راهێنەرێن شێلادزێ و تەناهی هاتنە سزادان

راهێنەرێن شێلادزێ و تەناهی هاتنە سزادان

30

قەیس وەیس:

ئێكەتیا تەپا پێی یا كوردستانێ‌ چەند بڕیار و رێنما د كۆمبوونا خوە یا بۆری دا پەسەندكرن ژ وانا گرێدایی یاریا هەردو یانەیێن پارێزگەها دهۆكێ‌ تەناهی و شێلادزێ‌ ئەوا د چارچووڤەیێ‌ هەڤڕكیێن خولا پلا دو یا كوردستانێ‌ ل یاریگەها زانكۆ هاتیە كرن و تێدا چەند توندوتیژی دناڤبەرا جەماوەر و ژلایەكێ‌ دووڤە دناڤبەرا دەستەكا راهێنەرێن هەردو یانەیان پەیدابوو.
ل دووڤ راپۆرتا سەرپەرشتێ‌ یاریێ‌ ئێكەتیا تەپا پێی بڕیاردا راگرتنا راهێنەرێ‌ تیما شێلادزێ‌ محەمەد سەلیم بۆ ئێك یاری و سزادان ب كۆژمەیێ‌ 250 هزار دیناران پشتی كارتا سۆر وەرگرتی، دیسان راهێنەرێ‌ گۆلپارێزان كارزان شەوكەت بۆ ئێك یاری و ب هەمان كۆژمە یێ‌ دارایی دەرئەنجامێ‌ كارتا سۆر، ژلایەكێ‌ دووڤە ئێكەتیا تەپا پێی راهێنەرێ‌ یانەیا تەناهی سەبری سلێمان بۆ دو یاریان دوورئێخست و كۆژمەیێ‌ 250 هزاران سزا دا ژبەر دەرچوون ژ گیانێ‌ وەرزشی، ب هەمان ئەگەر ژی سەرپەرشتێ‌ تیما تەناهی زەكی مەهدی ئەوێ‌ ب كارتا سۆر هاتیە دوورئێخستن بۆ ئێك یاری و هەمان كۆژمەیێ‌ دیاركری هاتە سزادان.
بۆ زانین د هژمارا بۆری دا لاپەرێ‌ وەرزشی یێ‌ رۆژنامێ‌ بابەتێ‌ دوورئێخستنا یانەیا دینارتە ژ خولا پلا دو یا كوردستانێ‌ دا هاتبوو بەلاڤكرن كو ئێكەتیا تەپا پێی بڕیار دابوو ب دوورئێخستنا تیما یانەیا دینارتە ژ هەڤڕكیێن ئەڤ سالە یێ‌ خولا پلا دو ژبەر ئەو روودانا توندوتیژیێ‌ دژی دادڤانێ‌ یاریا وان دگەل شێخان كو دوورئێخستنا هەتا هەتایی بۆ چار یاریزانێن دینارتە، دیسان دو ئەندامێن كارگێریا هەمان یانە دگەل سزادانا دارایی ب سێ‌ ملیۆن دیناران و دەستخوەشیا ئەوان كەسێن چەند ئەندامێن دی یێن یانەیا دینارتە و شێخان كر ئەوێن هەڤكاری بۆ پاراستنا دادڤانان كرین.

کۆمێنتا تە