د. فەرمان یوسف: وەرزشڤانێن سێمێلێ‌ خزمەتەكا مەزن بۆ وەرزشا پارێزگەهێ‌ كرییە و...

د. فەرمان یوسف: وەرزشڤانێن سێمێلێ‌ خزمەتەكا مەزن بۆ وەرزشا پارێزگەهێ‌ كرییە و د بێ‌ خودانن

56

یاریزانێ‌ دێرین و مامۆستایێ‌ وەرزشی د. فەرمان یوسف پسیار ژ بەرپرسێن دهۆكێ‌ و سێمێلێ‌ و وەرزشڤانێن دێرین دكەت كو هزر د هندێ‌ دا بكەن پشتەڤانی بۆ یانەیا سێمێلێ‌ بهێتە كرن ئەو یانەیا د دیرۆكا خوە دا كاروانەكێ‌ سەركەفتی و وەرزشڤانێن وێ‌ خزمەتەكا مەزن بۆ وەرزشا پارێزگەها دهۆكێ‌ كرییە.
زێدەتر ناڤهاتی بۆ رۆژنامەیا ئەڤرۆ گۆت: جهێ‌ سەرنجراكێشێ‌ یە باژێرێ‌ وەكو سێمێلێ‌ ب دیرۆكا خوە یا درێژ یا وەرزشی یاریزانێن وێ‌ خزمەتا پارێزگەهێ‌ كرییە و دگەل هەلبژارتیێ‌ دهۆكێ‌ و هەتا گەهشتینە هەلبژارتیێ‌ ئیراقێ‌ ژی و د نوكە دا بێ‌ خودانن و پێدڤی ب پشتەڤانیێ‌ نە، ئەرێ‌ ما هزرێن خوە ناكەن كو هاریكارییا یانەیا سێمێلێ‌ بكەن هەتا ئاستێ‌ وێ‌ ژی وەكو یێ‌ دهۆك و زاخۆ ژی بیت ما چ كێمترە ژ ئەوان یانەیان، بلا بەس بیت ئاخفتنا سێمێل كانییا وەرزشڤانایە و چو پشتەڤانی بوو نینە، هەر سال دبێژن دێ‌ پشتەڤانیێ‌ كەین و دووڤدا پشتگوهـ هاڤێتی یە، ئەم پێكڤە كاربكەین بۆ خزمەتا وەرزشا باژێرەكێ‌ خزمەتا وەرزشا پارێزگەهێ‌ كری.
هەروەسان د. فەرمان یوسف گۆت: داخواز ژ بەرێز مەسرۆر باریزانی سەرۆكێ‌ حوكمەتا هەرێما كوردستانێ‌ و د. عەلی تەتەر پارێزگارێ‌ دهۆكێ‌ و دەولەمەندێن باژێرێ‌ سێمێلێ‌ خەمەكا رژدی ل یانەیا سێمێلێ‌ بكەن، ژبەركو وەرزشڤانێن باژێرێ‌ مە پێدڤی ب پشتەڤانیێ‌ نە و ژ هەژی نە ژبەركو خودان شیانن و دێ‌ ئاستێ‌ وان ل سەر ئاستێ‌ كوردستانێ‌ و ئیراقێ‌ ژی دیار بیت، بۆ دیرۆكێ‌ یانەیا سێمێلێ‌ ئەوا ل وەرزێ‌ 1995ێ‌ ژ كۆما باكۆر ب شیان و نەخۆشترین كاودان دەربازبوو پلا دو یا ئیراقێ‌ و د نوكە دا ئەم دبینن ئاستێ‌ وێ‌ بەروڤاژی بوویە د خولێن ئیراقێ‌ و كوردستانێ‌ دان، ئەرێ‌ ئەو سۆزێن هاتینە دان دێ‌ كەنگی بجهـ ئێن، خەلكێ‌ سێمێلێ‌ پێدڤی ب هەوەیە ژبەركو یانەیەكا جەماوەری یە و حەز دكەت ل سەر ئاستێ‌ ئیراقێ‌ ژی بهێتە دیتن، هەرچەندە مە پەیوەندی ب لایەنێ‌ خزمەتگوزاری و كارگێری ڤە نینە لێ‌ بۆ مە یا گرنگ پشتەڤانییا وەرزشا سێمێلێ‌ یە.

کۆمێنتا تە