راهێنەرێ دهۆكێ: بۆ هەر یارییەكێ دێ پلانەكا تایبەت و جورەكێ یاریزانان هەبیت
راهێنەرێ تیما فوتبۆلا یانەیا دهۆك كەیفخوەشیا خوە دیاركر پشتی تیما وی شیایی سەركەفتنەكا گرنگ ل سەر مێڤانا خوە یانەیا ئەلقاسم ژ چارچووڤەیێ هەڤڕكیێن گەڕا 13ێ یا خولا ستێرێن ئیراقێ ئەوا ب گۆلەكا كۆژەك یا ستێرێ خوە جەبار كەریم د خولەكا 90+4 دا تۆماركری و بەر ب سەركەفتنێ بری و دیاركر بۆ هەر یاریەكێ پلانا خوە یا تایبەت هەیە.
زێدەتر ئەحمەد خەلەف د پرێسكۆنفرانسەكا رۆژنامەڤانی دا گۆت: پشتی راوەستیانا خولێ بۆ زێدەتری هەیڤەكێ مە كارەكێ باش دكر تایبەت چارەسەركرنا ئەوان كێماسیێن دناڤ تیمێ دا هەین، هەروەسان ب دانانا كەمپێ راهێنانێ ئەم شیایین گەلەك پێنگاڤێن باش پاڤێژیت ژ روویێ تەكتیكی و هونەری و دەرۆنی یێ یاریزانان ڤە، یارییا دگەل ئەلقاسم ژ خولا ستێرێن ئیراقێ ژەمەكا باش یا پێشڤەچوونێ و باوەری ب خوەبوونێ دا تیمێ، یارییەكا ب سانەهی نەبوو ژبەركو تیما مێڤان یا گەنج و خودان هیڤی و ئارمانج بوون.
هەروەسان ناڤهاتی گۆت: پیرۆزباهییا كارگێریێ و جەماوەری دكەم ئەڤ سەركەفتنە پالدەرە بەردەوامیێ بدەینە كۆمڤەكرنا خالان، هەرچەندە چو یاریێن ب سانەهی نینن، لێ بۆ هەر یارییەكێ ژی دێ پلانێن تایبەت و جورەكێ یاریزانان دناڤ یاریگەهێ دا هەبیت، ژبەركو مە زێدەتر ژ پێكهاتیەكی هەیە و یاریزانێن خودان شیان و ئێك ئاست ئەڤچەندە ژی وە دكەت كو بشێن بشێوەكێ باشتر بۆ هەر یارییەكێ خوە بەرهەڤبكەین، یارییا گەل ئەلقاسم ژی ئێك ژ ئەگەرێن سەركەفتنێ ئەو گوهۆڕینێن هاتینە كرن كو ئەنجام بۆ بەرژوەندیا مە دا ئینا.
بۆ زانین تیما یانەیا دهۆك شیایە د 13 یاریێن بۆری دا شەش سەركەفتن، چار وەكهەڤی و چار خوسارەتییان بینت، نەهـ گۆل هەنە و هەشت گۆل ل سەر هاتینە تۆماركرن ب كۆمكرنا 21 خالان رێزا چارێ دهێت.
