د سالڤه‌گه‌ڕا ئیدارا سه‌ربخوه یا زاخۆ دا پێنج پڕۆژه هاتنه ڤه‌كرن
زاخۆ، عه‌لی حاجی:
سه‌رپه‌رشتێ ئیداره‌یا سه‌ربخوه یا زاخۆ د كۆنگره‌یه‌كێ رۆژنامه‌ڤانی دا دیار كر، وان دوهی پێنج پڕۆژه ڤه‌كرن و دبێژیت: خزمه‌تكرنا زاخۆ ژی ئه‌م ب ئه‌ركێ خوه دزانین.
گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ گۆت: “بۆرینا ساله‌كێ ل سه‌ر ئیداره‌یا سه‌ربخوه یا زاخۆ 115 پڕۆژه كه‌فتینه د بیاڤێ بجهئینانێ دا و پڕانیا وان ژی ب دووماهی هاتینه و كه‌فتینه د خزمه‌تا وه‌لاتیان دا، دیسا د سالرۆژا ئیداره‌یا سه‌ربخوه یا زاخۆ دا رێڤه‌به‌ریا ئاكنجیبوونێ و قوتابخانه‌یه‌كا 18 رێزی و دو جادده‌یێن سه‌ره‌كی و دوڕیانه‌ك هاتنه ڤه‌كرن، به‌رێ بنیاتی ژی بۆ چه‌ندین جادده‌یان ل سنوورێ ناوچه‌داریا ده‌ركارێ هاته دانان ب گوژمێ 11 ملیار دیناران، بۆ قووناغا بهێت ژی مه چه‌ندین پڕۆژه‌یێن ستراتیژی هه‌نه و بۆ پتر خزمه‌تكرنا وه‌لاتیان دێ هێنه ئه‌نجامدان”.
گۆتژی: “هه‌موو گوند، كۆمه‌لگه‌هـ، ناوچه‌داری، ده‌ڤه‌رداری و سه‌نته‌رێ زاخۆ ژ وان پڕۆژه‌یان مفادار بووینه، كو د بیاڤێن جودا یێن ژیانێ دا بووینه”.
ل دۆر ئاڤاكرنا شوققه‌یێن كێم ده‌رامه‌تان ژی گوهدار شێخۆی گۆت: “پڕۆژه‌یێ شوققه‌یێن كێم ده‌رامه‌تان 90% كار تێدا ب دووماهی هاتیه و بڕیاره پاره‌یێ وی پڕۆژه‌یی بهێته مه‌زاختن و ده‌ست ب ته‌مامكرنا وی بهێته كرن، دیسا بڕیاره 575 شوققه‌یێن دی یێن كێم ده‌رامه‌تان ل ئیداره‌یا سه‌ربخوه یا زاخۆ بهێنه ئاڤاكرن”.
