج ستوونا سەرەكی یا هەر مللەتەكی نە و مللەتێ كورد ژی گرنگیەكا مەزن ددەتە گەنجان و دێ بزاڤێ كەین كارەكێ باش بۆ گەنجان بكەین، چونكە ئەمانەتێ مەنە و چەوا دەلیڤێن كاری ل ناڤەراست و باشورێ ئیراقێ هەنە ب پشتەڤانیا دارایی دێ كاركەین دەلیڤێن كاری بۆ گەنجێن مەژی زێدەتر هەبن و دێ زێرەڤان و پارێزەرێن مافێن خەلكێ كوردستانێ بین.
هەمان بەربژارا پارتی دیموكراتی كوردستان ئەو ژی گۆت: عەقلیەتا بەغدا یا مەركەزی یە بەلێ دێ هەمی بزاڤا كەین ئەو دەستورێ پتریا خەلكێ ئیراقێ دەنگ ل سەر دایی بهێتە بجهئینان و جێبەجێكرن.
گۆتژی: ئێكرێزیا گەلێ كورد پرسەكا سەرەكی یە و گەلەك یا گرنگە و تاكە ئامراز بشێین بكاربینین ل بەغدا بۆ جێبەجێكرنا دەستوری و پارستنا مافێن مللەتێ كورد ئێكرێزیا مللەتێ كوردە و ئێكرێزی یا پارت و ئالیێن كوردستانێ یە، چونكە ئەم دبێژین شەراكەت و تەوافق و تەوازن و ئەڤە یا سەرەكی یە.
ئەو ژی گۆت: ل دووڤ شیان و شارەزای و جۆرئەتا مە هەی ل خولێن پێشتر هەین دێ كاركەین رۆلێ خوە یێ چاڤدێری و یاسادانانێ كاراتر بكەین و دێ ب نوونەراتیەكا راستەقینی و دلسوزانە یا مللەتێ خوە كەین ل بەغدا بۆ چارەسەكرنا كێشا مووچان كو هەیڤانە بهێنە وەرگرتن و راستڤەكرنا مووچا و دەرمالێن خەلكێ مە كو وەك خەلكێ ئیراقێ لێ بهێن.
نەجیبا نەجیب گۆتژی: گەنج پاشەرۆژا مللەتێ مە نە و ئافرەت نیڤا جڤاكی نە و پێكڤە گرێداینە و ئەگەر مووچە بهێتەدان هەر هەموو تاكێن جڤاكی دێ مفاداربن و دێ ژین ب ئارامی، دێ گەلەك ب رژدی كار بۆ گەنان كەم و ئەڤە دێ ژ كارێن دەسپێكی بیت و دەلیڤێن كاری بۆ بهێنە پەیداكرن و مافێن گەنجان بهێنە پاراستن.
