دەستدرێژیا سێكسی کارتێکرن ل سەر ژنێن كار دكەن هەیە

دەستدرێژیا سێكسی کارتێکرن ل سەر ژنێن كار دكەن هەیە

7

هەولێر، قائید میرۆ:

ئەندامەكا ئێكەتیا ئافرەتێن كوردستانێ ئاماژە پێ‌ كر، دەستدرێژیا سێكسی كاریگەری هەبویە ل سەر وان ژنێن كار دكەن، بتایبەتی ئەوێن ل كەرتێ تایبەت و گۆت: ل گورەی دوماهی ئامارا توندۆتیژیێ‌ ل هەرێما كوردستانێ توندۆتیژیا ئەلكترۆنی زێدە بویە و د هەمبەردا لێدان و ئەشكەنجەدان بەر ب كێمبوونێ چوویە.

لیا سەیفەدین، ئەنداما سكرتاریەتا ئێكەتیا ئافرەتێن كوردستانێ بۆ رۆژناما ئەڤرۆ دیار كر، ل گورەی ئامارێن هاتینە بەلاڤكرن توندۆتیژیا ئەلكترۆنی ل هەمبەر ژنان زێدە بویە، بەلێ د هەمبەردا توندۆتیژیا قوتان و ئەشكەنجەدانێ كێمتر لێهاتیە، توندۆتیژیا سێكسی ژی بابەتەكێ جیهانیە، نەك بتنێ ل هەرێما كوردستانێ هەیە و گۆت: (كەس نەشێت رێگریێ ل توندۆتیژیا سێكسی بكەت و سنوردار بكەت، بتنێ هشیاریا تاكی مەرجە بۆ ئەنجام نەدانا توندۆتیژیا سێكسی و پێدڤیە ژن یا هشیار بیت داكو توندۆتیژیا سێكسی بەرامبەر نەهێتە كرن).
لیایێ‌ گۆتژی: (ئەم نا ڤەشێرین توندۆتیژیا سێكسی كاریگەری ل سەر وان ژنێن كار دكەن هەبوویە، بتایبەتی ژنێن ل كەرتێ تایبەت كار دكەن، بەلێ‌ هەبوونا رێڤەبەریێن بەرهنگاربوونا توندۆتیژیا خێزانی كارتێكرن هەبوویە ل سەر هشیاریا ژنان و دەمێ ژن تووشی دەستدرێژیێ دبن پەیوەندی ب ئەڤان رێڤەبەریان دكەن و هشیاریا ژنان بوویە ئەگەرەكێ بهێز بۆ رەتكرنا وان دەستدرێژیێن سەر وان دهێنە كرن).
ئەنداما ئێكەتیا ئافرەتێن كوردستانێ گۆتژی: (داخوازێ ژ هەموو ژنان دكەین دەمێ ئاریشەیەك یان توندۆتیژیەك ل هەمبەر دهێتە كرن بلا ب رێكێن قانوونی بزاڤێن نەهێلانا ئەڤێ توندۆتیژیێ بكەن و بۆ هەر توندۆتیژی و ئاریشەیەكا قانوونی سزا داناینە و كەسێن تۆمەتبار دێ ل گورەی قانوونێ سەرەدەری ل گەلدا هێتە كرن، پێدڤیە ژن یا هشیار بیت ل سەر وێ‌ دەستدرێژیا ل سەر وان دهێتە كرن و نوكە وەك سالێن دەستپێكێ نینە، هەم ژن هشیارترە هەم ژی قانوون یا هەی بۆ سزادانا گونەهباران.

کۆمێنتا تە